Sufixos verbals en francés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os sufixos verbals en francés se fan servir pa creyar nuevos verbos a partir de substantivos, adchectivos calificativos u d'atros verbos. A mes gran part d'estos sufixos dan un caracter frecuentativo, peyorativo u diminutivo a los verbos formaus.

Beluns d'os sufixos verbals d'o francés tienen equivalents en aragonés, manimenos bel filologo que los ha estudiaus en as parlas altoaragonesas considera a mes gran part como infixos verbals seguius d'a desinencia d'infinitivo simple.

Sufixo	Cognato aragonés	Parola que creya	Sentiu	Eixemplo
-ailler	-allar	Verbo > Verbo	Peyorativo.	Boirailler, tournailler
-asser	-azar	Verbo > Verbo	Peyorativo	Bavasser, rêvasser
-eler	-illar	Substantivo, verbo > Verbo		Craqueler, marteler
-er	-ar	Substantivo > Verbo	Verbos denominativos	Charger, vacciner
-eter	-etar	> Verbo	Diminutivo	Tacheter, voleter
-ifier	-ificar	> Verbo	Acción	planifier, solidifier
-iller	-ellar, -illar	Substantivo, verbo > Verbo	Diminutivo y peyorativo	Fendiller, mordiller
-iner	-inar	> Verbo	Diminutivo	Pietiner, trottiner
-ir	-ir	Adchectivo > Verbo	Verbos denominativos	Blanchir, verdir
-iser	-izar	Adchetivo > Verbo	Incoativo	angliciser, solidariser
-nicher		> Verbo	Peyorativo y diminutivo	Pleurnicher
-ocher		> Verbo	Peyorativo y diminutivo	Effilocher, flanocher
-onner	-onar	> Verbo	Peyorativo y diminutivo	Chantonner, tâtonner
-oter	-otar	> Verbo	Peyorativo	Picoter, toussoter
-oyer	-iar	> Verbo	Frecuentativo	Poudroyer
-ouiller	-ollar	Substantivo u Verbo > Verbo	Frecuentativo, diminutivo y peyorativo	Mâchouiller, patouiller

Sufixo -ailler

Se remonta a una terminación latina -ACULARE u a parolas francesas acabadas en -ail u -aille (terminación que en aragonés equivale a -allo y -alla). En aragonés trobamos o infixo verbal -all- seguiu d'infinitivo en estricallar y escopallar. En aragonés a parola estricallar ye un posible galicismo u occitanismo relacionau con o francés antigo trique ("tocho", "garrot"), u con verbos como étriquer y estriquer.

En belsetán bi ha una serie de verbos remataus en -allar que en bel caso representan una clase irregular adintro d'a primera conchugación. Son regulars esmasticullar, macullar, masticullar y abadallar y pueden estar irregulars abatallar, escergallar, escupitallar, esguinchallar, esmicallar y estusigallar.

Sufixo -asser

Se remonta a lo sufixo francés -asse, devez derivau d'unas terminacions latinas ACEAM u ACIS, que en aragonés han dau -az(o), -aza. Esta terminación en aragonés tamién se relaciona con o infixo -az-, que seguido d'a terminación d'infinitivo da a terminacion -azar: esmicazar, escagazar, que muitas vegadas s'ha combinau con o sufixo verbal -iar: cantalaciar, escantalaciar, acantalaciar, ecetra...

Sufixo -eler

Se remonta a una terminación latina -ILLARE u a parolas que en francés antigo acababan en -el (terminación que en aragonés equivale a -iello). Este sufixo corresponde en benasqués a -ellar (escantellar), y en aragonés cheneral a -illar (esportillar).

Os verbos con o sufixo -eler no se conchugan como appeler y siguen o modelo de geler, congeler y peler, que no doblan a -l- debant d'una silaba que contienga una e muda, y cambian a -e- muda d'a penultima silaba d'o infinitivo por una -è- ubierta.

• Je harcèle, elle harcèle, ils harcèlent.

Eixemplos: amonceler, bosseler, denteler , écarteler, griveler, grommeler, harceler, panteler, pommeler, écorcheler, empenneler, épanneler, tourteler, crêpeler, martèlement, acarnaler, achanteler, acheler, agrapeler, aisseler, hobeler, hoqueler, mueler, peintelé , joieler y entrousseler. ‎

Sufixo -eter

En aragonés se considera a secuencia homologa -etar como resultau d'a suma d'o infixo -et- y a terminación d'infinitivo simple. Uns cuantos verbos cambioron d'infixo y se convertioron en verbos acabaus en -oter: chuchoter y clignoter.

Lo sufixo verbal -eter se puede anyadir a un substantivo u a un verbo.

• Louve > louveter.
• Caler > caleter
• Claquer > claqueter.
• Craquer > craqueter.
• Voler > voleter.

O sentiu d'a secuencia -eter puede estar diminutivo, frecuentativo u un atro.

Tienen sentiu diminutivo: tacheter, biqueter, chèvreter, ecetra.

Tiene sentiu frecuentativo: hoqueter.

Sufixo -fier

Lo sufixo -fier deriva de lo verbo latino FACERE en las suyas composicions u derivacions prefixadas. Por alternacia vocalica FACERE se convertioron en -FICERE u -FICARE. Las primeras formas orichinoron en francés verbos como confire y suffire. La segunda se fizo mes frecuent y plegó a lo francés como -fier u -ifier y a l'aragonés como -ficar en cultismos.

Ye un sufixo que s'emplega pa expresar cambios u transformacions, y que s'anyade a adchectivos u substantivos. Buena part de los verbos en -(i)fier son formacions latinas heredadas por lo francés y que pueden tener cognatos en atras luengas neolatinas. Son formacions francesas cocufier, minifier, nazifier, dénazifier, wikifier.

S'han formau a partir d'adchectivos:

• Acidifier.
• Clarifier.
• Homogénéifier.
• Humidifier.
• Rigidifier.
• Simplifier.
• Solidifier.

S'han formau a partir de substantivos:

• Cocufier.
• Codifier.
• Cokéfier.
• Dragéifier.
• Gazéifier.
• Momifier.
• Ossifier
• Personnifier.

Sufixo -iller

Se remonta a una terminación latina -ĬCULARE u a parolas francesas acabadas en -ille, (terminación que en aragonés equivale a -ella u -illa).

Eixemplos:

• A partir de substantivos: gambiller, pétiller, pointiller y grappiller.
• A partir de verbos: fendiller, mordiller, pendiller y sautiller.

Sufixo -iner

Se remonta a la terminación latina -INARE, que en aragonés s'ha convertiu en -inar. Este sufixo se relaciona con lo infixo -in- de l'aragonés visible en palabras como molliniar, toquiniar, plevisniar, escruixinar y espatachinar.

Eixemplos:

• A partir d'un substantivo: tambouriner, relacionau con tambourin y a palabra benasquesa tamborinada.
• A partir d'un verbo: pleuviner ("plevisniar"), trottiner.

Sufixo -ir

Amás d'estar un morfema indicador d'infinitivo en la segunda conchugación francesa (equivalent a la conchugación incoativa de verbos acabaus en -ir en aragonés), ye un sufixo verbal que permite creyar nuevos verbos, lo que contribuyó a la productividat d'esta conchugación en francés dica fa poco.

Ye un sufixo verbal que puede creyar verbos a partir d'adchectivos expresando asinas un cambio u transformación, en especial a partir d'adchectivos de color, coincidindo con part de l'aragonés centro-oriental:

• Blanc > blanchir (comparable a emblanquir).
• Bleu > bleuir.
• Éclair > éclaircir (comparable a aclarir y esclarir)
• Jaune > jaunir.
• Grand > agrandir, grandir (comparable a agrandir en belsetán)
• Noir > noircir (comparable a en·negrir y renegrir).
• Rouge > rougir.
• Vert > verdir.

Sufixo -iser

Ye un sufixo culto d'orichen griego resultau de l'adaptación latina de -ίζειν, -ízein como -IZARE, que fació productivo. La evolución d'esta terminación orichinó en francés por vía patrimonial lo sufixo -oyer y por vía culta -iser. En francés meyo de lo sieglo XVI encomenzó l'adaptación de nuevas formacions con lo sufixo -iser (latiniser, gréciser), lo que fizo que estase productivo, sobre tot con adchectivos, encara que tamién puede creyar verbos a partir de substantivos (miniaturiser).

Ye un sufixo de caracter incoativo que expresa un cambio d'estau dende la noción de la radiz.

• Stable > stabiliser.

Sufixo -nicher

O sufixo -nicher ye visible en parolas como pleurnicher ("plorimiquiar", "ploriquiar").

Sufixo -ocher

O sufixo -ocher deriva d'o sufixo -oche, devez derivau d'o latín tardano -OCCA u d'o italiano -occia.

Eixemplos: balocher, bavardocher, bavocher, boulocher, branlocher, éffilocher, flânocher, garrocher, maillocher, pétocher, pimprelocher, rabibocher, râlocher, riocher, ecetra...

• A partir de substantivos: bouloche.
• A partir de verbos: bavocher, filocher y flânocher.

A parola éffilocher se relaciona etimolochicament con l'occitán filochar y con a parola navarro-aragonesa esfiluchar/esfilorchar-se,/esfilochar-se, que podría estar un occitanismo u un galicismo.

Sufixo -oyer

Se remonta a lo sufixo latín -IDIARE, que en aragonés medieval y belsetán dió -eyar, resultando a la fin -iar. A variant medieval guerreyar ye clarament un equivalent d'o francés guerroyer.

Sufixo -oter u -otter

Se remonta a parolas con o sufixo -ot seguidas d'a terminación d'infinitivo simple. En aragonés se considera a secuencia homologa -otar como resultau d'a suma d'o infixo -ot- y a terminación d'infinitivo simple (amanyotar, ecorcotar, escorcotar, escabortar, espingotiar, brincotiar).

Eixemplos:

• A partir de verbos: buvoter, clignoter, grignoter ("picar"), pleuvoter, siffloter, tapoter, trembloter, vivoter.
• A partir d'onomatopeyas: chuchoter, papoter.

Sufixo -ouiller

Se remonta a una terminación latina -ŬCULARE u a palabras francesas acabadas en -ouil, -ouille (terminación que en aragonés equivale a -ollo, -olla, u por metafonía a -ullo, -ulla). En aragonés trobamos o infixo -oll- seguiu d'infinitivo en arrepinchollar-se.

Os verbos bafouiller, bredouiller, vadrouiller derivan de substantivos. Os verbos baisouiller, bavouiller, bisouiller, branchouiller, dragouiller, glandouiller, léchouiller, mâchouiller, merdouiller, pendouiller, pétouiller, tatouiller y trempouiller derivan d'atros verbos.

O verbo mâchouiller se relaciona etimolochicament con o verbo castellano mascullar y probablement con o verbo benasqués mastullar, que aparentment presenta o influxo de masto. O verbo patouiller tiene a variant patrouiller amprau como patrullar en castellano.

As terminacions d'os verbos brouiller y embrouiller no representan este sufixo, por derivar d'una radiz relacionada tamién con l'orichen d'o verbo brollar en catalán y occitán. Tampoco en ye o caso de touiller, que deriva de TUDICULARE ("mesclar"), y se relaciona l'orichen d'a palabra ratatulla en benasqués y ratatolha en occitán.

Ye de destacar que muitos verbos acabaus en -ouiler expresan una succesión rapeda de movimientos u sonius: gazouiller, chatouiller, cafouiller, farfouiller, bafouiller, bredouiller, ecetra. A palabra aragonesa farfalloso se relaciona etimolochicamente con o verbo farfouiller. A palabra gargouiller s'interpreta que s'orichinó por cambio de sufixo a partir de gargonner y presenta pareixiu con l'aragonés gorgollar, y lo suyo substantivo gorgollo.

Bibliografía

• (es) Gramática francesa. Larousse Editorial, S.A, 2000.
• (es) José Antonio Saura Rami: Elementos de fonética y morfosintaxis benasquesas, Zaragoza, Gara d'Edizions-Institución Fernando el Católico (2003).
• (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978.
• (es) Chabier Lozano Sierra: Aspectos lingüisticos de Tella. Aragonés de Sobrarbe (Huesca), 2010. Gara d'Edizions.
• (es) Chabier Lozano Sierra, Ánchel Loís Saludas: Aspectos morfosintácticos del belsetán, 2005, Gara d'Edizions.
• (es) Xavier Tomás Arias: El aragonés del Biello Sobrarbe. Instituto de Estudios Altoaragoneses, 1999
• (es) María Luisa Arnal Purroy: El habla de la Baja Ribagorza Occidental. Institución Fernando el Católico, 1998.
• (es) BARCOS, Miguel Ánchel: El Aragonés Ansotano: estudio lingüístico de Ansó y Fago. Gara d'Edizions. Zaragoza, 2007.ISBN 978-84-8094-058-0</ref>
• (es) KUHN, Alwin, El Dialecto Altoaragonés (traducción de l'orichinal de 1935); Xordica Editorial. Zaragoza, 2008, p 240.ISBN 978-84-96457-41-6
• (fr) Danielle Morvan: Petit dictionnaire des suffixes du français. Annexo publicau en Le Micro Robert: Dictionnaire d'apprentissage de la langue française. Editor: Le Robert, 1988