Neerlandismos en francés

De Biquipedia
Ir ta: navego, busca
Uns matelots de lo sieglo XIX. La palabra francesa matelot proviene de lo vocabulario neerlandés de l navegación a vela.

Los neerlandismos en francés son palabras que esta luenga ampró de lo neerlandés en diferents periodos de la historia, destacando lo lexico relacionau con la navegación y la incheniería hidraulica.

Las palabras d'orichen neerlandés son mes comuns en las zonas francofonas en contacto con esta luenga como Belchica, tanto en valón como en francés standard.

Historicament las palabras d'orichen neerlandés se troban dende lo sieglo XII dica l'actualidat, y fan part de los estratos quatrén, cinquén y seisén en los que se dividen los chermanismos de lo francés. L'apocheu en la entrada de neerlandismos estió lo sieglo XVII, quan los neerlandeses teneban un monopolio en quasi tot lo comercio maritimo francés.

Lo neerlandés fa part d'un continuum dialectal que va dende los Alpes dica la Mar de lo Norte, estando pocas y progresivas las diferiencias entre esta luenga y las luengas chermanicas occidentals continentals con las que ye en contacto cheografico (lo baixo alemán y las "luengas altochermanicas centrals occidentals"). Distinguir los primers neerlandismos d'atros chermanismos orichinaus a partir de lo baixo alemán, de las luengas altochermanicas centrals occidentals u de l'alamanico ye dificil y s'ha de recurrir a documentar como se produció la expansión d'estas palabras, ya no bi heba grans diferiencias por perteneixer a un mesmo conchunto en grau d'igualdat. Dende la Edat Meya tardana, y a traviés de los sieglos XVI y XVII los Países Baixos y Flandres quedoron progresivament mes desvinclaus politicament, economicament y culturalment de las atras tierras chermanicas occidentals, y la formación de los Países Baixos como potencia significó que apareixese una luenga nacional, devez que en las tierras chermanicas fuera de los Países Baixos y de Flandres se cheneralizaba l'acceptación un alemán estándar basau en lo luengache de la Biblia de Lutero. Las palabras chermanicas que han iu entrando en francés dende lo neerlandés en estos sieglos (neerlandismos) presentan circunstancias y campos lexicos proporcionalment diferents de las que han iu entrando dende las atras luengas y dialectos de lo diasistema entre l'alto y lo baixo alemán (tudesquismos).

Neerlandismos primerencos[editar | editar código]

En lo quatén estrato de chermanismos los neerlandismos yeran difícils de distinguir de los chermanismos d'orichen francico. Un de los pocos eixemplos probables en lo sieglo XII ye esturman ("una clase de marinero"), relacionau con l'holandés antigo stuurman.[1]

En este periodo bi ha contactos entre franceses y holandeses en relación a la pesca en Mar de lo Norte y de la Canal de la Manga, pero tamién entre franceses y flamencos en relación a lo comercio y las ferias locals en la zona entre lo norte de Francia y los Países Baixos. Lo peache Bapaume entre Lille y Amiens ilustra lo comercio que bi heba en ixas zonas entre 1097 y 1634.

En lo sieglo XI Flandres y Brabant yeran superpoblaus y bi heba una emigración ta Francia y beluns esdeveniban mercenarios. En lo exercito francés bi heba rechimientos neerlandeses.

Bi ha neerlandismos como écran y étape que amuestran la lei fonetica francesa que en la baixa Edat Meya fizo desapareixer la -s- debant d'una consonant en francés:

Neerlandismos dende lo sieglo XIV dica l'actualidat[editar | editar código]

Los palabras d'orichen neerlandés yeran los chermanismos mes abundants de lo cinquén estrato (Edat Meya tardana). En este periodo s'introducioron digue (de lo neerlandés meyo dijc), bouquin (de lo neerlandés meyo boeckijn), mannequin (de lo neerlandés meyo manneken).

En ixas envueltas de lo Ligallo de la Hansa, que controlaba lo trafico maritimo entre la mar Baltica y Francia, la navegación esdeviene mes important. En Flandres se desarrollan puertos como Brugge y Anvers, y en Francia bi heba colonias neerlandesas en puertos como Ruán, Dieppe y Bordeus.

Los neerlandeses estioron presents como incheniers y man d'obra en tiempos d'Henrique IV en obras hidraulicas pa desecar u desauguar los almarchals de Picardía, Poitou, Saintogne, Guyana, Auvernia y Provenza. Lo cardenal Richelieu reclutó tecnicos y obrers neerlandeses en la marina francesa. En lo sieglo XVII los neerlandeses obtenioron de lo comercio de vins, y de feito a mitat de lo sieglo XVII a mes gran part de lo comercio internacional francés se feba a traviés de los barcos de los neerlandeses. Lo sieglo en lo que lo francés ampró mes neerlandismos estió lo sieglo XVII.

Lo ministro Colbert prebó de fer minguar la posición de los neerlandeses y ninvio incheniers franceses a los Países Baixos pa que prenesen conoixencias d'incheniería hidraulica. La revocacion de lo Edicto de Nantes en 1685 fació que muitos neerlandeses protestants deixasen Francia, pero lo suyo puesto lo podioron ocupar neerlandeses catolicos. Dimpués de la paz d'Utrecht (1712) la influencia politica de los neerlandeses minguó y las colonias neerlandesas que bi heba en Francia encomenzoron a asimilar-sen a los franceses, deixando se parlar holandés.

La intensidat de los contactos entre neerlandeses y franceses fació que entre las palabras ampradas bi'n hese muitas de lo vocabulario de base (bouquin, drôle), pero la mes gran part de lo lexico neerlandés perteneixe a lo sector de la navegación (amarrer, cambuse). Ligaus a la navegación trobamos nombres de peixes marins, mercaderías, medios de transporte, fauna y flora exotica. Tamién son representaus lo sector de l'artesanía y industria (cliver, pompe), la incheniería hidraulica (polder, digue), lo sector militar (boulevard), la fiesta y la diversión (cabaret, bastringue), y las bebidas (bière, brandevin).

Vocabulario de base[editar | editar código]

Verbos[editar | editar código]

  • Begayer.
  • Grouiller: deriva de lo neerlandés meyo grollen.
  • Gruger : deriva de lo neerlandés gruizen « esclafar ».

Navegación[editar | editar código]

Una flûte en un gravau de 1647, ye un « barco redondo » con fuerte capacidat de transporte que permitió a Holanda adquirir la primera marina mercant d'Europa en lo sieglo XVII.
  • Affaler: de afhalen ("tirar") u afvallen ("cayer"). Ye abaixar un cordache pa aduyar a que corra en una garrucha y que baixe millor. Por extensión abaixar una vela. Documentau dende 1610.
  • Amarrer: de aanmeren, "ligar", dimpués pasó a lo castellán y catalán como amarrar, tamién se puede considerar de lo vocabulario de base.
  • Bâbord: < bakboord « borde de dezaga », de bak « espalda , dezaga».
  • Bastaque: un tipo de cable.
  • Cambuse:[2] reposte de la embarcación.
  • Foc < fok.[3] Una vela triangular.
  • Flûte < fluijt: navilio de carga holandesa.
  • Livarde: palo posau a'l bies pa ixamplar una vela. Ye sinonimo de balestron.
  • Matelot[2] < mattenoot « companyero » (huei matroos): marinero.
  • Tribord, stribord: < stierboord, variant de stuurboord.
  • Vrac : < wrak « bazar, restas, naufrachio ».

Flora y fauna[editar | editar código]

Flora y fauna exotica[editar | editar código]

Fruitos de Citrus maxima, conoixius en francés como Pamplemousse y pomélo.
Fruitos de Citrus ×paradisi, tamién conoixius en francés como Pamplemousse y pomélo.

Sobre tot son zoonimos y fitonimos d'orichen exotico.

Peixes marins[editar | editar código]

Abadecho en un aquario de Mareis. La especie Gadus morhua ye conoixida en francés como morue u tamién con lo neerlandismo cabillaud.
  • Aiglefin / aigrefin / eglefin: peix Melanogrammus aeglefinus.
  • Cabillaud: abadecho, Gadus morhua. Derivau de lo neerlandés kabeljauw. No ye claro si la palabra orichinal ye vasca u neerlandesa.[4] Las formas en neerlandés tienen una documentación mes antiga que no la vasca (forma lalinizada cabellauwus de lo S. XII), y bi ha una variant con metatesi bakeljauwkabeljauw que precedería a las formas vasca bakailao y castellana bacalao.
  • Éperlan: peix de lo chenero Osmerus.
  • Flétan: peix de la subfamilia Hippoglossinae y de los cheneros Hippoglossus y Reinhardtius.
  • Elbot: peix de la subfamilia Hippoglossinae, sinonimo de Flétan.
  • Lingue: lo peix Genypterus blacodes.
  • Lingue franche: lo peix Molva molva.

Tamién bi ha denominacions sobre productos comercials de peixes marins sozmesos a metodos tradicionals de conservación:

  • Saur: aplicau a l'arengue quan ye zafumau y secau. Deriva de lo neerlandés soor, que significa secau.
  • Stockfisch: filetz de peix secau en un palo a l'aire libre. Se refiere en especial d'abadecho. Deriva de lo neerlandés stokvis pero con ortografía influida por l'alemán. Vis ye peix y stok se traduce por "bastón".

Cucos[editar | editar código]

Los cucos mite y cancrelat no son fauna exotica pa los franceses pero talment tiengan nombre neerlandés por trobar-sen en los barcos.

Mercaderías y medios de transporte[editar | editar código]

  • Drogue: deriva de lo neerlandés drōge « mercadería seca », en neerlandés actual drogerij « hierba secada ».
  • Échope: deriva de lo neerlandés meyo schoppe. Ye una botiga chica. En lo sieglo XIII yera escope y se documentaba primero en lo norte de Francia, devez que en atras zonas s'ixemeneba lo probable occitanismo d'orichen helenico boutique.
  • Frelater: deriva de verlaten « trescolar ».
  • Potasse.
  • Coche: un tipo d'embarcación fluvial.

Artesanía y industria[editar | editar código]

Villabarquín, palabra que deriva de lo neerlandés wimmerlkijn.

Incheniería hidraulica[editar | editar código]

Anvista aeria de los polders de La Gironda.

Agricultura y cheografía fisica[editar | editar código]

Perfil transversal tipico d'un barducal supramareal en un río costero dito rivière de Penzé, en Bretanya. Un barducal d'una plana de marea se dice en francés vasière, palabra derivada de lo neerlandismo vase, "sedimento lutitico".
  • Friche: yermo. La forma orichinal en neerlandés ye versh que fa part de la expresión versch land, "tierra fresca", "tierra ganada a la mar".
  • Vase: sedimento lutitico, bardo, buro, fango, limo, laco, tarquín. Deriva de lo neerlandés meyo wase, que ha dau en neerlandés actual waas.
  • Vasière: plana de marea, barducal. Derivau de l'anterior con lo sufixo -ière.
  • Wagage: limo que se fa servir d'abono. Deriva de lo neerlandés wag ("mullau").

Guerra y vida militar[editar | editar código]

Lo sector militar ye representau por:

  • Blocus.
  • Boulevard. Deriva de lo neerlandés antigo bollewerc, correspondient a la forma actual bolwerk ("muralla"). En francés la palabra boulevard ha perdiu progresivament lo suyo significau militar que han heredau lo catalán baluard y lo castellán baluarte, luengas a on que ha plegau recientment dende lo francés bulevar y bulevard con lo significau urbán d'avenida ampla con árbols.
  • Halecret.
  • Risban: ye un terrero con canyons pa protecher un puerto. Deriva de lo neerlandés Rijsbank.

Fiesta y diversión[editar | editar código]

Ropa, accesorios[editar | editar código]

  • Bague: aniello. Deriva de lo neerlandés premoderno bagge « aniello », que corresponde a l'actual bag « choya »).
  • Mannequin : < mannekijn « hombre chicot ».
  • Ruban : deriva de lo neerlandés ringband « collar ».

Gastronomía[editar | editar código]

Bebidas[editar | editar código]

Neerlandismos locals[editar | editar código]

Son neerlandismos propios de Belchica (belchicismos): kot (cambra d'estudiant) y drève (de l'holandés dreef).

Adaptación de los neerlandismos[editar | editar código]

Lo diminutivo neerlandés kijn que s'adapta en francés como quin y lo veyemos en vilebrequin (villabarquín). Atros eixemplos son bouquin (de lo neerlandés meyo boeckijn) y mannequin (de lo neerlandés meyo manneken).

Bi ha muitas palabras neerlandesas que s'adaptan con la terminación -an, que en part ye lo resultau de la evolución de lo sufixo -enc, -anc, la forma como s'adaptó en francés antigo lo sufixo francico -ing.

  • Spierlinc (forma en neerlandés meyo)> éperlan.
  • Scherm (forma en neerlandés meyo)> écran.
  • Ringhband (forma en neerlandés meyo)> ruban.
  • Vleting > flétan.
  • Rijsbank > risban (terrero con canyons pa protecher un puerto).

Esta traza d'adaptar palabras se troba tamién en tudesquismos (brelan, élan), y en italianismos (bilan, palan).[6]

Referencias[editar | editar código]

  1. (es) Carlo Tagliavini: Origenes de las lenguas neolatinas. Fondo de Cultura Economica. 1973, pp 404-416.
  2. 2,0 2,1 (es) Gramática francesa. Larousse Editorial, S.A, 2000., pp 206-208.
  3. (es) Francisco Sánchez Romero: La influencia de los terminos neerlandeses en la lengua española. Publicau en Transferencias culturales, literarias y lingüísticas en el ámbito de la Unión Europea. Universidat de Sevilla, 2006.
  4. (es) Manuel Agud, Antonio Tovar: Materiales para un diccionario etimologico de la lengua vasca IX.
  5. (es) Chabier Lozano Sierra: Aspectos lingüisticos de Tella. Aragonés de Sobrarbe (Huesca), 2010. Gara d'Edizions, Prensas Universitarias de Zaragoza, Institución Fernando el Católico. p 256.
  6. (fr) Paul Imbs, Bernard Quemada: Trésor de la langue française, Dictionnaire de la langue du XIXe et du XXe siècle (1789-1960). Editor: Éditions du CNRS/Gallimard, Paris, 1971-1994.

Bibliografía[editar | editar código]

Vinclos externos[editar | editar código]

Se veiga tamién[editar | editar código]


Os neerlandismos en aragonés y atras luengas romances
Os neerlandismos en castellán | os neerlandismos en aragonés | os neerlandismos en catalán | os neerlandismos en occitán | os neerlandismos en francés | os neerlandismos en arpitán | os neerlandismos en italián


 
Gramatica d'o francés
Fonetica Accentuación · Epentesi de consonant-puent · Fonetica · Fonolochía · Elisión · H aspirada · Liaison · Sincopa
Morfolochía Adchectivos (Calificativos · Chentilicios · Colors · Grau comparativo · Grau superlativo · Demostrativos · Exclamativos · Indefinius · Interrogativos · Posesivos · Numerals cardinals · Numerals ordinals) · Adverbios (Adverbios d'afirmación · Adverbios de dubda · Adverbios d'opinión · Adverbios deicticos · Adverbios espacials · Adverbios exclamativos · Adverbios de freqüencia · Adverbios interrogativos · Adverbios modals · Adverbios de manera · Adverbios de negación · Adverbios de quantidat · Adverbios de relación lochica · Adverbios de tiempo) · Articlos (Articlos definius · Articlos indefinius · Articlo partitivo) · Chenero · Conchuncions (Conchuncions copulativas · Conchuncions adversativas · Conchuncions dischuntivas · Conchuncions causals · Conchuncions comparativas · Conchuncions completivas · Conchuncions concesivas · Conchuncions condicionals · Conchuncions consecutivas · Conchuncions finals · Conchuncions subordinativas· Conchuncions temporals) · Numerals · Numero · Pronombres (Pronombres demostrativos · Pronombres indefinius · Pronombres interrogativos · Pronombres posesivos · Pronombre presonal · Pronombre relativo) · Prefixo (Prefixos cultos) · Sufixo (Sufixos cultos · Sufixos verbals) · Preposicions · Locucions prepositivas · Verbos · Conchugación (Primera conchugación · Verbos acabaus en -oir · Verbos acabaus en -re · Verbos acabaus en -ir d'a tercera conchugación · Conchugacions incoativas · Verbos irregulars acabaus en -ître · Segunda conchugación · Verbos irregulars · Modo condicional · Modo imperativo · Modo indicativo · Modo infinitivo · Modo participio · Modo subchuntivo · Tiempos verbals · Tiempos verbals perifrasticos · Verbos auxiliars · verbo être · verbo avoir) · Verbos modals · Verbos de movimiento · Verbos pronominals · Locucions verbals · Construccions verbo-nominals)
Sintaxi Concordancia · Estilo directo · Estilo indirecto · Inversión · Negación · Sintagma adchectival · Sintagma nominal · Sintagma verbal · Orden de pronombres · Voz pasiva · Oracions de relativo · Oracions completivas · Oracions completivas infinitivas · Oracions temporals · Oracions causals · Oracions finals · Oracions consecutivas · Oracions concesivas · Oracions condicionals · Oracions comparativas · Oracions impersonals
Lexicolochía Anglicismos · Antroponimia · Arabismos · Castellanismos · Celtismos · Cultismos · Chermanismos · Escandinavismos · Eslavismos · Fitonimia · Hidronimia · Goticismos · Helenismos · Italianismos · Lusismos · Miconimia · Neerlandismos · Occitanismos · Palabras ampradas d'as luengas d'oïl en francés · Persismos · Superstrato francico · Tudesquismos · Turquismos · Nominalización · Oronimia · Semicultismos · Toponimia · Zoonimia
Ortografía Normas ortograficas d'o francés