Verbos incoativos en aragonés

De Biquipedia
Ir ta: navego, busca
Zona d'emplego d'os incoativos en aragonés.

Se dice verbos incoativos, en morfolochía lingüistica, a los verbos que en la tercera conchugación y en la segunda conchugación presentan morfemas verbals irregulars con una -ix- (se pronuncia -ix- en aragonés oriental y -x- en aragonés occidental). Estos verbos etimolochicament marcaban lo principio d'una acción u comportamiento, encara que en a luenga actual muitos d'ellos perdioron este significau.

Verbos incoativos d'a segunda conchugación[editar | editar código]

Son verbos incoativos de la segunda conchugación remataus en -er:

  • amaneixer, conoixer, creixer, feneixer (derivau de finir), floreixer, mereixer, naixer, y pareixer.

Verbos incoativos d'a tercera conchugación[editar | editar código]

Son verbos incoativos de la tercera conchugación remataus en -ir:

  • En belsetán: estretir, alarguir, enchapurnir, escaseir, engaldir, empetrequir, enfurnir, patir, estranguchir, embalbir, enfredir, escaldabuchir, embabuquir, amansir, endolorir, enfosquir, encallorpir, engarrolir, endurir, esparbutir-se, enchapurnir, (en)chupir, estremurdir, escantechir, escurir, enzurcir, endulcir, enchugardir, encloquir, entreclarir, desburdir-se, enflaquir, agrandir, engrandir, escurrir, en.negrir, emblanquir, espesir y esclarir. Tamién putrir, escupir, seguir, turir, furnir, emporquir, esturdir, rebutir, tusir e putir, que pueden conchugar-sen como incoativos u no.
  • En tellán no bi n'ha investigacions sobre esto pero se sape que se conchuga como incoativo siguir/asiguir.
  • En chistabín: ablandir, aclarir, berrir, buquir, canyir, embullir, esbandir, escasir, escurir, estrechir, funir, furnir, gatir, pudrir, respesir, restrenyir, turir.
  • En aragonés medieval estioron incoativos: diferir, establir, excedir, exercir, exibir, expel·lir, finir, traferir, muitos d'ellos neolochismos u cultismos. Hemos de parar cuenta que bells verbos que en latín rematan en -UERE y en aragonés son verbos irregulars remataus en -uir se conoixen como verbos incoativos en aragonés medieval, ye o caso d'os verbos restituir, substituir, constituir, destruir, estatuir, estando diferents d'os verbos mu(y)ir y fu(y)ir, relacionaus con os verbos irregulars con epentesi antihiatica. Muitos d'estos verbos han dau errors d'interpretación a filologos hispanocentristas que deduciban verbos como estatuexer. Tamién ye documentau en l'aragonés medieval de la Val de l'Ebro la conchugación incoativa de los verbos derivaus de lo verbo ducere latín: proceder

No se parla d'os verbos incoativos d'a tercera conchugación en a "Gramatica de la lengua aragonesa" de Francho Nagore.

Orichen[editar | editar código]

La -x- de los verbos incoativos provién de la terminación de lo infitivo en latín -ESCERE (pronunciau /-éskjere/) de las formas de present:

  • COGNOSCERE > Cono(i)xer

S'ha d'aclarir que en la mitat oriental de l'Alto Aragón la evolución de la -X-, la -SK- y la -KS- latinas se fan con una -i (faixa, coixo), lo verbo incoativo n'ixa zona se pronuncia con una -i que seguntes la grafía de Uesca no s'ha d'escribir y seguntes la grafía de l'Academia de l'Aragonés sí (conoixer).

En latín bi habió dos zonas verbals que se diferenciaban entre atras cosas en la diferent evolución de la cuarta conchugación latina y en lo diferent resultau de los verbos incoativos. L'aria de l'aragonés yera entre ixas dos grans arias dialectals latinas. Podemos comparar los resultaus diferents en dos luengas cheograficament cercanas pero cadaguna d'un aria verbal. Si femos una lista de verbos que en castellán tienen -cer y en catalán -ir, encara que no signifiquen lo mesmo de tot y que totas no sigan formas comuns tenemos:

Castellán Catalán
amanecer amanir
agradecer agraïr
amortecer esmortir
desfallecer defallir
desvanecer esvair
esclarecer aclarir
ensordecer ensordir
establecer establir
favorecer afavorir
florecer florir
fortalecer enfortir
ofrecer oferir
padecer patir

Variants y retacule por castellanización[editar | editar código]

Por la presión de lo castellán, la terminación en -e(i)xer ha retaculau muito y nomás la trobamos que en l'aragonés ansotano y en l'aragonés de las altas vals de l'aria centro-oriental, y la ha sustituito la terminación en -ezer (parezer, amanezer, esmortezer).

La gramatica de Francho Nagore aconsella emplegar en aragonés común las formas en -xer, que son las chenuinas y responden a la fonetica aragonesa. De feito ye como gosa escribir-se en aragonés común.

La luenga aragonesa ye cheograficament entre las dos zonas que bi heba en latín vulgar con respecto a los verbos incoativos, pero pareix que més que més en la primera, con las atras luengas iberorromances. En la lista de verbos de la tabla comparativa d'alto, predominan los verbos como amaneixer, pero tamién bi ha casos contrarios como aclarir que contrastan con lo castellán esclarecer. En ansotán bi ha verbos incoativos como amanixer, compadexer, conoxer, crexer, merexer, naxer, pareixer, reconoxer, texer, que se conchugan en totz los tiempos y presonas como -ex/ix- y d'atros que tienen dobletz y se fan con dos conchugacions completas, una sin -ex/ix- y l'atra con -ex/ix-: aclarir/aclareixer, ablandir/ablandexer. Ye curioso en ansotán lo caso de lo verbo ofrir/ufrir/ofrexer, que fueras de lo infinitivo, nomás tien que conchugación con -ex/-ix-.

Alwin Kuhn comenta o caso de enflacar en aragonés ansotano, que contrasta con o verbo enflaquecer en castellán, y s'habría d'anyadir o caso de ensordar en castellán d'Aragón que contrasta con ensordecer en castellán cheneral.

En castellán podrían estar d'orichen navarro-aragonés, catalán u galo-romance verbos como aburrir, podrir y atros que se relacionan con aborrecer, pudrecer.

Se sabe que en chistabín bi ha verbos de la conchugación rematada en -ir que tienen una conchugación con o incremento en -ix: ablandir, aclarir, buquir, canyir, embullir, esbandir, escurir, estrechir, funir, respesir, restrenyir. L'aria on bi ha verbos incoativos de la conchugación en -ir ye: Val de Vio, val de Bielsa, bal de Chistau y val de Benás.

En aragonés medieval son rechistraus os pasaus perfectos simples desobidioron y enriquió, que pa Alwin Kuhn representarían una perduga d'a caracteristica incoativa,[1] pero que en realidat serían pasaus feitos a partir d'infinitivos como os anteriors remataus en -ir, y no con un infinitivo con incremento incoativo en -exer.

En los textos notarials de la Val de l'Ebro de los sieglos XIV y XV, los verbos establir y estatuir teneban formas en lurs presents de subchuntivo y indicativo como establezca, estatuezca, estatuesca, estatuesco. Establir y esmortir representan infinitivos en -ir que contrastan con formas que huei son en -ecer en aragonés cheneral y -e(i)xer en aragonés más chenuíno.

Los verbos derivaus de lo verbo DUCERE latín como proceder/procedir podeban tener una conchugación incoativa tamién, lo qualo ye lochico, porque dica en castellán actual tienen formas irregulars en lo present de subchuntivo pareixidas a las formas incoativas. D'esta traza en lo libro de la Puent de Piedra mos trobamos:

En el nombre de Nuestro Senyor Dios et de la Virgen Santa Maria, de los quales todas cosas del mundo procedexen.

Tamién se conoixen las formas verbals en aragonés medieval adquerezcan, espellescan, distribuescan y constituezcan, y pueden indicar que verbos como espellir, distribuir y constituir haigan puesto tener incrementos verbals con -x- d'incoativo. Lo verbo bendecir puet prener formas presonals incoativas tipo bendizca en castellán d'Aragón.

Tamién bi ha verbos que en aragonés medieval teneban formas en -xer y que huei terminan en -ir, dica en castellán: concernescer, punescer, presumescer, pero podrían estar hipercorreccions a partir de concernir, punir y presumir.

Cal pensar en lo caso d'esmortir (huei en aragonés cheneral esmortezer, por castellanizar-se foneticament esmortexer) si no ye un caso de posible occitanismo u catalanismo.

Referencias[editar | editar código]

  1. KUHN, Alwin, El Dialecto Altoaragonés (traducción de l'orichinal de 1935); Xordica Editorial. Zaragoza, 2008. ISBN 978-84-96457-41-6

Bibliografía[editar | editar código]

Se veiga tamién[editar | editar código]


Os verbos incoativos en aragonés y atras luengas romances
Os verbos incoativos en galaico-portugués | os verbos incoativos en astur-leyonés | os verbos incoativos en castellán | os verbos incoativos en aragonés | os verbos incoativos en catalán | os verbos incoativos en occitán | os verbos incoativos en francés | os verbos incoativos en italián | os verbos incoativos en rumán


 
Gramatica de l'aragonés
Fonetica Accentuación · Fonetica (Epentesi antihiatica · Diftongación debant de Yod en aragonés · Protesi velar · Oclusivas xordas intervocalicas · Sonorización dezaga de liquida) · Fonolochía · Cheada
Morfolochía Adverbios (Adverbios d'afirmación · Adverbios de dubda · Adverbios espacials · Adverbios espacials deicticos · Adverbios de negación · Adverbios de tiempo · Adverbios de manera · Adverbios de quantidat · Adverbios d'opinión · Locucions adverbials en aragonés) · Articlos definius · Articlos indefinius · Chenero · Conchuncions (Adversativas · Copulativas · Coordinativas · Dischuntivas · Completivas · Condicionals · Causals · Concesivas · Consecutivas · Comparativas · Finals · Subordinativas · Temporals)· Adchectivos (Calificativos · Chentilicios · Demostrativos · Exclamativos · Indefinius · Numerals cardinals · Interrogativos · Numerals ordinals · Posesivos) · Numero (Substantivos incontables) · Pronombres (Pronombres demostrativos, Pronombres indefinius, Pronombres relativos · Pronombres presonals · Pronombres adverbials: pronombre adverbial en/ne, pronombre adverbial i/bi/ie) · Infixo · Prefixo (Prefixos cultos) · Sufixo (Sufixos cultos) · Preposicions · Verbos (Tiempos verbals · Verbos auxiliars · Verbos de movimiento · Verbos pronominals · Verbos incoativos · Verbos freqüentativos · Verbos irregulars con epentesi antihiatica · Locucions verbals · Perifrasis verbals)
Sintaxi Concordancia · Estilo directo · Estilo indirecto · Negación · Sintagma adchectival · Sintagma nominal · Sintagma verbal · Complemento de rechimen verbal · Orden de pronombres · Combinacions de pronombres febles en aragonés · Verbo estar-ser · Voz pasiva · Oracions con infinitivo · Oracions de relativo · Oracions completivas · Oracions temporals · Oracions causals · Oracions finals · Oracions consecutivas · Oracions concesivas · Oracions condicionals · Oracions comparativas
Lexicolochía Adchectivación · Anglicismos · Arabismos · Castellanismos · Catalanismos · Celtismos · Chermanismos · Cultismos · Fitonimia · Galicismos · Goticismos · Helenismos · Hidronimia · Italianismos · Leyonesismos · Lusismos · Mozarabismos · Neerlandismos · Nominalización · Occitanismos · Oronimia · Persismos · Semicultismos · Superstrato francico · Toponimia · Tudesquismos · Vasquismos · Zoonimia
Ortografía Ortografía medieval · ACAR · Uesca · SLA