Pronombre adverbial en/ne en aragonés

De Biquipedia
Ir a la navegación Ir a la búsqueda

O pronombre adverbial en/ne existent en aragonés vien d'o latín INDE. A forma arcaica ende, nde, etc... ye rechistrada en Ansó como muito minoritaria y tamién en lugars d'o Baixo Aragón historico como Arinyo u Alloza.

Se fa servir pa referir-se a un substantivo en estos casos:

  • Quiers vin?
  • No, no en quiero
  • No, no en quiero prener ni una gota
  • Quan ye con un numeral quantitativo u indefiniu:
  • No tien un fillo, en tien tres
  • Agora baixa tanta augua por o río que ya en torna a saltar por l'azute.
  • Quan tenemos un adchectivo pronominalizau y fa referencia a este tipo de substantivo:
  • Tiens uellas negras? No, nomás en tiengo que de blancas
  • Tiens vin blanco? No, nomás en tiengo que de negro
  • Quan un substantivo sin articlo ye con a preposición de:
  • I heba muitos codonyos y hemos culliu un capazo de codonyos
  • I heba muitos codonyos y n'hemos culliu un capazo.
  • Yes contento de o que fas? Si en soi satisfeito
  • Antes me fablaba de totas ixas cosas, agora ya no me'n fabla
  • D'ixe forato me'n salioron dos paniquesas

Suplemento de verbos pronominals[editar | editar código]

Bi ha verbos pronominals que son seguius d'un sintagma nominal que encomienza por a preposición de y que representa un suplemento u complemento de rechimen verbal:[1]

  • acordar-se.
  • alegrar-se.
  • burlar-se.
  • deixar-se.
  • despedir-se.
  • fartar-se.
  • fiar-se.
  • guardar-se.
  • pasar-se.
  • reyir-se (con as suyas variants foneticas).

O pronombre adverbial en/ne ye capaz de substituir a ixe sintagma nominal dando formas como:

  • M'acuerdo d'a mía mayestra > Me'n acuerdo.
  • T'alegras d'a muerte de Franco > Te'n alegras.
  • Se burla de l'autoridat > Se'n burla.
  • Mos despedimos d'os yayos > Mo'n despedimos.
  • Ya tos deixatz de reyir > To'n deixatz.
  • Se fartan ya de veyer esta serie > Ya se'n fartan.
  • Se fian de tú > Se'n fian.
  • Se guardan de fer fuina > Se'n guardan.
  • Se pasa de luengo > Se'n pasa.
  • Como cruces el barranquet te'n acordarás.[2] (Referindo-se a la facienda d'haber cruzau o barranco)
  • Se me tocás la lotería qui sabe el que me'n alegrarí[2]. (Referindo-se a lo feito de tocar-li la lotería
et cuanto de la intencion de las palauras del uiello lenperador s'ende ha bien redido, mas por que non se leua(n)tás a(l)gun rumor mudo las palauras[3]

Manimenos en l'uso de totz estos verbos bi ha diferents variacions dependendo d'o verbo y d'a parla. A on no ha puesto plegar prou presión castellanizadera pa eliminar l'uso d'este pronombre adverbial con esta función, se i puet veyer en uns quantos d'estos verbos que bi ha usos agramaticals expletivos (superfluos) d'o pronombre adverbial sin substituir a lo sintagma nominal, fendo asinas d'adchacent d'un caso-rechimen. Esto podemos sentir-lo en parlas como o ribagorzán:

  • Te'n acòrdas de cuan yeran a Ansils?[4]. (Uso expletivo)
  • M'ha dito que no se'n acordabe a qui l'hebe dixau[5]. (Uso expletivo)
  • No me'n acordo.[5]
  • Me'n acordo d'un día que va llove(r) mucho. (Uso expletivo)[1]

O verbo reyir-se como reflexivo ye o que se fa servir mes con pronombre en chenerando usos expletivos, esdevenindo un verbo reyir-se-ne en Ribagorza Baixa.

  • Estoi reindo-me-ne. (De tu)[1]
  • quan le i conto se'n rie. (De lo que conta)[1]
  • no paro de rei-me-ne de lo que m'has dicho. (Uso expletivo referindo-se a lo que m'has dicho)[1]

En a Val de Benás (Alta Ribagorza occidental) o verbo reyir con as suyas variants redi(r) y riure tamién presenta usos expletivos quan ye pronominal, y dica presenta atros usos mes complexos.

  • Se'n riu de totz.[5] (Uso expletivo referindo-se a totz)
  • No te'n riugues d'els pobres que ye pelat[5]. (Uso expletivo referindo-se a los pobres)
  • Se le'n riden las urellas (ye un dito que se fa quan se charra de qui prene actitutz somardonas[5])

Manimenos en aragonés no s'ha plegau a lo extremo de cheneral verbos con o pronombre lexicalizau debant d'o lexema como en catalán popular tipo enrecordar-se, enriure's y enportar-se, que dan duplicacions d'o pronombre adverbial tipo enriure-se'n, se n'enrecora, me n'enporto, ecetra.

En o caso d'o verbo deixar a construcción formada por o pronombre reflexivo, o pronombre adverbial y o verbo ha puesto fosilizar como deixar-se-ne prenendo un matiz semantico especial como d'aturar-se u cesar un acto, proceso una realidat:

  • Ixa parella ya se'n deixoren.[2]
  • Ya se'n ha deixato.[2] (Referindo-se a fenomens como de plever)
  • Ixes se'n han deixato.[2] (Referindo-se d'estar parella)
  • S'ende dexó estar (eixemplo en aragonés medieval de Zaragoza)

Locativo[editar | editar código]

Puet sustituir a un complemento nominal que encomienza por de y tien como nuclio un substantivo (por eixemplo un toponimo), indicador de puesto de procedencia u d'a on sale o movimiento:[1]

  • no vale la pena de marchar-ne.[1] (referindo-se a lo puesto a puesto a on ye a presona que charra)
  • ya'n viengo.[1] (Referindo-se a lo puesto a on ye a presona que charra)
  • aún no n'ha tornau.[1] (Referindo-se a lo puesto a on ye a presona de qui se charra)

Verbos reflexivos de movimiento[editar | editar código]

En relación a o zaguero, s'emplega con os verbos reflexivos de movimiento (ir-se-ne, venir-se-ne, salir-se-ne,[1], baixar-se-ne y puyar-se-ne), porque indican punto de partida, d'acá, d'astí, d'allí, etc:

  • Me'n voi a sentar a'l pedrizo[1]
  • Te'n fués enta tierra plana
  • Ya se'n van.

Pronominalización d'o subchecto[editar | editar código]

En aragonés se puet pronominalizar o subchecto en bellas condicions por meyo d'o clitico "en". En istos casos o verbo no concuerda con o subchecto y s'impersonaliza:

  • Tiens manzanas? -Tres en queda.
  • Han venito mas ninos? Si, en ha venito dotze mas.
  • As uellas no resisten as temperaturas tan baixas. En muere muitas en iste lugar.

Ye un rasgo tipico en aragonés que se puet trobar ya en documentos escritos en aragonés medieval, como por eixemplo a decumentación d'a Casa de Ganaders de Zaragoza:

ne perdió largas
ende perdió largas[6]

Si o subchecto ye pronominalizau con en/ne o verbo auxiliar d'as formas composadas ye haber[7]:

  • En ha estato un ciento.[7]
  • En ha venito vente.[7]

Referencias[editar | editar código]

  1. 1,00 1,01 1,02 1,03 1,04 1,05 1,06 1,07 1,08 1,09 1,10 (es) Maria Luisa Arnal Purroy: El habla de la Baja Ribagorza Occidental: Institución Fernando el Católico, 1998, pp 306-317
  2. 2,0 2,1 2,2 2,3 2,4 Chabier Lozano Sierra y Ánchel Loís Saludas Bernad, Aspectos morfosintácticos del belsetán (aragonés del valle de Bielsa), Zaragoza, Gara d'Edizions-CEDESOR-Concello de Bielsa-Institución "Fernando el Católico". 2005, p 60-63
  3. (an) "Libro de los Emperadors"
  4. *(es) José Antonio Saura Rami: Elementos de fonética y morfosintaxis benasquesas, Zaragoza, Gara d'Edizions-Institución Fernando el Católico (2003). p 148
  5. 5,0 5,1 5,2 5,3 5,4 (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978, p 31, p 419
  6. [1] Documentación medieval de la Corte del Justicia de Ganaderos de Zaragoza: y, Ordinaciones de la Casa de Ganaderos de Zaragoza del año 1511, Número 21. Institución "Fernando el Católico", 1995
  7. 7,0 7,1 7,2 (es) Chabier Lozano Sierra, Ángel Lois Saludas Bernal: Aspectos morfosintácticos del belsetán, 2005, Gara d'Edizions, p 102.

Bibliografía[editar | editar código]


Os pronombres adverbials derivaus d'INDE en aragonés y atras luengas romances
O pronombre adverbial en/ne en aragonés | o pronombre adverbial ''en'' en catalán | o pronombre adverbial ''en'' en occitán | o pronombre adverbial ''en'' en francés | o pronombre adverbial ''en'' en italián


Gramatica de l'aragonés
Fonetica Accentuación · Apocopa · Oclusivas xordas intervocalicas · Cheada · Diftongación debant de Yod · Diftongos · Disimilación · Elisión · Epentesi antihiatica · Esdrúixols · Eufonía · Fonolochía · Hiatos · Metafonia · Metatesi · Protesi velar · Sincopa · Sonorización dezaga de liquida ·
Morfolochía Adverbios (Adverbios d'afirmación · Adverbios de dubda · Adverbios espacials · Adverbios espacials deicticos · Adverbios de negación · Adverbios de tiempo · Adverbios de manera · Adverbios de quantidat · Adverbios d'opinión) · Locucions adverbials en aragonés (Locucions adverbials d'afirmación · Locucions adverbials de dubda · Locucions adverbials espacials · Locucions adverbials de negación · Locucions adverbials temporals · Locucions adverbials de manera · Locucions adverbials quantitativas) · Articlos definius · Articlos indefinius · Chenero · Conchuncions (Adversativas · Copulativas · Coordinativas · Dischuntivas · Completivas · Condicionals · Causals · Concesivas · Consecutivas · Comparativas · Finals · Subordinativas · Temporals)· Adchectivos (Qualificativos · Colors · Chentilicios · Grau comparativo · Grau superlativo · Demostrativos · Exclamativos · Indefinius · Numerals cardinals · Interrogativos · Numerals ordinals · Posesivos) · Numero (Substantivos incontables) · Pronombres (Pronombres demostrativos, Pronombres indefinius, Pronombres relativos · Pronombres presonals · Pronombres adverbials: pronombre adverbial en/ne, pronombre adverbial i/bi/ie) · Infixo · Prefixo (Prefixos cultos) · Sufixo (Sufixos cultos) · Preposicions · Locucions prepositivas · Verbos (Verbos auxiliars · Verbos de movimiento · Verbos pronominals · Verbos freqüentativos) · Conchugación verbal (Primera conchugación · Segunda conchugación en aragonés · Tercera conchugación en aragonés · Conchugacions incoativas · Conchugación incoativa de verbos acabaus en -eixer · Conchugación incoativa de verbos acabaus en -ir · Verbos irregulars · Modo indicativo · Modo subchuntivo · Modo imperativo · Tiempos verbals · Verbo estar-ser · Verbo haber) · Locucions verbals · Perifrasis verbals
Sintaxi Concordancia · Estilo directo · Estilo indirecto · Negación · Sintagma adchectival · Sintagma nominal · Sintagma verbal · Complemento de rechimen verbal · Orden de pronombres · Combinacions de pronombres febles en aragonés · Voz pasiva · Oracions con infinitivo · Oracions de relativo · Oracions completivas · Oracions temporals · Oracions causals · Oracions finals · Oracions consecutivas · Oracions concesivas · Oracions condicionals · Oracions comparativas · Oracions impersonals
Lexicolochía Adchectivación · Anglicismos · Arabismos · Castellanismos · Catalanismos · Celtismos · Chermanismos · Cultismos · Fitonimia · Galicismos · Goticismos · Helenismos · Italianismos · Leyonesismos · Lusismos · Miconimia · Mozarabismos · Neerlandismos · Nominalización · Occitanismos · Persismos · Semicultismos · Superstrato francico · Toponimia (Hidronimia · Odonimia · Oiconimia · Oronimia) · Tudesquismos · Turquismos · Vasquismos · Zoonimia
Ortografía Ortografía medieval · ACAR · Uesca · SLA