Verbos irregulars acabaus en -uir

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os verbos irregulars acabaus en -uir son cultismos u semicultismos derivaus de verbos latinos acabaus en -UĔRE y presentan diferents trazas d'irregularidat derivadas d'a presencia d'una -i- debant os morfemas personals que encomienzan por vocal y fan que amaneixa una -y-. Historicament en aragonés medieval tenioron una conchugación verbos incoativos d'a tercera conchugación, con incrementos en -ix-. No bi n'ha estudios profundos sobre esta clase de verbos irregulars, ni dende a filolochía hispanica tradicional ni dende a filolochía que estudia l'aragonés como una luenga romanica.

Verbos d'este modelo son:

• Derivaus de STRUĔRE: construir, destruir, instruir, obstruir, ecetra.
• Derivaus de TRIBUĔRE: atribuir, contribuir, distribuir, retribuir, ecetra.
• Derivaus de FLUĔRE: afluir, confluir, influir, refluir, ecetra.
• Derivaus de STITUĔRE variant de STATUĔRE: destituir, prostituir, restituir, substituyir, estatuir, instituir, ecetra.
• Atros: disminuir, intuir, diluir.

No perteneixe a este grupo de verbos irregulars conclu(y)ir (concludir en aragonés medieval, visible en a actas de Corz d'Aragón y en o "Libro d'el Trasoro"), d'o latín CONCLUDERE), excluir, incluir, recluir, que d'acuerdo con as normas ortograficas podrían escribir-se concluyir, excluyir, incluyir y recluyir por provenir d'un etimo latín con -d- intervocalica perdida y documentar-se a forma concluyir en os "Fueros d'Aragón", y a forma conclluyí(r) en benasqués.

Participio

Ye bien documentau l'uso medieval tanto de participios regulars en -ido (destruido), como de participios fuertes en -úito (destrúito, escrito destruyto).

A forma instrúito la trobamos en o "Breviarium ab Urbe condita", a forma destruito y as suyas variants en diferents textos medievals: "Liber Regum", "Vidal Mayor", "Libro de los Emperadors", documentos medievals navarros, actas d'as corz d'Aragón de 1366, ecetra. O filologo Vicente García de Diego considera que deriva d'o latín DESTRUCTUM.

En esta catibdat estidieron los fillos d Israel LXX annos, entro que aspiro Deus nuestro señor a Cirus, el rei de Persia, e los solto que fuessen fraugar el temple de Iherusalem, qui era destruito.

.que, alongado muito el fecho, la cosa non fuesse sentida e que ellos serían destruitos; así que, havido consello entre ellos, fueron una buelta al emperador en su palacio a ora de nona e cegáronlo de los ojos muit deshonestament

et queriendo el enperador honrar ha villisario a lo ordenado seyer senado; apres que la huest de los vandalos fue estruyta segunt auemos dito enuio a villisario a Roma por liurar la de los guodos

Encara en aquel tempo el senyor de Candia el cual auia nombre Sayt de haps a feyto grant armada sobre la qual es ordenado capitan offocio honbre ualient et de grant coraçon el qual ha estruyto toda la part de la maritima de los grieguos et todo larceplelaguo & puyo entro a la boca de roma(n)ia do se encontro con las galeas de los grieguos

algunos lugares seran destruytos.

As formas regulars como statuido, statuida, destruido, ecetra, son as mes frecuents. A sola documentación medieval de formas como destroyidos u destruyidos se reduce a lo manuscrito d'un borrador conservau que facioron escribanos catalanoparlants antes d'a redacción definitiva de "La Grant Cronica d'Espanya de Chuan Ferrández d'Heredia.

En o libro "Gramatica de la Lengua Aragonesa" figuran os participios fuertes en -úito como destrúito, constrúito y tamién as formas regulars, pero sin indicar a procedencia d'estas formas.

Present d'indicativo

En aragonés medieval tenemos documentau o present con conchugación incoativa (substituexe, statuexe, statuexen), que naturalment no afecta a las primeras personas plurals (statuimos). En a obra y traduccions de Chuan Ferrández d'Heredia no se gosa veyer y entre os pocos eixemplos tenemos instruex y destruexen en o libro "Rams de Flors". En os textos medievals a primera persona -exco s'escribiba como -esco (instituesco, substituesco), pero se troba a sobén converchent con o castellano -ezco (restituezco, anuezco), y tamién se documenta a forma de tercera persona d'o singular converchent con o castellano -ece (destruece, redargüece, statuece), y a forma de tercera persona plural -ecen (constituecen, destruecen).

A forma instituesco, frecuent en o luengache notarial se puet trobar dica en o castellano d'o sieglo XVI escrito en Aragón, como por eixemplo un texto de 1534 de Lo Mas de las Matas.

D'esta traza a forma teorica orichinal en grafía medieval sería:

Present d'indicativo

Statuexco

Statuexes

Statuexe

Statuimos

Statuid(e)s

Statuexen

Y con un grau d'influencia castellana:

Present d'indicativo

Statuezco

Statueces

Statuece

Statuimos

Statuid(e)s

Statuecen

Pasau imperfecto d'indicativo

Os pasaus imperfectos d'indicativos son regulars. En os textos medievals no se gosa representar a forma en -iba cheneral de l'aragonés moderno, excepcionalment se troba destruyva en as actas d'as Corz d'Aragón celebradas en Zaragoza y Calatayú (1365-1366).

Pasau perfecto simple

Presenta una irregularidat por sumar-se a consonant -y- d'a radiz con a i d'o diftongo -ie- d'as formas regulars, partié u sintié.

Pasau perfecto simple

Destruyé

Destruyés

Destruyó

Destruyemos

Destruyetc

Destruy(or)on

Present de subchuntivo

En aragonés medieval trobamos formas como contribuesca en as corz de Zaragoza de 1366, y en atros textos instituesca.

En l'aragonés d'as comunidaz aragonesas estos verbos no debeban conchugar-sen como incoativos y en o Fuero de Teruel se conoixe a forma destruya d'o verbo destroyr coincident con o castellano. En a obra de Chuan Ferrández d'Heredia s'escriben as formas (e)struya y (e)struyan.

Pasau imperfecto de subchuntivo

Se conoixen formas como contribuyssen.

Problemas d'estandarización

Teoricament estos verbos pueden presentar-se vulgarizaus con una -y- en a terminación: destruyir, construyir, como esdevién en os idiomas circunvecins catalán y castellano. En aragonés medieval os infinitivos s'escriben cuasi siempre acabaus en -uir u con una "h intercalada" en -uhir. En o "Libro de los Emperadors" trobamos destrovir.

En l'aragonés escrito creyau en las decadas de 1970 y 1980 se confundió a terminación vulgarizada en -uyir con la terminación chenuína natural d'atros verbos irregulars como "fuyir", "muyir" y "freyir" (verbos irregulars acabaus en -yir) y se cheneralizó l'uso escrito d'os infinitivos costruyir, destruyir, influyir, restituyir, sustituyir, ecetra, asinas como formas personals que en derivarían por regularidat.

Bibliografía

• (es) Max Gorosch: El Fuero de Teruel; Estocolmo, 1950.
• (es) Javier Terrado Pablo: La Lengua de Teruel a fines de la Edad Media. Instituto de Estudios Turolenses, 1991.
• (es) SAROÏHANDY, Jean-Joseph, Misión lingüística en el Alto Aragón (compilación de materials ineditos dende 1906); Xordica Editorial. Zaragoza, 2005. ISBN 84-96457-06-0.
• (es) BARCOS, Miguel Ánchel: El Aragonés Ansotano: estudio lingüístico de Ansó y Fago. Gara d'Edizions. Zaragoza, 2007.ISBN 978-84-8094-058-0
• (es) María Pilar Benítez: L'Ansotano. Estudio del habla del Valle de Ansó. Gobierno de Aragón, 2001.
• (an) Chusé Lera Alsina: Aplego. Diccionario de Resistencia y Gramática sobre lo cheso. Massanas gràfiques. 2004.
• (es) Chabier Lozano Sierra, Ángel Lois Saludas Bernad: Aspectos morfosintácticos del belsetán, 2005, Gara d'Edizions, pp 103–105.
• (es) Lozano, Ch.: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010.
• (es) Brian Mott: El Habla de Gistain. Instituto de Estudios Altoaragoneses, 1989.
• (es) Fernando Blas Gabarda, Fernando Romanos Hernando: Diccionario aragonés: chistabín-castellano (Val de Chistau). Colección Ainas. Gara d'Edizions, 2008.
• (es) Chabier Tomás Arias: El aragonés del Biello Sobrarbe. Instituto de Estudios Altoaragoneses, (1999).
• (es) José Antonio Saura Rami: Elementos de fonética y morfosintaxis benasquesas. Gara d'Edizions, Institución Fernando el Católico, 2003.
• (es) Ángel Ballarín Cornel: Diccionario del Benasqués. Institución Fernando el Católico, Zaragoza, segunda edición 1978.
• (es) Mascaray Sin, Bienvenido: Vocabulario del habla de Campo (Ribagorza, Huesca). Xordica Editorial, 2014.
• (es) María Luisa Arnal Purroy: El habla de la Baja Ribagorza Occidental. Institución Fernando el Católico, 1998.

• Datos: Q13050410