Adverbios espacials en aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os adverbios espacials en aragonés son d'orichen latín y prenen formas pareixidas a como son en idiomas mugants. A part d'os adverbios espacials deicticos aquí, astí, allí u allá, bi n'ha d'atros, muitos d'éls distribuitos en parellas d'oposaus, que pueden ir acompanyaus de preposicions.

Adverbios espacials deicticos

Ta más detalles, veyer l'articlo adverbios espacials deicticos en aragonésveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

Son aquí, astí y allí, allá.

Adverbios pa expresar distancia relativa

A cercanía la expresan os adverbios cerca u amán y a leixanía la expresan os adverbios luent u leixos.

A forma amán se fa servir muito en aragonés escrito pero no se fa servir guaire en aragonés charrau, u por o menos no tanto como o verbo amanar con o que ye relacionau. O significau de cerca ye mes amplo que no lo significau de amán.

A forma luent (pronunciau /luén/) se rechistra unicament en Chasa, pero se troba muito en textos medievals y se suposa que deriva d'o latín LONTE como unas cuantas parolas d'a suya familia (lonteza y alontar). En benasqués se diz lluen y encara se documenta llun en bel texto grausín d'o sieglo XX, tot en continación cheografica con o catalán lluny (pronunciau llun en muitos puestos), que se suposa que provién d'o latín LONGE. Ye posible que en aragonés haigan puesto convercher as evolucions d'o latín LONTE y LONGE. Leixos se documenta en belsetán y tellano.

Pa expresar una lonteza gran tenemos l'adverbio dillá, posiblement relacionau con o catalán enllà, l'occitán enlà y o francés delà. Se proposa una etimolochía a partir d'o latín DE ILLAC.

Adverbios pa expresar inclusión u exclusión espacial

A inclusión en un espacio determinau la expresa l'adverbio adintro, con diferents variants, a exclusión respecto a un espacio determinau la expresa l'adverbio afuera u difuera.

Adverbios pa expresar posicions en a verticalidat

As posicions verticals altas s'expresan con os adverbio (d)alto y (d)encima, as posicions baixas con abaixo y debaixo. As formas (d)encima y debaixo fan referencia a ser chusto en a part superior u a part inferior d'un plan imachinario horizontal respectivament.

En aragonés ribagorzano tenemos l'adverbio dichós u dechós como resto de l'adverbio d'uso medieval chus(o), indicador d'inferioridat vertical, en oposición a sus(o), indicador de superioridat vertical y que no se conserva en garra parla altoaragonesa actual.

Adverbios pa expresar posicions en a horizontalidat

Tenemos arredol, enfrent y parella d'oposaus debant-dezaga, toz con as suyas variants.

• Arredol indica posicions en totas direccions en relación a un punto imachinario central. Presenta como variant alredol.
• Enfrent indica una posición en un mismo plan horizontal que atra pero enfilada en sentiu diferent a l'obchecto que se'n parla.
• Debant se refiere a una posición horizontal respecto a un obchecto en o mesmo costau que l'observador, dezaga se refiere a una posición horizontal respecto a un obchecto en un costau diferent a l'observador. Ye un d'os pocos adverbios d'orichen arabe en aragonés.

O relativo (a) on como adverbio espacial

A parola a on (con as suyas variants), ye un pronombre relativo que deriva d'o latín ŬNDE con o posible acompanyamiento d'a preposición a y puede prener una función d'adverbio visible por eixemplo en:

• ande habeba que actuar.
• dende allí t'ande fue.
• por ande se fica l'augua.
• no son como las uellas que las fas rodar t'an quieres.

As diferents variants de a on son:

• On(e), en aragonés ribagorzano.
• Agón, en benasqués con una epentesi antihiatica por fonetica sintactica a partir de a on.
• An, s'explica por aglutinación d'a preposición a con on: a+on > aon > an.
• Ande y Onde s'explicarían por converchencia con o castellano de rechistro vulgar, on son presents estas formas, consideradas vulgarismos de donde y adonde.

L'adverbio a on (y as suyas variants) puet ir acompanyau d'o relativo que indicando millor a suya valura relativa, y servindo pa dar enfasi. Encara que ye bien documentau en belsetán, tamién se documenta en Gavín, Sobrepuerto, Val de Tella, Viello Sobrarbe, Val de Chistau y Val de Benás:

• Lleva-la t'an que yera (aragonés d'a Valle de Tella).
• Ande que se coceba o pan (aragonés d'o Viello Sobrarbe).
• T'an que quero (benasqués).

Bibliografía

• (es) Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico, 2010.
• (es) José Antonio Saura Rami: Elementos de fonética y morfosintaxis benasquesas. Gara d'Edizions, Institución Fernando el Católico.
• (es) Chabier Tomás Arias: El aragonés del Biello Sobrarbe. Instituto de Estudios Altoaragoneses, (1999).