Consello d'a Fabla Aragonesa
O Consello d'a Fabla Aragonesa (C.F.A.) conoixito popularment como "Consello", ye una asociación cultural naixita en 1976 e reconoixita legalment en 1978. O suyo ambito territorial ye Aragón.
As fins d'ista asociación son a esfensa, promoción, estudio y espardidura de l'aragonés en totz os suyos aspectos:
Historia, literatura, gramatica, lexico, toponimia, folklore, consideración social y legal, pedagochía, didactica, amostranza, etc., parando especial cuenta en o estudio, protección e desembolique de totas as suyas variants locals y comarcals, as qualas son l'alazet de l'aragonés común u estándar.
O quefer d'o Consello d'a Fabla Aragonesa s'alazeta en tres prencipios:
1. Actitut rispetuosa enta a realidat trilingüe d'Aragón.
2. No adscripción colectiva a garra ligallo politico, sindical u relichioso.
3. Libertat ideolochica d'as presonas que lo forman. Ye, de feito, una d'as asociacions de referencia arredol d'a luenga aragonesa en tota a sociedat aragonesa.
Dende a suya creyación, o Consello d'a Fabla Aragonesa ha treballato de recio en a dignificación de l'idioma aragonés, contribuindo a creyar un estato d'opinión favorable arredol d'ista chicorrona luenga romanica y espardindo o suyo conoiximiento a traviés de publicacions variatas, como as revistas Fuellas u Luenga e Fablas. Como editorial, baixo la dirección de Francho Nagore, ha publicato un total de 130 libros en aragonés en os zaguers 30 anyos, como A lueca. A istoria d'una mozeta d'o Semontano (1982) de Chuana Coscujuela, el Vocabulario básico bilingüe aragonés-castellano y castellano-aragonés (1997) de Antonio Martínez Ruiz, u Sobre fonética histórica del aragonés de Jesús Vázquez Obrador (2011).
Dende que se creyó en l'anyo 2000 o Consello Asesor de l'Aragonés dintro d'o Consello d'a Fabla Aragonesa, totas as decisions que prene iste organo se publican en Fuellas, ta que a chen las conoixca. Convoca cualques premios literarios: "Ana Abarca de Bolea" de poesía, "Chusé Coarasa" de novela curta, "O Gua" de literatura infantil e chovenil, etc.
O Consello ye miembro de l'Asociación por las Luengas e Culturas Europeyas Menazatas (ALCEM, antes AIDLCM). Asiste a los suyos congresos y ha organizato en Uesca lo XVIII.º Congreso en chulio de 1997[1] y lo XXIV.º Congreso en chulio de 2015 en a siede d'a Deputación Provincial de Uesca. [2]
Os organos de gubierno d'o Consello d'a Fabla Aragonesa son l'Asambleya Cheneral de consellers e a Chunta Directiva, que a suya composición y atribucions amaneixen reglatos en as Ordinacions d'o Consello. Os vocals, dende 2015, son siete miembros, mantenindo o criterio de paridat d'entre ombres e mullers, en a Chunta directiva.
| Chunta Directiva d'o
Consello d'a Fabla Aragonesa |
actual
(a partir d'aviento 2015 dica agora) |
anterior
(dende 2004 dica noviembre de 2015) |
|---|---|---|
| President | Chusé Inazio Nabarro | Chusé Inazio Nabarro |
| Vicepresident | Rafel Vidaller Tricas | Santiago Bal Palazios |
| Secretaría Cheneral | Ana Cris Vicén Pérez | Daniel Lerín Cristóbal |
| Tresorero | Chorche Escartín Guillén | Chorche Escartín Guillén |
| Vocals | Alberto Gracia Trell (de Publicacions)
Amaya Gállego Lamarca (de Relacions) Tresa Estabén Laguía (d'Organización e Comercialización) María Villalba Monente (d'Amostranza) Óscar Latas Alegre (d'Estudios e Bibliotecas) Mónica Loncan Bergua (de Consellers d'Aduya) Paz Ríos Nasarre (de Comunicación) |
Alberto Gracia Trell (de Publicacions)
Amaya Gállego Lamarca (d'Estudios e Bibliotecas) Tresa Estabén Laguía (d'Organización e Comercialización) Ana Cris Vicén Pérez (d'Amostranza) Ánchel Ramírez (de Consellers d'Aduya) Paz Ríos Nasarre (de Comunicación) |
Coleccions d'a Editorial CFA[editar | editar código]
Serie cheneral en aragonés Obras orichinals en aragonés, de creyación literaria en cheneral, incluyindo-ie volúmens colectivos de premios literarios.
Puens enta ra parola Colección de vocabularios, lexicos, glosarios e obras lexicograficas en cheneral.
A tefla de cuatro fuellas Colección d'asayos, estudios, rechiras e obras d'espardidura.
A tuca Creyación literaria: obras d'os millors autors que escriben en aragonés, testos clasicos e testimonials escritos orichinalmén en aragonés.
Os fustez Colección de traducions.
Charrín-charrán Colección de libros escolars e d'amostranza
O gua Colección de literatura infantil e chovenil.
