Bulgaria

Republica de Bulgaria Република България Republika Balgariya
(En detalle) (En detalle)
Lema nacional: Съединението прави силата (bulgaro; «A unión fa la fuerza»)
Himno nacional: Mila Rodino
Situación de Bulgaria
Capital  • Población  • Coordenatas	Sofiya 1.328.790 (2020) 42°42' N 23°20' E
Mayor ciudat	Sofiya
Idiomas oficials	Bulgaro
Forma de gubierno President Primer ministro	Republica Rumen Radev (Румен Радев) Dimitar Glavchev (Димитър Главчев)
Independencia  • Declarada  • Reconoixida	de l'Imperio Otomano 3 de marzo de 1878 22 de setiembre de 1908
Superficie  • Total  • % augua Mugas Costas	Posición 102º 110.910 km² 0,3 1.808 km 354 km
Población  • Total  • Densidat	Posición 89º 7.112.154 (2020) 67.9 hab/km²
PIB (PPA)  • Total (2019)  • PIB per capita	Posición 65º EUR€ 61.239.423.600 EUR€ 8.748
Moneda	Lev (BGN)
Chentilicio	Bulgaro/a
Zona horaria  • en Verano	EET (UTC+2) EEST (UTC+3)
Dominio d'Internet	.bg
Codigo telefonico	+359
Prefixo radiofonico	LZA-LZZ
Codigo ISO	100 / BGR / BG
Miembro de: UE, OTAN, ONU, OSCE

A Republica de Bulgaria ye un estau europeu situau en os Balcans, que muga a lo norte con Rumanía, a lo sud con Grecia y Turquía y a l'ueste con Serbia y Montenegro y con Macedonya d'o Norte. A suya capital se troba en a ciudat de Sofiya.

Población

A suya población ye de 7.537.929 habitants (2003) en una superficie de 110.910 km², con una densidat de población de 67,9 hab/km².

Población por etnias y nacionalidaz

En 1991 s'estimaba que de 8.989.000 habitants de Bulgaria 8.200.000 yeran bulgaros etnicos, (pero los zingaros no se censaban aparte y podeban estar-ne uns 150.000), y 700.000 turcos rumelís. Entre 100.000 y 200.000 son bulgaros musulmans u pomacos.

Cheografía

Provincias y municipios

Dende 1987 dica 1999 Bulgaria yera formada por 9 provincias (oblasti, en singular oblast); pero dende 1999, tien 28 provincias. Istas provincias son:

Blagoevgrad. Burgas. Dobrich. Gabrovo. Haskovo. Kardzhali. Kyustendil. Lovech. Montana. Pazardzhik. Pernik. Pleven. Plovdiv. Razgrad.

Rousse. Shumen. Silistra. Sliven. Smolyan. Sofiya. Sofiya (oblast). Stara Zagora. Targovishte. Varna. Veliko Tarnovo. Vidin. Vratsa. Yambol.

Istas provincias tienen 264 municipios.

Prencipals localidaz

Posición	Ciudat	Población	Posición	Ciudat	Población
1.	Sofiya	1.393.565	9.	Dobrich	103.309
2.	Plovdiv	379.119	10.	Shumen	89.613
3.	Varna	352.211	11.	Pernik	81.191
4.	Burgas	203.797	12.	Haskovo	76.397
5.	Russe	167.715	13.	Yambol	74.132
6.	Stara Zagora	152.619	14.	Pazardzhik	71.979
7.	Pleven	122.989	15.	Blagoevgrad	70.881
8.	Sliven	104.304	16.	Veliko Tarnovo	68.783

Historia

Encara que en o territorio de l'actual Bulgaria ya se i troban chacimientos arqueolochicos en o Paleolitico Meyo y en o Neolitico, no ye so que arredol d'o 3000 aC que i plegoron os primers pobladors indoeuropeus, los tracios, reconoixius por a suya habilidat con a metalurchia y por estar expertos chinetes. Tanimientres, no formoron garra unidat politica organizada dica que dentroron en contacto con os griegos que heban prencipiau a establir colonias con finalidaz comercials en as costas d'a mar Negra y que plegó enta la rechión l'Imperio Aquemenida. Alavez establioron en o sieglo V aC lo Reino odrysio, que en o dende 320 aC teneba la suya capital en Seutopolis.

Dende lo sieglo IV aC, con Filipo II de Macedonya lo Reino de Macedonya s'expandió enta lo norte, en apropiando-se d'os territorios tracios, dica lo punto que parte substancial d'as tropas con as que Aleixandre lo Gran redotó a l'Imperio Aquemenida y plegó dica la India estioron tracios.

Dende lo sieglo III aC a Republica romana prencipió la suya expansión por os Balcans, rematando la suya conquiesta total en o sieglo I dC, encara que mantenioron bel tiempo un chicot reino tracio. La luenga d'os tracios, lo tracio, encara sobrevivió dica lo sieglo V en bels puestos. En dividir-se l'Imperio Romano entre Honorio (qui recibió l'Imperio Romano d'Occident) y Arcadio (qui recibió l'Imperio Romano d'Orient, clamau Imperio Bizantín), os territorios de l'actual Bulgaria quedoron incorporaus a iste zaguero.

Etnochenesi d'os bulgaros

Os protobulgaros d'o baixo Danubio yeran un pueblo de luenga turquica que as fuents contemporanias denominaban "bulgaros". Os protobulgaros yeran aliaus d'unas tribus eslavas y s'heban feito con o control de territorios de l'Imperio Romano d'Orient entre la Cordelera d'os Balcans y lo Danubio. Ixe territorio, a lo norte d'a linia Jirecek yera habitau por poblacions romanizadas de luenga latina, que ya en l'alta Edat Meya serán conoixius como vlacos, que tamién irán eslavizando-se y serán cada vegada mes ixemenaus por os balcans.

En Tracia os chacimientos eslaus mes antigos se pareixen a los d'a cultura de Hlincea I (cultura documentada en l'actual territorio de Rumanía entre la segunda metat d'o sieglo VII y lo sieglo IX), y pareix coincidir con o naiximiento d'o primer estau bulgaro en a segunda metat d'o sieglo VII.

Os protobulgaros encomenzoron a eslavizar-se y fusionar-sen con os eslaus cuan arredol de l'anyo 865 lo rei Boris I se convirtió a lo cristianismo. A lo principio os bulgaros cristianos yeran aliniaus con Roma, pero Boris decidió aliniar-se con Costantinoble porque o papa de Roma no permitiba que hi hese en Bulgaria una seu metropolitana. Climent y Nahún, disciplos de Cirilo y Metodio, introducioron a liturchia en eslau eclesiastico y l'alfabeto glacolitico, y d'esta traza prenió importancia a luenga y cultura d'os eslaus, mes numerosos en a zona, debant d'a luenga y cultura d'os bulgaros de luenga turquica. En o sieglo vinient se constituyó una ilesia autonoma con o suyo patriarca.

Primer Imperio Bulgaro

Ta mas detalles, veyer l'articlo Primer Imperio Bulgaroveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O fillo de Boris I, Simeón, fue coronau Basileus en l'anyo 913, prenendo o títol de zar, y en 926 trasladó la capital ta Preslav, no guaire luent de Pliska. Este imperio bulgaro plegaba dica las actuals Serbia, Macedonya y Albania y ye conoixiu por os historiadors como primer Imperio Bulgaro. Bi habió un gran desarrollo artistico y literario, y a cultura bizantina s'ixemenaba por o mundo eslau.

D'alcuerdo con bella fuent l'emperador bizantín León VI o Sabio, en guerra contra la poderosa Bulgaria de Simeón clamó a los hongaros pa creyar-lis a los bulgaros un frent a la suya espalda. Os bulgaros reaccionoron clamando a los pazinacos pa que atacasen por a espalda a los hongaros. O resultau estió que os hongaros habioron d'abandonar as tierras que alavez ocupaban en Ucraína occidental y Moldavia y establir-sen en Panonia. Os pazinacos ocuporon o puesto d'os hongaros en Ucraína y Moldavia. L'Imperio Bulgaro perdió lo control d'os países vlacos y eslaus d'o norte d'o Danubio (d'alto u baixo l'actual Rumanía), y remató firmando a paz con Costantinoble en l'anyo 897, en pagas por cobrar un tributo anyal a l'Imperio Bizantín. En o Libro de los emperadors lo contan asinas:

De la cual cosa l'emperador ha havido grant desplazer e ha enviado tantost embaixadores con grandes donos e presentes a los de Hongría que estavan cerca del río de Istro pregandolos que.l fuesen contra los búrgaros por dapnificar su tierra

Dimpués de Simeón l'Imperio fació figa.

A cultura bizantina s'heba ixemenau tanto por o primer Imperio Bulgaro que tamién i plegoron ideyas heterdoxas, y d'esta traza l'asceta bulgaro Chuan Bogomil desenrollcó en o monesterio de Ryla (Macedonya) o bogomilismo.

Decadencia d'o primer Imperio y ocupación Bizantina

O rei Samuel prebó de reaccionar centrando lo suyo estau en Ohrid (Macedonya d'o Norte), pero l'emperador bizantín Basilio II invadió los zaguers territorios orientals que controlaban os bulgaros y en 1014 lis inflichió una gran derrota en a que los bizantins prenioron como brutal represalia vuedar os uellos de 14.000 presoners bulgaros, que ninvioron a lo rei por un tuerto. En o Libro de los Emperadors lo describen asinas:

E fueron presoneros búrgaros XV mil, a los cuales ha feito levar la vista sino a cada centenar uno, e aquel con un ojo, por manera que guidás los otros, e aprés los soltó francos e les mandó que fuessen a su senyor

Samuel muere dos días dimpués. Cuatre anyadas dimpués o zaguer rei de Bulgaria muere en una batalla.

Basilio II concedió la chestión a l'aristocracia nativa y confirmó la posición d'a ilesia. Os bizantins preboron d'helenizar a los bulgaros, como a atros eslaus de territorios que tornaban a controlar. As planas d'o norte yeran zona de paso pa pueblos turquicos d'as estepas que s'escapaban de lo poder de l'Imperio Bizantín: pazinacos, usios y cumans, probables antipasaus d'os gagauzes. Bulgaria tamién estió zona de paso pa los cruzaus.

Segundo Imperio Bulgaro

Ta mas detalles, veyer l'articlo Segundo Imperio Bulgaroveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

A fins d'o sieglo XII los campesins bulgaros y los vlacos de rebeloron y constituyoron un nuevo estau bulgaro, que por estar tamién prou extenso ye conoixiu como "segundo Imperio Bulgaro" por os historiadors, y tamién conoixiu como "Imperio Bulgaro-Vlaco" por historiadors rumanos, por ser gobernau por una dinastía vlaca, os Asán. A capital yera Tarnovo; a ilesia recuperó la suya autocefalia y bi habió una recuperación cultural.

En a Cronica de Morea parlan de Caloynni Assan, emperador de Bulgaria, qui invadió l'Imperio Latino de Costantinoble en ixas envueltas de Balduín I. Tamién nombran a un Andronico Assani en relación con os almogávars:

Et el emperador, huyendo aquesto, tantost enuió vn su nieto, fillo de su hermana, el cual se nombraua micer Andronico Assani con buena companya

En o Libro del Trasoro denominan barbaros a los bulgaros, considerando-los como ocupants ilechitimos de Tracia, considerada part de Grecia:

Et depues es la tierra de Tracia, en do los barbaros son, e Romanya e Constantinoble

A invasión mongola de 1242, cuan tornaban d'Hongría fació que los bulgaros dentrasen en decadencia. O suyo estau s'esminglanaba y se succedeban diferents dinastías, belunas d'orichen cumán. A costa d'a mar Negra y a boquera d'o Danubio se poblaban por pueblos turquicos de diferents oríchens, talment antipasaus d'os actuals gagauzes. A fins d'o sieglo XIV bi heba dos reinos bulgaros principals, un con capital en Tirnovo y atro con capital en Vidina. En 1382 los otomans prenioron Sofía, en 1393 o reino de Tirnovo, y en 1396 o reino de Bidina. En 1396 os hongaros y franceses organizoron una cruzada anti-otomana, plegando a ocupar Vidina, pero los vencioros en Nikopol. En 1444 atra cruzada antiotomana fue redotada en a batalla de Varna, en a que morió ño rei Vladislau de Polonia y Hongría.

Dominación otomana

Dende fins d'o sieglo XIV dica fins d'o sieglo XVIII Bulgaria fació part de l'Imperio Otomán. Talment por deseyo d'os griegos o patriarcau bulgaro fue suprimiu en 1393, y la ilesia bulgara dependeba dreitament d'o patriarca de Costantinoble. A ilesia s'helenizó y a luenga eslava fue abandonada por o griego. A nobleza bulgara, muit diezmada por as guerras, fue deportada enta Anatolia u se convertió a l'islam. A mayoría d'os campesins bulgaros continoron estando ortodoxos, pero en o sud-ueste bi heba bulgaros que se convertioron a la relichion musulmana convertindo-se en os actuals pomacos. Os turcos s'establioron en diferents parz de Bulgaria, como la Dobrucha, pero tamién i heba bulgaros islamizaus que se convertioron en turcos por prener a luenga turca. Cualques poblacions de Bulgaria se facioron multietnicas. Os mercaders griegos, armenios y chudieus (sefarditas) ocuporon o puesto d'a clase meya. Os chudieus yeran admesos en os vicos turcos d'as ciudaz. A lo norte d'os Balcans as ciudaz solas que i heba yeran dominadas por ciudadans griegos y guarnicions turcas. As viellas ciudaz de Rumelia fuoron helenizadas. As tradicions bulgaras se mantenioron vivas en secreto en os monesterios, gracias a Paisij, un monche d'Athos que en l'anyo 1762 escribió una historia d'o suyo pueblo bulgaro.

A presión rusa

L'aislamiento d'os bulgaros se crebó dende la segunda metat d'o sieglo XVIII por contacto con os rusos, que abanzaban enta lo sud desgastando l'Imperio Otomán. En a guerra de 1768 entre l'Imperio Otomán y l'Imperio Ruso, as tropas rusas plegoron dica Bulgaria y en 1774 vencioron a los otomans en a batalla de Chumla. Por o tractau de Küçük-Kaynarca Rusia s'adchudicó lo poder de protección d'os cristianos ortodoxos de l'Imperio Otomán.

En 1829 os griegos se rebeloron y las tropas rusas ocuporon una gran parte d'as tierras bulgaras, prenendo Adrianopoli. Por o tractau de paz Vlaquia y Moldavia se convertioron en un protectorau ruso y Bulgaria permaneixió en l'Imperio Otomán, pero muitos bulgaros emigroron enta Vlaquia y Moldavia (especialment enta Besarabia).

O separatismo bulgaro

En a decada de 1830, los misioners europeus occidentals y nortamericanos s'intresoron por os bulgaros. En ixa epoca amaneixió lo nacionalismo bulgaro, amaneixió una burguesía bulgara comerciant y artesana, s'ubrioron escuelas y s'imprimioron obras en luenga eslava. A primera biblia bulgara fue publicada en 1840 por Eli Riggs. Os mesmos otomans fomentaban este nacionalismo pa desgastar l'emerchent nacionalismo griego. A presión popular consiguió que la liturchia tornase a estar en luenga eslava, y en 1870 lo soldán creyó un exarcau bulgaro independient, en contra d'a voluntat d'o patriarca de Costantinoble. A pesar d'o refirme otomán a lo nacionalismo bulgaro y las concesions bi heba descontento por a plegada de refuchiaus musulmans de l'Imperio Ruso como circasians, nogais y tartaros de Crimea, (venius dimpués d'a guerra de Crimea). Os nacionalistas bulgaros emigraus en Bucarest s'organizoron.

L'autonomía

En 1875 esclató una insurrección en Bosnia que arribó en Bulgaria en 1876. Os turcos reaccionoron con una represión brutal con os bachibozuks, que facioron mortaleras y devastoron o país. A opinión publica europea s'escandalizada por as noticias de Bulgaria (un panfleto de Gladstone denunciaba lo que s'escayeixeba) y los países europeus, en especial Gran Bretanya y Rusia, presionoron pa que diesen l'autonomía a Bulgaria. Rusia declaró la guerra a l'Imperio Otomán en 1877 y invadió Bulgaria con o refirme de l'exercito rumano y d'una lechión bulgara. En chinero de 1878 l'exercito ruso yse trobaba bien amán de Costantinoble. O 3 de marzo de 1878 Rusia imposó a lo soldán o tractau de Sant Estefano. D'alcuerdo con este tractau se creyó un estau pan-bulgaro con os territorios de l'actual Bulgaria, as tierras eslavas de Macedonya, una francha de l'actual Serbia y lo norte de Tracia Oriental. Como esto suposaba un desmantelamiento de l'Imperio Otomán en Europa y un desequilibrio de fuerzas en os Balcans, Austria y Gran Bretanya presionoron a Rusia pa que firmase o congreso de Berlín en chulio de 1878 por que se manteneba o status quo. O prencipau autonomo de Bulgaria se reduciba a la rechión de Sofía y las tierras a lo norte d'os Balcans. A cuenca d'o río Maritsa seguiba estando una provincia otomana, dita Rumelia Oriental, encara que con cierta autonomía, con un gobernador cristiano y baixo la supervisión d'as grans potencias. Macedonya no heba cambiau de situación.

En 1878 una asemblea constituyent aplegada en Tarnovo adoptó una Constitución y esleyó a Aleixandre de Battemberg como prencipe. En Rumelia Oriental os representants d'as potencias europeas elabororon estatutos organicos.

Bulgaria independient

En 1885 l'exercito bulgaro ocupó Rumelia Oriental. Os serbios reaccionoron pero fuoron derrotaus. Aleixandre cesó a los conselleros rusos sin consultar a Rusia y lo zar organizó un complot militar en contra d'él. Aleixandre habió d'abdicar y prenió o control Stepan Stambolov. Stambolov consiguió que l'exarca nombrase bispes bulgaros en Agrida y Veles, alavez territorio otomán. L'asemblea de 1887 esleyó como prencipe a Ferrando de Saxonia-Coburgo, que en 1894 se desfació d'o dictador Stambolov. En 1908 Ferrando proclamó en Tirnovo la independencia de Bulgaria y prenió lo títol de zar con l'aprobación d'Austria-Hongría, y con reconoiximiento internacional. Bulgaria no teneba una clase meya, pero a suya aristocracia teneba una mentalidat civil y laica (os tiempos de control griego en a ilesia facioron que os bulgaros estasen bella cosa allenaus d'a ilesia). En 1903 bi heba habiu una prebatina d'insurrección bulgara en Macedonya y Tracia, pero fracasó dimpués de 3 meses, esclafada por os otomans.

As guerras balcanicas

Ta mas detalles, veyer l'articlo Guerras balcanicasveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

En 1912 Bulgaria declaró a guerra a l'Imperio Otomán chunto con Serbia y Grecia, encomenzando la Primera Guerra Balcanica. Adrianopoli cayó en marzo de 1913 y los otomans se rindioron. Por o tractau de Londres d'o 30 de mayo de 1913 l'Imperio Otomán abandonó los territorios a l'este d'a linia Enos-Midia. Os tres estaus vencedors no se posoron d'alcuerdo con o reparto. Os bulgaros, que heban combatiu en l'este, se consideran os autenticos vencedors d'os turcos, pero heban estau os serbios qui heban ocupau o centro y norte de Macedonya. Os griegos heban ocupau tierras d'o sud de Macedonya pobladas por eslaus. O 23 de chunio Ferrando ordenó atacar a los serbios y griegos sin declaración de guerra, encomenzando la Segunda Guerra Balcanica. En a Segunda Guerra Balcanica os bulgaros fuoron atacaus tamién por os otomans y os rumanos, y perdioron a guerra. Por o tractau de Bucarest d'o 10 d'agosto de 1913 Bulgaria obtenió una extensión territorial en o sud, con una parte de Tracia que li daba acceso a la mar Echea, pero habió de ceder o sud de Dobrucha a Rumanía, y Adrianopoli y Tracia Oriental a Turquía. Serbia conservó la suya part de Macedonya, l'actual Macedonya d'o Norte.

As guerras mundials

Primera Guerra Mundial

En setiembre de 1915. mientres a Primer Guerra Mudial, Bulgaria fació liga con l'Imperio Austrohongaro y declaró la guerra a Serbia o 15 d'octubre. L'exercito serbio se trobó en una pinza y se retiró enta la mar a traviés d'Albania. As tropas bulgaras ocuporon a parte serbia de Macedonya d'o Norte y facion frent a las tropas d'os Aliaus que heban desembarcau en Tesalonica o 15 d'octubre (se creyó o frent d'Orient). Cuan Rumanía dentró en guerra en agosto de 1916 Bulgaria s'asoció a la contraofensiva d'as potencias centrals y ocupó Dobrucha d'o sud, que heba perdiu en a segunda Guerra Balcanica.

O 18 de setiembre de 1918 se crebó lo frent d'Orient y Bulgaria se veyó obligada a firmar un armisticio o día 29. O 3 d'octubre Ferrando abdicó en Boris III. O tractau de Neully d'o 27 de noviembre de 1919 imposó perduas territorials: Rumanía recuperó lo sud de Dobrucha, Serbia s'anexionó bel districto buegant de Bulgaria, Grecia ocupó Tracia Occidental, por o que Bulgaria perdió l'acceso a la mar Echea y s'empobrió l'antepaís d'ixa costa. En 1923 os griegos forachitoron a 250.000 bulgaros de Tracia y Macedonya, y los substituyoron por refuchiaus griegos fuyius de Turquía.

Periodo d'entreguerras

Encomenzó la dictadura campesina de Alexandre Stambolijski, que fue asasinau en 1923. Dimpués bi habió una insurrección comunista, seguida d'una represión. Dimpués s'escaició un periodo d'inestabilidat con desenrrollo d'o terrorismo. Se creyó un movimiento d'inspiración musoliniana pareixiu a los ustaixas, os komitadjis, salius d'o ORIM, (Organización Revolucionaria Interior de Macedonya, fundada a fins d'o sieglo XIX). A fins d'ixe mesmo anyo os oficials fomentoron un golpe d'estau. A l'anyo siguient se proclamó una dictadura exercida por o mesmo rei Boris III, que manifiestaba simpatías por o Tercer Reich.

Segunda Guerra Mundial

O 7 de setiembre por l'alcuerde de Craiova Bulgaria recuperó Dobrucha d'o sud, en un tiempo que Rumanía fue obligada a ceder territorios. En marzo de 1941 Bulgaria s'adhirió a lo Pacto Tripartito y fue recompensada con l'anexión d'una gran parte de Macedonya, d'o districto de Pirot de Serbia, y con a recuperación de Tracia. Os griegos de Tracia, uns 100.000, fuoron forachitaus en respuesta por a expulsión d'os bulgaros en 1923. O gubierno bulgaro prebó de ganar-se la simpatía d'os macedonyos eslaus y d'integrar-los.

Boris III se negó a entregar a los chudieus de Bulgaria a los nazis y a participar en a guerra contra la Unión Sovietica. En agosto de 1943 Boris III morió.

A Bulgaria comunista

Os dirichents bulgaros proboron en 1944 de pactar un alcuerde con as potencias occidentals, pero en agosto los sovieticos ya yeran prou amán, y penetroron en Rumanía. O 5 de setiembre la Unón Sovietica declaró a guerra a Bulgaria, que se rindió y fue presionada pa que declarase la guerra a Alemanya. As tropas bulgaras se retiroron de Grecia y de Yugoslavia. O 16 de setiembre os sovieticos ocuporon Sofiya (y ocuparán Bulgaria dica fins de 1947). O 28 d'octubre se firmó un armisticio en Moscú y o poder pasó a los comunistas.

O 9 de setiembre un golpe d'estau posó en o gubierno a lo Frent d'a Patria. O Partiu Comunista yera la sola fuerza organizada, organización que dependeba de Moscú, y prenió tot o poder con l'aduya de l'exercito d'ocupación. Dimpués de l'abolición d'a monarquía por referendum se proclamó la republica popular o 15 de setiembre de 1946. L'aduya sovietica permitió que por o tractau de París de 1947 Bulgaria conservase Dobrucha d'o Sud. En 1947 unos cuantos procesos eliminoron a los dirichents politicos no comunistas, como Nikolai Petkov, dirichent d'os campesins. En 1949 o Partiu Comunista sufrió una purga estalinista por parte d'os cuadros d'o partiu formaus en a Unión Sovietica que permitió apartar a parte d'os comunistas, acusaus de titismo. L'estalinista Valko Chervenkov se posó a la cabeza d'o partiu y dimpués y fue succediu por Todo Jirkov, qui seguirá los dictaus d'a Unión Sovietica.

A bulgaria postcomunista

En noviembre de 1989 Todo Jirkov fue cesau en as suyas funcions y acusau de corrupción. Tres anyadas dimpués fue condenau a siet anyadas de presón. Con o suyo succesor Petar Mladenov o Partiu Comunista se tornó socialista, y en as eleccions libres de chunio de 1990 obtenió 211 d'os 400 escanyos de l'Asemblea nacional. Os excomunistas compartioron o poder con a oposición (Unión d'as Fuerzas Democraticas). En chulio de 1991, o Parlamento adoptó una nueva constitución. As eleccions lechislativas d'octubre de 1991 dioron 110 escanyos a la UFD, 106 a lo Partiu Socialista y 24 a lo Movimiento d'os dreitos y libertaz d'os turcos y pomacos. Jeliou Gelev, lider d'a UFD, fue esleyiu president d'a Republica por sufrachio universal en chinero de 1992.

Bulgaria fue lo primer estau en reconoixer la independencia d'a Republica de Macedonya, encara que no ha reconoixiu a lo pueblo macedonyo como diferent d'o pueblo bulgaro.

Esporte

Bulgaria en os Chuegos Olimpicos

• Bulgaria en os Chuegos Olimpicos.
• Categoría principal: Categoría:Bulgaria en os Chuegos Olimpicos.

Bulgaria en os Chuegos Olimpicos ye representada per lo Comité Olimpico Bulgaro, creau en l'anyo 1923 y miembro d'o Comité Olimpico Internacional dende 1924. Participó por primera vegada en os I Chuegos Olimpicos pero de forma individual. Dende os Chuegos Olimpicos de 924 ha participau de forma mas u menos regularment y dende 1988 de forma consecutiva dica l¡actualida lo país ha obteniu un total de 231 medallas en as edicions de verano repartidas d'a siguient forma: 57 d'oro, 89 d'archent y 85 de bronce, os esportes en os que destaca son a luita y l'halterofilia an ha aconseguiu cuasi la metat d'as medallas.

En os Chuegos Olimpicos d'Hibierno ha participau en 21 edicions, estando Garmisch-Partenkirchen 1936 la suya primera participación en estes Chuegos. Lo país ha aconseguiu un total de 6 medallas en as edicions d'hibierno: 1 d'oro, 2 d'archent y 3 de bronce.

Vinclos externos

• Se veigan as imáchens de Commons sobre Bulgaria.
• Essential History of Bulgaria in Seven Pages

• Datos: Q219
• Multimedia: Bulgaria / Q219