Imperio Latino de Costantinoble

	Imperio Latino de Costantinoble ; Imperium Romaniae
	Situación de L'Imperio Latino con os suyos vasallos (Reino de Tesalonica, Ducau d'Atenas y Principau d'Acaya) y os estaus succesors griegos (l'Imperio de Nicea, o Despotau d'Epiro y l'Imperio de Trapisonda) dimpués d'a partición de l'Imperio bizantín, c. 1204. As mugas son cuestionables.
Capital	Costantinoble
Idioma oficial; • Atros idiomas	Latín y francés antigo; Griego
Relichión	Catolicismo (oficial); Ilesia Ortodoxa (popular)
Gubierno	Monarquía

En 1204, os caballers d'a Cuatrena Cruzata establioron un estau cruzau conoixiu como Imperio Latino u Romanya, con base en Costantinoble, dimpués de saqueyar a ciudat. Se proclamaban como os succesors cristianos de l'Imperio Bizantín. Balduín IX, conte de Flandres, fue coronau como o suyo primer emperador o 16 de mayo de 1204.

A denominación latina de l'emperador yera Imperator Romaniae, u "Emperador de Romanya". O nombre no teneba garra relación con o estau homofono actual; ye a forma latina d'o títol d'Emperador Bizantín, a qui l'emperador latino esperaba reemplazar. O Imperio Bizantín nunca no se dició d'esta traza y o títol d'emperador yera Basileos Rhomaion, u emperador d'os romanos. Esto produció o curioso efecto que en Europa i heba a lo mesmo tiempo tres imperios romanos, estando-ne atro o Sacro Imperio Romano Chermanico.

L'Imperio Latino reclamó totas as tierras controladas por l'Imperio Bizantín en l'inte que Costantinoble fue conquiesta y exercioron control sobre arias de Grecia (os estaus cruzaus: o Reino de Tesalonica, o Principau d'Acaya y lo Ducau d'Atenas. Manimenos a mayoría d'o territorio permaneixió en mans d'estaus rivals dirichius por aristocratas de l'imperio antigo, como o Despotau d'Epiro, l'Imperio de Nicea y l'Imperio de Trapisonda. Os parients de Balduín luitoron por muitas anyatas por os suyos dominios. L'Imperio Latino de Costantinoble remató o 25 de chulio de 1261 cuan Miguel VIII Paleologo reconquirió Costantinoble derrocando a lo zaguer emperador latino Balduín II.

Os hereus de Balduín II siguioron fendo servir o títol d'emperador de Costantinoble por un sieglo, y se veyeban como teoricos duenyos d'estaus latinos en a Mar Echea.

Datos: Q178897
Multimedia: Latin Empire / Q178897