Mar Echea

Mar Echea Αιγαίο Πέλαγος - Ege denizi
Oceano u mar d'a IHO (n.º id.: 28)
Anvista dende satelite d'a mar Echea.
Localización administrativa
Estau	Grecia Turquía
Cheografía
Mar	Mar Mediterranio
Continents	Europa/Asia
Mars mugants	Mar de Marmara y mar Chonica
Subdivisions	Mar de Tracia, mar de Creta, mar de Mirto
Superficie	180.000 km²
Largaria maxima	600 km
Amplaria maxima	400 km
Mapa
Localización d'a mar Echea

A mar Echea (Ege denizi en turco, Αιγαίο Πέλαγος en griego) ye una mar que fa parte d'a mar Mediterrania, y que desepara a l'este Turquía en Asia y a l'ueste Grecia en Europa. S'estendilla dende la isla de Creta a lo sud dica l'estreito d'os Dardanelos a lo norte, conectando por meyo d'ixe estreito con a mar de Marmara. A parte sud d'a mar Echea, dita mar de Creta, en o espacio que s'estendilla dende as islas Cicladas a lo norte dica Creta a lo sud, conecta con a resta d'a mar Mediterrania, d'a cual la separa chustament Creta, amás d'atras islas mas chicotas como Citerea, Kharpatos u Rodas. En a suya parte norte, dita mar de Tracia, banya as costas de Tracia y a peninsula de Gallipoli.

Entre Turquía y Grecia i hai disputas politicas sobre cuantos aspectos d'o control politico d'o espacio d'o mar, como l'aria d'as respectivas auguas territorials, lo control aerio y la delimitación d'os dreitos economicos sobre la plataforma continental. Estas cuestions se conoixen como la Disputa d'o Echeo.

Toponimia

Bi ha un mito que explica o nombre d'a mar Echea, la cuala diz que proviene d'un lechendario rei ateniense dito Echeo y qui, en creyer que lo suyo fillo Teseo heba estau devorado per lo Minotauro en o suyo laberinto, s'arrulló a este mar dende lo cabo Sunio. Chuan Ferrández d'Heredia nos transmite iste mito en a suya compilación Grant Cronica d'Espanya:

Reculliosse enla barca & yendo su camino a athenas dexo la h(er)mana mayor de aq(ue)llas en huna ysla saluatge. & leuo la ot(r)a menor co(n)sigo. & tomola por muller los marin(er)os co(n) alegria que hauie(n) noles me(m)bro de mudar la uela. & q(u)ando el Rey uido la uela negra pe(n)sando q(ue) su fijo fues muerto. de gra(n)t dolor que huuo la(n)çose de una penya endo estaua. enla mar & murio. Et por esto huuo no(m)bre aq(ue)lla mar pielago de egeo entroa el tiempo que los habitadores d(e)la tierra fueron x(r)i(sti)anos. & los calog(er)os fazie(n) s(an)c(t)a uida por aq(ue)llas yslas & corronpieron el uocable & como primero dizien pielago de egeo mudaro(n) le nombre layo pielago que quiere dezir sancto pielago.

Economía

El Mar Echeo ye muito important para la economía tanto de Grecia como de Turquía. Per el transitan muitas mercancias, personas y turistas que visitan las suyas islas y costas, amás de tener buenos caladeros de pesca.

Turismo

Grecia ye un d'os países mas visitaus d'Europa y d'o mundo, con mas de 33 millons de visitantes en 2018 y la industria d'o turismo ye arredol d'una cuarta parte d'o suyo producto interior bruto (PIB). Las islas d'o Echeo represientan gran parte d'o suyo exito, las mas conoixidas y visitadas son Santorini, Creta, Lesbos, Delos y Mykonos que son destins turisticos habituals. Se calcula que uns 2 millons de turistas visitan Santorini cada anyo.

Turquía tamién ha teniu exito en o desarrollo de zonas turisticas y en l'atracción d'un gran numero de turistas, lo que ha contribuyiu a incrementar la importancia d'o turismo en o suyo PIB. L'antiga ciudat de Troya, Patrimonio d'a Humanidat, se troba en a costa turca d'o Echeo.

Vinclos externos

• Se veigan as imáchens de Commons sobre a mar Echea.

• Datos: Q34575
• Multimedia: Aegean Sea / Q34575

[[Categoría:Mares d'Asia]|Echea]