Austria

De Biquipedia
Articlo d'os 1000
Republica d'Austria
Republik Österreich
Bandera de Austria Escudo de Austria
(En detalle) (En detalle)
Lema nacional:
Himno nacional: Land der Berge, Land am Strome
Situación de Austria
Situación de Austria
Capital
 • Población
Viena
1.931.593 (2022)
Mayor ciudat Viena
Idiomas oficials Alemán1
Forma de gubierno Republica federal
Alexander Van der Bellen
Karl Nehammer
Formación 27 de chulio de 1955
Superficie
 • Total
 • % augua
Mugas
Costas
Posición 112º
83.878,99 km²
0%
2.558 km
0
Población
 • Total (2021)
 • Densidat
Posición 93º
8.932.664
106 hab/km²
PIB (PPA)
 • Total (2018)
 • PIB per capita
Posición 26º
US$ 461.432 millons
US$ 51.936
Moneda Euro (€)
Chentilicio Austriaco/a[1]
Zona horaria UTC+1
Dominio d'Internet .at
Codigo telefonico +43
Prefixo radiofonico OEA-OEZ
Codigo ISO 040 / AUT / AT
Miembro de: ONU, UE, OCDE, OSCE, COE
1Son cooficials o esloveno en Carintia y o croata y l'hongaro en Burgenland.

Austria (en alemán Österreich; nombre oficial: Republica d'Austria, Republik Österreich) ye un país y estau d'Europa, organizato como una republica federal y miembro d'a Unión Europea dende 1995. Austria ye situata en Europa Central y muga con Alemanya, Republica Checa, Eslovaquia, Hongría, Eslovenia, Italia, Suiza y Liechtenstein.

Os orichens de l'Austria chermanofona se troban en o sieglo IX, cuan os territorios de l'Alta y Baixa Austria estioron cada vegata mas poblatos. O nombre alemán "Ostarrichi" ye documentato por primera vegata en un documento oficial de 996 y tien as suyas radices en o primer milenio a.C. Dende allora la palabra s'ha desenvolicato dica Österreich.[2]

Austria ye una democracia representativa parlamentaria formata nueu estaus federals[3] y ye un d'os seis países europeus que han declarato neutralidat permanent.[3] Austria ye miembro d'as Nacions Unidas dende a suya independencia en 1955[4] y dentró en a Unión Europea en 1995.

Toponimia[editar | modificar o codigo]

O nombre alemán Österreich deriva de l'alemán antigo Ostarrîchi "Territorio de l'Este".[5] A primera forma d'o nombre estió celtica: norig con o mesmo significato. Ista palabra fue romanizata a Noricum. Regio australis y a forma latina Austria son neolochismos d'a Edat Meya.

En "La Flor de las Ystorias d'Orient" s'escribe Ostaricha u Staricha:

apres de Aquesto los tartaros passaron deues alamanna et fueron tanto que plegaro(n) ala ribera de vn Rio qui corre por el ducat de ostaricha los tartres cuydaron passar por vn puent que aqui auia mas el duch de staricha fizo fornir el pue(n)t et assi no pudieron passar auant los tartres

A designación oficial ye de Republica d'Austria (en alemán Republik Österreich). Dimpués d'a cayita de l'Imperio Austrohongaro en 1918 se deciba Estau alemán d'Austria[6] pero dimpués d'o Tractau de Saint-Germain-en-Laye habió de cambear o suyo nombre a "Republik Österreich" ("Republica d'Austria"). O nombre "Republik Deutsch-Österreich" se puet trobar en as estampetas y diners de prencipios d'os anyos 1920. O nombre se tornó a cambear mientres o rechimen faixista (dende 1934 dica 1938) a Estau Federal d'Austria (Bundesstaat Österreich), pero tornó a estar o mesmo con a independencia y a "Segunda Republica Austriaca" (1955 – actualidat).

Cheografía fisica[editar | modificar o codigo]

O Großglockner.

Austria ye un país chicot y montanyoso, localizato en Europa central, entre Alemanya, Italia y Hongría, con una superficie d'o doble de Suiza. No tien denguna costa maritima; muga con Suiza y Liechtenstein a l'ueste, Alemanya, a Republica Checa y Eslovaquia a lo norte, Hongría a l'este, y Eslovenia y Italia a lo sud. A rechión mas occidental d'o país ye una francha estreita entre Alemanya y Italia, d'entre trenta y dos y sesanta kilometros de longaria. A resta d'Austria, a l'orient, tien una longaria, de norte a sud, de 280 km.

O río Danubio en Dürnstein.

A mayor parti d'o territorio d'Austria se troba aintro d'a sección oriental d'os Alpes que tienen en ista zona altarias de mas de 3.000 metros. As sierras d'Austria s'estendillan d'este a ueste y son deseparatas una de l'atra por amplas vals. As sierras d'o norte incluyen os Alpes de Tirol d'o Nord y os Alpes de Salzburgo. En o centro, as sierras incluyen o Hohe Tauern, que contiene o Großglockner, o pico mas alto d'o país, con 3.797 m.[7] As sierras d'o sud incluyen os Alpes d'o Ötztal, os Alpes de Zillertaler, os Alpes Carnicos, y as montanyas de Karawanken. Bi ha, amás d'istas sierras, atras que s'estendillan en a dirección norte-sud.[7]

A población se conzentra en as vals d'os ríos entre os cualos destaca o Danubio, que dentra en Austria por Passau, en a muga con Alemanya; pasando por Linz y Viena, dica Bratislava, en a muga con Eslovaquia. Por a muga con Alemanya plega l'Inn, que pasa por Innsbruck, y tien como afluent prencipal o río Salzach, que pasa por Salzburgo. O laco Constanza ye o mas gran d'o país y forma la muga occidental con Alemanya y Suiza.

Clima[editar | modificar o codigo]

Mapa con as temperaturas meyas anyals.

O clima en Austria se puede asignar a los climas pleviosos templado-calido d'a comarca templada-fría-humida. En o ueste y norte d'Austria i ha un clima oceanico, a ormino caracterizau per aires humidos d'o ueste. En l'este, en cambeo, o clima ye continental de baixas precipitacions, con veranos calurosos y hibiernos fredos.

O clima rechional d'Austria ye fuertement influenciau per a topografía alpina. A ormino existen considerables diferencias climaticas en distancias curtas y chicotas diferencias d'altitut. En augmentar l'altaria, se troban en primeras climas boreals y de tundra, y mesmo climas polars en as arias de tucas. No nomás a cresta alpina prencipal actúa como una división climatica. As vals de Föhntal, ricas en sol (per eixemplo, Inntal) contrastan con os paisaches de cuencas propensas a la boira (per eixemplo, a cuenca de Klagenfurt), os bordes d'as montanyas con plevidas intensas (per eixemplo, Bregenzerwald) contrastan con as vals ixutas alpinas interiors (per eixemplo, Alpes de Ötztal).

O rango total d'a temperatura meya anyal de l'aire en Austria s'extiende dende mas de 11 °C en os districtos internos de Viena dica menos de -9 °C en a tuca d'o Grossglockner. En as tierras baixas densament pobladas, a temperatura ye sobretot entre 8 °C y 10 °C. Lo promeyo d'a comarca ye de 6,0 °C. A isoterma meya anyal de zero graus ye d'arredol de 2200 m sobre o livel d'a mar. En cuencas zarradas y vals per debaixo de 800 a 1200 m sobre o livel d'a mar, os augmentos de temperatura con l'altitut (inversión de temperatura) a ormino ocurren en os meses d'hibierno.

Mientres que en a mayor parti d'Austria chinero y chulio son en promeyo os meses mas fredos y calidos de l'anyo, en as altas montanyas isto s'aplica a febrero y agosto. A temperatura meya de l'aire en chinero en os paisaches planos de l'iste ye entre 0 °C y -2 °C y caye entre -4 °C y -6 °C a uns 1000 m sobre o livel d'a mar. A valor mas baixa en l'aria d'os tucas mas altas ye arredol de -15 °C. En chulio as valors meyas fluctúan entre 18 °C y 20 °C en l'este y entre 13 °C y 15 °C a 1000 m. En Großglockner, a buega meya de zero graus no se supera mesmo en pleno estiu.

Organización politico-administrativa[editar | modificar o codigo]

Ta más detalles, veyer l'articlo Estaus d'Austriaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Estaus d'Austria.

Austria ye una republica federal que se divide en nueu estaus (Bundesländer):

  1. Burgenland.
  2. Carintia (Kärnten).
  3. Baixa Austria (Niederösterreich).
  4. Alta Austria (Oberösterreich).
  5. Salzburgo (Salzburg).
  6. Estiria (Steiermark).
  7. Tirol.
  8. Vorarlberg.
  9. Viena (Wien).

Cheografía humana y sociedat[editar | modificar o codigo]

Demografía[editar | modificar o codigo]

A población d'Austria yera en chinero de 2022 de 8.978.929 habitants.[8] A población d'a capital, Viena blinca d'os 1,93 millons[9] (2,5 millons incluyindo-ie l'aria metropolitana) estando asinas un cuatreno d'a población total d'o país. Viena ye una ciudat que ofreixe una gran oferta cultural, asinas como una sobrebuena calidat de vida.

En contraste con a capital, a resta de ciudaz no plegan a 1 millón d'habitants: a segunda ciudat mas gran ye Graz con bels 292.630 habitants, seguita por Linz (207.247), Salzburgo (155,416), Innsbruck (130.585), y Klagenfurt am Wörthersee (102.618). A resta de ciudaz austriacas tienen menos de 100.000 habitants.

Luengas[editar | modificar o codigo]

L'idioma oficial d'Austria ye l'alemán, parlato por un 88,6% d'a población, seguito por o turco (2,3%), serbio (2,2%), croata (1,6%), hongaro (0,5%) y bosnio (0,4%).[10] Una important minoría de fablants d'o esloveno vive en os estaus federals austriacos de Carintia y Estiria, estando arredol de 14.000 personas (seguntes o censo oficial austriaco; dica 50.000 seguntes atras fuents no oficials). En o estau mas oriental, Burgenland (d'antis mas parti hongara de l'Imperio Austrohongaro), arredol de 20.000 ciudadans austriacos parlan hongaro y bels 30.000 parlan croata. D'a resta de austriacos que son descendients de no-austriacos, a mayor parti tienen o suyo orichen en os países mugants, mas que mas en países de l'antigo bloque de l'este. Os ditos "treballadors huespedes" (en alemán Gastarbeiter) y os suyos descendients, asinas como os refuchiatos d'a guerra de Yugoslavia y atros conflictos, fan tamién parti d'una important minoría en Austria. Dende l'anyo 1994 os chitans tamién son reconoixitos como una minoría etnica en o país.

Pintura de Viena en a primera metat d'o sieglo XVIII, obra de Canaletto.

D'alcuerdo a lo censo publicato por Statistik Austria en l'anyo 2001[11] bi heba un total de 710.926 personas estrancheras vivindo en Austria. D'istas, 124.392 parlaban l'alemán como luenga materna (prencipalment inmigrants procedents d'Alemanya, Suiza y a provincia italiana de Bozen). As siguients nacionalidaz con mayor numero d'habitants en Austria son as procedents de l'antiga Yugoslavia con 240.863 personas (estando entre os mas numerosos 135.376 serbios y 105.487 croatas); os turcos con 123.417 (d'os cualos 25.155 tienen l'anglés como luenga nativa), os albaneses con 24.446, polacos 17.899, hongaros 14.699, rumanos 12.216, arabes 7.982, eslovenos 6.902 (sin d'incluyir a minoria autoctona), eslovacos 6.891, checos 6.707, persas 5.916, italianos 5.677, rusos 5.466, franceses 5.213, chineses 4.938, espanyols 4.264 y bulgaros 3.503.

A orografía montanyosa d'Austria ha feito que s'haigan desenvolicato muitos subdialectos de l'alemán. Manimenos, toz os subdialectos que se i charran perteneixen a lo dialecto austro-bavaro, de fueras d'o subdialecto charrato en o estau federal mas occidental, Vorarlberg, que perteneixe a lo dialecto alamanico. Bi ha tamién un alemán austriaco estandar con bella diferencia respective a l'alemán estandar d'Alemanya.

Musica[editar | modificar o codigo]

Wolfgang Amadeus Mozart (1756-1791).

O pasato d'Austria como potencia europea cheneró un ambient cultural que contrebuyó amplament con diferents formas d'arte, entre ellas especialment a la musica. Austria estió lo puesto de naixencia de grans compositors como Wolfgang Amadeus Mozart, Joseph Haydn, Franz Schubert, Anton Bruckner, Johann Strauss (pai), Johann Strauss (fillo) y Gustav Mahler asinas como bel miembro d'a Segunda escuela vienesa como Arnold Schoenberg, Anton Webern u Alban Berg.

Viena tenió una especial importancia como centro d'innovación musical. Mientres os sieglos XVIII y XIX os compositors yeran atrayitos a la ciudat gracias a lo patronache d'os Habsburgo, fendo de Viena a capital europea d'a musica clasica. En a epoca barroca bi habió importants influencias d'os folklors eslaus y hongaro en a musica austriaca. Compositors d'atras nacionalidaz como Ludwig van Beethoven vivioron a mayor parti d'as suyas vidas en Viena.

L'actual himno nacional austriaco, atribuito a Mozart, fue esleito dimpués d'a Segunda Guerra Mundial, cambiando-lo por o tradicional himno austriaco, obra de Joseph Haydn.

Austria tamién ha producito un notable musico de jazz, o teclista Josef Zawinul. L'artista pop y rock, Falco, internacionalment conoixito en os anyos 1980 tamién yera austriaco.[12] O batería Thomas Lang naixió en Viena en 1967 y actualment ye reconoixito por a suya habilidat tecnica.

Gastronomía[editar | modificar o codigo]

L'escalope vienés ye una birolla tipica d'Austria.

A causa d'a historia austriaca, as artes culinarias de Hongría, Bohemia, Italia y Francia en particular tienen un influxo en os platos tipicos austriacos d'hue. A ofierta se complementa con l'arte culinario rechional tradicional d'os estaus federatos. Os platos tipicos son o Tafelspitz, l'escalope vienés, o pollo frito d'Estiria, o pollo rustiu, o gulaix y platos de peix como a carpa y a truita. Os postres, como a Tarta Sacher, l'Apfelstrudel y o Kaiserschmarrn, han aconseguiu fama mundial.

Dica fa uns anyos, a chent minchaba sobretot en casa. Hue en día, especialment en as ciudaz mas grans, muitas personas minchan a ormino en pubs, restaurants, cafeterías, puestos de salchichas y tabiernas de kebab, en sucursals de cadenas de birolla rapida u en a carrera u en o transporte publico.

As variacions de café tradicionalment cautivadas componen a gama de cafeterías que se pueden trobar en tota Austria, seguindo l'eixemplo d'a cafetería vienesa. As primeras cafeterías s'establioron en Viena poco dimpués de 1683. Hue en día son mayoritariament cafés-restaurants, en os cuals se combina la tradición d'o café con l'ofierta d'o “ minchador burgués ”.

A viticultura tien una larga tradición en Viena, Baixa Austria, Estiria y Burgenland. Lo vin austriaco ye muit popular tanto en Europa como en l'extranchero. Mientres que dinantis yera común a producción sobretot en masa (en o Doppler, a redoma de dos litros), dende a decenio de 1980 muitos viticultores s'han especializau en a elaboración de vins de calidat.

A biera ye important como bebida diaria en Austria. Con cuasi 109 litros de consumo per capita y anyo y con 140 biereras, incluyidas marcas nacionals tradicionals como Gösser, Hirter, Ottakringer, Puntigamer, Schwechater, Stiegl y Zipfer, Austria puede clamar-se a ella mesma una nación bierera.

Referencias[editar | modificar o codigo]

  1. (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
  2. Brook-Shepherd, Gordon. The Austrians: A thousand-year odyssey. Carroll & Graf Publishers, Inc., 1997. ISBN 0-7867-0520-5.
  3. 3,0 3,1 Introducing Austria: A short history, Johnson, Lonnie; Ariadne Press, 270 Goins Court, Riverside, CA 92507, 1989 ISBN 0-929497-03-1
  4. Jelavich 267
  5. Gwillim, Law, States of Austria, Statoids
  6. Àustria - l'Enciclopèdia: Història: 1918 - 1920.
  7. 7,0 7,1 Austria. Land and Resources. MSN Encarta.
  8. Total population - At 1 January
  9. (de)Bevölkerungszahl 01.01.2022, Statistik Austria
  10. Statistik Austria, Die Bevölkerung nach Umgangssprache, Staatsangehörigkei und Geburtsland, pachina 75. PDF.
  11. (de) Statistik Austria, Die Bevölkerung nach Umgangssprache, Staatsangehörigkei und Geburtsland
  12. Falco, 2007, VH1.


Estaus d'Europa
Abkhasia3 | Albania | Alemanya | Andorra | Armenia2 | Artsakh3 | Austria | Azerbaichán1 | Belarrusia | Belchica | Bosnia y Herzegovina | Bulgaria | Cazaquistán1 | Croacia | Cheorchia1 | Chipre2 | Chipre d'o Norte2, 3 | Chequia | Dinamarca | Eslovaquia | Eslovenia | Espanya1 | Estonia | Finlandia | Francia1 | Grecia | Hongría | Islandia | Irlanda | Italia1 | Kosovo3 | Letonia | Liechtenstein | Lituania | Luxemburgo | Macedonya d'o Norte | Malta | Moldavia | Mónegue | Montenegro | Noruega | Osetia d'o Sud3 | Países Baixos | Polonia | Portugal | Reino Uniu | Rumanía | Rusia1 | San Marino | Serbia | Suecia | Suiza | Transnistria3 | Turquía1 | Ucraína | Vaticano
Dependencias: Åland | Akrotiri y Dhekelia | Chibraltar | Guernési | Isla de Man | Islas Feroe | Jèrri | Svalbard
1 Parti d'o suyo territorio ye difuera d'Europa. 2 Se troba en Asia, pero tien relacions historico-culturals con Europa. 3 Parcialment reconoixiu. 4 No reconoixito