Metalurchia

De Biquipedia
Articlo d'os 1000
Alto forno ta lo tractamiento de mineral de fierro.

A metalurchia ye a Ciencia, aintro d'o dominio d'a ciencia de materials, que estudia o comportamiento d'os elementos metalicos, os compuestos intermetalicos y as suyas aleacions. Tamién ye a tecnolochía d'os metals, a traza d'aplicar a Ciencia ta la suya utilización practica, a suya extracción, transformación y elaboración. A palabra metalurchia provién d'o griego antigo μέταλλον métallon ta designar bel puesto a on bi ha menas y lo sufixo -ουργός -ourgós, con o significau de treballo, significando asinas o conchunto lo treballo u extracción d'os metals.

A Ciencia d'a metalurchia puet dividir-se en dos grans brancas: d'una man a metalurchia quimica, d'atra man a metalurchia fisica. A metalurchia quimica s'ocupa mas que mas d'a reducción y oxidación d'os metals, amás de lo suyo rendimiento quimico; incluyindo-ie lo procesamiento d'os minerals, a extracción d'os metals, a termodinamica, a electroquimica y la degradación quimica d'os metals u corrosión. Sindembargo, a metalurchia fisica se centra en as propiedaz mecanicas y fisicas d'os metals y en o suyo rendimiento fisico, incluyindo-ie a cristalografía, a caracterización de materials, a metalurchia mecanica y as transformacions d'os materials.