Menería

De Biquipedia
(Reendrezato dende Minería)
Ir a la navegación Ir a la búsqueda
Interior d'una mena en Escuita, Teruel

A menería ye una actividat economica d'o sector primario representada por a espleitación u extracción d'os minerals que s'han acumulau en o suelo y subsuelo en forma de chacimientos. Pendendo d'o tipo de mineral a quitar l'actividat se divide en menería metalica (arambre, oro, archent, aluminio, plomo, fierro, mercurio, etc) que son emplegaus como materias primas basicas ta a fabricación d'una variedat de productos industrials. Mientres que en a menería no metalica u tamién dita de pedrera y construcción (archila, quarz, zafir, esmeralda, granito, marbre, mica, etc) son usaus como materials de construcción y materia prima de choyería, ornamentación, entre atros usos. Atro tipo de menería, ye a extracción d'os minerals enercheticos u combustibles, emplegaus mas que mas ta chenerar enerchía, como por eixemplo o petrolio, gas natural y carbón.

Cal sinyalar que a menería ye una d'as actividatz mas antigas d'a humanidat, ya que se sabe que dende tiempos d'a prehistoria l'hombre ha feito servir quantos minerals ta a fabricación d'ainas y armas. Con o paso d'os sieglos se convirtió en una important industria, que ha creyau una serie de tecnicas, estudeos y analisis fisico-quimicos con l'obchectivo d'amillorar a exploración y espleitación d'os chacimientos. Por a suya parti, as companyías u interpresas meneras son as encargadas de desembolicar-la como industria, pendendo a suya competencia d'a producción de mineral quitau y d'a calidat y cantidat d'o mesmo. Ta entender-la millor, l'actividat se divide en gran, meyana y chicota menería, manimenos, en bells países existe una quarta categoría, l'artesanal.

Ta regular a industria menera os gubiernos nacionales y as instituciones financieras internacionals han creyau una serie de reformas lechislativas, que buscan l'armonía y a estabilidat d'o sector productivo. Istas en a suya gran mayoría son enfocadas en o cudiau d'o medio ambient y en a seguridat d'os meners, manimenos, as violacions a istas normas en os zaguers tiempos han prevocau quantos desastres en diferents países d'o mundo. D'atra man, distintas organizacions, como o Banco Mundial, consideran a la menería como un d'os indicadors basicos d'as posibilidatz de desembolique economico d'una localidat, rechión u país.

Menería en Aragón[editar | editar código]

Construcción menera en Arinyo

Aragón ye un país con una gran riqueza en o subsuelo, a on se pueden trobar recursos minerals ta diferents usos. [1]

En o relativo a las espleitacions meneras con fins enercheticas han destacau historicament os chacimientos de carbón en as cuencas meneras d'Oliet, Utriellas-Aliaga y Mequinenza, emplegadas mas que mas ta servir como combustible a centals termicas como as d'Andorra y Escatrón.

Debiu a la variedat y calidat d'as espleitacions meneras existents en iste campo, Aragón se puet considerar líder en o sector d'a menería no metalica, destancando a extracción d'archilas, mas que mas as archilas especiales que se fan servir en a elaboración de granulars absorbents domesticos y industrials y archilas refractarias, que s'emplegan en a fabricación de materials de construcción como gres, porcelanas, azuleixos, pavimentos y sanitarios.

D'importancia estratechica ye tamién a extracción de sal chemma en Aragón, que se fa servir en a producción de cloro y sosa, destacando en iste campo as menas de Remolinos.

Respective a la espleitación de minerals metalicos, encara que testimonial en l'actualidat, tenió una gran importancia en o pasau con as menas de fierro de Sierra Menera, que suministraban material a la industria siderurchica de Murviedro.

Menería enerchetica en Aragón[editar | editar código]

Carbón[editar | editar código]

Anvista d'as menas de carbón d'Estercuel

En Aragón se pueden trobar os chacimientos de lignito negro u hulla sub-bituminosa mas importants d'Espanya. Son distribuyius en tres zonas prencipals, Oliet, Utrillas-Aliaga, que deixoron d'espleitar-se en chinero de 2019[2][3] y Mequinenza, que remató a suya actividat en chunio de 2014[4]. A cuenca de Castellot (Teruel) deixó d'espleitar-se en 1990. D'atra man bi ha zonas con incicios de tener reservas de carbón en o sector oriental d'a provincia de Uesca (Llascuarre-Capella u Caixigar), asinas como antracitas en Sallent de Galligo Buscar y a redolada de Bisagorri, Castilló de Sos y Las Pauls. As tres zonas d'a menería d'o carbón mas importants en Aragón son:

En l'anyo 1999 o carbón aragonés suposaba un 20 % d'o total estatal. Encara que as reservas baixo tierra aragonesa son de l'orden de 1.000 millons de toneladas, a espleitación aturó ta cutio en Aragón con o cierre d'as menas d'Arinyo en 2019, rematando asinas con 100 anyos de tradición menera d'o carbón en o país.[5] As prencipals razons ta l'albandono de l'actividat menera d'o carbón en Aragón estioron as siguients:

  • Os lignitos aragoneses tienen un alto conteniu en ixufre, lo que fa que ta mirar de privar grieus problemas medioambientals como a plevia acida, s'haiga de desulfurar. Isto tien un important coste economico. En o caso d'as cenisas d'o carbón que veniba de Mequinenza cal adhibir amás o problema d'o suyo baixo punto de fusión.
  • O pre d'o carbón importau, provenient de países como Estatos Unitos u Australia desplazó a o carbón aragonés d'os mercaus a tamás d'as midas presas por as institucions publicas a traviés d'aduyas ta mirar de frenar iste desequilibrio.

Gas natural[editar | editar código]

Encara que entre l'anyo 1979 y os anyos 1990 se quitó gas natural d'os chacimientos que bi heba en a val d'Acumuer, amán d'Isín, estando os más importants d'Aragón, en l'actualidat ya no i ha producción.

Dende que s'acotoló o gas istos chacimientos de Serrablo s'han feito servir como almadazens naturals de gas procedent d'Alcheria.

Menería metalica en Aragón[editar | editar código]

Antiga espleitación de fierro en Sierra Menera

A unica espleitación important de minerals metalicos que existió en Aragón estió a de Sierra Menera y yera destinada a suministrar fierro a l'antiga planta siderurchica de Murviedro, hue ya desapareixida. S'estima que as reservas de fierro son de bells 33 millons de toneladas y tienen un alto conteniu de magnesita.

Bi heba d'antis mas tamién espleitacions de metals muito menors en atras zonas d'a cheografía aragonesa como en Moncayo (fierro), en a val de Chistau (cobol y níquel), en Calcena (plomo, arambre y archent), en Estupinyán (manganés) u en Bielsa y Parzán (fierro y plomo-zinc) entre atras.

Antimás d'istos chacimientos bi ha indicios de que podrían trobar-se en Aragón atros materials metalicos como antimonio, tungstén, molibdén, arseni u bismuto. S'han feito bellas rechiras ta mirar de trobar signos d'a presencia de totz ells, destacando as relacionadas con l'uranio en a redolada de Mequinenza.

Encara que no pareixe guaire probable que exista probabilidat de trobar grans chacimientos de minerals metalicos en territorio aragonés, si que s'han localizau metalotectos ligaus a la tectonica en zonas d'o Pireneu y o Sistema Iberico lo que podría levar a espleitaciones meneras d'intrés.

S'ha de considerar amás a posibilidat de trobar en o Pireneu, chacimientos de minerals metalicos sobre os que encara no s'ha feito garra prospección, como por eixemplo litio, berilio, niobio u tantal, entre atros. En a provincia de Uesca bi ha permisos d'investigación ta oro y sulfuros, centrau en skarns.

Menería no metalica en Aragón[editar | editar código]

Archilas especials[editar | editar código]

Bi ha una espleitación menera de sepiolita y paligorskita en a redolada de Mara-Orera-Ruesca, en a provincia de Zaragoza, minerals emplegaus ta a elaboración de granulars absorbents domesticos y industrials.

As reservas d'istas menas son de a o menos 1,3 millons de toneladas, encara que probablement bi haiga belatros 3 millons, estando o porcentache de sepiolita d'entre un 65 y un 80%. En l'anyo 1999 bi habió una producción de bellas 60.000 toneladas, treballando más de 60 personas en iste sector.

Podrían existir reservas en atras zonas d'a provincia de Zaragoza como Burcharaloz u Borcha.

Archilas refractarias[editar | editar código]

Aragón ye o primer productor d'o Estau Espanyol en o que fa a archilas refractarias, entre as que se troban as archilas plasticas y as archilas con un alto conteniu en alumina. S'espleitan en l'actualidat en La Canyada de Beric, Foz Espalda-Bezeit y Castellot, todas en a provincia de Teruel. D'antis mas bi habió tamién espleitacions d'archilas ceramicas plasticas en as localidat teruelanas de Crivillén, Gargallo, Estercuel, Arinyo, Oliet, Los Olmos y Tronchón. A producción total ye de mas de 850.000 toneladas a l'anyo entre as 14 espleitacions existents en as que treballan mas de 140 personas.

O emplego d'as archilas refractarias ye mas que mas a fabricación de refractarios, gres, porcelana, azuleixos, pavimentos y sanitarios.

Sal[editar | editar código]

Bi ha un total de 6 espleitacions de sal en Aragón, estando a mas important a de Remolinos (Zaragoza), pero existindo tamién belatras en a zona oriental d'a provincia de Uesca.

As reservas en Remolinos son de mas de 4 millons de toneladas, estando asinas un d'os mas importants chacimientos en toda Europa. A espleitación de l'actual chacimiento de sal chemma (halita) d'o Mioceno, en a que treballan 35 personas, tien una producción anyal de bellas 190.000 toneladas. O suyo destín ye a electrolisi ta a producción de cloro y sosa y en menor mida l'alimentación animal.

En a provincia de Uesca bi ha quantas espleitacions con diferents metodos. En Naval, Calasanz y Peralta de la Sal s'espleitan manantials salinos asociaus a formacions triasicas d'o borde pirenenco. D'atra man en Castillón d'o Puent bi ha una espleitación por lixiviación por sondeos, lo que fa que se consideren en o futuro as cavidatz creyadas ta l'almadazenamiento de gas natural u hidrocarburos. A producción total d'a provincia de Uesca ye de bellas 35.000 toneladas anyals, treballando 15 personas en iste sector.

En l'anyo 1999 bi habió una producción total en Aragón de bellas 225.000 toneladas de sal.

Caolín y arenas caoliniferas[editar | editar código]

Bi ha chacimientos de caolín y arenas caoliniferas en o Sistema Iberico teruelano y a parti sudueste d'a provincia de Zaragoza.

En l'actualidat a prencipal espleitación se troba en Río Deva, en a provincia de Teruel, encara que tamién s'estendilla por partis d'a provincia de Valencia. A producción total d'Aragón ye de mas de 150.000 toneladas, treballando mas de con 15 personas en iste sector.

Bi ha estimacions de reservas importants, en as redoladas de Camariellas-Alcalá de la Selva y Alfama d'Aragón-Cubel.

Ocres[editar | editar código]

Os ocres son minerals formaus con oxidos de fierro procedents de l'alteración d'hematites, magnetita y goethita. Industrialment no tienen aplicación metalurchica. Bi ha chacimientos en Tierga y Lueixma (provincia de Zaragoza) que creyan empleo ta mas de 30 treballadors.

Aragón ye a primera productora d'o Estau Espanyol, suposando a suya producción, que en l'anyo 1999 estió de bellas 40.000 toneladas, un 70% d'a producción estatal.

O destín d'os ocres ye a fabricación de pigmentos aditivos d'alta densidat ta pinturas y cargas especials.

Barita[editar | editar código]

Bi ha en Aragón una sola espleitación de barita en Tobet (provincia de Zaragoza), que teneba en l'anyo 1999 una producción de bellas 1.500 toneladas que se destinan mas que mas a o suyo emplego como aditivo de pinturas. Bi ha belatras antigas esplotacions, hue albandonadas en o Sistema Iberico.

Atros minerals industrials[editar | editar código]

Podrían existir reservas de poco intrés d'asbestos en Bielsa y magnesita en a zona occidental d'a provincia de Teruel.

S'ha espleitau a bauxita en Foz Espalda (Teruel), encara que as reservas son chicotas y tienen alto conteniu en oxidos de fierro, por lo que no ye guaire intresant como mena d'aluminio sea prácticamente nulo. D'atra man as reservas de distintos tipos d'archilas lateriticas, de 10 millones de toneladas, son importants en Aragón. Tampoco no s'espleitan dende fa anyos os chacimientos de ixufre de Libros (Teruel).

Bi ha habiu tamien espleitacions intermitents de fluorita, encara que de poca importancia en Sallent de Galligo (Uesca), o suyo potencial menero pareix manimenos chicot.

Os chacimientos de potasa son importants en a zona d'as Cinco Villas mugants con Navarra[9], a on se ye mirando d'ubrir dos menas de 113 km² entre os termins municipals d'Undués de Lerda y Urriés (Aragón), Sangüesa y Xabier (Navarra).[10]

Rocas industrials[editar | editar código]

Cheso[editar | editar código]

Antigos furnos de cheso en Chuslivol

Os chacimientos de cheso en Aragón son a-saber-los, mas que mas os apareixius en o Terciario en a Depresión d'Ebro y a Comunidat de Calatayú y, en menor mida, en o Mesozoico en o Sistema Iberico y o Prepireneu.

Constituyen a mayor reserva chesifera d'Europa y se tracta de chesos de gran calidat y pureza que se pueden emplegar en a elaboración de prefabricaus de cheso, chesos blancos y escayolas. Bi ha 5 espleitacions importantes, que teneban en 1999 una producción total de bellas 700.000 toneladas y más de 20 treballadors. O 95% d'a producción de cheso en Aragón procede d'a provincia de Zaragoza.

Calsinera y dolomías[editar | editar código]

Se pueden trobar calsineras en Aragón en tot o espectro estratigrafico que va dende o Cambrico enta o Mioceno. As prencipals espleitacions se distribuyen mas que mas por Morata de Xalón, Muel, Mezalocha, Belchit y Calatorau en a provincia de Zaragoza; Andorra, Villafranca del Campo, San Blas y Valdecebro en a provincia de Teruel; y Fonz, Baldellou y Estadilla en a provincia de Uesca. D'atra man en Morés (Zaragoza) s'espleitan dolomías. En total mas de 20 pedreras que dan treballo a 120 personas y produciban en 1999 2,5 millons de toneladas.

A mas gran parti d'a producción va destinada a aridos y a la producción de cimento, estando as calsineras ta uso ornamental nomás un 1-2% d'a producción.

Rocas ornamentals[editar | editar código]

En o sector d'as rocas ornamentals, prou important en Aragón, se pueden distinguir entre calsineras (marborias u no), piedras d'arena y chesos (alabastro).

As prencipals espleitacions de calsinera ta iste sector se troban en Calatorau, Fuent de Todos y Puebla d'Albortón en a provincia de Zaragoza, La Iglesuela, Cantaviella, Mosqueruela, Castellot y Puertomingalbo en a provincia de Teruel y chicotas espleitacions en a provincia de Uesca, como as existents en Broto-Fiscal, Aísa y Canfranc.

A producción en o sector yera en 1999 de bellas 40.000 toneladas; estando a metat concentrada en a provincia de Zaragoza y a resto entre Uesca y Teruel; con mas de 70 treballadors.

Bi ha tamién en Aragón chicotas espleitacions de marbre, con una producción total de bellas 20.000 toneladas y de piedra d'arena (en Fuent de Todos, Tagüenca u Gotor), con una producción total de bellas 50.000 toneladas.

Cal destacar tamién que encara no s'espleitan as pizarras y granitos d'o Pireneu debiu a motivos medioambientals y a la baixa calidat d'as primeras.

Alabastro[editar | editar código]

Alabastro

Aragón ye o primer productor estatal d'alabastro, espleitando-se en as rocas prodecents de l'Oligoceno y Mioceno en a Depresión d'Ebro. As espleitacions mas importants se troban en Quinto, Viliella d'Ebro, La Zaida, Almochuel y Fuents d'Ebro en a provincia de Zaragoza y Albalat de l'Arcebispe, La Puebla d'Íxar y Zaila en a provincia de Teruel.

En total en 1999 a producción en estió de mas de 40.000 toneladas, estando 100 os treballadors d'as 12 espleitacions que bi heba. Mas d'un 80 % d'a producción tien o suyo orichen en a provincia de Zaragoza.

Archilas comunas[editar | editar código]

Bi ha a-saber-las archilas comunas en Aragón, estando os prencipals chacimientos en Fuents d'Ebro, Calatayú y Mallén en a provincia de Zaragoza; Alcoleya de Cinca, Villanueva de Sixena, Sarinyena, Tamarit de Litera y Fraga en a provincia de Uesca; y Galv, Alcanyiz, Castellot, Las Parras de Castellot y Alacón en a provincia de Teruel. Entre as 13 espleitacions que bi ha a producción ye de 400.000 toneladas anyals y ocupando a 30 treballadors.

O destín d'istas archilas ye a fabricación de cimento, así como de productos de tierra cueta (tella, ladriellos, etc.).

Areniscas y quarcitas[editar | editar código]

As piedras d'arena se troban en chacimientos d'o Cretacico inferior y o Terciario, estando as prencipals espleitacions en La Iglesuela y Mosqueruela en a provincia de Teruel y atras mas chicotas en as provincias de Zaragoza y Uesca. A producción total ye de bellas 6.000 toneladas anyals. S'emplegan como rocas de construcción u ornamentals.

As quarcitas provienen d'o periodo Paleozoico en o Sistema Iberico y encara que son abundants nomás s'espleitan en Morés (Zaragoza).

Ofitas[editar | editar código]

As ofitas que bi ha Aragón se pueden trobar en as formacions Keuper d'o Sistema Iberico y o Prepireneu. Nomás s'espleita activament en Estupinyán (Uesca), con una producción de 400.000 toneladas.

Se veiga tamién[editar | editar código]

Referencias[editar | editar código]

Vinclos externos[editar | editar código]