Depresión d'Ebro
A depresión d'Ebro dende o punto de vista estratigrafico ye una cuenca d'antepaís que se fundió quan se plegoron os monts Pirineus. Dende o punto de vista cheofisico ye una "plataforma". Corresponde en part a lo que se conoix como val d'Ebro
Historia cheolochica[editar | modificar o codigo]
A cuenca d'antepaís se plenó de sedimentos terciarios, procedents d'a erosión d'o Sistema Iberico y, sobre tot, d'os Pirineus. En o centro evaporiticos (chesos) y en as marguins terrichenos (archila, arenas, ruellos de glera). En o Mioceno superior yera plena de tot, y sedimentoron as piedras calsineras pontianas d'as muelas d'o sector central (Sierra d'Alcubierre por eixemplo) y empecipió l'apertura enta a mediterrania. S'orichinó o proto-Ebro, y empecipió a erosión d'os materials terciarios, quedando as piedras calsineras pontianas y qualques almendrons d'o Baixo Aragón como parte alta en as zonas menos erosionadas en os puestos entre dos ríos, (plataformas estructurals y pueyos testigo).
Zonación[editar | modificar o codigo]
Los cambios laterals de facies que bi ha en los sedimentos que plenoron la cuenca (y en las rocas sedimentarias que en resultan), presentan diferencias en la resistencia a la erosión (erosionabilidat), y en resultan diferents modelaus litolochicos. Las diferiencias en estructurals cheolochicas fan que i haiga diferents modelaus estructurals.
La zona marguinal de la depresión d'Ebro gosa estar más alta que lo centro. La zona marguinal norte de la depresión d'Ebro ye lo semontano pirenenco, y la zona marguinal sud lo semontano iberico, que no ye tant bien definiu.
En las comarcas situadas entre las sierras prepirenencas exteriors y la ribera d'Ebro ye posible distinguir uns quantos sectors: semontano pirenenco, depresión presemontana y plataformas estructurals.
En lo primer sector bi ha unas sierras modeladas en almendrons oligocenos y miocenos que fan de semontano. En Cinco Villas estas sierras son Penya,[1] Uncastiello, Luesia,[2] Biel y Luna.[3]
En lo segundo sector a erosionabilidat de las archilitas ha feito que se formen fondadas y foyas de dirección E-W: Cinco Villas,[3], A Violada, ecetra. Estas foyas se situan a menor altaria que las sierras semontanesas situadas a lo norte y que las muelas de la depresión d'Ebro situadas a lo sud y creyan en conchunto una depresión de lo sud de lo semontano. Adintro de las foyas de la depresión presemontana bi ha glacis y focos d'endorreísmo.
En lo tercer sector las calsineras fan de livel resistent a la erosión y se forman plataformas estructurals a diferents altarias. Las muelas de la depresión d'Ebro son las plataformas mas altas y se forman en los interfluvios, luent d'Ebro y los suyos afluents, que como totz los cursos fluvials exercen una erosión regresiva. En Cinco Villas destacan la plana Negra y los Monts de Castellón. En Monegros destaca la sierra d'Alcubierre.
Clima[editar | modificar o codigo]
O clima ye mediterranio semiarido continentalizau en o sector més central (Monegros, Bardenas, ecetra...), pero en os semontanos no ye tan seco.
Referencias[editar | modificar o codigo]
- ↑ (es) Paloma Ibarra Benlloch: Marco geográfico y rasgos geomorfológicos de la comarca de Cinco Villas. Publicau en Comarca de Cinco Villas. Colección territorio, nº 25. Gubierno d'Aragón, Departamento de Politica Territorial, Chusticia y Interior, 2017. pp. 27-28.
- ↑ (es) Eduardo Viñuales Cobos: Red Natural de Aragón. Comunidad de Calatayud nº 33, 2007. p. 14.
- ↑ 3,0 3,1 (es) Antonio Higueras Arnal (coordinador): Geografía de Aragón Tomo I. Editorial Guara. pp 49-52.
Bibliografía[editar | modificar o codigo]
- (es) Francisco Pellicer Corcellano, María Teresa Echevarría Arnedo: Formas de relieve del centro de la depresión del Ebro. Institución Fernando el Católico. 1989.