La Puebla d'Íxar

	La Puebla d'Íxar
	Municipio d'Aragón
Entidat; • País; • Provincia; • Comarca	Municipio; Aragón; Teruel; Baixo Martín
Superficie	60,78 km²
Población; • Total	; 914 hab. (2013)
Altaria; • Meyana	; 254 m.
Distancia; • 163 km; • 78 km	; enta Teruel; enta Zaragoza
Alcalde	Pedro Bello Martinez
Codigo postal	44510
Chentilicio	Pueblano
Patrons	Asumpción de María
Ríos	Martín
Coordenadas	41°13′20.10″N 0°26′37.46″U
	La Puebla d'Íxar La Puebla d'Íxar en Aragón
	Web oficial

Este articlo trata sobre La Puebla d'Íxar. Pa atros emplegos de lo toponimo Puebla se veiga Puebla (desambigación).

La Puebla d'Íxar (La Puebla de Híjar en castellano) ye un municipio aragonés de la provincia de Teruel, situau en la comarca de lo Baixo Martín.

La suya población ye de 982 habitants (2012) en una superficie de 60,78 km² y una densidat de 16,55 hab/km².

Cheografía[editar | modificar o codigo]

La Puebla d'Íxar ye situau en un plan, a 254 metros d'altaria dencima de lo livel d'a mar y a una distancia de 163 km de Teruel, la capital de la suya provincia, y de 78 km de Zaragoza, la capital d'Aragón, con abundants auguas sotorranas. Lo suyo termin municipal ye travesau por lo río Martín

La gara de lo tren (Ferrocarril de la Val de Zafán) se fació a bells cientos de metros de lo nuclio més antigo de lo lugar. Actualment una carrera luenga une la estación con lo nuclio antigo.

En lo suyo termin, pero más cerca de Zaila y La Zaida ye lo despoblau de La Romana, que se menciona en textos de principios de lo sieglo XII. Atros nuclios de población tamién hué deshabitaus son La Romaneta, Torre la Sorda, Torre L'Ausín y Fabrica Salitraría. Cerca de La Romaneta trobamos la LIC de Val de Mesón con una important presencia d'aus esteparias.

Muito en las afueras de lo lugar bi ha un poligono industrial situau en la marguin de la carretera nacional N 232 en dirección Zaragoza dito Venta del Barro con la fabrica de Prenavisa, un hostal y lo club Shangai-Lilí. En la Guerra Civil Espanyola estió un campo d'aviación.

Mugas[editar | modificar o codigo]

Binazeit, Zaila	La Zaida	Sastago
Almochuel		Exatiel
	Íxar	Sant Per de Calanda

Parla[editar | modificar o codigo]

L'aragonés residual de La Puebla ye uno de los primers que s'estudioron. Felix Monge, profesor de la Universidat de Zaragoza, que ye naixito en Mainar, vivió de nino en La Puebla y publicó un estudio incompleto en 1951. La parla de La Puebla teneba ya n'ixas envueltas de Felix Monge menos aragonesismos que las parlas d'Íxar u Sant Per porque la zucrera y la estación trayoron muita población d'atros lugars de la redolada, como la familia de l'actriz Sara Mora Romeo y tamién de muit luent. Los factors socioculturals yeran prou diferents a los de la redolada, car yera un lugar industrializau. Manimenos encara rechistró los imperfectos traiban y saliban y muito vocabulario.

La embotada de los de La Puebla ye en aragonés: los d'Íxar lis dicen bachanos probablement porque son auguas ta baixo de lo río Martín (Baixanos > Bachanos por cheada). Los de Binazeit (pronunciau en la redolada Binazai) tamién dicen asinas a los de Zaila, auguas ta baixo de lo río Aguas. La mesma embotada tienen los de Muniesa.

Toponimia[editar | modificar o codigo]

Lo nombre feba referencia a un poblau anterior a la repoblación dito Gayén, asinas por eixemplo en la decada de 1450 lo sinyor d'Íxar Chuan Ferrández d'Íxar y Centelles escribiba:

Anuezco e perpetua, indivisible e inseparable unión fago de los castillos, villas e lugares de Ixar, Urrea, la Pobla de Gayen e la Pobla de Benalfajar, de Belchit, Almonezir e la Pobla d'Albortón, e de Lezera e de Binazeit, con toda la jurisdiccion civil e criminal

Con lo tiempo s'imposará l'apelativo d'Íxar, en especial quan son forachitaus los moriscos. Podemos veyer l'alternancia en Pobla de Izar de lo Fogache de 1495 y Pobla de Gayén u Puebla de Gayén en un texto de 1502.

Encara bi ha toponimos en aragonés u con trazas aragonesas: Valletas, El Bochar, Espartosa, Ferrada, Ferraduras, Fila Badía, Fila del Pino, Fila Jordana, Fila Ráfales, Fila Rilla, Foguera, Foladaza, La Presquera, La Torraza, Loma el Coleto, Los Valellos, Mayuelos, Molino Rafel, Ojo Ferrerón, Plana San Antón, Planas, Basales, Val de Zaila, etz... Foladaza ye una zaica que riega lo que antes se diciba Foya de la Daza u Suelto de San Per, y perteneixeba a lo termin de Sant Per de Calanda que mugaba con La Romana. Mayelos ye una trascripción yeista de Malluelo que significa "vinyero chóven" en aragonés medieval y testimonia la tradición viticultora de la redolada antes de las grans plagas de Filoxera.

Curiosos son los microtoponimos El Chárif, una plaza con una fuent a la entrada de lo lugar, y Val de Zafán, que podría estar un caso de metatesi dende l'adaptación aragonésa de Hassán: *Val de Fazán > Val de Zafán. Val de Zafán dió nombre a un tren, lo Ferrocarril de la Val de Zafán y la suya linia ferria que travesaba las comarcas de lo Baixo Aragón, Matarranya y Tierra Alta dica arribar en Tortosa, a on li diciban Lo Banyero.

Apellius[editar | modificar o codigo]

Son caracteristicos los apellius Artal, Bordonaba, Gareta, Mugüerza, Pina, Pellicena, Polo, Baguer, Sierra y los d'orichen occitán Guallar (derivau de Guallart) y Lambea (derivau de como se diz en gascón Lembeye y castellanizau como la zaica Gayén en Gaén y foyeta en foeta por perda de -y- epentetica).

Demografía[editar | modificar o codigo]

Evolución demografica

1362 f	1495 f	1842	1857	1860	1877	1887	1897	1900
-	-	2.321	2.343	2.274	2.150	2.152	1.900	1.934

1910	1920	1930	1940	1950	1960	1970	1981	1991
2.276	2.790	2.837	2.328	2.651	2.506	2.105	1.534	1.256

1992	1994	1996	1997	1998	1999	2000	2001	2002
-	-	1.145	-	1.117	1.105	1.089	1.078	1.074

2003	2004	2005	2006	2007	2008	2009	2010	2011
1.035	1.013	1.015	1.016	1.005	1.018	-	1.006	-

2012	2013	2014	2015	2016	2017	2018	2019	2020
-	-	-	-	-	-	-	-	-

2021	2022	2023	2024	2025	2026	2027	2028	-
-	-	-	-	-	-	-	-	-

1717-1981: población de feito; 1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración[editar | modificar o codigo]

Reparto de concellers[editar | modificar o codigo]

Eleccions municipals
Partiu	1979	1983	1987	1991	1995	1999	2003	2007	2011
Izquierda Unida									5
Partido de los Socialistas de Aragón									2
Partido Popular									1
Partido Aragonés									1
Total									9

Alcaldes[editar | modificar o codigo]

Lista d'alcaldes
Lechislatura	Nombre	Partiu politico
1979–1983	José Antonio Félez Calvo ^[1]	UCD
1983–1987
1987–1991
1991–1995
1995–1999	Juana María Barreras Falo	Partido de los Socialistas de Aragón
1999–2003	Juana María Barreras Falo	Partido de los Socialistas de Aragón
2003–2007	Juana María Barreras Falo	Partido de los Socialistas de Aragón
2007–2011	Juana María Barreras Falo	Partido de los Socialistas de Aragón
2011–2015	Pedro Bello Martínez	Izquierda Unida

Puestos d'Intrés[editar | modificar o codigo]

Molimentos relichiosos[editar | modificar o codigo]

Ilesia parroquial de la Natividat de la Virchen, una ilesia de lo sieglo XVIII.
Ermita de Nuestra Sinyora de las Dolors y de lo Santo Sepulcre, una ermita de lo sieglo XVII.