Bulgaria

De Biquipedia
Ir ta: navego, busca
Република България
(Republika Balgariya)
Bandera de Bulgaria Escudo de Bulgaria
(En detalle) (En detalle)
Lema nacional: Съединението прави силата
(bulgaro; «A unión fa la fuerza»)
Himno nacional: Mila Rodino
Situación de Bulgaria
Capital
 • Población
 • Coordenatas
Sofiya
1.208.930 (2004)
42°42' N 23°20' E
Mayor ciudat Sofiya
Idiomas oficials Bulgaro
Forma de gubierno Republica
Rosen Plevneliev
Marin Raykov
Independencia
 • Declarata
 • Reconoixita
d'o Imperio Otomano
3 de marzo de 1878
22 de setiembre de 1908
Superficie
 • Total
 • % augua
Mugas
Costas
Posición 102º
110.910 km²
0,3
1.808 km
354 km
Población
 • Total
 • Densidat
 • Densidat
Posición 89º
7.537.929 (2003)
67.9 ab./km²
67.9 hab/km²
PIB (PPA)
 • Total (2005)
 • PIB per capita
Posición 65º
US$ 71.381 millons
US$ 9.205
Moneda Lev (BGN)
Chentilicio Bulgaro, bulgara
Zona horaria
 • en Verano
EET (UTC+2)
EEST (UTC+3)
Dominio d'Internet .bg
Codigo telefonico +359
Prefixo radiofonico LZA-LZZ
Codigo ISO 100 / BGR / BG
Miembro de: UE, OTAN, ONU, OSCE

A Republica de Bulgaria ye un país europeu situato en os Balcans, muga a lo norte con Rumanía, a lo sud con Grecia y Turquía y a l'ueste con Serbia y Montenegro y con a Republica de Macedonia. A suya capital ye Sofiya.

Población[editar | editar código]

A suya población ye de 7.537.929 habitants (2003) en una superficie de 110.910 km², con una densidat de población de 67,9 hab/km².

Población por etnias y nacionalidatz[editar | editar código]

En 1991 s'estimaba que de 8.989.000 habitants de Bulgaria 8.200.000 yeran bulgaros etnicos, (pero os zingaros no se censaban a parte y en podeban estar-ne uns 150.000), y 700.000 turcos rumelís. Entre 100.000 y 200.000 son bulgaros musulmans u pomacos.

Cheografía[editar | editar código]

Provincias y municipios[editar | editar código]

Dende 1987 dica 1999 Bulgaria yera formata por 9 provincias (oblasti, en singular oblast); dende 1999, tien 28 provincias. Istas provincias son:

Istas provincias tienen 264 municipios.

Prencipals localidatz[editar | editar código]

Posición Ciudat Población Posición Ciudat Población
1. BG Sofia coa.svg Sofiya 1.393.565 9. Dobrich-coat-of-arms.svg Dobrich 103.309
2. Plovdiv-coat-of-arms.svg Plovdiv 379.119 10. Emblem of Shumen.png Shumen 89.613
3. Varna 352.211 11. Pernik-coat-of-arms.svg Pernik 81.191
4. Burgas-coat-of-arms.svg Burgas 203.797 12. Haskovo-coat-of-arms.svg Haskovo 76.397
5. Rousse-coat-of-arms.svg Russe 167.715 13. Yambol Coat of Arms.jpg Yambol 74.132
6. Stara-Zagora-coat-of-arms.svg Stara Zagora 152.619 14. Pazardzhik-coat-of-arms.svg Pazardzhik 71.979
7. Pleven-coat-of-arms.svg Pleven 122.989 15. Emblem of Blagoevgrad.svg Blagoevgrad 70.881
8. BUL Сливен COA.png Sliven 104.304 16. Veliko-Tarnovo-coat-of-arms.svg Veliko Tarnovo 68.783

Historia[editar | editar código]

Etnochenesi d'os bulgaros eslavos[editar | editar código]

Os proto-bulgaros d'o baixo Danubio yeran un pueblo de luenga turquica que as fuents contemporanias denominaban "bulgaros". Os bulgaros turquicos yeran aliatos d'unas tribus eslavas y s'heban feito con o control de territorios d'o Imperio Román d'Orient entre a Cordelera d'os Balcans y o Danubio. Ixe territorio, a lo norte d'a linia Jirecek yera habitato por poblacions romanizatas de luenga latina, que ya en l'alta Edat Meya serán conoixitos como vlacos, que tamién irán eslavizando-se y serán cada vegata més ixemenatos por os balcans.

En Tracia os chacimientos eslavos més antigos se pareixen a los d'a cultura de Hlincea I (cultura documentata en l'actual territorio de Rumanía entre a segunda metat d'o sieglo VII y lo sieglo IX), y pareix coincidir con o naiximiento d'o primer estato bulgaro en a segunda metat d'o sieglo VII.[1]

Os bulgaros encomenzoron a eslavizar-se y fusionar-sen con os eslavos quan arredol de l'anyo 865 o rei Boris I se convirtió a lo cristianismo. A lo principio os bulgaros cristians yeran aliniatos con Roma, pero Boris decidió aliniar-se con Costantinoble porque o papa de Roma no permitiba que hi hese en Bulgaria una seu metropolitana. Climent y Nahún, disciplos de Cirilo y Metodio, introducioron a liturchia en eslavo eclesiastico y l'alfabeto glacolitico, y d'esta traza prenió importancia a luenga y cultura d'os eslavos, més lumerosos en a zona, debant d'a luenga y cultura d'os bulgaros de luenga turquica. En o sieglo vinient se constituyó una ilesia autonoma con o suyo patriarca.

primer Imperio Bulgaro[editar | editar código]

Gnome-searchtool.svg
Ta más detalles, veyer l'articlo Primer Imperio Bulgaroveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O fillo de Boris I, Simeón, fue coronato Basileus en l'anyo 913, prenendo o títol de zar, y en 926 traslada a capital ta Preslav, no guaire luent de Pliska. Este imperio bulgaro plegaba dica as actuals Serbia, Macedonia y Albania y ye conoixito por os historiadors como primer Imperio Bulgaro. Bi habió un gran desembolique artistico y literario, y a cultura bizantina s'ixemenaba por o mundo eslavo.

D'alcuerdo con bellas fuents o emperador bizantín León VI o Sabio, en guerra contra a poderosa Bulgaria de Simeón clamó a los hongaros pa creyar-lis a los bulgaros un frent a la suya espalda. Os bulgaros reaccionoron clamando a los pazinacos pa que atacasen por a espalda a los hongaros. O resultato estió que os hongaros habioron d'abandonar as tierras que alavez ocupaban en Ucraína occidental y Moldavia y establir-sen en Panonia. Os pazinacos ocuporon o puesto d'os hongaros en Ucraína y Moldavia. O Imperio Bulgaro perdió o control d'os países vlacos y eslavos d'o norte d'o Danubio, (d'alto u baixo l'actual Rumanía), remató firmando a paz con Costantinoble en l'anyo 897, a cambeyo de cobrar un tributo anyal a lo Imperio Bizantín. En o "libro de los emperadors" lo cuentan asinas:

De la cual cosa l'emperador ha havido grant desplazer e ha enviado tantost embaixadores con grandes donos e presentes a los de Hongría que estavan cerca del río de Istro pregandolos que.l fuesen contra los búrgaros por dapnificar su tierra

Dimpués de Simeón o Imperio s'enfeblix.

A cultura bizantina s'heba ixemenato tanto por o primer Imperio Bulgaro que tamién plegoron ideyas heterdoxas, y d'esta traza o asceta bulgaro Chuan Bogomil desembolicó en o monesterio de Ryla (Macedonia) o bogomilismo.

Decadencia d'o primer Imperio y ocupación Bizantina[editar | editar código]

O rei Samuel preba de reaccionar centrando o suyo Estato en Ohrid (Macedonia), pero o emperador bizantín Basilio II invade os zaguers territorios orientals que controlan os bulgaros y en 1014 lis infliche una gran derrota en a que os bizantins prenen como brutal represalia vuedar os uellos de 14.000 presioners bulgaros, que son ninviatos a lo rei por un tuerto. En o "Libro de los Emperadors" lo describen asinas:

E fueron presoneros búrgaros XV mil, a los cuales ha feito levar la vista sino a cada centenar uno, e aquel con un ojo, por manera que guidás los otros, e aprés los soltó francos e les mandó que fuessen a su senyor

Samuel muere dos días dimpués. Quatre anyatas dimpués o zaguer rei de Bulgaria muere en una batalla.

Basilio II concedió a chestión a l'aristocracia nativa y confirmó a posición d'a ilesia. Os bizantins preboron d'helenizar a los bulgaros, como a atros eslavos de territorios que tornaban a controlar. As planas d'o norte yeran zona de paso pa pueblos turquicos d'as estepas que s'escapaban a lo poder d'o Imperio Bizantín: pazinacos, usios y cumans, probables antipasaus d'os gagauzes. Bulgaria tamién estió zona de paso pa os cruzatos.

Segundo Imperio Bulgaro[editar | editar código]

Gnome-searchtool.svg
Ta más detalles, veyer l'articlo Segundo Imperio Bulgaroveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

A fins d'o sieglo XII os campesins bulgaros y os vlacos de rebelan y se constituye un nuevo estato Bulgaro, que por estar tamién prou extenso ye conoixito como "segundo Imperio Bulgaro" por os historiadors, y tamién conoixito como "Imperio Bulgaro-Vlaco" por historiadors rumans, por ser gobernato por una dinastía vlaca, os Asán. A capital yera Tarnovo, a ilesia recuperó a suya autocefalia y bi ha una recuperación cultural.

En a "Cronica de Morea" parlan de Caloynni Assan, emperador de Bulgaria, que invadió o Imperio Latín de Costantinoble en ixas envueltas de Balduín I. Tamién nombran a un Andronico Assani en relación con os almogávars:

Et el emperador, huyendo aquesto, tantost enuió vn su nieto, fillo de su hermana, el qual se nombraua micer Andronico Assani con buena companya

En o "Libro del Trasoro" denominan barbaros a los bulgaros, considerando-los como ocupants ilechitimos de Tracia, considerata part de Grecia:

Et depues es la tierra de Tracia, en do los barbaros son, e Romanya e Constantinoble

A invasión mongola de 1242, quan tornaban d'Hongría fació que os bulgaros entrasen en decadencia. O estato s'esminglanaba y se succedeban diferents dinastías, belunas d'orichen cumán. A costa d'a Mar Negra y a boquera d'o Danubio se poblaban por pueblos turquicos de diferents orichens, talment antipasaus d'os actuals gagauzes. A fins d'o sieglo XIV hi heba dos reinos bulgaros principals, un con capital en Tirnovo y atro con capital en Vidina. En 1382 os otomans prenioron Sofía, en 1393 o reino de Tirnovo, y en 1396 o reino de Bidina. En 1396 os hongaros y franceses organizan una cruzata anti-otomana, plegan a ocupar Vidina, pero son vencitos en Nikopol. En 1444 atra cruzata antiotomana ye redotata en 1444 en a batalla de Varna, en a que muere o rei Vladislau de Polonia y Hongría.

Dominación otomana[editar | editar código]

Dende fins d'o sieglo XIV dica fins d'o sieglo XVIII Bulgaria fació part d'o Imperio Otomán. Talment por deseyo d'os griegos o patriarcato bulgaro fue suprimito en 1393, y a ilesia bulgara dependeba dreitament d'o patriarca de Costantinoble. A ilesia s'heleniza y a luenga eslava ye abandonata por o griego. A nobleza bulgara, muito diezmata por as guerras, ye deportata t'Anatolia u se convierte a lo islam. A mayoría d'os campesins bulgaros siguen estando ortodoxos, pero en o sudueste bi ha bulgaros que se convierten a la relichion musulmana esdevenindo os pomacos. Os turcos s'estableixen en diferents partz de Bulgaria como Dobrucha, pero tamién i habrá bulgaros islamizatos que esdevenirán turcos por prener a luenga turca. Bellas poblacions de Bulgaria se fan multietnicas. Os mercaders griegos, armenios y chodigos (sefardís) ocuporon o puesto d'a clase meya. Os chodigos yeran admesos en os vicos turcos d'as ciudatz. A lo norte d'os Balcans as ciudatz solas que i heba yeran dominatas por ciudadans griegos y guarnicions turcas. As viellas ciudatz de Rumelia fuoron helenizatas. As tradicions bulgaras se mantenioron vivas en secreto en os monesterios, gracias a Paisij, un monche de Athos que en l'anyo 1762 escribió una historia d'o suyo pueblo bulgaro.

A presión rusa[editar | editar código]

L'aislamiento d'os bulgaros se crebará dende a segunda metat d'o sieglo XVIII por contacto con os rusos, que abanzaban enta o sud desgastando o Imperio Otomán. En a guerra de 1768 entre o Imperio Otomán y o Imperio Ruso, as tropas rusas plegarán dica Bulgaria y en 1774 vencerán a los otomans en a batalla de Chumla. Por o tractato de Küçük-Kaynarca Rusia s'adchudica o poder de protección d'os cristians ortodoxos d'o Imperio Otomán.

En 1829 os griegos se rebelan y as tropas rusas ocupan una gran parte d'as tierras bulgaras, prenendo Adrianopoli. Por o tractato de paz Vlaquia y Moldavia esdevienen un protectorato ruso y Bulgaria permaneixe en o Imperio Otomán, pero muitos bulgaros emigran enta Vlaquia y Moldavia (especialment ta Besarabia).

O separatismo bulgaro[editar | editar código]

En a decada de 1830 os misioners europeus occidentals y norteamericans s'intresan por os bulgaros. En ixa epoca amaneix o nacionalismo bulgaro, amaneix una burguesía bulgara comerciant y artesana, s'ubren escuelas y s'imprimen obras en luenga eslava. A primera biblia bulgara fue publicata en 1940 por Eli Riggs. Os mesmos otomans fomentaban este nacionalismo pa desgastar o emerchent nacionalismo griego. A presión popular consigue que a liturchia torne a estar en luenga eslava, y en 1870 o soldán creya un exarcato bulgaro independient, en contra d'a voluntat d'o patriarca de Costantinoble. A penar d'o refirme otomán a lo nacionalismo bulgaro y las concesions bi ha descontento por a plegata de refuchiatos musulmans d'o Imperio Ruso como circasians, nogais y tartres de Crimea, (venitos dimpués d'a guerra de Crimea). Os nacionalistas bulgaros emigratos en Bucarest s'organizan.

L'autonomía[editar | editar código]

En 1875 esclata una insurrección en Bosnia y arriba en Bulgaria en 1876. Os turcos reaccionan con una represión brutal con os bachibozuks, que fan mortaleras y devastan lo país. A opinión publica europea ye escandalizata por as noticias de Bulgaria (o panfleto de Gladstone denunciaba o que escayeixeba) y os países europeus, en especial Gran Bretanya y Rusia, presionan pa que den l'autonomía a Bulgaria. Rusia declara a guerra a lo Imperio Otomán en 1877 y invade Bulgaria con o refirme d'o exercito rumán y d'una lechión bulgara. En chinero de 1878 o exercito ruso ye muito a man de Costantinoble. O 3 de marzo de 1878 Rusia imposa a lo soldán o tractato de Sant Estefano. D'alcuerdo con este tractato se creyaría un estato pan-bulgaro con os territorios de l'actual Bulgaria, as tierras eslavas de Macedonia, una francha de l'actual Serbia y lo norte de Tracia Oriental. Como esto suposaba un desmantelamiento d'o Imperio Otomán en Europa y un desequilibrio de fuerzas en os Balcans, Austria y Gran Bretanya presionoron a Rusia pa que firmase o congreso de Berlín en chulio de 1878 por que se manteneba o status quo. O prencipato autonomo de Bulgaria se reduciba a la rechión de Sofía y las tierras a lo norte d'os Balcans. A cuenca d'o río Maritsa seguiba estando una provincia otomana, dita Rumelia Oriental, encara que con cierta autonomía, con un gobernador cristián y baixo a supervisión d'as grans potencias. Macedonia no heba cambeyato de situación.

En 1878 una Asambleya constituyent aplegata en Tarnovo prenió una Constitución y esleye a Aleixandre de Battemberg como prencipe. En Rumelia Oriental os representants d'as potencias europeas elaboran estatutos organicos.

Bulgaria independient[editar | editar código]

En 1885 o exercito bulgaro ocupa Rumelia Oriental. Os serbios reaccionan pero son derrotatos. Aleixandre cesa a los menistros rusos sin consultar a Rusia y lo zar organiza un complot melitar en contra d'éll. Aleixandre ha d'abdicar y prene o control Stepan Stambolov. Stambolov consigue que o exarca nombre bispes bulgaros en Agrida y Veles, alavez territorio otomán. L'asambleya de 1887 esleye como prencipe a Ferrando de Saxonia-Coburgo, que en 1894 se desfa d'o dictador Stambolov. En 1908 Ferrando proclama en Tirnovo a independencia de Bulgaria y prene o títol de zar con l'aprobación d'Austria-Hongría, y o reconoiximiento internacional. Bulgaria no teneba una clase meya, pero a suya aristocracia teneba una mentalidat civil y laica, (os tiempos de control griego en a ilesia facioron que os bulgaros estasen bella cosa allenatos d'a ilesia). En 1903 bi ha una prebatina d'insurrección bulgara en Macedonia y Tracia, pero fracasa dimpués de 3 meses, esclafata por os otomans.

As guerras balcanicas[editar | editar código]

En 1912 Bulgaria declaró a guerra a lo Imperio Otomán chunto con Serbia y Grecia, encomienza a Primera Guerra Balcanica. Adrianopoli caye en marzo de 1913 y los otomans se rinden. Por o tractato de Londres d'o 30 de mayo de 1913 o Imperio Otomán abandona os territorios a l'este d'a linia Enos-Midia. Os tres estatos vencedors no se posan d'alcuerdo con o reparto. Os bulgaros, que han combatito en l'este se consideran os autenticos vencedors d'os turcos, pero han estato os serbios qui han ocupato o centro y norte de Macedonia. Os griegos han ocupato tierras d'o sud de Macedonia poblatas por eslavos. O 23 de chunio Ferrando ordena atacar a los serbios y griegos sin declaración de guerra, encomenzando a Segunda Guerra Balcanica. En a Segunda Guerra Balcanica os bulgaros son atacatos tamién por os otomans y os rumans, y pierden a guerra. Por o tractato de Bucarest o 10 d'agosto de 1913 Bulgaria obtién una extensión territorial en o sud, con una parte de Tracia que li da acceso a la mar Echea, pero ha de ceder o sud de Dobrucha a Rumanía, y Adrianopoli y Tracia Oriental a Turquía. Serbia conserva a suya part de Macedonia, actual Republica de Macedonia.

As guerras mundials[editar | editar código]

En setiembre de 1915 Bulgaria fa liga con o Imperio Austro-Hongaro y declara a guerra a Serbia o 15 d'octubre. O exercito serbio ye un una pinza y se retira enta la mar a traviés d'Albania. As tropas bulgaras ocupan a parte serbia de Macedonia y fan frent a las tropas aligatas que han desembarcato en Salonica o 15 d'octubre (se creya o frent d'Orient). Quan Rumanía entra en guerra en agosto de 1916 Bulgaria s'asocia a la contraofensiva d'as potencias centrals y ocupa Dobrucha d'o sud, que heba perdito en a segunda Guerra Balcanica.

O 18 de setiembre de 1918 se creba o frent d'Orient y Bulgaria ye obligata a firmar un armisticio o día 29. O 3 d'octubre Ferrando abdica en Boris III. O tractato de Neully d'o 27 de noviembre de 1919 imposa perdugas territorials: Rumanía recupera o sud de Dobrucha, Serbia s'anexiona bells distritos buegants de Bulgaria, Grecia ocupa Tracia Occidental, por o que Bulgaria pierde o acceso a la mar Echea y s'empobrix o antepaís d'ixa costa. En 1923 os griegos forachitoron a 250.000 bulgaros de Tracia y Macedonia, y son sustituitos por refuchiatos griegos de Turquía.

Encomienza a dictadura campesina de Alexandre Stambolijski, que ye asesinato en 1923. Dimpués bi ha una insurrección comunista, seguita d'una represión. Dimpués un periodo d'inestabilidat con desembolique d'o terrorismo. Se creya un movimiento d'inspiración musoliniana pareixito a los ustaixas, os komitadjis, salitos d'o ORIM, (Organización Revolucionaria Interior de Macedonia, de fins d'o sieglo XIX). A fins d'ixe mesmo anyo os oficials fomentan un golpe d'Estato. A l'anyata vinient se proclama una dictadura exercita por o mesmo rei Boris III, que manifiesta simpatía por l'Alemanya nazi.

O 7 de setiembre por l'alcuerde de Craiova Bulgaria recupera Dobrucha d'o sud, en un tiempo que Rumanía ye obligata a ceder territorios. En marzo de 1941 Bulgaria s'adhiere a lo Pacto Tripartito y ye recompensata con l'anexión d'una gran parte de Macedonia, d'o districto de Pirot de Serbia, y con a recuperación de Tracia. Os griegos de Tracia, uns 100.000, son forachitatos en respuesta por a expulsión d'os bulgaros en 1923. O gobierno bulgaro preba de ganar-se a simpatía d'os macedonians eslavos y integrar-los.

Boris III se negó a entregar a los chodigos de Bulgaria a los nazis y a participar en a guerra contra a URSS. En agosto de 1943 Boris III muere.

A bulgaria comunista[editar | editar código]

Os dirichents bulgaros miran en 1944 un alcuerde con as potencias occidentals, pero en agosto os sovieticos ya son prou amanatos, y penetran en Rumanía. O 5 de setiembre a URSS declara a guerra a Bulgaria, que se rinde y ye presionata pa que declare a guerra a Alemanya. As tropas bulgaras se retiran de Grecia y Yugoslavia. O 16 de setiembre os sovieticos ocupan Sofía y ocuparán Bulgaria dica fins de 1947. O 28 d'octubre se firma un armisticio en Moscú y o poder pasa a los comunistas.

O 9 de setiembre un golpe d'estato posa en o gobierno a lo Frent d'a Patria. O Partito Comunista ye a fuerza organizata sola, organización que depende de Moscú, y prene tot o poder con l'aduya d'o exercito d'ocupación. Dimpués de l'abolición d'a monarquía por referendum se proclama a republica popular o 15 de setiembre de 1946. L'aduya sovietica permite que por o tractato de París de 1947 Bulgaria conserve Dobrucha d'o Sud. En 1947 unos quantos procesos eliminan a los dirichents politicos no comunistas, como Nikolai Petkov, capitoste d'os campesins. En 1949 o partito comunista sufre una purga estalinista por parte d'os quadros d'o partito formatos en a URSS que permite aibar a parte d'os comunistas, acusatos de titismo. O estalinista Valko Chervenkov se posa a la cabeza d'o partito y dimpués ye succedito por Todo Jirkov, qui seguirá os dictatos d'a URSS.

A bulgaria postcomunista[editar | editar código]

En noviembre de 1989 Todo Jirkov ye cesato en as suyas funcions y acusato de corrupción. Tres anyatas dimpués será condenato a siet anyatas de prisión. Con o suyo succesor Petar Mladenov o partito comunista se torna socialista, y en as esleccions libres de chunio de 1990 obtién 211 d'os 400 escanyos de l'Asambleya nacional. Os excomunistas comparten o poder con a oposición (Unión d'as Fuerzas Democraticas). En chulio de 1991, o Parlamento adopta una nueva constitución. As esleccions lechislativas d'octubre de 1991 dan 110 escanyos a la UFD, 106 a lo Partito Socialista y 24 a lo Movimiento d'os dreitos y libertatz d'os turcos y pomacos. Jeliou Gelev, lider d'a UFD, ye esleito president d'a Republica por sufrachio universal en chinero de 1992.

Bulgaria será o primer Estato en reconoixer a independencia d'a Republica de Macedonia, encara que no haiga reconoixito a lo pueblo macedonián como diferent d'o pueblo bulgaro.

Referencias[editar | editar código]

  1. Michel Kazanski Cécile Morrison Jean-Pierre Sodini "El hundimiento ante las invasiones: Los siglos oscuros. Gran atlas de arqueolocía. S.A EBRISA.

Vinclos externos[editar | editar código]


Estatos d'Europa
Abkhasia3 | Albania | Alemanya | Alto Karabakh3 | Andorra | Armenia2 | Austria | Azerbaichán1 | Belarrusia | Belchica | Bosnia y Herzegovina | Bulgaria | Cazaquistán1 | Croacia | Cheorchia1 | Chipre2 | Chipre d'o Norte2, 3 | Chequia | Dinamarca | Donetsk4 | Eslovaquia | Eslovenia | Espanya1 | Estonia | Finlandia | Francia1 | Grecia | Hongría | Islandia | Irlanda | Italia1 | Kharkiv4 | Kosovo3 | Letonia | Liechtenstein | Lituania | Luxemburgo | Macedonia | Malta | Moldavia | Múnegu | Montenegro | Noruega | Osetia d'o Sud3 | Países Baixos | Polonia | Portugal | Reino Unito | Rumanía | Rusia1 | San Marino | Serbia | Suecia | Suiza | Transnistria3 | Turquía1 | Ucraína | Vaticano
Dependencias: Åland | Akrotiri y Dhekelia | Chibraltar | Guernési | Isla de Man | Islas Feroe | Jèrri | Svalbard
1 Parti d'o suyo territorio ye difuera d'Europa. 2 Se troba en Asia, pero tien relacions historico-culturals con Europa. 3 Parcialment reconoixito. 4 No reconoixito