Academia de l'Aragonés

Logo de l'Academia de l'Aragonés.

L'Academia de l'Aragonés ye un organo creyato o 15 de chulio de 2006 por o II Congreso de l'Aragonés con l'obchectivo d'estar l'autoridat lingüistica de l'aragonés. Actualment no tiene reconoiximiento explicito por o Gubierno d'Aragón, y a suya forma churidica ye la d'una asociación cultural baixo lo nombre Estudio de Filología Aragonesa, pero se la conoixe de totz como 'Academia de l'Aragonés'. Tiene a suya seu en Zaragoza.

Os obchectivos de l'Academia, seguntes as ordinacions homologatas en dito Congreso, son:

• Investigar todas as manifestacions orals y escritas de l'aragonés.
• Replegar y actualizar o suyo lesico.
• Fixar a suya toponimia y onomastica.
• Investigar y formular leis ortograficas, gramaticals y foneticas ta todas as modalidatz de l'aragonés.
• Fixar, desembolicar y amillorar a modalidat estándar.

y procurar o respeto a os dreitos linguisticos d'os suyos fabladors.

O suyo primer consello de gubierno provisional estió presidito por José Lera. O primer pleno estió celebrato lo 28 d'octubre de 2006 en a Deputación Provincial de Zaragoza, establindo-se-ie asinas un nuevo consello de gubierno de l'Academia, esleito seguntes as ordinacions, con Manuel Castán como president.

O 18 de noviembre de 2010 se presentó publicament en Zaragoza a Propuesta Ortografica de l'Academia de l'Aragonés, dimpués d'un proceso publico de replega d'esmiendas y socherencias a la mesma.

Miembros

A nomina actual de miembros de l'Academia de l'Aragonés ye:

• Chusé Aragüés, Vocal de coordinación
• Manuel Castán, President
• Juan José Lagraba, Tresorero
• José Lera, Secretaire
• Chabier Lozano, Vecipresident
• Francho Rodés, Vocal d'investigación
• Fernando Romanos, Vocal de sociolingüistica
• Ánchel Lois Saludas
• Fernando Sánchez
• Chusé María Satué, Vocal de decumentación
• Juan José Segura, Vocal de codificación
• Roberto Serrano
• Ana Tena
• Quino Villa
• Antonio Plaza Boya (dende o 24 de noviembre de 2007)

O 14 de mayo de 2007 l'Academia de l'Aragonés, achuntata en sesión extraordinaria, nombró a os suyos cinco primers Academicos d'Honor, que fueron homenachiatos o 24 de noviembre de 2007 en a seu d'o Gubierno d'Aragón. Ista nomina s'enampló o 12 d'abril de 2008 y o 21 de marzo de 2009 con a proclamación como Academicos d'Honor de Michael Metzeltin, catedratico de Lingüistica y Didactica d'as Luengas Romanicas d'a Universidat de Viena, y de Xabier Kintana Urtiaga, escritor y secretaire d'Euskaltzaindia.

Os Academicos d'Honor son:

• Nieus Luzía Dueso Lascorz (†)
• Juan José Guillén Calvo
• Artur Quintana i Font
• Brian Mott
• Rosario Ustáriz Borra (†)
• Michael Metzeltin
• Xabier Kintana Urtiaga

Vinclos externos

• Se veigan as imáchens de Commons sobre l'Academia de l'Aragonés.
• Pachina oficial