Capital (politica)
De Biquipedia
- Iste articlo ye sobre o conzeuto politico de capital. Ta atros usos se beiga capital.
En termins de Politica, se clama capital, ziudat capital u capital politica á la ziudat u lugar en que bi ye a seu d'as instituzions de gubierno d'un país, rechión, comarca o cualsiquier almenistrazión territorial. Á sobent ye á más a ziudat con mayor poblazión d'o territorio en custión, encara que no siempre ye asinas.
Sin d'embargo, ye posible que en un estato bi aiga más d'una capital, en funzión d'os dibersos poders. Asinas, puet aber una capital ta o poder chudizial u ta o poder lechislatibo diferent d'a capital d'o poder echecutibo. Á más, a capital economica puet estar diferent á las capitals anteriors.
Istoricament, en os países d'Europa o conzeuto de capital naxió cuan as corz d'os monarcas s'establioron en un lugar concreto, albandonando a suya transuanzia u itineranzia por o suyo reino en funzión d'os recursos economicos disponibles.
A begatas, cuan s'estableix un nuebo país a capital ye una ziudat nueba, ta que no i aiga binclos con o pasato. Ye o caso d'os Estatos Unitos, en que a capital ye a ziudat de Washington, creyata ta ebitar enfrentamientos entre as ziudaz d'o nuebo estato; y tamién de Brasil, que creyó a ziudat de Brasilia ta promober o desembolique d'o interior d'o país.
Antiparte, a capital á sobent esdebién una ziudat que conzentra a mayor parti d'os serbizios, autibidaz economicas y de poblazión d'o territorio, y por ixa causa puet esdebenir macrozefalica. Iste ye o caso d'a ziudat de Zaragoza en Aragón, que conzentra, alto u baxo, a metat d'a poblazión aragonesa y a seu sozial d'as suyas prenzipals instituzions politicas, almenistratibas, economicas, periodisticas y sozials.
[editar] Etimolochía
L'orichen d'a palabra ye a boz latina caput (capeza en aragonés), fendo referenzia á que ye o lugar an que i son as prenzipals instituzions politicas.
