Articlo definito en l'aragonés

L'articlo definito en aragonés ha tenito bells cambeos que han esdevenito caracters de diferenciación dialectal. Se considera que la traza més antiga ye lo, los, la, las y la més estendillata en l'Alto Aragón ye o, os, a, as.

Articlo lo, los, la, las sin contraccions

Se troba en cheso, aragüesín, navalés. En Tellán o paradigma ye pareixito.

L'articlo lo dezaga as preposicions á, de no presenta formas contraitas: de lo, á lo.

Bi n'ha repuis d'o suyo emplego en chaqués, ayerbense d'Agüero, tensino, belsetán, viellosobrarbés y en l'aragonés de L'Ainsa de 1933, en emplego precario u mezclato con atros sistemas d'articlos que explicaremos. En belsetán s'emplega dezaga as preposicions á y per.

En o Viello Sobrarbe la documentación de Chabier Tomás Arias en documenta emplegos aislatos: busca lo conil, lo trico lo traco. L'articlo lo, los, la, las podió estar cheneral en ixa zona, porque en una buegata de termins d'o sieglo XVI sale en totz os toponimos d'una lista, y porque ye amán d'o navalés.

Una documentación antiga d'este sistema ye d'o sieglo XII en un texto latín con elementos romances:

• Et tanchit ad Orbilito lo campo de lo vynal a la part de Cuara... (sin de calendata)
• est allium campum ad illas nocheras de lo Vellito... (1154).
• Tetigit ad Arnal Alaman, lo campo de lo Molinello, prope campo de don Lop et in la carera de la Tahona lo campo de don Gil en iuso.

Os textos d'os dances localizan ista forma d'articlo (igual como as formas "o, a") en Os Monegros y lo Baixo Aragón.

Articlo lo, es, la, las

En tellán o paradigma ye pareixito a lo debant dito, pero en cuenta d'articlo plural los bi ha articlo es. Dezaga d'as preposicions a, ta y de as formas lo, la y las no forman contraccions, pero dezaga de en forma contracions como n'o, n'a, n'as u produce nasalizacions como enno, enna que se documentan en riochán precastellán.

Articlo lo, los, la, las con contraccions

Ye o que s'emplegaba en aragonés meyeval en amplas zonas, pero no ye guaire documentato porque quan en o sieglo XIII ya s'escribe en romanz, o romanz que s'escribe escribe l'articlo como en castellán: el, los, la, las. Se documenta millor en os textos latins arromanzatos d'os sieglos XI, XII, alternando con illo, illa, illum, (encara que en latín no i aiga articlo definito, estas formas prenen función d'articlo en os textos latins aragoneses).

Ye pareixito a lo sistema que se da en bellas parlas catalanas occidentals (fragatín, leridán, tortosín, etz) entre Leida y lo centro de Castellón. A diferencia d'o anterior sistema, lo dezaga as preposicions á y de prene las formas al y del, de trazas homologas con las contraccions al, als, del, dels en ixas parlas catalanas debant ditos.

A contracción con a preposición á se conoix ya en 958:

• et al turmo de lo cuello loguero a la part de Mesue.

A contracción de lo con a preposición de se conoix ya dende 958:

• et al prado Cabrero et al pux Ballarín, et a la espada del Castillelo de Alui, et al cuello de lo turmo loguero a la part de Mesue. (958)
• Tetigit ad Guillem Alaman lo campo de Exençi, al pont de Pere de Barciol et la faxiola del Roio. (1191)
• allium lo planello detras lo mont recipit semen X quartales, alium la faxola de las tercias cum alio del pontiello recipit semen V quartales. (sieglo XII)

Ye posible que ya en o sieglo XV en o sud de Navarra y zonas que mugan con Castiella lo hese sustituito l'articlo el, los, la, los (que Heinrich Lausberg crei que s'orichina en las luengas neolatinas en cheneral a partir d'as formas contraitas del y al). Estase un feito autonomo u un castellanismo, a fins d'o sieglo XV en l'aragonés d'as comunidatz aragonesas nomás se'n documenta que un caso en a toponimia: Lo Regadío.

O emplego antigo de lo en aragonés ribagorzán s'ha d'entender en conexión con l'articlo lo en catalán occidental, on como s'ha dito fa contracción con as preposicions a, de y per. En benasqués y atras parlas ribagorzanas güegants bi ha constancia d'o suyo emplego en toponimia, asinas como en expresions preceditas per lo determinant "tot": tot lo mundo, tot lo día, tot lo temps/tot lo tiempo, (formas pareixitas se dan en zonas d'o valencián on s'emplega l'articlo el actualment). A vitalidat d'ista forma d'articlo en ribagorzán no ye guaire estudiata, pero se puet trobar dende o benasqués dica o baixorribagorzán, plegando ta las parlas de transición de Alins, Zanui y Calasanz entre l'aragonés y o catalán entre a Baixa Ribagorza y la Litera

Articlo o, os, a, as sin variant dezaga vocal

S'emplega en ansotán, chaqués, sarrablés, aragonés de la Galliguera, fobán y semontanés (tanto en ayerbense como en semontanés oriental, pasando por a Plana de Uesca). Por o sud plega dica Almudévar, Barbués, Albero y Torres d'Alcanadre, por o norte plega dica Biescas y dica quasi Tella. Tamién se troba en l'aragonés de transición d'Os Monegros, en a metat norte d'a comarca.

Debant de vocals A, O, U, en cuenta de presentarse o se presenta l' :

• L'onso, l'urmo, l'almada

Debant de vocals E, I tonicas tamién se presenta l':

• L'inte, L'Ebro

Debant de vocals E, I atonas se presenta a, o:

• O Hespital, O entibo, O impeltre.

En femenín a s'apostrofa debant de sustantivos que empecipien por a:

• L'Almada, L'aloda.

Dezaga de bellas preposicions fa contraccions apostrofando-se a preposición:

• d'o, d'os, d'a, d'as.
• t'o, t'os, t'a, t'as.

D'alcuerdo con lo que se vei en o romanz riochán y en Razón Feita d'Amor, y en un texto templero de 1198 en latín, este articlo amaneixió como una variant de lo dimpués de -n (que como l ye una consonant liquida):

• conno, enno (o dezaga con y en, formas que se troban en as Glosas Emilianenses)
• Son as Rosas (Razón feita d'Amor)
• et fuerunt factas istas conveniencias in manu de Guillem Badels, qui erat comendador in Castellot, et Micael de Luna in Cantaviella et ena canyada de Venatanduz.

Se da en toponimos de zonas on huei s'emplegan atros articlos, mesmo más antigos:

• En Embún, on se charra cheso, i trobamos as Eras, A martuina, A Tallata.
• En Fonz, on se charra baixorribagorzán, o toponimo as Cabanetas.

Articlo o, os, a, as con variant ro, ros, ra, ras dezaga vocal

S'emplega en dos zonas deseparatas por o Viello Sobrarbe:

• Aria central: tensino, aragonés d'a Tierra de Biescas, Sobremont, Sobrepuerto, aragonés d'a Ribera de Fiscal u aragonés d'a Val d'Ara y aragonés de Valle de Vio.
• Semontano oriental: una zona d'o semontano oriental. Apareix en o baixo Vero, (Colungo, Buera, Huerta, Pozán, Castillazuelo), en Salas Altas, Salas Baixas, Abiego, Coscullano, Sant Pelegrín, Siétemo y As Cellas.
• La documentación en o Viello Sobrarbe no ye segura, lo vueito cheografico entre as dos lo cubriría a documentación en a Sierra de Guara (se documenta en Rodellar y As Almunias), y Sarrablo (se documenta en Bara, en a Val de Nocito).

A diferencia d'o sistema anterior no fa contraccions dezaga as preposicions de, a, ta, y como siempre dezaga una vocal se i mete ro, ra, ros, ras: ta ra, de ro, a ras, etz...

No ye un gasconismo como s'ha quiesto veyer (en gascón pirenenco os articlos son eth y era, en gascón cheneral son lo y la), pero si que representa un feito d'evolución d'a -LL- latina ta -r- como en gascón. La suya documentación ye antiga y ya se troba en un texto de 1090 procedent d'o Sobrarbe, texto en latín pero con elementos en romanz aragonés: {{cita|Ad Galino Acenarece era lorika, ero cabalo, era espata (a L n'este caso puet representar una L cheminata tipo belsetán u una ll).

En as zagueras decadas s'ha visto que retacula debant o sistema més cheneral. Francho Rodés comenta en o suyo estudeo de l'aragonés d'a Tierra de Biescas que a chent chóven emplega l'articlo cheneral aragonés o, os, a, as y que manimenos entre chent viella encara puede sentir-se a variedat postvocalica ro, ros, ra, ras y pareix que yera prou vivo dica fa un par de cheneracions. La situación ye pareixita en o Sobrepuerto y en o Sobremont.

En o semontano ye vital encara en o Baixo Vero, Salas Altas, Salas Baixas y As Cellas. Kuhn en documenta un uso en Biarche, pero en 1998 Chabier Tomás Arias y Paz Ríos no lo i troboron ni tampoco en Alquezra.

Si que lo troboron con prou vitalidat en Rodellar y As Almunias:

• en a cuneta y ros otros, de ras Almunias, asta ra gasolina.

Articlo el, la, es, las

Ye propio de l'aragonés oriental. Se da en belsetán con mezcla d'atros, en chistabín y en tot o ribagorzán. En a Baixa Ribagorza es no s'emplega y s'emplega los.

L'articlo el dezaga as preposicions a, de, ta fa contraccions a'l, de'l, ta'l.

Puet estar una traza derivata d'o sistema lo, los, la, las por estas razons:

• A toponimia y documentación antiga amuestra que antigament en a Ribagorza s'emplegó l'articlo lo, los.
• En catalán cheneral l'articlo meyeval yera lo, los, la, las, y cambeó ta el, els, la, les, fueras de bellas parlas occidentals,
• Chusto a l'este d'a Ribagorza bi ha enclaus y repuis d'emplego de lo, los, la, las.
• En Belsetán bi ha repuis d'emplego de lo dimpués as preposicions a y per: a lo, per lo.

Bells autors consideroron que es ye una evolución de LL ta r paralela a ro, ros; atros piensan que representa una variant curta de els (que se documenta en Benás), como plural lochico de el:

• Primera interpretación: Illos > eros > ers > es.
• Segunda interpretación: els (plural de el) > es.

Se puet considerar que en aragonés oriental cambeó os articlos el, es por doble influencia catalana y castellana, pero tamién puet representar una evolución autonoma y autoctona.

Articlo es

Como s'ha dito en aragonés oriental, l'articlo masculín plural ye es, y ye un derivato probable de els que se siente en Benás (en Benás quan se charra a escape els suena es). En atras zonas on se siente no se puet considerar como un derivato de els, car en ixas zonas bi ha atros articlos. Se siente como forma antiga y no guaire emplegata en Pandicosa, en bergotés y en Aragonés de Valle de Vio, que ye zona de ro, ros, ra, ros, y en Tellán, que ye zona de lo, la pero que muga tanto con a zona de ro como con a zona de el.

Chabier Tomás Arias la trobó por sorpresa quan en una enqüesta que feba en Elsón li charroron de bella presona d'Asque, que lo emplegaba como forma antiga y en desuso (es napos ya bullen).

Encara que s'ha dito que ye present en a toponimia y fosilizato en verbos, no ye seguro que estijeras, estreudes y estenazas tiengan un es que se remonte a este articlo. Lo mesmo se'n poderba dicir en muitos toponimos.

En zonas de ro, ros, si que poderba estar:

• ILLOS > eros > ers > es

Pero como a forma con -r- ye postvocalica y no ye lo caso, ye probable que siga una desimilación de o ta e muito frecuént en tot l'aragonés dende a Edat Meya (hemologar, hespital, Segorb, semontano, Teruel, Terrient, prebar, ecetra.), asinas que la evolución més probable ye:

• ILLOS > los > os > es

Ye de destacar en occitán aranés (variant que muga con l'aragonés benasqués), s'emplega es en cuenta de eths d'o gascón pirenenco.

Problemas de normalización

En as primeras gramaticas de l'aragonés deciban que en aragonés l'articlo yera o, os, a, as y que dezaga vocal s'emplegaba lo, los, la, las u ro, ros, ra, ras, informando sobre as variants locals u dialectals. Con esto prebaban d'unificar graficament las formas con r- con las formas con l-. Como ya se sape o emplego de l'articlo lo en zonas de o, os, a, as no ye como variant post-vocalica, sino que ye un repui d'emplego d'un sistema d'articlos més antigo.

En una segunda fase, en a decada de 1990 se proposó no escribir formas contraitas con apostrofe (n'o, d'o, t'o) y escribir en o, de o, ta o pa tener una expresión grafica equidistant entre de lo, de ro, de'l y d'o. Se proposaba que los charradors que no fan contraccions pueden avegar-sen a escribir de o y leyer pa ellos de lo, de ro. Seguntes Francho Nagore, en ayerbense quan se charra a bonico se puet sentir la no contracción: de o padre, de os dos bandos, de os soldaus. Manimenos no s'ha seguito guaire en part por desconoiximiento d'esta propuesta, y mesmo o Consello d'a Fabla Aragonesa no se dixó de clamar d'a fabla pa esdevenir de a fabla.

Huei seguntes o Consello Asesor de l'Aragonés, l'aragonés standard replega la traza més estendillata, o, os, a, as, con posibilidat d'emplego d'as formas postvocalicas alomorfas ro, ra, ros, ras.

Manimenos totas estas prebatinas de normalización, que se chustifican en mirar lo común y cheneral ofreixen bells problemas, porque las variants de l'aragonés que millor resisten y encara se charran prou no presentan lo paradigma más extendillato.

O sistema el, es, la, las considerato menos chenuino (pero que puet estar perfectament autoctono), no s'emplega en aragonés standard, y representa un problema porque ye o sistema d'articlo que s'emplega en as variants més vitals d'aragonés y las que tienen més posibilidatz de sobrevivir.

Referencias

• Manuel Alvar. "ESTUDIOS SOBRE EL DIALECTO ARAGONÉS [sic]" . Institución Fernando el Católico. (1987).
• Anchel Conte et al. "EL ARAGONÉS: IDENTIDAD Y PROBLEMATICA DE UNA LENGUA". Librería General (1982).
• Francho Nagore "GRAMATICA DE LA LENGUA ARAGONESA". Mira Editores. (1989).
• Chabier Tomás Arias "EL ARAGONÉS DEL BIELLO SOBRARBE". Instituto de Estudios Altoaragoneses. (1999)