Teruel

De Biquipedia
Ir ta: navego, busca
[[{{{4|Wikipedia:Articlos destacatos|...]]
LinkFA-star Aragon.svg
Teruel
Municipio d'Aragón
Bandera Escudo d'armas
Plaza del Torico (Teruel).jpg
Plaza d'o Torico.
Entidat
 • País
 • Provincia
 • Comarca
Municipio
Flag of Aragon.svg Aragón
Teruel (provincia).svg Teruel
Comunidat de Teruel
Superficie 440,4 km²
Población
 • Total

35,841 hab. (2012)
Altaria 915 m.
Chentilicio terolano, teruelano
Ríos Guadalaviar
Coordenatas 40°20’24’’N 1° 6’ 0’’U
Teruel en Aragón
Teruel
Teruel
Situación de Teruel en Aragón
http://www.teruel.net

Teruel (prenunciato en aragonés ter'.wel y en castellán te.'rwel) ye una ciudat d'Aragón, situata en a zona centro-oriental d'a peninsula Iberica, capital d'a provincia d'o mesmo nombre y d'a comarca d'a Comunidat de Teruel. Con una población de 35.037 habitants (2008), ye a capital de provincia menos poblata d'Espanya. Se troba en o forcallo d'os ríos Guadalaviar y Alfambra. O suyo clima se caracteriza por hibiernos fredos y veranos calidos y xutos.

A ciudat de Teruel tien una luenga historia, que prencipia con as primeras poblacions estables en a zona mientres a Edat de Bronze, con presencia luego d'os pueblos celtibers y de l'Antiga Roma, dica plegar a lo establimiento d'a ciudat en a Edat Meya (1141) por o rei Alifonso II d'Aragón, quan l'adhibió a lo reino d'Aragón. Estió una ciudat ubierta, con muita influencia d'os ganaders que feban a transuancia enta o reino de Valencia, encara que continó estando una ciudat de tamanyo chicot, dica esdevenir en 1833 capital d'a nueva provincia de Teruel, en establir-se en Espanya a nueva división territorial en provincias. En a Guerra Civil Espanyola a ciudat estió o scenario d'a batalla de Teruel, una d'as más importants batallas d'a guerra en territorio aragonés.

Ye especialment conoixita por os suyos pernils y o suyo arte mudéchar, y reconoixita por a UNESCO como Patrimonio Común d'a Humanidat.

A suya fiesta mayor se celebra o lunes más cercano a o 10 de chulio (Sant Cristoval) conoixita como a Vaquilla del Ángel por as vaquetas. As fiestas se caracterizan por os pasavillas musicals (charangas), bailes nocturnos y toros ensogatos por as carreras d'o centro d'a ciudat.

Entre os suyos atractivos toristicos se troban as suyas edificacions mudéchars, o mausoleu d'os aimants de Teruel, o centro paleontolochico Dinópolis y una gran riqueza natural. O suyo arte mudéchar fa remerar o suyo pasato multicultural. Os molimentos más destacatos d'iste estilo son a Ilesia de Santa María, Seu d'a diocesi de Teruel, as torres de O Salvador, Sant Martín y Sant Per, a los pietz d'a que se troba a ilesia que tien o mesmo nombre, tamién d'arte mudéchar.

Simbolos[editar | editar código]

Se veiga ta más información l'articlo sobre o escudo de Teruel
Version simpla d'o escudo en a "escalereta".

O escudo d'armas d'a ciudat de Teruel ye formato de tres elementos ovalatos, dos y un, tot dencima d'una cartela. O primero as quatre barras d'Aragón, de gules sobre fundo d'oro. O segundo, un toro parato d'oro, terrasato de sinople, surmontato d'una estrela de ueito puntas d'oro. O tercero ye de gules, un canyón y un obús d'archent en aspo, surmontatos d'una granada, de plata, encendita de gules, y en punta una pila de seis balas esfericas ordenatas una, dos, tres, y arredol, dentro de filactería a leyenda en castellán que diz M(uy) NOBLE, FIDELISIMA, HEROICA Y VENCEDORA (en aragonés M(uit) NOBLE, FIDELISMA, HEROICA Y VENCEDORA). Acolato tot de dos brancas d'olivera, trescruzatas en o suyo naiximiento, de sinople, frutatas d'oro, y como trofeus dos banderas d'Espanya, dos tambors y dos fusils con bayoneta; superato o conchunto d'un murciacalo, con as suyas alas estendillatas, de sable; timbrato de corona ducal.

A suya bandera ye de color roya, con as antigas armas d'a ciudat: un toro surmontato d'una estrela de ueito puntas, rodiato tot de brancas de laurero y timbrato de corona ducal.

A presencia d'o toro y a estrela tien relación con a leyenda fundacional d'o toro y a estrela

Historia[editar | editar código]

Prehistoria y Edat Antiga[editar | editar código]

En a Edat de Bronze ya bi heba poblacions estables en a zona, habendo-se trobato chacimientos arqueolochicos importants en l'Alto del Batán, El Cabezo del Arquillo, El Barranco de la Guea u El Cabezo de San Cristóbal, pero estando mas que mas important o chacimiento de La Escondilla, en Bellestar, a on que se troboron restas d'actividatz metalurchicas.

D'as poblacions d'a primera Edat de Fierro podemos veyer as influencias que tenioron tanto a val de l'Ebro como a Meseta castellana y más tardi tamién a iberización que i plegó dende as costas levantinas. D'ista epoca destacan os chacimientos de La Muela del Rajo (Bellestar), Paracuellos y El Castillejo (Tortallada).

En tiempos d'os ibers yeran a-saber-los os poblatos que yeran esparditos por os cabezos d'os arredols de l'actual Teruel, destacan l'Alto Chacón, El Castillejo de San Blas, Penya Rubia y o Castillejo de Villespesa u o Castillejo de Tortallada. Istos poblatos se trobaban aislatos os uns d'os atros, de traza que yeran fácils d'esfender. As inscripcions que s'han puesto trobar (por eixemplo en Penyalba de Bellestar) nos amostran que lingüisticament yera una zona celtiberica.

L'alfarería yera ya a prencipal actividat economica en ista epoca como contrimuestan os furnos que bi heba en belunas d'istas poblacions.

Fue ocupata por os romans quedando poblacions a on que existioron campamentos (Castralbo d'o latín Campamento Blanco). No bi ha guaires restas arqueolochicas conoixitas d'a epoca, pero si que ye important a villa romana de Villespesa y más que más as suyas ceramicas.

Edat Meya[editar | editar código]

A ciudat fue ocupata por l'arabe Tarik, un chicot castiello dito Tirwal entre Saraqusta y Cordoba. Sieglos dimpués fue conquiesta por as tropas d'Alifonso II, qui establió l'actual Teruel en l'anyo 1171, una chicota población cristiana. Dimpué fue encorporata a o termin de Daroca. D'ista epoca ye a leyenda fundacional de Teruel, que recenta o suyo nombre y o suyo orichen. A causa d'a conquiesta de Valencia por os almuades, Alifonso II miró de fortificar a ciudat de Teruel ta organizar dende astí a reconquiesta. Metió a Berenguer d'Entenza como tenente d'a ciudat en octubre d'ixe mesmo anyo. Ya l'1 d'octubre de 1177 prencipió a repoblación con chents prencipalment d'orichen aragonés y navarro, dando-li fuers y esligando-se de Daroca dende l'inte y estando allora cabeza d'un amplo territorio que encara s'heba de reconquerir.

A ciudat s'heba convertito en muga d'o reino d'Aragón con as tierras musulmanas y asinas ye que dende astí salioron expedicions melitars t'a conquiesta d'o Rincón d'Ademuz (1210), Valencia (1238) y Murcia (1266). Más tardi en as Guerras d'a Unión a ciudat refirmó a o rei Pero IV estando-li atorgato o títol de ciudat o 7 de setiembre de 1347.

Torre de Sant Martín.

Mientres os sieglos XIII y XVI a ciudat, con os suyos fueros, tenió a-saber-los enfrentamientos con una monarquía que heba evolucionato enta una forma de gubierno más autoritaria y centralizadora. O maximo organimo de gubierno teruelano por ixas envueltas yera o concello, una asambleya cheneral de vecins con amplas competencias, mas que mas en l'administracion d'a ciudat. L'orichen d'iste concello se troba en o privilechio que heba atorgato o 10 de chulio de 1250 o rei Chaime I d'Aragón, establindo ista autoridat con catorce concellers, encara que en o sieglo XV gosaban estar deciueito. Atro feito politico important estió a celebración entre os anyos 1427 y 1428 en Teruel d'as Cortz Chenerals d'o Reino con presencia d'o rei Alifonso V. A inspección d'a vida economica d'a ciudat yera afer de l'almutazaf u mayordombre qui cusiraba as transaccions mercantils que se i feban, a inspeccions de pesos y medas y o control d'actividatz artesanals.

A población se dividiba en grupos socials con diferent relichión y estatus churidico-fiscal, manimenos totz teneban os mesmos privilechios y fueros. Ye dende metat d'o sieglo XIII quan prencipió a fer-se una cherarquización entre a población cristina entre caballers (que yeran d'a clase superior) y a resta de vecins. Chodigos y moros viviban en os suyos respectives vicos, deseparatos d'a resta d'a población y organizatos en alchamas. En iste sieglo, debito a la división social habió a-saber-los conflictos internos en a ciudat.

En epoca medieval a ciudat de Teruel y a suya redolada yeran una d'as zona ganaderas más importants d'o reino, destacando mas que mas a suya cabanya lanar, favoreixita por estar zona de paso enta os pastos d'hibierno en Tortosa y Valencia. Allora os pastors y ganaderos teruelanos s'agrupaban en una chunta u ligallo ta esfender os suyos intreses.

Culturalment cal destacar o "Estudio d'Artes" que existió en a ciudat dende l'anyo 1396 y que pendeba economicament y administrativa en o concello.

Edat Moderna[editar | editar código]

Teruel en o sieglo XVIII

En l'anyo 1482 os reis Ferrando II d'Aragón y Isabel I de Castiella churan os fueros d'a ciudat de Teruel, establindo-ie dos anyos dimpués a Enquesición. A ciudat s'oposaba a ista institución por lo que bi habió disturbios cheneralizatos encabezatos por o Concello. Dimpués d'un setio en a ciudat, con Juan Garcés de Marciella como capitán nombrato por o rei Ferrando II, s'imposó a Enquesición y se cremó a totz os capes d'a rebelión. Mientres tot o sieglo XVI a ciudat luitó por a esfensa d'os suyos fueros debant d'una monarquía que se feba cada vegata más absolutista. Tamién contrebuyó Teruel en as Alteracions de 1591, esfendendo os fueros d'Aragón en Zaragoza. A conseqüencia estió que beluns d'os suyos habitants fuoron enforcatos por fer parti d'a rebelión contra o rei Felipe I.

A población d'a epoca que apareixe en o Fogache de 1495 ye de 392 vecins. A economía se basaba prencipalment en l'agricultura y a ganadería, fendo-se a transuancia enta tierras d'o reino de Valencia, estando amás as relacions comercials más freqüents con iste reino que con a ciudat de Zaragoza. En a industria destacaban os pelaires y os fabricants de panyos de lana.

En a Guerra de Succesión espanyola, Teruel refirmó a Felipe V, encara que a la fin os fueros fuoron abolitos por iste rei como en a resta d'os reinos d'Aragón, Valencia, Mallorca y o Prencipato de Catalunya por os Decretos de Nueva Planta. En l'anyo 1775 Teruel consigue o privilechio de voto en as Cortz de Castiella que heba perdito dende a desaparición d'as institucions aragonesas por os Decretos de 1707. Ye un d'os tretze correchimientos en que se trestalla o Reino d'Aragón.

A población creixió una mica en tot o sieglo XVIII, estando en l'anyo 1776 de 1.015 vecins.

Edat Contemporania[editar | editar código]

Dende l'anyo 1833 Teruel ye capital d'a provincia d'o mesmo nombre, estando dende allora centro administrativo, chudicial, docente, comercial y de comunicacions. En as dos anteriors divisions provincials, la de Chusé Bonaparte de 1810 y la d'o Trienio Constitucional de 1822, a provincia teneba una grandaria menor, ye por ixo que en trobar-se a capital una mica descentrata bellas zonas d'as suya provincia se troban una mica luent y mal comunicatas.

Teruel por Pedro Pruneda

Mientres a Guerra d'o Francés a ciudat estió fidel a o rei Ferrando VII, alentatos por o Capitán Cheneral d'Aragón José Palafox. As tropas francesas a o mando d'o Mariscal Suchet ocuporon Teruel, setiando dimpués a ciudat as tropas de Villacampa que heban redotato a os refuerzos franceses que se trobaban en Caudet.

En l'anyo 1835 se construyó o puent d'a Reina ta unir a ciudat con os "Llanos de San Cristoval" y en l'anyo 1858 ye quan se mete en l'alto d'una colunna en a plaza Mayor u d'o Mercato o emblema d'a ciudat O Torico

En as Guerras Carlistas, a capital estió fidel a os isabelinos debant d'o poder carlista d'o Mayestrato, nunca a capital fue menazata por o cheneral Ramón Cabrera, encara que sí se facioron expedicions reyalistas ta safocar l'acoso carlista sobre a Tierra Baixa, y aduyar en o setio que bi habió en Alcanyiz en 1838. Mientres a Tercera Guerra Carlista a ciudat fue atacata por Marco de Bello y o infante Alfonso con numerosas tropas pero fracasoron y nomás pudioron dentrar en os arrabals d'a ciudat.

En 1901 plega ta Teruel o ferrocarril, construindo-se-ie a escalinata neomudéchar, obra d'o incheniero José Torán, ta unir a gara con o centro urbán.

Guerra Civil[editar | editar código]

Se veiga tamién l'articlo sobre a batalla de Teruel.

Teruel adquirió trista fama mientres a Guerra Civil, en estar o scenario d'a dita batalla de Teruel. Habendo cayito en mans d'os sublevatos a o comencipio d'a guerra, estió a sola ciudat presa por a Republica y posteriorment reconquerita por as tropas de Franco (o 22 de febrero de 1938). A ciudat quedó practicament destruita.

O plan de l'alto mando republicán yera metigar una mica a presión que os nacionals yeran fendo sobre Madrit, a capital d'a republica, y sobre as zonas que controlaban en o frent norte. Ta ixo miroron de reconquerir Teruel allora en mans d'os sublevatos, representando una amenaza ta o Levant que yera zona republicana. Emplegoron 12 divisions d'o Exercito Popular Republicán con bells 110.000 soldatos en a operación.

A ofensiva republicana sobre a ciudat prencipió por a zona de Corbalán o 15 d'aviento de 1937, baixo o mando d'o cheneral Vicente Rojo Lluch. En prencipiar se facioron bells bombardeyos a posicions estratechicas que i yeran amanatas a la ciudat, prencipalment nudos de comunicacions, y tamién bombardeyos a o mesmo casco urbán d'a ciudat. D'atra man, os nacionals, a o mando d'o coronel Domingo Rey d'Harcourt, yeran tanimientres parando a esfensa con os poquetz efectivos que'n teneban. No yeran más de 5.000 hombres, estando os puntos más fuertes d'a suya esfensa o edificio de Comandancia d'a plaza Sant Chuan y o seminario, puestos a on que tamién se'n fuoron as chents d'a ciudat t'acubilar-sen d'os bombardeyos. Amás i plegoron bells 1.500 civils y 1.759 melitars d'aduyar en a esfensa.

En plegar ta os arredols d'a capital, as fuerzas d'a Republica prencipioron a parar l'artillería sobre o centro d'a ciudat, estricallando de tot as zonas de mayor resistencia. Os combates en as carreras d'a ciudat yeran cuerpo a cuerpo, feito que fació que muitos civils estasen embrecatos en istas acions. O Exercito Popular Republicán gosaba ubrir brecas en as paretz d'as casas mugants, chitando granadas y matando a muita población civil, pero enantando asinas a escape, ya que no podeban fer-lo por as carreras, en as que se trobaban os melitars enemigos.

A ciudat rebla o 8 de chinero de 1938, ante o setio republicán y tamién debito a las baixas temperaturas que facioron encara mas dificils as operacions. As tropas republicanas prenioron a Domingo Rey d'Harcourt y a qui allora yera bispe de Teruel-Albarrazín Anselmo Polanco, qui sería fusilato en Pont de Molins o 7 de febrero de 1939, quasi a la fin d'a guerra.

A respuesta d'as fuerzas nacionals heba prencipiato o 31 d'aviento con bombardeyos aerios por orden de Rafael García Valiño. Y o 2 de chinero se situan os Nacionals en os alrredols d'a ciudat, encara que dica o 7 de febrero no pueden dentrar-ie, con una fuerte ofensiva d'artillería y o refirme por aire d'a Lechión Cóndor, zarrando asinas o setio o día 20. A tamas d'os esfuerzos Republicans, o 22 a ciudat rebla, con a presa de quasi 15.000 prisioners y numeroso material belico. D'ista traza se torna a un estato en o frent pareixito a l'anterior a la operación. Con Teruel recuperata ta a zona Nacional, y unas perdugas muit grans en hombres y material ta a Republica, sin d'haber conseguito os suyos obchectivos inicials, nomás retrasando a dentrata final de Franco en Madrit.

A la fin con a nueva ofensiva Nacional en Aragón dica a Mediterrania, en marzo de 1938, aproveitando l'acumulación de fuerzas en Teruel, o frent s'aluenya d'a capital. Y chino chano s'irá normalizando a vida en a ciudat, que yera quasi de tot estricallata, dimpués de dos setios. Un dato intresant ye que en a batalla de Teruel s'emplegó por primera vegada, y como preludio d'o que ocurriría en a Segunda Guerra Mundial, l'avión alemán Ju 87 Stuka.

En rematar a guerra prencipian os treballos de reconstrucción. Ista actividat duró dica meyatos d'os anyos 50. Entre os que s'aproveitó ta dotar a Teruel de mayors espacios ubiertos y racionalización de carreras. A suyas prencipals actuacions estioron o Seminario y arredols. A carrera y Plaza de Sant Chuan y o conchunto de l'Óvalo.

Toponimia[editar | editar código]

Orichen prerromán[editar | editar código]

O suyo nombre se remonta a una radiz prerromana, probablement o celta TUROS, que se repite muito en toponimos d'o sud d'a provincia y que apareixe en as inscripcions celtiberas de Penyalba de Bellestar. Bi ha muitos toponimos en os países antigament celtas con esta radiz, como Zúrich < TURICIUM, pero lo que más li se pareix ye Borgo Turola en o norte d'Italia. Esta radiz se presenta en iste zaguer toponimo italiano y en Teruel con a terminación -OLUS, o deminutivo latín que evolucionó ta l'aragonés -uelo/-uel y o mozarabe -uel. En un ara trobata en a localidat de Pías (Maceda, Ourense) bi ha referencias a lo dios galaico Torolvs Combiciegvs. En Castro Candelas (Ourense), se trobó una iscripción que i posaba REVVE ANA/BARAECO /AFER ALBINI /F(ilius) TVROLVS /V(otum) S(olvit) L(ibens) M(erito).

Bells autors sindembargo relacionan Teruel con l'antiga Turba, capital d'os antigos turboletas.

Formas medievals[editar | editar código]

A evolución natural de TVROLUS seguindo a fonetica d'os ibero-romances centrals ye Toruelo (a u puet evolucionar ta o como en FURCA > forca), y la O curta latina diftonga ta -ue-:

  • TUROLUS > *TUROLO > *Toruelo.
O toro y a estrela

O mozarabe local teneba una tendencia a perder a -o final n'estas terminacions (Bunyuel, Aranyuel, Estercuel, Almochuel, Exatiel, Castiel Fabib, Caudiel), tendencia que heredó l'aragonés medieval (que ya teneba en o mesmo Prepireneu como ilustra o toponimo Pedruel), y que tamién prenió d'os repobladors occitans:

  • Toruelo > Toruel / Teruel

En fuents arabes andalusís trobamos Tiruwal en o Muqtabis V de Ibn Hayyan (987-1076), un sieglo enantas d'a reconquiesta de 1170 y Tiruwl en Al-Udri.

O pareixito fonetico con o Toro favoreixió a leyenda fundacional d'Alifonso II perseguindo lo Toro. Amás d'istas en os textos medievals latins y romances s'escribiba de muitas trazas, a sobén as latinizatas Torol, Turol, Terol. Como en catalán o sufixo latín -OLUS no diftonga y pierde a vocal final romanz, en catalán o toponimo s'adapta con una d'estas zagueras, prenendo-ne Terol.

A trasformación d'a "o" romanz en "y" ye normal en l'aragonés dende a Edat Meya (Semontano, Hespital, os lugars de Terrient y Segorb). O castellán prenerá a forma d'o toponimo que será más común a fins d'a Baixa Edat Meya: Teruel.

Denominación en aragonés actual[editar | editar código]

En aragonés o diftongo -ue- desembolica a sobén una g quan va dimpués de r (Esquirgüelo, Pallargüelo, Cirgüello, Villargüé, Argüés, etz..), que en a grafía de l'Academia de l'Aragonés no s'escribe.

O investigador pancrudino de l'aragonés Miguel Anchel Martín Pardos adaptó lo toponimo oficial Teruel como Tergüel suposando esta pronunciación en aragonés, y adaptando-lo a la ortografía de l'aragonés común escrito en a decada de 1980 (Tergüel). Fació esta adaptación fonetica y ortografica sin saber que ya existiba esta pronunciación: en baixorribagorzano ya se pronuncia asinas. Amás en bellas parlas churras ye Tergüel,[1] Teregüel u Tregüel y que en os textos romances baixo-medievals de l'aria de Rubihuelos, actual Rubielos de Mora s'escribiba Terhuel y Noguerhuelas con una h que representaba precisament ixa g de debant o diftongo .

Demografía[editar | editar código]

Teruel ye a capital de provincia con menor población d'o Estato Espanyol, con 35.841 habitants en l'anyo 2012. Amás ye a capital con un menor porcentache de población entre os 15 y os 29 anyos y a capital con o indice más alto de personas mayors de 65 anyos.


Evolución demografica
1362 f 1495 f 1842 1857 1860 1877 1887 1897 1900
- 392 7.165 9.509 10.432 9.488 9.423 9.938 10.797
1910 1920 1930 1940 1950 1960 1970 1981 1991
11.935 12.010 13.584 16.172 18.745 19.726 21.638 28.225 30.789
1992 1994 1996 1997 1998 1999 2000 2001 2002
- - 28.994 - 29.320 30.047 30.491 31.068 31.506
2003 2004 2005 2006 2007 2008 2009 2010 2011
32.304 32.580 33.238 33.673 34.236 35.037 35.396 35.241 35.288
2012 2013 2014 2015 2016 2017 2018 2019 -
35.841 - - - - - - - -
1362-1495: fuegos; 1717-1981: población de feito; 1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

En o período 1900-1991 os datos se refieren a población de feito. Dende 1996 se fa servir o nuevo sistema de chestión contina y informatizata d'os Padrons municipals, basato en a coordinación de totz ellos por parti de l'INE.

Evolución demografica

Dende l'anyo 1860 a evolución d'a población ha estato cheneralment positiva, excepto dica 1887 quan a población baixó de 10.432 a 9.423. En o sieglo XX a población puyó en totz os censos que se facioron pasando de 10.979 habitants en 1900, dica los 18.745 en 1950, los 26.495 en 1980 y los 29.320 en 1998. Encara que no ha estato un gran creiximiento si que s'ha mantenito constant.

Manimenos si que se puet charrar d'una grieu despoblación en a suya provincia que teneba 246.000 habitants a prencipios d'o sieglo XX y continó baixando dica 236.000 en 1950, 170.284 en 1970 y nomás 136.840 en 1998. Muita d'ista población se'n fué ta la capital, por ixo lo ratio de población de Teruel respective a la suya provincia creixió en iste sieglo dende un 4,3% a prencipios de sieglo dica un 15,4% en 1976 y 22% en 1998. Ye amás a sola provincia d'o Estato a on que mueren más personas que naixen.

Chentilicio[editar | editar código]

O chentilicio d'os habitants de Teruel y tamién d'a suya provincia ye en aragonés "terolano" u "teruelano". En castellán o chentilicio ye "turolense",[2] que ye un cultismo. Tamién existe a forma "turboleta", introdueita dende ambients cultos clasicistas baixo a suposición que os turboletas vivioron en Teruel, pero que no tien guaire emplego.

Cheografía[editar | editar código]

En Teruel no son guaire raros os nevazos en hibierno

Teruel se situa en a depresión formata por a compleganza d'os ríos Xiloca y Guadalaviar, entre a foya de Calatayú y a plana valenciana. Ye rodiata por os macizos de Gúdar, Chabalambre y os Monts Universals, lo que fa que os suyo clima sía estremo.

Se troba a 915 metros d'altaria sobre o ran d'a mar, en un tozal chunto a o Guadalaviar a un kilometro d'o furco d'iste río con l'Alfambra.

A suya situación ye estratechica por estar en o nugo de comunicacions entre as vals d'o Xiloca, Alfambra, Millars y Guadalaviar, punto d'acceso d'a Meseta y d'Aragón a l'antigo Reino de Valencia.

Morfolochía y estructura urbana[editar | editar código]

Anvista cheneral d'a ciudat.

Encara s'alzan restas d'a viella muralla que cletaba la ciudat de Teruel en epoca medieval. Yeran siet as puertas que s'ubriban en o muro encara que hue nomás se conoixe a suya antiga ubicación. Actualment se puet veyer en o plan de Teruel l'aria perteneixient a la dita ciudat medieval. As carreras d'o casco historico, a-saber-lo estreitas, quasi no s'han adaptato a los tiempos modernos, fendo difícil a vegatas o paso d'o trafico. O casco antigo se puet dividir en dos por l'eixe que forman as carreras d'o Salvador, plaza de Castiella y a carrera d'o Tozal, corazón d'a ciudat y puesto a on que se trobaba d'antis más o mercato. O sector norte ye formato por carreras irregulars que s'endrezan perpendicularment a lo dito eixe. D'atra man o sector sud yera l'antiga chudería, situata en o cobalto d'a ciudat, as suyas carreras son radials y converchen en a plaza. En cheneral o plan de Teruel nos charra d'una ciudat cristiana de nueva planta. Pareixe que en Teruel no bi habió morería, ya que dengún d'os suyos vicos tien a estructura d'as carreras estreitas y irregulars caracteristicas d'os vicos andalusins.

No bi habió guaires modificacions en o casco urbán de Teruel dica o sieglo XVIII quan s'espaldó a parti más amanata a lo Guadalaviar ta enamplar o camín reyal que iba enta Valencia. Dimpués se facioron atras obras, ya difuera d'as murallas, construindo-se desanches arredol d'a ciudat. A población prencipia a enamplar-se por a parti oriental, amaneixendo asinas vicos como lo de Cuevas del Siete u os vicos de Sant Julián y o Rabal a lo sud, frent a lo Tozal.

A ciudat moderna s'estendilló a l'atro canto d'o primitivo tozal a on que ye a ciudat viella, gracias tamién a lo Viaducto, que premite unir as dos marguins. Astí se construyoron tamién a plaza de toros y o estadio de Pinilla, construindo-se primero casas unifamiliars a prencipios d'o sieglo XX y creyando-se dimpués o vico d'o Ensanche, con as suyas prencipals carreras radials enta o Viaducto

O río Guadalaviar ha estato un obstaclo important que no ha premitito que a ciudat s'estendillase muito enta l'ueste. As prencipals edificacions d'ista marguin d'o río son bellas industrias y urbanizacions modernas.

Asinas pues a morfolochía urbana d'a ciudat de Teruel ye de tipo radioconcentrico, adaptando-se a lo suyo entorno y prenendo como eixes radials as suyas prencipals vías de comunicación como son as carreteras de Zaragoza, Murviedro y Alcanyiz.

Respective a la tipolochía d'as suyas edificacions, cal decir que, encara que l'altaria d'istas ye prou variable, nunca no blinca d'os 13 pisos. Os edificios más altos se troban en o Ensanche, estando a torre de Teruel en l'Avenita Ruiz Jarabo o edificio más alto d'a ciudat, con 13 pisos.[3]

Hidrografía[editar | editar código]

Trescruzato por o río Guadalaviar, se troba a man d'o forcallo que forma iste río con l'Alfambra y dende a on que tamién gosa conoixer-se a lo primero d'istos dica la suya desembocadura en a ciudat de Valencia como lo río Turia.

Mugas[editar | editar código]

O suyo termin municipal muga con La Puebla de Valverde, Cubla, Bellestar, Rubials, Albarrazín, Cella, Celadas, Alfambra, Peralellos, Cuevas Labradas y Corbalán.

Vicos[editar | editar código]

Se puet dividir a ciudat de Teruel en dos zonas esferenciatas, a marguin oriental d'o río Guadalaviar a on que se troban a mayor parti d'os vicos d'a ciudat y o suyo nuclio historico y a marguin occidental a on que podemos trobar prencipalment zonas industrials y urbanizacions de nueva construcción.

En a marguin oriental se situa o casco historico d'a ciudat y arredol d'iste una serie de vicos como son o vico d'o Carmen, Cuevas del Siete, Los Baches, Los Arcos, El Carrel, o Rabal u Sant Julián.

En ista mesma marguin, pero deseparatos d'a resta d'o casco urbán por a rambla de Sant Julián, se troban os modernos vicos d'o Ensanche y Fuentfresca. Entre as urbanizacions que se troban en a periferia de Teruel son a Laguna, o Tubo, Los Arreñales, La Guía, Cerro Alcaldes, La Florida, Pinilla, Los Aljezares, Sagrada Familia, Viñas de Sant Cristoval.[4]

En a marguin occidental d'o Guadalaviar destacan o vico d'o Jorgito y a Urbanización Pinar de la Muela.

Entre os poligonos industrials cal destacar o poligono de La Paz que se troba chunto a la N-234.

Vicos rurals[editar | editar código]

Amás d'os vicos urbans, fan parti d'o municipio de Teruel os vicos rurals d'Aldeyuela, Val de Zebro, Villespesa, Villalba Chusana, Lo Campiello, Castralbo, Caudet, Concut, La Guea, Sant Blas, Tortallada y despoblato d'a Gasconiella.

Clima[editar | editar código]

Climograma de Teruel.

O clima de Teruel ye un clima mediterranio continental de montanya. En verano as temperaturas son suaus, encara que con muita oscilación termica, y en hibierno son fredas, con minimas muit baixas que a vegatas baixan d'os -10º. A temperatura meyana d'o mes de chinero ye de 3º y la de agosto de 21,9°, estando a meya anyal de bells 10,5°[5]

As precipitacions tienen o suyo minimo en hibierno y o maximo a la fin d'a primavera. Debito a lo suyo clima continental no son guaire abundants, recullendo-se-ie bells 400 mm. anyals.

Observatorio de Teruel
1971-2000 chi feb mar abr may chn chl ago set oct nov avi TOTAL
Temp. maxima (°C) 9,3 11,6 14,5 16,2 20,5 25,7 30,4 29,7 25,2 18,6 13,2 9,8 18,7
Temp. minima (°C) -2,1 -1,1 0,4 2,6 6,5 10,2 12,8 13,0 9,9 5,7 1,2 -0,6 4,9
Precipitacions (mm) 17 14 19 36 56 43 30 40 36 42 22 20 373

Los records de temperatura rechistratos en l'Observatorio de Teruel son os 39,3º d'o 4 d'agosto de 2007 y os -19,0º d'o 26 d'aviento de 2001.

Administración[editar | editar código]

Reparto de concellers[editar | editar código]

Eleccions municipals[6][7]
Partito 1979 1983 1987 1991 1995 1999 2003 2007 2011
Partido Popular/Alianza Popular - 7 6 7 10 9 8 8 12
Partido de los Socialistas de Aragón 5 7 7 9 7 6 8 7 5
Chunta Aragonesista - - 0 1 1 1 1 2 2
Partido Aragonés - 1 2 4 2 4 4 4 1
Partido Comunista de España/Izquierda Unida 1 0 0 0 1 1 0 0 1
Independients 5 6 4 - - - - - -
Centro Democrático y Social - - 2 0 - - - - -
Unión de Centro Democrático 10 - - - - - - - -
Total 21 21 21 21 21 21 21 21 21

Alcaldes[editar | editar código]

Gnome-searchtool.svg
Ta más detalles, veyer l'articlo Lista d'alcaldes de Teruelveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
Lista d'alcaldes
Lechislatura Nombre Partito politico
19791983 Ricardo Eced Sánchez UCD
19831987 Ricardo Eced Sánchez PAR
19871991 Javier Velasco Rodríguez[8] PSOE
19911995 Ricardo Eced Sánchez PAR
19951999 Luis Fernández Uriel[9] PP
19992003 Manuel Blasco Marqués[10] PP
20032007 María Lucía Gómez García PSOE
20072010 Juan Miguel Ferrer Górriz PAR/Independient
20102011 Manuel Blasco Marqués PP
2011 Manuel Blasco Marqués PP

Economía[editar | editar código]

Población de Teruel por sectors economicos:

   Atros servicios

   Comercio

   Industria

   Construcción

   Agricultura

L'actividat economica en a capital s'orienta a la industria (con bells 1.832 treballadors) y a construcción (con bells 1.032), encara que o prencipal sector ye o sector servicios con más de 8.290 treballadors.[5] Manimenos a poca población d'a ciudat fa que a suya actividat economica no tienga prou dinamismo, estando una ciudat d'emigración en cuentas d'una ciudat receptora de población.

Existen quantas explotacions ganaderas y industrias carnicas, adedicatas prencipalment a lo bestiar porcín, t'abastir o mercato de productos carnicos con denominación d'orichen, amás d'industrias de fabricación de prenso y abonos derivatos.

Atro tipo de industrias importants en Teruel son, por eixemplo, as relacionatas con l'automobil, as industrias de transformación de productos ceramicos y meneros y a industria forestal<.ref>(es) GEA Localización de la industria en la provincia de Teruel</ref> Entre as 230 industrias que se i pueden trobar, destacan prencipalment as chicotas. O prencipal poligono industrial ye La Paz, chunto a la carretera de Zaragoza, con 579.256 de superficie industrial en a suya primera fase y 620.055 m² en a segunda.

A importancia d'o sector servicios se troba en o feito de que Teruel ye a capital administrativa tanto d'a suya comarca como d'a suya provincia. Encara que no bi'n ha muitos, son más de 1.300 os comercios u botigas que se troban en a ciudat.

Torismo[editar | editar código]

Os prencipals atractivos toristicos d'a ciudat son o conoixito mudéchar teruelano y os Aimants de Teruel. As calendatas con mayor afluencia de toristas en a ciudat gosan estar as fiestas de la Vaquilla, os Aimants y a Semana Santa prencipalment. A ciudat tien un rete d'hotels de tres estrelas que premite agüespar a os suyos vesitants.

O Palacio de Congresos y Esposicions de Teruel tamién aculle tot tipo de ferias y congresos, d'entre as que destacan a Feria d'o Pernil y o Salón d'os Aimants.[11]

Educación[editar | editar código]

Teruel ye a población a on que se concentran totz os centros d'amostranza superior d'a comarca, con quantos Institutos d'Amostranza Segundaria y Formación Profesional y tamién o campus d'a Universidat de Zaragoza que incluye as titulacions de psicolochía, artes politas, sciencias d'o treballo, humanidatz, relacions laborals, machisterio y as inchenierías tecnicas en informatica y telecomunicacions.

Arte y cultura[editar | editar código]

Molimentos[editar | editar código]

En Teruel se puet trobar una important muestra de molimentos de totas as epocas dende a Edat Meya dica o modernismo, pasando por o renaiximiento u o barroco. Contino apareixen os molimentos más importants clasificatos por epocas.

Teruel medieval y mudéchar[editar | editar código]

Torre de Sant Per.
Claustro mudéchar de Sant Per.
  • Entre os molimentos medievals d'a ciudat de Teruel cal destacar os que son incluyitos en o conchunto de l'arquitectura mudéchar aragonesa declarata por a UNESCO como patrimonio d'a Humanidat:
    • A Seu de Santa María, ye una d'as pocas seu, chunto con a de Tarazona, construitas en estilo mudéchar. Son Patrimonio d'a Humanidat dende 1986 o teito y cimborrio y a suya torre. O suyo orichen se troba en a ilesia de Santa María de Meyavilla d'estilo romanico que prencipió a construir-se en 1171 y remató con a construcción d'a torre mudéchar en 1257. Dimpués a ilesia evolucionaría dende o romanico dica o mudéchar, pasando por atros estilos como lo gotico. A suya frontera neo-mudéchar la fació lo catalán Pablo Monguió en 1909.
    • A torre y ilesia de Sant Per. A torre ye d'a mesma epoca que a torre d'a seu. En a ilesia destacan l'abside gotico-mudéchar y a nau interior con o suyo retablo mayor. O conchunto ye patrimonio d'a Humanidat dende 1986. Ista ilesia ya existiba en 1196, encara que actualment lo más antigo que se conserva ye a suya torre. O suyo retablo mayor que en grandaria ye parellán a lo d'a seu, puet estar obra de Cosme Damián Bas (meyatos d'o sieglo XVI) encara que no se conoixe guaire bien o suyo orichen. O retablo más important ye l'adedicato a los Santos Cosme y Damián, obra de Gabriel Joli (1537), y se troba en a capiella que se diz d'os Aimants ya que ye astí a on que se troboron as momias d'os Aimants de Teruel en 1555.
    • A torre d'a ilesia de Sant Martín que data d'o sieglo XIV, construita en una ilesia que ya existiba dende 1196.[12] Ye de planta quadrata y por debaixo d'o suyo arco pasa una carrera. O suyo contrafuerte de piedra picata ye obra de Pierres Vedel y fue construito en o sieglo XVI. Tamién patrimonio d'a Humanidat dende l'anyo 1986. A ilesia se situa chunto a lo Portal de l'Andaquilla. Destacan bellas pinturas d'o sieglo XVII que s'alzan en ista ilesia, copias de Carracci y Guercino y un lienzo de Santa Teresa, obra de Bisquert.
    • A torre d'a ilesia d'o Salvador ye amás tardana d'as torres mudéchars d'a ciudat y talment por ixo reculle y desarrolla más elementos d'iste tipo d'arquitectura. Como as tres anteriors ye patrimonio d'a Humanidat dende 1986.
  • A ilesia d'a Mercet ye d'estilo mudéchar d'o sieglo XVI encara que a suya torre ye d'estilo barroco. O suyo retablo de Sant Chorche, d'autor desconoixito pero a sobén atribuito a Jerónimo Martínez (1525), tien un gran intrés iconografico.
  • Tamién cal destacar entre l'arquitectura civil medieval l'alchub, construito en 1373.
  • A ilesia de Sant Francisco ye d'estilo gotico, fue construita en l'anyo 1392. A suya nau ye de 5 trampos, destacando amás en o exterior as politas finestras ochivals y as suyas dos portaladas.[13] Feito construir entre os anyos 1391 y 1402 por o arcebispe de Zaragoza García Ferrández d'Heredia, naixito de Teruel. Obra d'os mayestros Conrat Rey y Gonzalvo de Vilvo.
  • O torretón d'Ambeles que feba parti d'a muralla d'a ciudat. Yera un d'os 40 torretons que bi heba y se construyó entre 1475 y 1525.[13]

Teruel renaixentista[editar | editar código]

Los Arcos de Teruel

Teruel barroco[editar | editar código]

Teruel modernista[editar | editar código]

Museus[editar | editar código]

Dinópolis.
Museu d'Arte Sacro de Teruel.

Parques y chardins[editar | editar código]

Parque de Los Fueros.

Son poquetas as zonas verdas publicas que bi ha en a ciudat de Teruel. Entre istas cal destacar o parque de los Fueros que ye o mayor espacio verde d'a ciudat, os chardins d'a Ciudad Escolar, o chardín d'a Glorieta, os chardinetz que bi ha chunto a la Escalereta debant d'a gara, un chicot parque en Fuentfresca y belatras chicotas arias verdas en as carreras d'o Ensanche, Fuenfresca y chunto a las carreteras d'Alcanyiz y Zaragoza. D'atra man as urbanizacions de las Viñas y Pinar de la Muela tienen asaberlas zonas verdas de propiedat privata.[3]

Fiestas[editar | editar código]

O Torico ye o centro d'a fiesta.
  • As suyas fiestas patronals, as Fiestas de l'Ánchel, conoixitas popularment como a Vaquilla del Ángel u simplament La Vaquilla ("a vaqueta" en aragonés), se celebran a primera quincena de chulio. Destacan en istas fiestas os toros ensogatos, as charangas y l'ambient de borina que bi ha en tota la ciudat. L'acto prencipal ye o "toque d'o campanico" y a mesa d'o "panyuelico" a lo Torico. En istas fiestas se remera o establimiento d'a ciudat medieval de Teruel, o mito d'o toro y a estrela.
  • As Vodas d'Isabel de Segura se celebran totz os anyos dende 1996 o tercer cabo de semana de febrero. Ye una fiesta en homenache a los Aimants de Teruel, Juan Martínez de Marciella, dito popularment huei Diego de Marcilla, y Isabel de Segura. En ista fiesta os teruelanos se visten con traches alto-medievals y s'instala un mercato medieval en as carreras d'o casco antigo d'a ciudat. L'acto central ye una representación teatral d'a historia d'os aimants.
  • O martes de Pascua se i fa o Sermón d'as Tortiellas que tien o suyo orichen en a fundación cristiana d'a ciudat, quan o martes de Pascua de cada anyo os teruelanos eslechiban a los cargos d'o Concello de Teruel. En ista celebración se gosa salir a minchar en as zonas verdas d'os arredols d'a ciudat.

Vida nocturna[editar | editar código]

As prencipals zonas a on que se concentra la vida nocturna en Teruel son as carreras entre a plaza del Torico y a Ronda de Ambeles. Entre as carreras a on se pueden trobar mayor cantidat de tabiernas y pubs son Sant Estebán, Parra, Abadía, Sant Andrés y Huesca.

En ista zona bi ha dende tabiernas irlandesas a on se puet beber biera dica atras a on se puet chugar a lo billar mientres se toma una copa. A variedat de musica que nos ofreixen istos locals va dende os zaguers exitos pop u house dica musicas tradicionals, jazz, salsa u musica alternativa, a vegatas en dreito. Ye de destacar en a vida nocturna teruelana dende fa muitos anyos o Café Bretón, o solo "karaoke" d'a ciudat (y conoixito tamién como el desguace).

L'atra prencipal zona de tabiernas d'a ciudat se troba a l'atro canto d'o Viaducto, en o primer Ensanche, arredol d'as carreras Soria y l'Avenita Ruiz Jarabo, a on que podemos trobar tamién gran variedat de pubs y tabiernas.[20]

Gastronomía[editar | editar código]

O pernil de Teruel ye a base d'a suya gastronomía.

A base d'a gastronomía teruelana como la d'a suya provincia ye a carne de ternasco y o pernil, dos productos con denominación d'orichen. Amás en gran parti d'a suya provincia tamién se fa l'aceite d'o Baixo Aragón, que se fa servir en totas as recetas d'a cocina teruelana.

Entre as verduras destacan o cardo, a borraina u as celgas. Atros primers platos tipicos son as sopas (más conoixitas las d'allo), asinas como los cocitos y potaches.

O "reganyao" ye un producto tipico de Teruel, feito con una masa de pan con pernil u sardina con pimiento royo y tot cueto en o furno.

Entre os pescatos destacan a truita, frita con pernil, y l'abadeixo.

Os más conoixitos lamins en Teruel son os "sospiros d'aimant", encara que tamién destacan as fruitas d'Aragón, os turrons (prencipalment de guirlache) y os lamins mudéchars.

Musica[editar | editar código]

Conoixemos os datos d'o establimiento d'a Capiella musical d'a seu de Teruel gracias a las suyas Actas Capitulars. Bi heba seis infants, cantaires de musica d'organo y canto plano, musicos de chirimías, baixón, cornetas, sacabuche, harpa, organo gran y chicot. O primero d'os mayestros de capiella estió Phelippe Balthasar (1604-1630). Yeran os musicos en ista epoca seguntes apareixen en os documentos Geronimillo, Bartolomillo, Blas, Bartolomé Pascual, Joan Gomes, tiples; Francisco Navarro, Martín Ximeno, contraltos; Amancio, "musico y tenor", Vicente Oller, "musico y cantor"; Bernad, Bartolomé García y Castillo, cornetas; Pedro Navarro, baixón, y organista Diego Muñoz (1619). Os siguients mayestros de capiella estioron: Juan Brun (1631), Gaspar Queto (1631), L. Ramos (1632), Juseppe de Rada (1633), Martín, M. de Victoria (1638), Miguel Marqués, de Daroca (1644), Cristóbal Galán (1646), Gerónimo Murciano (1649), Miguel Tello (1652) y Jusepe Alcalá (1664). Y organistas: Bartolomé Llobera (1630), Juan de Rueda (1632), Baptista González (1652), Vicente Pérez (1652) y Gerónimo Iranzo (1657) entre atros.[5]

Amás entre os grans musicos d'a ciudat de Teruel cal destacar os compositors Antón García Abril y Javier Navarrete, o cantaire pop David Civera u o tenor Andrés Marín.

Accesos y transporte[editar | editar código]

L'A-23 en pasando por Teruel.

Teruel ye comunicata por carretera con as atras dos capitals aragonesas, Zaragoza y Uesca, y con a ciudat de Valencia por medio de l'Autovía Mudéchar (A-23) que fa o recorrito entre o puerto de Somport y Murviedro. Con a N-420 se comunica con Cuenca y con Tarragona a traviés d'Alcanyiz. Por a N-330 ye comunicata con Utiel y Albacet, y con a N-234 se comunica con Castiella y Leyón.

A estación d'atobuses se troba situata en o centro d'a ciudat y dende ella se puet plegar a lo casco historico en nomás 5 menutos. Enlaza la ciudat d'os aimants con atras ciudayz importants como Zaragoza, Barcelona, Valencia, Bilbau, Madrit, Tarragona u Pamplona, amás de muitas localidatz d'as provincias de Teruel, Castellón y Valencia.[21] Bi ha servicio d'autobuses urbans y taxis en a ciudat de Teruel.

O Ferrocarril Central d'Aragón comunica Teruel con Zaragoza y Valencia.

Actualment ye en prochecto un aerodromo ta la ciudat de Teruel con una pista de 2.825 metros de longaria y 45 m. d'amplo.[22] Se situará en o vico rural de Caudet.

Esporte[editar | editar código]

Campeonato de Espanya Biketrial 2008 en Teruel.

O equipe esportivo más important d'a ciudat ye o CAI Voleibol Teruel, equipe de voleibol que chuga actualment en a Superliga, y ye chunto a o Fabregas Sport Multicaja os solos equipes aragoneses que lo fan. Amás o Club Voleibol Teruel ye un d'os tres solos equipes aragoneses que han ganato un títol de liga a ran estatal en a suya historia. Chuga como local en o Pavillón de Los Planos.

O prencipal equipe de fútbol d'a ciudat ye o Club Deportivo Teruel, establito en l'anyo 1945 y que actualment chuga en a Segunda División B en o estadio de Pinilla.

Instalacions esportivas[editar | editar código]

Entre as instalacions esportivas municipals d'a ciudat destacan:

  • O complexo esportivo de Pinilla, que amás d'o estadio de fútbol incluye trinquet y pista de tenis.
  • O pavillón esportivo de Los Planos que incluye a pista prencipal de fútbol sala, baloncesto, balonmano y voleibol, un rocodromo, chimnasio y salas de tiro con arco, tiro olimpico y esgrima.
  • O campo de fútbol Luis Milla, de yerba artificial.
  • O complexo esportivo Las Vinyas, con pistas d'atletismo, campo de fútbol y rugby, chimnasio, pavillón y pista de tenis.
  • O complexo esportivo Sant Fernando con pistas poliesportivas exterior y interior.
  • Una piscina climatizata de 25 x 12,5.
  • As piscinas municipals de Fuentecerrada, Los Planos, San Fernando y San León.

Medios de comunicación[editar | editar código]

O medio de comunicación local más important ye o Diario de Teruel, establito l'1 d'octubre de 1885 por Alfonso Torán.[23] A suya edición ye d'arredol de 5.000 unidatz.

Ciudatz achirmanatas[editar | editar código]

Presonalidatz naixitas de Teruel[editar | editar código]

Categoría principal: Naixitos de Teruel.

Entre os teruelanos más ilustres se troban:

Se veiga tamién[editar | editar código]

Bibliografía[editar | editar código]

  • Allanegui Félez, A.: La evolución urbana de Teruel, Real Academia de Nobles y Bellas Artes de San Luis, Zaragoza 1959. 58 pp.
  • Andrés, F.: Disquisiciones históricas sobre el origen de Teruel, Teruel, 1896.
  • Blasco y Val, J.: Historia de Teruel, Teruel, 1870.
  • Caruana Y Gómez De Barreda. J.: Organización de Teruel en los primeros años siguientes a su reconquista, Teruel, núm. 10, 1953.
  • Casas Torres, J. M.: Un mapa de los mercados de la prov. de Teruel, Estudios Geográficos, núms. 20-21, Madrid, 1945.
  • Navarro Aranda, M.: Documentos inéditos para la geografía urbana de Teruel. La traída de aguas a Teruel en el siglo XVI, Teruel, núm. 6, 1951, pp. 37–57.
  • Navarro Aranda, M.: Función geohistórica de la ciudad de Teruel, Teruel, núm. 3, 1950.
  • Soláns Castro, M.: Evolución de la población de Teruel entre 1860 y 1960, Instituto de Estudios Turolenses, CSIC, Teruel, 1968, 220 pp.
  • Caruana y Gómez de Barreda, J. : Historia de la provincia de Teruel, Instituto de Estudios Turolenses, Teruel, 1956.
  • Buesa Conde, D.: Teruel en la Edad Media, Guara Editorial (Colección básica aragonesa, 27), Zaragoza, 1980.
  • Actas Capitulares de la S. I. Catedral de Teruel (1604 y ss.)
  • Actas Capitulares de la S. I. Catedral de Albarracín (1592 y ss.)
  • Calahorra Martínez, P.: Historia de la Música en Aragón (siglos I-XVII), col. Aragón, Zaragoza, 1977.
  • Calahorra Martínez, P.: La música en Zaragoza en los siglos XVI y XVII. I. Organistas, organeros y órganos, Zaragoza, 1977.

Referencias[editar | editar código]

  1. Vicente Llatas El habla del Villar del Arzobispo y su comarca Institución Alfonso el Magnánimo, Diputación Provincial de Valencia, 1959 [1]
  2. Diccionario d'a RAE
  3. 3,0 3,1 (es) Mª PILAR BORDERÍAS URIBEONDO Y MANUEL GARCÍA MÁRQUEZ, Evaluación de la calidad de un medio urbano: la ciudad de Teruel, Espacio, Tiempo y Forma, Serie VI, Geografía, t.10, 1997, págs.51-73
  4. Mapa de Teruel en PDF
  5. 5,0 5,1 5,2 Datos d'a GEA
  6. Datos Eleccions MIR
  7. http://portal.aragob.es/archelec/index.jsp
  8. (es) Nota de prensa sobre a composición d'o Gubierno d'Aragón en a pachina web d'a Deputación Cheneral d'Aragón.
  9. (es) Noticia sobre a baixa de Luis Fernández en o PP por a invasión d'Iraq en 2003.
  10. (es) Eleccions municipals en Aragón en o periodico El País.
  11. (es) Palacio de Congresos y Esposicions de Teruel.
  12. Torre de Sant Martín en www.redaragon.com
  13. 13,0 13,1 Urban Teruel. Monumentos
  14. (es) Texto en o BOA d'a declaración de Los Arcos de Teruel como Bien d'Intrés Cultural.
  15. Casa de la Comunidat en www.dpteruel.es.
  16. (es) Texto en o BOA d'a declaración d'o palacio d'o marqués de Tosos de Teruel como Bien d'Intrés Cultural.
  17. (es) Texto en o BOA d'a declaración de Casa Ferran de Teruel como Bien d'Intrés Cultural.
  18. (es) Texto en o BOA d'a declaración de Casa La Madrilenya de Teruel como Bien d'Intrés Cultural.
  19. (es) Texto en o BOA d'a declaración de Casa Lo Torico de Teruel como Bien d'Intrés Cultural.
  20. (es) www.redaragon.com De Marcha por Teruel.
  21. www.estacionbus-teruel.com
  22. (es) Isolux y Corsan construirán el aeródromo de Teruel, en o diario Heraldo de Aragón.
  23. Diario de Teruel en GEA
  24. EcoDiario

Vinclos externos[editar | editar código]


Lugars d'o municipio de Teruel
Aldeyuela | Lo Campiello | Castralbo | Caudet | Concut | La Gasconiella | La Guea | Sant Blas | Teruel | Tortallada | Val de Zebro | Villespesa | Villalba Chusana


 
Municipios d'a comarca Comunidat de Teruel
Aguatón | Aguilar d'Alfambra | Alava | Alfambra | Almofalla | Alobras | Alpenyés | Archent | Bellestar | Camanyas | Camariellas | Canyada Vellida | Cascant | Cedriellas | Celadas | Cella | Corbalán | Cubla | Lo Cuervo | Escoriuela | Cuevas Labradas | Exorcas | Fababuix | Fuents Calients | Galv | Libros | Lidón | Mont Agut | Orrios | Pancrudo | Peralellos | Perals | Lo Pobo | Riello | Río Deva | Santa Olalia | Teruel | Tormón | Torre la Cárcel | Torremocha de Xiloca | Tramacastiel | Valacroch | Veguiellas de la Sierra | Villar Cremato | Villel | Visiedo