Aragonés ribagorzano

Iste articlo ye sobre o dialecto ribagorzano de l'aragonés. Ta atros emplegos se veiga ribagorzano.

Ribagorzano Ribagorsano, ribagorzano
Variedat de l'aragonés
Localización cheografica
Territorios	Ribagorza
Lugar(s) principal(s)	Campo, Estadilla, Graus
Sociolochía
Vitalidat	Alta
Literatura
Escritors principals	Ana Tena, Toni Collada
Rasgos dialectals	De transición ta o catalán

L'aragonés ribagorzano (pronunciato ribagorsano en a parla altorribagorzana), ye alto u baixo l'aragonés d'a Val de l'Esera en a Ribagorza.

As parlas d'a Ribagorza son dende un punto de vista macrocheografico parlas transición enta o catalán, y i-trobamos caracters mas catalans asinas como mos movemos enta l'este y mas castellans enta o sud. Dende o punto de vista microcheografico a trancición concreta ye en o Baixo Isabana y en "la Ribera", una val lateral a lo sud d'o Turbón.

En a enciclopedia aragonesa dicen a o grausino meyoribagorzano, manimenos se parla d'Alta Ribagorza a lo norte d'o Turbón y Baixa Ribagorza a lo sud. Graus ye prou a lo sud y la suya charrada no ye tan diferent d'o estadillano u o foncense. Si s'habiés d'emplegar o termin meyorribagorzano, diz que se aplicaría millor ta o Campés, seguntes se veye en a tabla d'o cabo de l'articlo.

Caracteristicas

Fonetica

• Palatalización d'a "l-" inicial latina:

llobo, llugá

• Palatalización d'a "l" en os grupos latins "pl-", "cl-", "fl-", "gl-", "bl-":

flló, cllau, pllegá

• Perduga d'a "-r" final, que afecta tamién a la "-r" final d'os infinitivos:

flló, llugá, pllegá

• Ye a comarca de l'Alto Aragón on mos trobamos mas casos de -m- que en castellán han dato -mbr-, y que empecipia a estar present en aragonés escrito meyeval en 1330.
  • HOMINE > homne > home.
  • FAMEN > fame.
  • VIMEN > vime.
  • LEGUMEN > llegume.
  • NOMEN > nom.
  • LUMEN > llum.
  • EXAMEN > ixamen (en Fonz)

Manimenos tamién i trobamos muitos casos de -mbr-: vimbre, costumbre, ixambre, llumbre, etc....y mesmo fambre en bell lugar.

Morfolochia

• Articlos: el, e(l)s, la, las.
• Morfema presonal de 1ª persona plural en -m u -n: nusaltros cantam, nusatros cantan. (En aragonés cheneral no existe a -m final y Miriam se pronuncia Mirian).
• Cherundios en -an, -en, -in (que s'escriben con una -d que no se pronuncia):
  • cantand, metend, partind
• Pasato perfecto perifrastico tipo catalán con o verbo ir:
  • ell va cantá en cuenta de el cantó
• Bellas formas verbals estranias en l'aragonés mas que mas en a Baixa Ribagorza:
  • yeba/eba en cuenta de yera.
  • "tu es" y "él e" en cuenta de "tu yes" y "él ye".

Sintaxi

combinacions de pronombres febles de dativo y acusativo de tipo catalán, con un orden coincident tamién con o francés (les lui):

• lo + li > lo-i
• los+ li > los-i
• la + li > la-i
• las+ lis > las-i

Subdialectos

O dialecto ribagorzano de l'aragonés puede dividir-se en quantos subdialeutos:

• Altorribagorzano u Benasqués
  • Alto Benasqués
  • Baixo Benasqués
• Meyorribagorzano
  • Campés
• Baixorribagorzano
  • Grausino
  • Estadillano
  • Foncense

Quadro de diferencias entre as parlas locals:

	Baixorribagorzano			Altorribagorzano
	Estadilla 1888	Graus 1910	Campo 1950	Bisagorri-Renanué 1950	Benás 1975
Diminutivo -et	-é	-é, a vegatas -et	-et, a vegatas -é	-et	-et
Diminutivo -iello	-illo	-illo	-illo	-iello	-iello
Articlo	El, los, la, las	El, los, la, las	El, es, la, las	El, y(l)s, la, las	El, els, la, les
Casos de no diftongación	Pocos	Pocos	Beluns	Beluns	Muitos
Desinencia de 1ª presona plural	-n	-n	-m	-m pero a vegatas -n	-m
Desinencia de 2ª presona plural	-z	-z	-z	-ts	-ts
Fonema /z/ u /s/	/z/	/z/	/z/	/s/	/s/
Formas d'o verbo estar	E, eba	E, eba	Ye, eba	Ye, yeba	Ye, yera
Infinitivos en -re	No bi'n ha	No bi'n ha	No bi'n ha	Bi'n ha: binre, beure	Bi'n ha: binre, beure
Participios	-au, -iu	-au, -iu	-au, -iu	-au, -eu, -iu	-au, -eu, -iu
Plurals femenins	-as	-as	-as	-as	-es
Pronombre de 1ª presona plural	Nusatros	Nusatros	Nusotros	Nusaltros	Nusaltros

Bibliografía

• Maria Luisa Arnal Purroy y Maria Angeles Naval López Lengua y literatura de unos poemas en ribagorzano (1861-1888). Archivo de Filología Aragonesa XLII-XLIII. 1989.

Vinclos externos

• http://www.elenachazal.com/aragones.html
• http://www.labullanga.com/dicxionario.htm#arriba