Ursus arctos

De Biquipedia
Ir a la navegación Ir a la búsqueda
Ursus arctos
Ero and Mira 3.jpg
Onsos pardos (Ursus arctos)
Denominacions populars
Onso, onso pardo
Clasificación scientifica
Dominio:
Eukaryota
Reino:
Animalia
Filo:
Chordata
Clase:
Mammalia
Subclase:
Theria
Orden:
Carnivora
Suborden:
Caniformia
Familia:
Ursidae
Subfamilia:
Ursinae
Chenero:
Ursus
Especie:
Ursus arctos
Descripción
Ursus arctos
L., 1758
Distribución cheografica
Ursus arctos range map.svg
Distribución d'Ursus arctos

L'onso pardo (scientificament Ursus arctos (L., 1758)) ye una especie de mamifero placentario en a orden Carnivora, familia Ursidae, y a más amplament distribuida y reconoixible d'o chenero Ursus. Se distribuye por Asia, Europa y America d'o Norte. Como especie, tendría entre 6 y 19 subespecies descritas. O numero de subespecies pende d'as clasificacions, y como gosa pasar en Zoolochía, no todas as escuelas de clasificación as en admite todas.

Descripción[editar | editar código]

L'onso pardo ye un carnivoro granizo, anque a suya mida ye una d'as caracteristicas que más varían entre poblacions diferents. Os más grans son os onsos de Nordamerica, as subespecies conoixidas popularment como grizzly y onso Kodiak, d'as quals os masclos pesan entre 400 y 450 kilogramos. As poblacions d'Europa occidental (supespecie U. a. arctos) se contan entre as más chicorronas, con pesos que no gosan pasar de 250 kg. O dimorfismo sexual en a mida tamién ye una caracteristica d'esta especie, trobando-se que as fembras pesan de regular entre 2/3 y a metat que un masclo adulto, y son considerablement más chicas.

O pelo el tienen denso, cerrudo, de color marrón u menos vegadas grisosa. En unas poblacions puede haber-ie más variabilidat de color entre exemplars que en atras. As patas fuertes rematan en zarpas de cinco didos con grans unglas no retráctils que emplegan pa esgarrapar en a tierra, vulcar piedras y trancos y arribar enta radices, tuberclos y invertebraus. Fan marcha plantigrada sobre as zarpas debanteras y os pietz.

Tién mala vista pero l'olfacto ye a-saber-lo bueno. As suyas vocalizacions van dende ronius dica gramidos graus, audibles a buena distancia.

Habitat[editar | editar código]

Os onsos pardos son habitants de selvas viellas de caducifolios u taigas con buena mida d'arbustos que proporcionen fruitos. Son animals prou adaptables, y en i ha poblacions que habitan mesmo en habitats esteparios u en disiertos, anque son as menos. Quasi todas as poblacions son en recesión y a causa gosa estar a especie humana, que destruye os suyos habitats u en caza.

Alimentación[editar | editar código]

Os onsos pardos son omnivoros. Minchan muitos productos vechetals, arredol d'o 75% d'a suya dieta,[1] como radices, tuberclos, bayas variadas, y tamién gran cantidat de lulos de fagacias como glans, castanyas, billotas y fayas.[1] Anque pertenecen a la orden Carnivora, os ursidos han desenvolicau adaptacions especificas pa esta dieta de preferencia vechetal, y tienen muelas carnuceras baixas, con coronas aplanadas, que les permiten mastecar. Os micromamiferos representan o 15,6% de a suya dieta, y os insectos l'atro 9,4%,[1] por o qual a caza y o consumo de carne de grans mamiferos ye de tot testimonial.

S'ha estimau que un onso en os Perineus puet minchar dica 144 kg anyals (arredol d'o 8% d'a suya dieta) de carne de carnuzos que dimanan de bistiar domestico.[1] Este costumbre, en zonas firme humanizadas como os Perineus, ye la causa d'es problemas de convivencia con a ganadería, pos os onsos aprenden a veyer a os animals domesticos como una fuent d'alimento (principalment por os carnuzos deixaus y as esparias) y les rondan, y regular que eventualment se puedan acapizar. Os onsos pardos adultos consumen entre 10 y 16 kg d'alimento cada día.[1]

En a cordelera cantabrica, aon que a fracción carnivora en a dieta de l'onso pardo ye más estudiada, os onsos pardos cazan crías de corzo y de ciervo.[1] Pa fer-lo, siguen una tactica que fa pensar en as descripcions que tradicionalment fan os ganaders y pastors perinencos d'os onsos como animals rondadors, que «rondan» a las ramadas; os onsos cantabricos, una vegada que han ulorau a la cría de cervido, rechiran de traza sistematica entre 15 y 45 minutos un espacio d'entre 0,5 y 1 hectaria dica que la troban con a ulor, y alavetz s'arremeten contra ella en un ataque a la capeza que nomás dura un momento. Contino, l'onso arrociega a la suya presa entre a maleza pa consumir-la tranquilo.[1]

Os onsos cantabricos nomás cazan animals mui chovens,[1] nunca adultos, y como se gosa veyer son concienzudos y selectivos, y mesmo como fan atros depredadors salvaches como o lobo, marchan d'o campo con a suya presa y se cubillan en a selva pa minchar. Os cans abandonaus son cazadors inexpertos y indiscriminaus, no matan una sola presa quan atacan sino que s'acapizan contra tot lo que pueden, y tienen o costumbre d'abandonar as despullas en o mesmo puesto.[2] Tanto lo estau francés como l'espanyol indemnizan os ataques d'onso y de lobo, pero no pas os de cans domesticos.[3]

Variacions estacionals[editar | editar código]

L'alimentación d'os onsos pardos ye firme influenciada por a hibernación. Os onsos tienen dos periodos anyals d'hiperfachia (gran inchesta d'alimentos) y una estación d'hipofachia (baixa inchesta) quan son dispiertos. Os periodos d'hiperfachia son d'agüerros, quan s'aprestan pa la hibernación, en o qual consumen especialment alimentos caloricos como abayons, manzanas, glans y castanyas, y de primaveras, quan salen d'as onseras y quieren recuperar; alavetz consumen muita hierba y brotes verdes (cerbillons, umbeliferas, etc.).[1] En a Peninsula iberica, o periodo d'hiperfachia primeral dura entre marzo y mayo, y o d'agüerros d'agosto dica noviembre.[1] A hibernación d'os onsos pardos ibericos dura aviento, chinero y febrero. En os meses de chunio y chulio, estes animals pasan o periodo d'hipofachia, con inchestas prou más baixas. Curiosament, os ataques contra arnas se fan de normal en ixes meses.

Subespecies[editar | editar código]

Mida comparativa d'una onsa europea (Ursus arctos arctos) y un hombre moderno.

L'onso pardo ye una especie con abundantes subespecies, anque o suyo numero y clasificación pueda variar seguntes a escuela de clasificación. I hai subespecies reconoixidas universalment, como Ursus arctos arctos u Ursus arctos middendorffi, pero atras son a-saber-lo polemicas y la suya descripción no s'accepta por quasi denguno, como Ursus arctos pyrenaicus.

  • Ursus arctos arctos: l'onso pardo d'Europa y Asia occidental. Ye una subespecie relativament menuda (os masclos adultos no pasan de 250 kg),[4] descrita por Linné en 1758, por o que ye a primer subespecie reconoixida. Habitaba historicament dende a Peninsula iberica y as islas Britanicas dica Rusia y Orient Meyo y dende o norte d'Africa dica Escandinavia, anque en l'actualidat ye relicto en una población d'a cordelera cantabrica, una atra más chicorrona en os Perineus, gravement menazau en os Apenins en Italia, y un poco más numeroso en o Caucas, d'aon que dimanan os eixemplars pa reintroducción en atros puestos. En Escandinavia y Rusia i son a mayoría d'os entre 200000 y 250000 onsos que se creye que fan parte d'esta subespecie.[4] En estudeos d'ADN, todas as poblacions europeas mostraban poca variabilidat relativa en os marcadors cheneticos estudiaus.[5] Se piensa que en a zaguera glaciación totz os onsos pardos d'Europa y Rusia feban parte d'una sola población.[4]
  • Ursus arctos collaris: Onso pardo de Siberia. Ye una subespecie que ocupa puestos intermedios entre a disrtribución cheografica de U. a. arctos y a d'os onsos de Kamchatka. Tamién son intermedias as suyas mesuras y o color d'o pelache, pos tiene exemplars fuscos como os europeus y atros que tienden a colors más claras.[4] En queda en as montanyas Altai en Mongolia, en a provincia china de Xinjiang y en o estrimo oriental de Cazaquistán. Tamién en a taiga de Siberia.[6]
  • Ursus arctos beringianus: Onso pardo de Kamchatka. A subespecie a describió Alexander von Middendorff en 1851.[7] Son onsos de mida graniza (os más grans en o Viello Mundo), semellants en mesuras y en colors con os onsos d'Alaska, con os quals son estreitament emparentaus.[7][5] Se piensa que de conchunta podrían haber formau una sola población en o pasau que estaría l'antipasau más probable de l'onso Kodiak.[7] Se'n troba en a peninsula de Kamchatka, en a isla Karaginsky y en as islas Shantar y as islas Kuril,[7] en l'estrimo más oriental de Siberia. En total, entre 10000 y 14000 onsos pardos forman esta población, pero ye una d'as más menazadas por a caza furtiva, pos a rechión ye escasament poblada por l'hombre y i ha bien poco control y porque a visicula biliar d'onso ye mui demandada en a medicina tradicional china. Se calcula que dica 2000 onsos podrían morir cada anyada a conseqüencia d'esta caza ilegal.[7]
    • Ursus arctos alascensis: Onsos pardos d'Alaska. A describió como subespecie Clinton Hart Merriam en 1892, pero se piensa que podría formar una sola subespecie con os onsos pardos de Kamchatka.[8] En caso de que se confirmás, prevaldría o nombre scientifico Ursus arctos beringianus en estar o más antigo. Estes onsos habitan en a metat sud d'Alaska, en as costas d'o golfo Norton Sound, y en as montanyas Unalaldik y Shakotolik y a lo largo d'es ríos Nushagak y Kuskokwim,[8] en o dito estau estatounitense. Os masclos adultos pesan entre 130 y 400 kg, y as fembras entre 90 y 200 kg, por o que ye una d'as subespecies con mayor variabilidat de midas.[8]
Ilustración de 1942 d'una muller a o canto d'un onso Kodiak (U. a. middendorffi) disecau.
  • Ursus arctos middendorffi: L'onso de Kodiak u onso Kodiak. A mayor subespecie d'onso pardo, con masclos adultos que pesan en promedio entre 450 y 545 kg.[9] Fan arredol de 3 metros de largaria, o que los fa rivalizar con l'onso polar en mida, que ye o carnivoro terrestre más gran. Viven en a isla Kodiak y atras islas adebant d'a costa sud d'Alaska, y a tamas que o suyo habitat natural tiene buena copia d'alimentos, se'n troba en territorios individuals más chicorrons que a resta de subespecies,[9] lo que permite que i haiga una mayor densidat de población en l'archipielago. Ye una subespecie emparentada con U. a. beringianus y U. a. alascensis, por o que se piensa que talment s'orichinó a partir d'una población d'aquellas. A subespecie de l'onso Kodiak dimana d'una población ancestral d'Ursus arctos que quedó isolada en l'archipielago Kodiak en a zaguera glaciación.[9] I ha bels 3500 onsos Kodiak en as suyas islas.[9]
  • Ursus arctos horribilis: L'onso griso americano u grizzly (o suyo nombre popular en anglés, que viene a significar «canoso»). Ye a subespecie d'onso pardo más amplament distrtibuida d'America d'o Norte, con poblacions dende Alaska dica os Estaus Unius continentals, a traviés de Canadá. Historicament heba teniu poblacions saludables en quasi tot lo ponient de Nordamerica pero en l'actualidat no i queda si que en o 2% d'a suya aria de distribución en a resta d'os 48 Estaus Unius continentals que no son Alaska,[10] pasando de 50000 onsos en o sieglo XIX seguntes as estimacions dica entre 1000 y 1500 en Estaus Unius sacando Alaska en l'actualidat.[10] Nomás dentro d'o Parque Nacional de Yellowstone se considera que no sía en periglo d'extinción.[10] En Alaska y Canadá as suyas poblacions son tamién más numbrosas. Os onsos grizzly mesuran dende 90 centimetros dica 1,2 metros d'altaria en a cruz, y entre 1,6 y 2,4 metros mesos de piet, y pesan entre 180 y 700 kg,[10] lo que les fa una subespecie con muita variabilidat interna. Tamién son una d'as subespecies con más variacions de color, que van dende la marrón amarillisca dica quasi a negra, pasando por a combinación de marrón escuro con pels blancos que les da nombre[10] (grizzly significa «de pelo griso» u «canoso» en anglés americano).
  • Ursus arctos pruinosus: l'onso azul tibetano. Ye una subespecie en extremo periglo d'extinción, que namás habita en l'Himalaya y de regular a altitutz mayors que atros onsos.[11] Se'n sabe bien poco sobre l'estau actual d'as suyas poblacions, pero se considera en periglo extremo y beluns el consideran ya extincto en a Naturaleza.[11] O pelo ye de color negra y puede tener una tonalidat cenisosa, que ye d'aon le viene o nombre. Tiene una taca amariella en o peito, y a cara rubia-royisca.[11] Os masclos adultos farían entre 1,8 y 2,1 metros de largaria.[11]
  • Ursus arctos syriacus: L'onso pardo sirio. Ye a subespecie más menuda con diferencia, con una largaria d'entre 100 y 140 centimetros totals y un peso de 200 kg.[12] Tiene o pelache más claro que atras subespecies, tendent a rubio, con una faixa más escura que va dende a cabeza dica la coda por tot l'espinazo. As patas son más escuras que o cuerpo, y as unglas son de color clara.[12] Historicament en i heba en Turquía, Echipto, Israel, Libano, Irak, Irán, Afganistán y norueste de Pakistán; en l'actualidat no en queda ni en Israel, ni Siria, ni Libano ni Echipto, y en global podría estar amán de desapareixer en a Naturaleza.[12]
    • Ursus arctos isabellinus. L'onso pardo de l'Himalaya. Subespecie no reconoixida por todas as autoridatz, se describió en o sieglo XIX en as montanyas d'o que huei ye Pakistán. Ye un onso rubio, bellas vegadas royisco, no guaire gran. Pa bels autors podría estar una población d'Ursus arctos syriacus.
  • Ursus arctos crowtheri. L'onso pardo de l'Atlas. Descrito en 1844 como Ursus crowtheri,[13] se piensa que os antipasau d'esta subespecie arribón en as montanyas de l'Atlas en un proceso migratorio entre a zaguera glaciación. Teneba un aspecto semellant a os onsos pardos europeus, con o pelache fusco y os costaus más royiscos, pero yera prou más chicorrón.[13] Gosó habitar en toda la cordelera de l'Atlas, dende Marruecos dica Tunicia, y se tiene conoiximiento d'a suya existencia dende tiempos d'os romans, qui en capturaban y importaban pa lo circo. Se considera que a subespecie s'extinchió en a decada de 1870.[13]
Dos onsos de Hokkaido (Ursus arctos yesoensis).
  • Ursus arctos gobiensis: L'onso de Gobi. Subespecie que no totz acceptan, se describió en 1997[14] y estaría representada por una población d'entre 20 y 40 onsos que tansament habitan en o sudueste de Mongolia, entre o disierto de Gobi y as montanyas Altai.[14]
  • Ursus arctos lasiotus. L'onso pardo d'Ussuri. Subespecie que vive en o extrimo oriental de Siberia en o mar de Chapón, a isla rusa de Sakhalín, as islas Shantar y Kurils, o norueste de China y a peninsula de Korea. Ye una subespecie emparentada con a suya vecina U. a. beringianus, pero una miqueta más chica en mesuras y con a cabeza un poquet más larga y a frent no tan elevada.[15] I ha una población isolada en a isla chaponesa de Hokkaido, y bels autors a consideran una subespecie diferent, Ursus arctos yesoensis.[15]
    • Ursus arctos yesoensis. L'onso pardo de Hokkaido. Ye un onso pardo de color escura y mida chica, propio d'a isla norte de Chapón. No s'accepta por totz, y a mayoría d'autors a consideran una población local d'U. arctos lasiotus.[15]

Etimolochía[editar | editar código]

O nombre scientifico d'a especie, Ursus arctos, se forma d'un nombre chenerico Ursus, que ye «onso» en latín, y un especifico arctos (ἄρκτος) que ye «onso» en griego. Por tanto ye un pleonasmo.

Referencias[editar | editar código]

  1. 1,0 1,1 1,2 1,3 1,4 1,5 1,6 1,7 1,8 1,9 (es) Ecología trófica de Ursus arctos CSIC, consultada o 12 de noviembre de 2019.
  2. (fr) Le chien qui attaque aux brebis, consultada o 12 de noviembre de 2019.
  3. (fr) L'indemnistion des dégats d'ours; consultada o 12 de noviembre de 2019.
  4. 4,0 4,1 4,2 4,3 (es) El oso pardo; consultau o 12 de noviembre de 2019.
  5. 5,0 5,1 (es) Juárez-Casillas y Varas; Genética evolutiva y molecular de la familia Ursidae: una revisión bibliográfica actualizada. Abril 2011.
  6. (en) Siberian Brown Bear, consultada o 12 de noviembre de 2019.
  7. 7,0 7,1 7,2 7,3 7,4 (en) Kamchatka Brown Bear, consultada o 12 de noviembre de 2019.
  8. 8,0 8,1 8,2 (en) Alaska Grizzly Bear, consultada o 12 de noviembre de 2019.
  9. 9,0 9,1 9,2 9,3 (en) Kodiak Bear, consultada o 12 de noviembre de 2019.
  10. 10,0 10,1 10,2 10,3 10,4 (en) Grizzly Bears, consultada o 12 de noviembre de 2019.
  11. 11,0 11,1 11,2 11,3 (en) Tibetn Blue Bear, consultada o 12 de noviembre de 2019.
  12. 12,0 12,1 12,2 (en) Sirian Brown Bear, consultada o 12 de noviembre de 2019.
  13. 13,0 13,1 13,2 (en) Atlas Bear, consultada o 12 de noviembre de 2019.
  14. 14,0 14,1 (en) Gobi bear; consultada o 12 de noviembre de 2019.
  15. 15,0 15,1 15,2 (en) Ussuri or Amur brown bear; consultada o 12 de noviembre de 2019.

Vinclos externos[editar | editar código]