Caza

De Biquipedia
Ir a la navegación Ir a la búsqueda
Caza d'un bisont por un amerindio en una representación de 1844 por George Catlin.
Scena de caza en un manuscrito d'o sieglo XV.

A caza ye una actividat humana que tien como finalidat a captura (y eventualment a muerte) d'un animal, ta finalidatz d'ocio, alimentación u de comercio. Actualment gosa estar una actividat mas que mas esportiva, pero alazetalment yera una actividat esencial ta permitir a supervivencia, mientres a Prehistoria y en bellos momentos posteriors d'a Historia.

Asinas, quan amanixió la caza como actividat humana estió como continidat de l'acción depredadora de l'hombre sobre atras especies animals, mas que mas ta completar a suya dieta alimentaria, estando a cazata una fuent important de proteínas d'orichen animal, encara que tamién yera important t'aproveitar segundariament atros elementos de l'animal, como a suya piel, que se feva servir ta fabricar-ne vestitos, y as grasas animals, emplegatas no nomás t'alimentación sino que tamién ta iluminación.

Uno d'os grans abances en a historia d'a humanidat estió a domesticación d'animals capturatos por meyo d'a caza, pero que dende ixe inte ya no se mataban y minchaban, sino que se destinaban a la reproducción en l'actividat conoixita como ganadería, de forma que l'hombre podeba asinas acceder a una fuent estable d'alimentos, no depenendo asinas dreitament d'a suerte en a cazata.

Ta practicar a caza, l'hombre emplega armas, evolucionando asinas l'actividat d'a caza seguntes a mesma evolución d'as armas, dende os simples palos aguzatos dica a lanza, l'arco y as flechas u l'aplicación d'a polvora t'a caza con fusils u rifles cada vegata mas sofisticatos.

Una expedición de caza se diz "cazata"[1] u "cacera"[2]. Se diz "fer una cazata" u "ir-se-ne de cazata". Qui caza ye un "cazaire" u "cazataire".

Se veiga tamién[editar | editar código]

Referencias[editar | editar código]

  1. Chabier Tomás Arias: El aragonés del Biello Sobrarbe. Instituto de Estudios Altoaragoneses (1999) p 206
  2. Francho Rodés, Paquita Maza, Gonzalo Gavín Bocabulario monegrino Publicacions d'o Consello d'a Fabla Aragonesa, 2005

Vinclos externos[editar | editar código]