Coda

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Coda d'un can.

A coda (d'o latín <CAUDA) ye la extremidat posterior de muitas especies d'animals, especialment quan ixa forma un apendiz móvil, flexible y destinguible d'o torso. A coda ye un apendiz exclusivo quasi que d'os vertebratos, anque bi ha especies d'invertebratos que gosan tener estructuras caudals que fan recordar a coda d'os vertebratos, como os arraclans y qualques insectos, per o que popularment se les diz tamién «codas».

A coda d'os vertebratos se sostenta en una estructura osia que ye continación natural d'a columna vertebral, dillá d'a cintura pelviana. En as luengas latinas, l'adchetivo que fa referencia a la coda ye «caudal».

As codas gosan desempenyar funcions diversas pendendo d'a especie en a que se troben; En os peixes y bells altros sers vivos aquaticos son estructuras locomotrices que baten d'un costato enta l'altro ta empuchar-se a traviés de l'augua, en bellas especies de quadrupedos (como os félidos) pueden emplegar-se como estructuras equilibraderas quan se mueven per puestos estreitos u alturas (p. ex. se piense en os gatos quan caminan per bell muro) u quan corren u brincan, en os grants artiodactilos (p. ex. as vacas) y perisodactilos (p. ex. os caballos) pueden bater-se ta espantar as moscas y os tabans, en os masclos d'as aus pueden servir como reclamo sexual (p. ex. o pavo reyal) anque de regular s'emplegan ta equilibrar-se y maniobrar en o volido, en os cetacios sirve ta desplazar-se en l'augua, etcetra.

En o ser humano, como en a resta d'especies de primates homininos, a coda ye una estructura vestichial que no se manifiesta si que en a fase embrionaria y desapareix a moniquet mientres que lo feto va creixendo. Existen casos anomalos de ninons que son naixidos con una coda, pero que no gosa manifestar sisquiera uesos, per lo que se le diz «coda tova». Este defecto, en o primer mundo, se puet correchir con cirurchía simple en o momento d'o naiximiento.

Imachens

• 

  De caballos.

• 

  D'un pavo reyal.

• 

  D'una engardaixina.

• 

  D'un hipopotamo.

Se veiga tamién

• Pata
• Tarrias
• Lumo

Vinclos externos

• Se veigan as imachens de Commons sobre codas.