Carnivora

De Biquipedia
Ir ta: navego, busca
Carnivora
Rechistro fosil: Dende l'Eocén dica l'actualidat
Salamandra
Chineta (Genetta genetta)
Clasificación scientifica
Dominio: Eukaryota
Reino: Animalia
Filo: Chordata
Clase: Mammalia
Orden: Carnivora
Bowdich, 1821
Familias

17 familias distribuitas en 2 subordens y 3 infraordens.

Carnivora ye una orden de mamiferos placentarios caraterizata per suya estructura dental, més que més per a forma d'as suyas molars carateristicas, que en mastozoolochía se dicen «muelas carniceras». Se i clasifican arredol de 260 especies conoixitas, repartitas en 2 subordens y 3 infraordens que comprenden 17 familias. O termino «Carnivora», que significa literalment «carnivoros» en latín, fa referencia a l'alimentación depredadera d'a mayoría d'as especies que se i comprenden, anque existen belunas que la fan omnivora.

Representants d'esta orden habitan os cinco continents, habendo-ie especies (superfamilia Pinnipedia, focas, morsas y lions de mar) que se son gosato adaptar a la vida marina en podendo dintrar-se mils de kilometros en a mar, per lo que tecnicament se'n puet trobar representants en qualsiquier punto d'o globo terrestre.

Per o rechistro fosil, se crei que os mamiferos carnivoros apareixoron en Nordamerica fa bells 45 millons d'anyos, dimanando d'a familia de mamiferos fosils dita Miacidae. L'aparición d'as dos subordens prencipals, Feliformia (literalment, en latín, «Os qui tienen forma de gato») y Caniformia (literalment, «Os qui guardan forma de can») se ye quiesto considerar que pasó no guaire dimpués.

Os primers miembros d'a familia Carnivora teneban una alimentación carnivora, como encara en l'actualidat la i tienen a mayoría d'as especies vivas d'o grupo. Enguán, només os Felidae y os Pinnipedia guardan una alimentación exclusivament carnivora sin d'excepcions conoixitas, estando omnivoros os muitos Canidae (se piense en os vulpins), Mustelidae (se piense en os teixudos), Ursidae (onsos), mangostas, chinetas ecetra. Os onsos gosan ser omnivoros de regular, estando que l'onso polar (Ursus maritimus) per a dureza de l'habitat a on que se troba, se fa obligato a mantener una dieta carnivora quasi que en o 100%, anque si se le'n ofreixe tamién consume alimentos vechetals. En comparanza con l'anterior, l'onso panda chigant (Ailuropoda melanoleuca), que tamién fa parte d'a familia Ursidae, ye herbivoro en a més gran parte d'a suya dieta, anque o suyo consumo de uevos, peixes y insectos ya s'haiga documentato.

Imachens[editar | editar código]

Vinclos externos[editar | editar código]