Chordata

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Cordatos
Rechistro fosil: Dende o Cambrico dica l'actualidat
Latimeria chalumnae
Clasificación scientifica
Dominio: Eukarya Reino: Animalia Subreino: Eumetazoa Indefinito: Bilateria Superfilo: Deuterostomia Filo: Chordata Bateson, 1885

Os cordatos (ditos scientificament Chordata, d'o latín chorda = cuerda, cordón) son un tipo morfolochico, considerau en zoolochía, d'animals que presentan a lo menos en beluna d'as suyas fases de desarrollo una estructura dita notocorda u cuerda dorsal.

Os cordatos, dende o punto de vista evolutivo, son un grupo d'animals muit important, porque ye o grupo que as suyas especies plegan t'a más gran diversidat de nichos ecolochicos, y son as que han amostrau una capacidat más gran d'adaptación ta ambients más diferents, sobretot, en tierra firme, anque muchas especies son tamién de tot aquaticas u amfibias. Entre os cordatos destaca a suya capacidat d'autorregulación y organización interna, y a posibilidat de puyar y mantenir a temperatura corporal en bells grupos (mamiferos y muxons prencipalment). Ixes y atros factors van fer más gran a suya complexidat y van meter, en o suyo momento, a la suya desposición una capacidat unica ta controlar as suyas reaccions metabolicas y a perfección d'un sistema niervoso más complexo.

Caracteristicas chenerals d'os cordatos

• Simetria bilateral, con o cuerpo segmentau, con tres capas cherminals y un celoma bien diferenciau.
• Cordón niervoso siempre dorsal. A partir d'iste cordón, en os animals más complexos, se desarrolla o celebro y a miollo espinal.
• Estructura de sostentación, en posición dorsal, clamada notocorda. S'expande de largo por tot o cuerpo y en bells animals i remane durant toda a vida. En atros (a mayoría) se torna en o esquinazo antes de naixer.
• En a suya fase larval, totz tienen fendillas branquials en a farinche. Os vertebraus terrestres las pierden antes de naixer.
• Tienen un sistema dichestivo completo, con boca y ano.
• Se reproducen sexualment, en amás gran parte d'os casos os sexos son separaus.
• A fecundación puet ser tanto interna como esterna. D'entre os animals que la fan interna en i hai que fican uevos y en i hai que no.
• O corazón ye en posición ventral.
• O escleto ye por adintro de l'organismo, y puet estar cartilachinoso u osio.
• Tienen musculatura estriada.
• Tienen coda dimpués de naixer.
• Tienen una farinche tremada (que tien dos funcions: dichestiva y respiradera).
• Epineura.

Esquema basico d'un cefalocordau, como ideyalización d'a forma más simple d'os cordaus. 1) Ganglio cerebral (precursor de l'encefalo d'os organismos superiors) 2)Notocorda. 3) Cordón niervoso dorsal (precursor d'ao miollo espinal). 4) Coda. 5) Ano. 6) Canal alimentaria. 7) Sistema circulatorio. 8) Poro abdominal. 9) Lacuna suprafarinchia. 10) Fendillas branquials. 11) Farinche. 12) Lacuna bucal. 13) Barbulas. 14) Cavidat bucal. 15) gonadas (Ovario u Testiclo). 16) Fotorreceptor (precursor d'os uellos). 17) Niérvols. 18) Plegamiento abdominal. 19) Esbozo hepatico (precursor d'o figado y d'a mielsa).

Clasificación d'os cordaus

Branchiostoma lanceolata, un cefalocordau, l'eixemplo más simple que encara puet trobar-se vivo.

Gabilán (Accipiter nisus) eixemplo d'au.

Iberolacerta bonnali, eixemplo de reptil.

Una chineta (Genetta genetta), eixemplo de mamifero.

En i hai dos subtipos: vertebraus y procordaus y dintro d'ellos muitismas atras subclases:

• Cordadaus.
  • Cefalocordaus.
  • Urocordaus.
    • Thaliacea.
    • Ascidiacea.
    • Larvacea.
  • Vertebraus.
    • Pteraspidomorphi (extinguius).
    • Placodermos (extinguius).
    • Ostracodermos (extinguius).
    • Ciclostomos.
      • Lampredas y Mixinidos.
    • Condrictios.
      • Elasmobranquios.
        • Galeomorphi.
          • Heterodontiformes.
          • Lamniformes.
          • Orectolobiformes.
          • Carcharhiniformes.
        • Squatinomorphi.
        • Squalomorphi.
          • Hexanchiformes.
          • Squaliformes.
          • Pristiophoriformes.
        • Batoidea.
          • Rajiformes.
          • Pristiformes.
          • Torpediniformes.
          • Myliobatiformes.
      • Holocephali.
      • Hipotremos.
    • Osteictios.
      • Actinopterichios.
      • Sarcopterichios.
    • Amphibia.
    • Reptilia.
    • Aves.
    • Mammalia.

Clasificación actual

Como a taxonomía ye cambeando de contino a mida que s'enanta en as investigacions sobre os organismos y sobre os taxa, hue s'ha dixau d'emplegar agrupacions que se consideran artificials como yeran os Agnatos (peixes sin de bariellas) y os Gnatostomaus (peixes que sí que en teniban, actualment ficaus en un grupo de vertebraus clamaus Cephalaspidomorphi -cefalaspidomorfos-). Atro nombre que incluye a os vertebraus y tamién a atros organismos ye Craneata, que encara s'emplega actualment.

En os vertebraus d'os grupos d'as aves, mamiferos, reptils, amfibios y peixes, a cuerda dorsal només i ye present en a cría, porque dimpuesas se va sustituindo por o esquinazo.

Vinclos externos

• Se veigan as imachens de Commons sobre cordaus.
• Wikispecies tiene un articlo sobre cordaus.
• A branca d'os cordaus en l'arbol filochenico d'a vida (en anglés).