Parque Natural de Moncayo
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
| Moncayo | |
 Puyada a Moncayo | |
| Tipo | Parque Natural |
| Establiu | 1978 |
| Superficie | 1.399 ha |
| Situación |  Sistema Iberico, Zaragoza
|
| Latitut | 41.802 |
| Lonchitut | -1.826 |
 | |
O Parque Natural de Moncayo (en castellano Parque Natural del Moncayo) tien una amplaria de 1.399 hectarias y ye situato entre as comarcas de Tarazona y Moncayo, Aranda y Campo de Borcha en a provincia de Zaragoza. S'estendilla por os termins municipals de Tarazona, Los Fayos, Torrellas, Santa Cruz de Moncayo, Sant Martín de la Virchen de Moncayo, Litago, Lituenigo, Trasmoz, Vera de Moncayo, Anyón, Bulbuent, Ambel, Talamantes, Grisel, Agramont, Purillosa, Calcena y Beratón, iste zaguero en a provincia de Soria.
A tuca de Moncayo se troba dentro d'o parque natural, y ye o pico más alto d'o Sistema Iberico con 2.314 metros d'altaria.
Toponimia[editar | modificar o codigo]
En textos medievals relativos a Tarazona y Grisel se menciona una Defesa de Moncayo. Actualment en o termin municipal de Tarazona se troba o microtoponimo Dehesa de Moncayo u Dehesa del Moncayo que da nombre a este parque natural. A defesa yera en o piso bioclimatico d'o caixicar de Quercus pyrenaica[1], que una vegada aclarau yera un buen puesto pa paixentar o bestiar.
Flora y fauna[editar | modificar o codigo]
Dende os 900 metros y dica una altaria de 1.800 se i puede trobar o pinar, formau por diferents especies de pins seguntes as condicions climaticas, pero en bell caso no representa a vechetación natural. Tamién bi ha cardoneras, brucos y chordons. Os prencipals animals d'ista zona son o pinyonero, o papirroi y o taixugo.
Vechetación[editar | modificar o codigo]
A vechetación natural en Moncayo podemos trobar-la escaleronata ya que bi ha prous cambeos dende a zona baixa enta la tuca:
- La zona más baixa ye d'o piso mesomediterranio y i trobamos carrascals, dica os 900 metros d'altaria. Bi ha matarrals formatos por allagas y tremoncillos an viven conillos, perdices, rulletas, taixugos y fardachos entre atros.
- Entre os 900 y os 1.100 metros encara ye o piso mesomediterranio pero i trobamos o caixicar de Quercus faginea. Gais, chordos, chabalins y rabosas forman a suya fauna.
- Entre os 1.000 y 1.800 metros ye o piso supramediterranio, con caixicars, fayars y pinars.
- Os caixicars son de Quercus pyrenaica y en parte los han sustituitos por pinars de repoblación. Os caixicars se situan en altarias entre bells 950 m y 1.350, coindindo con a dentrada en o parque natural[1].
- Entre os 1.100 y os 1.650 ye o fayar, uno d'os más meridionals d'Europa. En o fayar bi ha una mayor humidat y as temperaturas son más baixas. Atras especies vechetals son, os fraixins, salces, abetullos, triémols, tileros, felces, molsas y canyuteras. Entre a suya fauna son os chabalins, o corzo, o esparbel y l'alica reyal.
- Ya dende os 1.650 metros y enta la tuca de Moncayo, lo fayar se fa cada vegata más claro y Alodas y gripias i viven.
- Por dencima d'os 1.800 metros ye o piso oromediterranio con chinebrals y pinars de pin royo. En la parte superior d'estas pinars (1.900-1.950) bi ha pin negro introdueito dende o Pireneu por repoblación.
- Por dencima de los 2.000 m ye o piso crioromediterranio con pastizals de Festuca indigesta dica la tuca.
Referencias[editar | modificar o codigo]
- ↑ 1,0 1,1 (es) Ignacio Ballarín Iribarren, Enrique Pelayo Zueco: Árboles y arbustos del Moncayo. Diputación General de Aragón, Departamento de Agricultura, Ganadería y Montes, 1985.
Bibliografía[editar | modificar o codigo]
- (es) Ignacio Ballarín Iribarren, Enrique Pelayo Zueco: Árboles y arbustos del Moncayo. Diputación General de Aragón, Departamento de Agricultura, Ganadería y Montes, 1985.
Vinclos externos[editar | modificar o codigo]
Se veigan as imachens de Commons sobre Parque Natural de Moncayo.- (es) Pachina web d'o Parque Natural de Moncayo.
- (es) Dentrada en a GEA (Gran Enciclopecia Aragonesa).
