Brueco
O brueco[1][nota 1] (d'o latín <brucus y iste d'o galo <*vroico) ye o nombre popular con o cual s'identifica a cualques especies vechetals d'a familia d'as ericacias caracterizadas por o porte arbustivo no superior a 2 metros d'altaria, follas muit menudetas y atipidas en as brancas, y una florada densa con flors chicorronas y muit numerosas, de color rosa, vrioleta u blanca.
Hábitat
[editar | modificar o codigo]Cuasi todas as especies de brueco son intolerants a suelos calsineros u de pH basico, y precisan de terrens acidos que son poco frecuents en Aragón, por o que son plantas poco abundants. I ha formacions de brueco en bels puertos de montanya en o Pireneu axial, a on que o suelo ye acido de forma excepcional, como en o macizo d'a Maladeta, en a val de Benás. Por ixe motivo, en bels puestos de l'Alto Aragón, o saber popular l'atribuye d'estar una planta propria de l'alta montanya, anque ista conclusión ye erronia porque no i creix por limitacions climaticas (a mayoría d'especies podrían creixer en una diversidat de climas muito mas ampla, y de feito lo fan en belatras rechions) sino por as condicions de suelo tan particulars que precisa.
Especies
[editar | modificar o codigo]En a Peninsula Iberica son frecuents as siguients especies, que se conoix como brueco:
- Calluna vulgaris - A mas abundant.
- Erica cinerea
- Erica scoparia
- Erica vagans - Sí que ye propria de l'alta montanya.
- Erica arborea
Pero a denominación puede fer-se extensiva a belatras especies de caracteristicas morfolochicas pareixidas, principalment en os cheneros Erica y Cassiope.
Fitonimia
[editar | modificar o codigo]En a val de Benás se documenta a forma brueco ta nombrar a istas plantas[2], que bellas fuents han dau por cheneral en aragonés.
En a Sierra d'Albarracín, o Xiloca y La Rioja a especie Calluna vulgaris recibe a denominación de biércol, denominación pareixida a brécol, que se diz en l'aragonés de Bisagorri, Renanué y en o catalán ribagorzano d'Espés, y a brócal en Castanesa y Bonansa.
Una extensión en a que predominan os bruecos se diz "brucal" u "brocal".[3] Tamién se diz "bruguera" y ha dau un apelliu toponimico. Os apellius Brugalla y Brualla tamién se relacionan con iste tipo de matas.
Notas
[editar | modificar o codigo]- ↑ Con as variants broc, bruco, broco y bruécol.
Referencias
[editar | modificar o codigo]- ↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
- ↑ (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
- ↑ (es) ALLUÉ NAVARRO, Mª Isabel y FUERTES CASAUS, Mª Pilar. Nombres para un paisaje (toponimia del Valle de Broto). Ed. Comarca de Sobrarbe + Diputación de Huesca; Zaragoza, 2006. ISBN 84-611-1141-9
Se veiga tamién
[editar | modificar o codigo]| Control d'autoridaz |
|
|---|
Datos: Q17128757