Molimento Natural d'o Naixedero d'o río Pitarc

Naixedero d'o río Pitarc
Naixedero d'o río Pitarc
Datos chenerals
Tipo	Molimento Natural
Establiu	15 d'aviento de 2009
Superficie	114 ha
Situación
Situación	Mayestrato (Teruel)
Latitut
Lonchitut
Mapa

O Molimento Natural d'o Naixedero d'o río Pitarc ye un Molimento Natural d'Aragón que fa parti d'o rete d'espacios naturals protechitos. Declarato como espacio protechito o 15 d'aviento de 2009, se troba situato en o termin municipal de Pitarc, en o Mayestrato teruelano, ocupando 114 ha. en os arredols d'o naixedero d'o río Pitarc.

Cheolochía

O río Pitarc travesa o sinclinal de Fortanet, entre as sierras de Canyada, a l'ueste y de la Lastra a l'ueste. A val que forma o río tien o suyo orichen en o Cretacio superior, y ye formata por calsinera, salagons y archilas. A permeabilidat d'istos materials, debito a os procesos de fracturación y disolución karstica que se han producito, fa que se comporten como un acuifero, cullindo l'augua d'a pluya y metendo-la a o fluxo soterranyo. Iste acuifero ye isolato por os materials archilo-arenosos que constituyen a formación d'Utriellas d'atros acuiferos d'a redolada que se troban a una fondaria mayor.

A parti superior de l'acuifero ye dreitament en contacto con a superficie, ya que no ye isolata por materials impermeables, lo que fa que tienga unas condicions de presión atmosferica igual que as superficials. As auguas salen en o naixedero d'o río Pitarc (u como se diz localment "El Ojo de la Fuente") con cabals de dica 1.500 l/seg. Cuan bi ha prous precipitacions l'augua gosa salir d'una "chaminera" creyando-se un polito salto d'augua. O rechimen d'o río Pitarc ye de tipo fluvio-nival, por lo que tien dos maximos, un en primavera y un atro secundario en agüerro.

Flora

A flora d'o río Pitarc destaca especialment. Ya en o sieglo XIX o botanico aragonés Ignacio Jordán de Asso y del Río vesitó y documentó a-saber-las especies vechetals d'ista zona.

Capra pyrenaica hispanica

As condicions d'humidat son prou buenas, por o que a vechetación ye abundant, destacando en as riberas os salces (Salix sp), chopos (Populus sp) y alvernices (Alnus glutinosa); en as laderas caixicos (Quercus faginea) chunto a os buixos (Buxus sempervirens) y seneras (Amelanchier ovalis), constituindo una representación de selvas mixtas submediterranias; en as zonas rocosas d'as foces se troban tot tipo de flora rupícola especializata y ta rematar as sierras d'a redolada, mas xutas, son cubiertas de pins nasarres (Pinus nigra). A cita de l'alverniz ye dubdosa, y por o menos actualment no se troba en este parache.

Adintro d'a foz se fa mas densa a vechetación con serberas (Sorbus sp), abillaneras (Corylus avellana), acirons blancos (Acer campestre), alitoners (Celtis australis), peberas (Lonicera etrusca), liedreras comuns (Hedera helix) y en primavera flors como as vrioletas (Viola willkommii), flors de primavera (Hepatica nobilis) u literolas (Euphorbia sp) entre atras.

Fauna

A fauna ye tamién variata, tanto en o propio río Pitarc como en os suyos arredols. En as auguas d'o río destaca a presencia d'a truita común (Salmo trutta) y d'a loira (Lutra lutra).

En os cinglos de calsinera a os cantos d'o río viven o vueitres (Gyps fulvus) y bucardos (Capra pyrenaica hispanica)

Vinclos externos

• (es) Molimento Natural d'o Naixedero d'o río Pitarc en www.rednaturaldearagon.com.
• (es) Molimento Natural d'o Naixedero d'o río Pitarc

• Datos: Q9035046
• Multimedia: Nacimiento del Río Pitarque / Q9035046