Quercus pyrenaica

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Caxico
Quercus pyrenaica
Dominio: Eukaryota
Reino: Plantae
División: Magnoliophyta
Clase: Magnoliopsida
Orden: Fagales
Familia: Fagaceae
Chenero: Quercus
Especie: Quercus pyrenaica
Quercus ilex
Willd.

Lo Quercus pyrenaica ye una especie de caixico con fuella marcescent, propia de suelos silicios y climas transicionals entre mediterranio y atlantico.

Distribución[editar | modificar o codigo]

Bi n'ha en lo sudueste de Francia, en la Peninsula Iberica y Norte de Marruecos (només que en Lo Rif).

Por lo que fa a la suya distribución en la Peninsula Iberica, ye mes que mes en la parte central y cuadrant nordoccidental, a on predominan substratos cheolochicos silicios. La mayor parte de la distribución peninsular d'este caixico ye en las sierras que mugan la compleganza de Duero.

En la mitat oriental, a on predominan materials calsinosos tien tendencia a trobar-se en enclaus coincidindo con afloramientos de materials paleozoicos y rodeno, por eixemplo: sierra d'Espadán, sierra de Pina, Penyagolosa, sierra d'Albarracín, sierra Menera, sierra de Cucalón, sierra de Mira, sierra de Moncayo, sierra de Prades.

Encara que lo haigan baptizau como pyrenaica no ye guaire común en los Pireneus, trobando-se en Iparralde. La suya sola representación en Navarra y Aragón a lo norte d'Ebro ye la sierra de Leire y sierra d'Orba.

Ecolochía[editar | modificar o codigo]

Ye un caixico especializau en un ambient d'humidat d'agüerro-hibierno. Tamién ye especializau en ocupar suelos acidos que se desembolican sobre substratos cheolochicos de piedras d'arena, rocas metamorficas u rocas ignias acidas. Produce muita follarasca, que alimenta a los animals de lo suelo. Contrarresta lo lavau de suelo aportando sals en ixa follarasca, estando millorant de lo suelo. En las sierras gosa plegar dica la cota de 1500 y 1600 m.

Como lo Quercus faginea u Quercus ilex puet estar arbustivo y un eixemplar desembolicar muitos trallos que salen independients de la mesma radiz, pero plega mes luent. Bel caixico d'estos con muitos trallos pueden formar alfombras de gran extensión pero con 30 cm d'altaria. Esta capacidat de lo Quercus pyrenaica de desembolicar grans extensions de matullos li permite de vivir a la sombra de lo Pin royo, creixer y substituyir-lo en condicions naturals.

Seguntes Pedro Montserrat Recoder, lo Quercus pyrenaica tiene relación con l'orichen de las ranyas de la Meseta Central, que se formoron por movimientos de ladera. Con la plevia d'agüerro-hibierno lo suelo, buralenco, saturau d'augua, cai fluindo ladera enta baixo. La presencia d'una alfombra de trallos de caixico, con las suyas radices a ran de suelo, forma una especie de pelleta que mantién la forma d'este suelo mientres se mueve cayendo. En muitos puestos las ranyas u mantos coluvials de lo Plioceno y Cuaternario superan los 20 m d'espesor y tienen una color royenca. Bi ha encara ranyas activas en los Montes de Oca y la Demanda, como por eixemplo en lo Puerto de la Pedraja.

La produccion de fuellas y glans d'esta especie y la suya capacidat milloradora de los suelos acidos fan que dende por lo menos la Edat Meya los habitants de la Espanya silicia haigan aclarau los caixicars de Quercus pyrenaica pa paixentar lo bestiar, convertindo-los en defesas, como se desvinió en la Defesa de Moncayo[1]. La defesa de Quercus pyrenaica se diz bardal, pero si la defesa de Quercus pyrenaica s'emplegaba pa tener animals de tracción como bueis y se convertiba en un boyalar u boalar. Por intereses fusters en muitos puestos como la zona de pinars de Soria y Serranía d'Albarracín, l'hombre ha favoreixiu lo pin royo tallando estos caixicos y fendo que i haiga pinars por debaixo de lo suyo livel topografico orichinal.

Fitonimia[editar | modificar o codigo]

Esta especie no tien garra fitonimo especifico en aragonés actual porque l'aragonés se charra actualment fuera de la suya aria de distribución prencipal. Los pocos eixemplars de la sierra d'Orba deben pasar como un caixico mes. No presenta una denominación homochenia en castellano. En bella zona como Leyón, Palencia y Salamanca, se clama rebollo. Manimenos on coincide con lo Quercus faginea, como por eixemplo en la mayor parte de Castiella, ye este a qui dicen rebollo, y claman roble a lo Quercus pyrenaica, por tener una fuella mes gran que fa recordar a los Quercus de fuella caduca. En catalán los botanicos y cheografos dicen roure reboll oficialment a lo Quercus pyrenaica.

Melojo ye como dicen en castellano de Segovia a lo Quercus pyrenaica y ye como agora prefieren dicir-ne los botanicos espanyols en as suyas obras, pa crebar l'ambiguedat de lo termin rebollo y l'amplaria de lo termin roble. Marojo ye una variant d'esta palabra que s'emplega en zonas d'Aragón que mugan con Castiella como sierra Menera, a on que troba lo microtoponimo El Marojal. Melojo, y sobre tot Marojo, se relaciona con l'astur-leyonés marfueyu, con lo castellano medieval marfojo, y talment existió en aragonés d'o sureste un cognato no identificau igual como existe en catalán marfull, que manimenos se refiere a lo Viburnum tinus.

Descripción[editar | modificar o codigo]

Fuellas y amentos colgants

La fuella de Quercus pyrenaica ye inconfundible porque ye la mes fendida de toz los Quercus peninsulars. Te tamién glauca y con superficie pilosa.

Referencias[editar | modificar o codigo]

Se veiga tamién[editar | modificar o codigo]