Parque Natural d'as Vals Occidentals

Vals Occidentals

Aguatuerta
Datos chenerals
Tipo	Parque Natural
Establiu	27 d'aviento de 2006
Superficie	27.073 ha
Situación
Situación	Chacetania, Uesca
Latitut	42.853
Lonchitut	-0.696
Mapa

O Parque Natural d'as Vals Occidentals ye o zaguero parque natural creyato en Aragón, o 27 d'aviento de 2006. Situato en o nord-ueste d'Aragón, en a comarca d'a Chacetania. Tien 27.073 hectarias de superficie que s'estendillan por os municipios d'Ansó, Val d'Echo, Aragüés de lo Puerto, Aísa y Borau y as mancomunidaz forestals de Aragüés-Chasa y Ansó-Fago. Existe amás una Zona Periferica de Protección de 7.335 ha.

O parque muga con Francia a o norte y con Navarra a l'ueste, estendillando-se por as cabeceras d'os ríos Veral, Aragón Subordán, Osia, Estarrún y Lubierre.

Se pueden trobar en o parque molimentos megaliticos que amuestran a presencia de l'hombre en istas tierras dende tiempos prehistoricos. En a Edat Meya yera un important paso d'o camín de Sant Chaime, aprofitando l'antiga calzada romana que i pasaba.

Cheolochía

S'incluyen a versant norte d'a Sierra Vernera, o Castiello d'Acher, Acherito, Aguatuerta y l'ibón d'Estaners. Os picos mas destacatos son o Bixaurín, o Esper, a Meseta d'os Tres Reis, a Penya Forca y o Ezcaurri. Tamién fa parte d'o parque a foz de Boca de l'Infierno en a val d'Echo. L'altaria maxima d'o Parque ye o Bisaurín con 2.670 m. y a minima son os 900 m.

Bi ha representación d'as unidaz conoixitas como "Pireneu axial" y de "sierras pirenencas interiors". O Pireneu Axial d'este parque natural corresponde a conglomeraus, piedras panals y archilas royencos d'edat permo-triasica conoixitos como "molasas tardiherzinicas" u "permotrías". Son bien vistables en a zona d'Aguatuerta. As sierras pirenencas interiors presentan materials sobre tot calsinosos d'edaz entre o Cretacio superior y o Eoceno con altarias importants a causa d'haber-se apilato uns cuantos encabalgamientos, cadagún con unas cuantas series de plegos bien vistables. Os plegos abundan en Sierra Vernera y Penya Forca y a vegatas s'han convertiu en sinclinals pendius, como podemos veyer en a mesma Sierra Vernera y en o Castiello d'Acher.^[1]

Entre as suyas formacions cheolochicas destacan los fenomenos karsticos (crepas, fovetas, foces) y cheleras d'o Cuaternario, trobando-se vals en U y ibons. Destacan Aguatuerta y o Castiello d'Acher.

Fauna

A fauna mas destacable incluye especies en periglo d'extinción como l'onso (Ursus arctos) u o trencauesos (Gypaetus barbatus) y atras como a loira (Lutra lutra), o milana (Milvus milvus), o gallo montesín (Tetrao urogallus aquitanicus) y a rana pirinenca (Rana pyrenaica).

Flora

Respective a la flora, o parque ye a millor muestra de selvas mixtas eurosiberianas en Aragón, prencipalment abetals (o mayor d'Aragón) y fabars. Tamién bi ha pinars y caixicars y matullars de buixos. En total bi ha 1200 especies vechetals, estando-ne 232 consideratas raras y 7 endemicas. Entre as suyas selvas destacan Gamueta, Oza y Linza.

Atras figuras de protección

Coinciden en parti con o Parque Natural atras feguras de protección:

PIC d'as Vals.
PIC d'as Vals Sud.
PIC Sierra d'as Vals, Aísa y Borau.
PIC d'o río Veral.
ZEPA d'as Vals (ES0000137)^[2] que cubre un aria de 319,88 km².
ZEPA de Salvatierra-Foces de Fago y Biniés (ES0000282)^[3] que cubre un aria de 25,89 km².