Sus scrofa

Sus scrofa
Un chabalín.
Denominacions populars
chabalín, cochín / cochino
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Mammalia
Orden:	Artiodactyla
Suborden:	Suina
Familia:	Suidae
Chenero:	Sus
Especie:	S. scrofa
Descripción
Sus scrofa L., 1758
Distribución cheografica
Distribución d'o chabalín

O chabalín (de l'arabe ǧabalí, nombre cientifico Sus scrofa (L., 1758)) ye un mamifero salvache d'Eurasia, d'a familia d'es suidos, omnivoro, prolifico y oportunista, muito frecuent en o continent, y que ha estato introducito ta altros paises, especialment per estar apreciato como a presa de caza mayor. Antes d'imposar-se l'arabismo chabalín se deciba en aragonés medieval puerco u puerco montés. Tamién se denomina a vegadas chenericament como cochín.

A especie fue descrita per primer vegada en 1758 en Alemania como Sus scrofa, y dimpués se respetó a denominación scrofa como forma especifica ta la subspecie centroeuropea, deixando-se ta las altras (incluito lo tocino) as denominacions mes segundarias.

Tien una capeza gran, con uellos chicos y o cuello muy desarrollato. As patas suyas son curtas, y se troban mes desarrollatas as unas de debant que no las de dezaga, a diferencia d'o tocín domestico, en o cual ta obtener-ne o millor resultato economico, s'ha seleccionato cheneticament ta que es animals modernos en tiengan as zaguereras mes grans, perque ye d'allá d'a on ne obtienen as millors piezas de carne. A vista ye estremadament pobre, y ta compensar-se-ne, es chabalins han desarrollato un olfacto prou mes bueno que les permit de ixolomar alimentos incluso a baixo d'a tierra.

Rayons, as crías d'o chabalín.

Es pelos tienen midas y colors diferents pendendo d'o puesto d'o cuerpo d'on se miren. En alto d'a crinera fan de 10 ta 13 cm de lonchitut (dica 16 cm en a coda) y son fuscos y bastos, en a cara y las patas els tienen mes fuscos que en a resta d'o cuerpo, y per es cantos mes que mes bi predominan colors mes claretas. En as crías chiquetas, o pelache ye caracteristicament rayato lonchitudinalment, cosa per a cual se'n diz rayons d'es chabalins chicoz. Atras denominacions ta as crías de chabalín son chabalinet, chabalinyón, chabato u leboixo. Con a edat en mudan a color, y arredol d'es primers 6 meses, cuan se conoixen como fraixencos, ya son cuasi de tot d'a mesma color que os adultos.

En a peninsula ye especialment abundant, y només que en ella ya bi tien dos subspecies: Sus scrofa castilianus, d'a metat norte y con o pelache caracteristicament compuesto de cerras y burda, y Sus scrofa baeticus, d'a metat sud, que tien o pelache unicament compuesto de cerras duras. Una tercena subspecie d'o mesmo animal ye lo tocín domestico.

Es masclos tienen una mida d'a redol d'es 70 cm d'altaria en a cruz, plegando-be enta es 120 cm de lonchitut y 70–90 kg de peso, excepcionalment superando os 100 kg, y las fembras son mica mes chicotas, con pesos d'entre es 40 y es 60 kg.

Es chabalins son animals gregarios.

Habitat

Es chabalins habitan a cualsiquier puesto a on que no manque cobertura vechetal u alimentos. Es puestos a on ye mes habitual de trobar-los son as selvas d'árbols caducifolios con matical a on que poder-se amagar. Os carrascals, fabars y caixigars ne fan d'habitat mes a sobén, anque se troban tamién en matullars meditarranios y marismas. En as arias rurals no ye dificil de trobar-los en campos caultivatos cuan no bi son guaire luent es arbolaus. Ye un gran nadador y se'n han trobato a alta mar a saber-las vegadas; se sape que d'ixa mesma traza bi plegoren enta las Islas Balears y enta las Islas Canarias.

Banyos en fango

Un masclo aintro d'una balsa fangosa.

O costumbre de banyar-se ye important enta la ecolochía d'a especie, y se considera que tien diversas funcions. D'una man aseguran a regulación termica d'o cuerpo de l'animal, perque es chabalins no pueden pas sudar perque mancan-les as glandulas sudoriparas, y tamién se considera que es banyos en o fango tienen importants implicacions enta las relacions socials d'a especie, plegando ta a mes important implicación en referencia enta la selección sexual, a on que, seguntes el que se'n conoix, as pilonas las emplegan toz es chabalins mientres toda l'anyada, en plegar o celo as balsetas las emplegan només que es masclos adultos, asinas s'ha considerato que es banyos pueden estar durantes d'ixe periodo vinclatos con a persistencia d'olors corporals. Per el regular, a presencia de fango a l'alto d'a piel els proteche d'es insectos y d'es parasitos cutánios.

Comportamiento

Pisatas de chabalin, en a ribera d'a Cinca.

O chabalin ye un animal de comportamiento sociable, no territorialista, y migra nomadicament en trapadas matriarcals lur estructura central la componen de 3 ta 5 fembras con crías. A fembra dominanta ye la una de mes edat (qui gosa, de vez, a ser a una mes gran tamién), es masclos chovenons (fraixencos) que no superan l'anyo de vida las acompanyan anque no gosan a fer parte d'o grupo. Es masclos, en cambio, son solitarios y només que es mes viellos gosan a disponer d'altro masclo mes choven que els acompanya, dito escudero, de traza similar a como fan es lupos.

Cutianament

O chabalín durantes d'o día ye regularment sedentario, encara que a la nueit puet fer grans distancias que bailan d'es 2 enta es 14 km de camín, a paso cruzato u trote levero (J. Reichholf, 1995), mientres que en fuyir puet pretar una galopada rapida que no dura pas guaire, que no ye guaire resistent.

En as selvas emplega cuasi siempre es mesmos pasaches ta fer-be as bribadas suyas. Ye clasico trobar pistas d'ixas que bi fan en o matical, que rematan marcando-se en a vechetación de tan a sobén como en fan uso.

Periodo de celo

Fraixencos de chabalín.

mientres o periodo de celo, d'entre noviembre y chinero, o chabalín masclo mira as fembras que sían receptivas ta cubrir-las con tanta d'esma que a sobén s'oblida de minchar. En trobar una porcada, en enzata la conquiesta enrestindo es fraixencos naixitos de l'anyo anterior, que de l'inte han d'ixopar-se, y cuan cal tamién se concara con altros masclos adultos prebando de conseguir o mes gran numbro de cutas que puet. Es arems cheneralment incluyen dos u tres fembras, anque ocasionalment se'n han visto que en teneban dica ueito.

Subspecies

O esqueleto d'a forma nominal d'o Sus scrofa.

I hai diversas subspecies y variedaz cheograficas, totas ellas con capacidat de reproducir-se entre ellas producindo descendencia fertil. Se troban dividitas en cinco grans brancas:

• Sus scrofa scrofa, o chabalín europeu, representato en a Peninsula Iberica per dos variedaz. Sus scrofa castilianus y Sus scrofa baeticus.
• Sus scrofa ussuricus, chabalín de l'Asia ultra-himalaya, que en Chapón ye representato per dos variedaz local, ditas Sus scrofa riukunianus y Sus scrofa leucomystax.
• Sus scrofa cristatus, chabalín con diferents variedaz en Asia menor y India.
• Sus scrofa vittatus, chabalín d'Indonesia.
• Sus scrofa domesticus, o tocín domestico con totas as suyas variedaz fenotipicas: S.s. barbatus, S.s. salvanius, S.s. verrucosus, S.s. bucculentus, S.s. cebifrons, S.s. celebensis, S.s. heureni, S.s. philippensis, S.s. timoriensis, etc.

Vinclos externos

• Se veigan as imáchens de Commons sobre a especie Sus scrofa..
• Wikispecies tiene un articlo sobre Sus scrofa.
• (es) Información d'o chabalins

• Datos: Q58697
• Multimedia: Sus scrofa / Q58697
• Especies: Sus scrofa