Buxus

De Biquipedia
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo tracta sobre o chenero de plantas Buxus. Ta o material que se quita d'istas especies, se veiga Buxo (madera).
Buixo
Buxo
Buixo
Dominio: Eukaryota
Reino: Plantae
División: Magnoliophyta
Clase: Magnoliopsida
Orden: Buxales
Familia: Buxaceae
Chenero: Buxus

Os buixos[1] (pronunciau /'buʃo/, /'butʃo/ u /'buiʃo/; cientificament Buxus) son un chenero de plantas perennifolias en a familia d'as buixacias. Habitualment tienen porte arbustivo, anque existe eixemplars de bellas especies que gosan arribar a porte arborio.

En a Peninsula Iberica, a especie mas representativa d'o chenero ye Buxus sempervirens, que ye silvestre en buena cosa de a cheografía, y forma poblacions importants en as sierras como os Pireneus.

Distribución[editar | modificar o codigo]

Son naturals en Europa (especialmnent en o sud), buena cosa d'o sud d'Asia en pasando por a India y en arribando dica o Pacifico, y en bellas zonas d'America (dende Mexico dica Colombia). As especies de Buxus son, por tot ixo, propias de latitutz y climas temperaus y subtropicals.

En existe cualques poblacions en o norte d'Africa, mas que mas en a cuenca mediterrania d'ixe continent. En a isla de Madagascar s'ha documentau bellas poblacions d'especies autoctonas, anque muit reducidas.

Caracteristicas[editar | modificar o codigo]

Os buixos manifiestan midas variables, anque as formas arbustivas de port reduciu son con diferencia as mas abundants, en existe belaltras, en climas tropicals, que arriban a fer 12 metros d'altaria. A especie mas frecuent en Europa, B. sempervirens, tiene una altaria meya de bels 120 cm, con a mayoría d'eixemplars plenament desarrollaus d'entre os 100 y os 150 cm,[2] anque de manera infrecuent pueden creixer dica 5 metros d'altaria.[2]

O creiximiento d'os buixos ye muit lento. No puyan si que bels centimetros cada anyada, y por ixa razón producen una madera bien quiesta por a suya dureza. En o Estau Espanyol, a suya expleitación ye viedada por as leis.

Follamen.

As fuellas son tiercas, coriacias, con forma lanciolada u arronchadeta, con una lonchitut que baila d'entre 1,5 y 5 cm (en pendendo de a especie y o eixemplar), y d'entre 5 y 35 mm d'amplaria. Brostan oposadas en a branca, y a suya coloración ye caracteristicament verda intensa en a mayoría d'as especies y en os eixemplars no exposaus a insolación directa, pero puede tornar-se amarellisca u royisca en o sol, con frido intenso, u cuan se fan viellas. En captividat, s'ha conseguiu variedaz ornamentals con diferents formas de variegación y colors diferents,[2] que en l'actualidat contan con cualque difusión en chardinería.

As flors son monoicas, con os dos sexos presents en o mesmo eixemplar, de regular muit discretas. Os estambres son largos y sesils, protuberants dillá que os petalos. Os lulos, cuan son maduros, son capsulas de color grisa u marrón que contienen as simients. A mida varía d'entre 5 y 15 mm.

Hábitat[editar | modificar o codigo]

As matas de buixo gosan creixer en una gran diversidat de puestos, en os que a sola limitación que troban ye o suyo creiximiento, tan lento, que fa que en as zonas umbrivolas se desarrollen mal, masiau finos y propensos a malotías. S'adaptan bien a una gran cantidat de suelos, pero tienen preferencia por os suelos calsinosos y con Ph amán d'os valors neutros.

Hábitat petroso sobre suelo calsinoso. Biotopo frecuent ta las matas de buixo, que compartirán con matas de romero, aliagas y estremoncillos.

En os solans tamién se'n i puede trobar, anque a forma que adoptan ye mas chicorrona y arronchadeta, y as matas se suelen trobar deseparadas d'entre ellas, sin formar guaire bardas ni atipir-se. En a cuenca mediterrania, a especie predominant, B. sempervirens, s'adapta bien a's terrenos petrosos en penya calsinera, por o que ye regular de trobar-los en ixes ambients, a on que as formacions en as que i predominan reciben o nombre de «buixitars» u «buixosas».[3] As venas, a largo termin, tienen una gran capacidat ta meteorizar a penya.

En formacions composadas, con elevada presencia d'árbols (selvas), as matas de buixo pueden formar una parte principal en o estrato arbustivo. En o dominio submediterranio en os Pireneus, o buixo ye a especie mas frecuent como sotobosque en as selvas de planifolios, como caixigars, carrascals y fabosas (en iste zaguer caso, se forma una comunidat conoixida como «fabosa con buixo»). Tamién se troba en pinars, anque a elevada competitividat por a luz que presentan as coniferas, de fuella perén y atipida, dificulta o suyo desarrollo.

En as etapas de degradación d'ixas formacions se i puede trobar comunidaz no formadas sique por buixos, por o que tamién se les gosa dar nombre «buixitars» u «buixosas».

Imáchens[editar | modificar o codigo]

Fitonimia[editar | modificar o codigo]

A forma «buixo» (d'o latín <BUXUS) ye a sola forma reconoixida pa representar este fitonimo en a Propuesta Ortografica de l'Academia de l'Aragonés,[1] en a que s'indica que as formas graficas «buxo» (/'buʃo/) y «bucho» (/'butʃo), que en a propuesta grafica de 1987 gosaba representar a ixas dos variants foneticas patrimonials, no s'emplegarán ya, tot asumindo-se que quedan incluidas en as posibilidaz de pronunciación de a forma grafica «buixo».

Pronunciación «buxo»[editar | modificar o codigo]

A nivel fonetico y no grafico, a pronunciación /'buʃo/ («buxo») ye con diferencia a mas emplegada por tot l'Alto Aragón, en rechistrando-se por toda una pantilla de lugars tanto en l'aria occidental, a on que sería mas esperable a pronunciación sin a -i- semivocalica, como en a oriental y centro-oriental, en a que sí que i ye un caso atipico pus o regular ye que s'introduzca la dita -i debant de -x [iʃ]. Asinas, o lexicografo naturalista Rafel Vidaller en documenta uso en puestos por toda la Chacetania (Echo, Ansó, Botaya, etc.),[4] en o norte de l'Alto Galligo (Pandicosa y Sallent),[4] por tot o Sobrarbe (Bielsa, Plan, Torla, Sarvisé, a Espunya, Fanlo, Nerín, a Buerda, Tella),[4] en a Ribagorza aragonesofona (Torres, Campo, etc.),[4] en o Semontano de Balbastro (en Naval y Castillazuelo),[4] en a Plana de Uesca (Agüero y Ayerbe)[4] y en Cinco Villas.

Pronunciación «buixo»[editar | modificar o codigo]

A forma /'buiʃo/ («buixo»), menos frecuent, s'ha documentau siempre en a zona mas oriental de o dominio lingüistico de l'aragonés. Vidaller la ha documentau en Ribagorza (Benás, Sarler, Campo, Vilanova, Torres, Capella, Bisagorri, etc.) pero tamién en a Cinca Meya (en Fonz).[4] En Sobrarbe tamién diz que ye prou abundant, anque coexiste en a mayor parte d'a comarca, de forma minoritaria, con as formas /'buʃo/ y /'butʃo/. Se diz /'buiʃo/, d'alcuerdo con Vidaller, en Fanlo y en Vio;[4] todas dos en a val de Vio.

Pronunciación «bucho»[editar | modificar o codigo]

A forma con cheada, /'butʃo/ («bucho»), acunyada por hipercorrección castellanizadera, se documenta en una gran cantidat de localidaz en as que historicament s'ha parlau aragonés y en belaltros en os que encara se i parla. Vidaller da como puestos de referencia Buerba en a val de Vio y Fraixén en a val de Broto en Sobrarbe, Alquezra, Nocito y Radiquero d'entre belaltros en o Semontano de Balbastro, Luesia y Longars en Cinco Villas, etc. pero s'ha de manifestar que a distribución d'ista forma, en l'actualidat, ye muito mas cheneral.

D'entre todas as formas exposadas, a sobén dos u mas d'ellas se pueden sentir coexistindo en bels puntos cheograficos, y mesmo puede que un mesmo parlant en diga una u l'altra aleatoriament en a mesma conversa. En iste estau se puede sentir o suyo emplego actual, p. ex, en l'Aínsa, a Buerda, Escalona y toz os lugars en a comarca, en a val d'a Cinca en Sobrarbe, en os que predominantement se diz «bucho» en l'actualidat, pero ocasionalment tamién se deixa sentir a forma «buxo» u dica «buixo», en estando ista zaguera la que muitos consideran mas «anticuada» y «basta», cosa que, como han gosau sinyalar muitos autors, tamién puede significar que sia la mas chenuinament aragonesa.

Referencias[editar | modificar o codigo]

  1. 1,0 1,1 (an) Varios. Propuesta Ortografica de l'Academia de l'Aragonés; Estudio de Filología Aragonesa (Academia de l'Aragonés); Zaragoza, 2010. ISBN 978-84-614-4170-9
  2. 2,0 2,1 2,2 Ficha de B. sempervirens; consultada l'11 de chunio de 2011.
  3. (es) ALLUÉ NAVARRO, Mª Isabel y FUERTES CASAUS, Mª Pilar. Nombres para un paisaje (toponimia del Valle de Broto). Ed. Comarca de Sobrarbe + Diputación de Huesca; Zaragoza, 2006. ISBN 84-611-1141-9
  4. 4,0 4,1 4,2 4,3 4,4 4,5 4,6 4,7 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7

Vinclos externos[editar | modificar o codigo]

Biquiespecies
Biquiespecies
Se veiga a información de Biquiespecies sobre Buxus.