Sierra

De Biquipedia
Ir ta: navego, busca
A parola sierra reendreza enta iste articlo. Ta altros usos d'o termin «sierra» se veiga Sierra (desambigación).
A sierra de Guara, una sierra de l'Alto Aragón.

Una sierra (prenunciau /'sjera/ u /'sjara/; de lo latín <SERRA) ye una sola y extensa formación feita de monts u montanyas tansament deseparadas d'entre ellas, con u sin puntas, estreitament relacionadas por a suya posición, dirección, formación y antigüedat. O termin «sierra» puede fer referencia a formacions que faigan parte d'una cordelera u formación montanyesa superior, u per contra, identificar a cordelera mesma.

Oronimia[editar | editar código]

L'oronimo sierra deriva d'o latín SĔRRA, y tiene formas equivalents en galaico-portugués, astur-leyonés, castellán, mozarabe, catalán y occitán.

Tamién se documenta en o dominio lingüistico de l'aragonés a parola sarra,[1][2] que ha gosau tener qualque difusión en os textos publicaus en as zaguers decadas por presonas y colectivos de defensa de l'aragonés. Manimenos, por a suya morfolochía no diftongadera, bells autors millor relacionaus con as variants patrimonials d'a luenga aragonesa l'han sinyalau como forma posiblement arcaica[3] (lat. SERRA > sarra) y actualment no present en as parlas vivas,[3] que en Aragón gosa manifestar-se-ie solament como forma fosilizada en a toponimia.[3]

A forma deminutiva natural d'a parola sierra, en aragonés, ye «serreta», anque bell autor l'han documentau tamién como «sierreta».[2] O termin «sarrato», relacionau, puede considerar-se morfolochicament una forma deminutiva de l'arcaísmo «sarra» y gosa designar tanto una sierra de dimensions menors (que sería o significau mes apropiau) como una estructura lateral (propiament, una garra u un cerro), que en naixendo d'una sierra gose adquirir qualque identidat morfolochica.

Una serreta de dimensions menudas se suele conoixer como sarrato u sarrau.

A parola sierra forma con freqüencia derivaus per afixación, deixando tota una una man de formas compuestas en a toponimia menor de muitas comarcas d'Aragón, mes que mes en as tierras montanyesas: Susierra/ Sosierra (sub + serra, «debaixo d'a sierra»), Trasierra (trans + serra, «per l'altra man d'a sierra»), etc.

Se veiga tamién[editar | editar código]

Referencias[editar | editar código]

  1. (an)(es) MARTÍNEZ RUIZ, Antonio, Vocabulario básico bilingüe Aragonés-Castellano y Castellano-Aragonés (3ª Ed.); Publicazions d'o Consello d'a Fabla Aragonesa. Uesca, 2008. ISBN 978-84-95997-31-9
  2. 2,0 2,1 (an) CASAUS PARRILLA, Chesús et MIGUEL BALLESTÍN, Pascual, Dizionario Aragonés de Terminos Cheograficos; Gara d'Edizions. Zaragoza, 2008. ISBN 978-84-8094-059-7
  3. 3,0 3,1 3,2 (es) LASAOSA SUSÍN, Ramón et ORTEGA MARTÍNEZ, Miguel, Miradas desde Tella; Ayuntamiento de Tella-Sin + Mancomunidad del Valle de Gistaín + Ediciones Imago. Zaragoza, 2003. ISBN 978-84-88518-61-7