A Buerda

De Biquipedia
Ir a la navegación Ir a la búsqueda
A Buerda
Municipio d'Aragón
Bandera Escudo d'armas
Labuerda.JPG
Envista d'a Buerda con nieu.
Entidat
 • País
 • Provincia
 • Comarca
Municipio
Flag of Aragon.svg Aragón
Flag of Huesca (province).svg Uesca
Sobrarbe
Superficie 18,05 km²
Población
 • Total
 • Densidat

162 hab.
8,98. hab/km²
Altaria 569 m.
Distancia
 • 118 km

enta Uesca
Codigo postal 22360
Parroquial
 • Diocesi
 •Arciprestato

Bp. de Balbastro-Monzón
Sobrarbe
Ríos Cinca
Coordenatas 42°27’36’’N 0° 8’24’’E
A Buerda en Aragón
A Buerda
A Buerda
Situación de A Buerda en Aragón

A Buerda (Labuerda en castellano, oficialment «Labuerda-A Buerda»[1] en castellano y aragonés) ye un municipio y un lugar d'a provincia de Uesca, en a comarca de Sobrarbe y partito chudicial de Boltanya.

A suya población ye de 162 habitants [2] en una superficie de 18,05 km² y una densidat de población de 8,98 hab/km². A mayoría d'a población se concentra en o lugar d'a Buerda, cabecera d'o municipio.

O termino municipal se troba tot entre a ribera d'o río Cinca y arredol d'a cuenca d'o barranco de Sant Visorio, que baixa dende a sierra d'ixe nombre y fa la boca en o río a poco trozo de lugar. A Buerda ye en a plana aluvial entre a carretera A-138 y o río, y Sant Vicient y Fontanal (os atros dos nuclios d'o municipio) son más t'alto en a cuenca d'o dito barranco.

O malnombre d'os de a Buerda en a redolada ye «gurrions de canalera», embotada que s'ha asegurau que dimana d'o caráuter ubierto y alegre d'os suyos naturals.[3] En Sobrarbe, «gurrión de canalera» ye una exprisión basada con o comportamiento nupcial d'os gurrions (Passer domesticus), que gosan fer niedo en as canaleras d'os tellaus a principios de primavera y entre que s'emparellan, os masclos no paran de cantar y d'encorrer a la fembra contino.

Cada primavera, o gurrión n'a canalera.
Popular

S'ha de fer notar o posible doble sentiu en a exprisión, pos o gurrión a la vez que puede personificar l'alegría y o treballo, tamién puede estar tabolero y fer-se pesau.

Cheografía[editar | editar código]

O termino municipal de a Buerda ye o segundo más chicote de tot Sobrarbe, por extensión, solo por dezaga de Palo en a Fueva. Limita a l'este con o río Cinca, por o norte con Puertolas, por o sur con l'Aínsa-Sobrarbe y por l'ueste con o troz de Boltanya que dentra ta valle' Vio (Murillo de Sant Pietro).

As buegas d'o municipio son en o tozal de Guardia en norte con o termino d'Escalona (Puertolas), o tozal d'o Pozo y o tozal d'as Cruces en l'alto d'a sierra de Sant Visorio con o de Boltanya, y o tozal de Regaderas y o barranco de río-Forcaz con l'Aínsa.

O termino concabe en esencia a cuenca hidrografica d'o barranco de Sant Visorio, que tamién en dicen de San Vicente u de a Sierra, dende o cabecero en a sierra de Sant Visorio dica la boca en a Cinca. As casas más baixas d'o lugar de a Buerda, y en especial o barrio Mingué, sufren de cabo a quan as creixidas d'o barranco dada la forma d'embudo d'o termino municipal y porque o cauce s'encaixona entre a Plana y as laderas de Cosinyor uns metros antes d'arribar ta lugar. O municipio ha feito a-saber-las inversions en acondicionar o cauce d'este barranco a lo largo d'os anyos.

O municipio ye formau de tres nuclios: A Buerda ye a capital municipal, seu de l'achuntamiento, a ilesia parroquial y bella infraestructura como a pista polideportiva, a piscina municipal y o parque. San Vicente-Sant Vicient d'a Buerda- ye a 3 km por pista asfaltada y tiene una quincena d'habitants, y Fontanal que ye un mas en o monte d'o municipio.

O lugar d'a Buerda ye dividiu en tres barrios: o barrio d'a Ilesia (bella vez tamién en dicen a Plaza), o barrio San Juan y o barrio Mingué. O primero y os dos zagueros son separaus por o barranco. O segundo y o tercero entre si lo i son por a carretera.

Un poquet de toponimia[editar | editar código]

A fuent d'a Plaza, de 1888. Dezaga casa Sesé y casa Carrera, y de fondo a torre d'a ilesia.

En o termino municipal d'a Buerda esiste una toponimia aragonesa abundante. Por alto d'o barrio d'a ilesia s'alza un monte que ye plano por alto y ye aon se troba buena cosa d'os campos de secano d'o lugar. Recibe o nombre de a Plana, dividida en Plana Abajo, Plana Enmedio y Plana Ermita. Cruz-Calvario, Tozals: Os Castillons, o sarrato Cocullón, o tozal de Regaderas, o tozal Corona y más t'allá, pasando de río Forcaz, o sarrato a Coda Sartén que pertenece a l'Aínsa, y os campos de Troteras que parten entre l'Aínsa y Boltanya.

En a cuentra d'o barranco, por alto d'o barrio San Juan, ye o tozal de Guardia u A Guardia. An rematan as zagueras casas de barrio San Juan pasa o barranco a Vinyeta, y dimpués os campos d'ixe nombre tamién. Luego vendrá Vinyacequia y dimpués Cosinyor y os suyos campos y terreros.

Barranco Sant Visorio, barranco Fontanal, barranco a Vinyeta, barranco Royo, barranco río Forcaz, barranco a Rabosa, barranco Melonera, barranco os Castillons, barranco Fondo, tamién o barranco Os Guatz, toponimo curioso que ye una forma arcaica de o plural de uerto (o guarto > os guartz > Os guatz).

Bel uerto y campos de regano: A Ribera, A Espuenda, Estanyuelos, os Quairons, uerta o Río, uerta o Molino, o Reguero, o Filador, o Flaire, etc.

As fuents: a Fuente-Penya, a Fuent Melonera, a Fuent d'a Tosca, a Fuent Vieja, a Rabosa, etc. y a fuent d'a Plaza son eixemplos.

Historia[editar | editar código]

Son pocas as referencias que i hai sobre a Buerda antes d'o sieglo XVI, y en cheneral fan referencia a o lugar de Sant Vicient d'a Buerda u a suya ilesia. A más antiga d'estas ye de 1055.[4]

O 25 d'octubre de 1559, Don Pedro Vitales visitó a ilesia de Sant Vicient en nombre d'o bispe de Uesca. Manda fer o zarramiento d'o cimenterio y que se construiga l'abadía.[5]

O 21 d'aviento de 1610 visitó l'Aínsa o cartografo portugués João Baptista Labanha. Dende ixa villa replega información sobre os lugars que i son cerca. Asinas ye como amanece a Buerda:

La villa tiene 4 aldeas de su jurisdicción: San Vicente y Blabuerda, que tendrán sesenta vecinos y pretenden segregarse de este señorío, y también tiene Guasso con 30 vecinos y La Torrezilla con 10 vecinos, que dista 1 legua de Aynsa.[6]

Casas[editar | editar código]

As casas d'a Buerda en a segunda metat d'o sieglo XX yeran:

  • Por o barrio San Juan: Casa Chorche, casa Emeterio, casa Pueyo, casa Puyoleta, casa Buil, casa Manco, casa García, casa Terrero, casa Coronas y casa Pía, casa Agustín, casa Juana y casa Pardineta.
  • Por o barrio Mingué: casa Navarro, casa o Portugués, casa Cerezo (viella) y casa Murillo.
  • Por o barrio a Ilesia: casa Manolico, casa Navalés, casa Vicién y casa Turmo (a d'o barranco), casa Rosa, casa For y casa Castro, casa Benita, casa Bellosta, casa Amalia Vicién, casa Orosia, casa Susana, casa Turmo (viella), casa Casilda y casa Ferrero, casa Ferraz, casa Roque, casa Borens, casa Cosculluela, casa Lafalla y casa Arcas, casa Botiguero, casa Pardina, casa Sagún, casa Barrabés y casa Pardina, Casa Migalico, casa l'Arriero, casa Timio, casa Broto y a Ferrería, casa Mur u casa Fanlo, casa Soro y casa Manolé, casa Maístro, casa Juan Lascorz, a ilesia y casa Chirón, casa Turmo (l'hotel y a tienda), casa Cerezo a nueva, casa Antigüedades (porque teneban ixe comercio), a Casa-escuela y casa Miranda, casa Carrera, casa Escalona, casa Salinas, casa Medica, casa Notario, casa Felipe, casa Lanau, casa Torrén, casa Falceto y casa Sesé, l'Abadía, casa Lanzón, casa Escartín, casa Felipe d'abajo, casa Buetas y casa Nao.

Demografía[editar | editar código]

Demografía d'o termino municipal d'a Buerda[editar | editar código]

Se incluyen as entidatz menors, que son Sant Vicient d'a Buerda y Fontanal.

Evolución demografica en o s. XIX.[7]
1842 1857 1860 1877 1887 1897 1900
356* 652 667 420 418 450 418

* Población de dreito, no pas de feito

Evolución demografica en o s. XX.[7]
1900 1910 1920 1930 1940 1950 1960 1970 1978 1981 1991 1996 1998 2000
418 427 441 389 387 327 297 245 191 159 155 180 179 172
E. demografica en o s. XXI.[8]
2001 2002 2003 2004 2005 2006 2007 2008 2009 2010 2011 2012 2013 2014 2015 2016 2017 2018 2019
167 168 167 166 171 169 177 180 172 167 169 156 156 156 155 167 158 157 162

Demografía d'o lugar d'a Buerda[editar | editar código]

No tracta si que d'o nuclio d'a Buerda (se saca Sant Vicient y Fontanal)

E. demografica en o s. XXI.
2001 2002 2003 2004 2005 2006 2007 2008 2009
148 149 147 147 151 151 152 155 151

Administración[editar | editar código]

Reparto de concellers[editar | editar código]

Eleccions municipals[9]
Partito 1979 1983 1987 1991 1995 1999 2003 2007 2011 2015 2019
Partido de los Socialistas de Aragón - - 5 5 5 5 5 5 5 5 5
Partido Popular - 5 - - - - 0 0 0 0 0
Independients 5 - - - - - - - - - -
Total 5 5 5 5 5 5 5 5 5 5 5

Alcaldes[editar | editar código]

Lista d'alcaldes
Lechislatura Nombre Partido politico
19791983 Francisco Lanau Orús[10] Independient
19831987
19871991 Enrique Campo Sanz Partido de los Socialistas de Aragón
19911995 Enrique Campo Sanz Partido de los Socialistas de Aragón
19951999 Enrique Campo Sanz Partido de los Socialistas de Aragón
19992003 Enrique Campo Sanz Partido de los Socialistas de Aragón
20032007 Enrique Campo Sanz Partido de los Socialistas de Aragón
20072011 Enrique Campo Sanz Partido de los Socialistas de Aragón
20112015 Enrique Campo Sanz Partido de los Socialistas de Aragón
20152019 Enrique Campo Sanz[11] Partido de los Socialistas de Aragón


Galería[editar | editar código]

Fiestas[editar | editar código]


Municipios achirmanaus[editar | editar código]

  1. Flag of France.svg-Flag of Occitania.svg Cadeilhan-Trachère (dpto. d'Altos Pireneus, Meyodía-Pireneus, Francia)

Se veiga tamién[editar | editar código]

Referencias[editar | editar código]

  1. (es) «Ley 5/2003 de creación de la Comarca de Sobrarbe» en a pachina d'o programa de comarcalización d'o Gobierno de Aragón, expublicada en o BOE de 26 de frebero de 2003. Consultau o 6 de marzo de 2010.
  2. (es) «Labuerda» en o nomenclátor d'unidatz poblacionals de l'INE, consultau o 12 de chunio de 2020.
  3. (es)El Gurrión, consultau o 12 de chunio de 2020.
  4. MIGUEL BALLESTÍN, Pascual, Toponimia Mayor de Aragón; Institución «Fernando el Católico» + Gara d'Edizions. Zaragoza, 2014. ISBN 978-84-8094-059-7
  5. (es) CONTE OLIVEROS, Jesús. Viaje por pueblos oscenses. Tomo I. Año 1559. Editorial LIbrería General. Zaragoza, 1980. ISBN 84-7078-098-0.
  6. (es) LABAÑA, Juan Bautista. Itinerario del Reino de Aragón. PRAMES. Zaragoza, 2006. ISBN 84-8321-201-3.
  7. 7,0 7,1 (es) «Labuerda» en a subpachina «Alteraciones de los municipios en los Censos de Población desde 1842» d'o Instituto Nacional de Estadística, consultau o 6 de marzo de 2010
  8. (es) Labuerda - Cifras de población resultantes... (INE); consultau o 13 de chunio de 2020.
  9. Archivo electoral
  10. (es) Treinta aniversario de las primeras elecciones municipales de la democracia.
  11. (es) Alcaldes de todos los municipios de la provincia de Huesca

Vinclos externos[editar | editar código]


Lugars d'o municipio d'a Buerda
A Buerda | Fontanal | Sant Vicient d'a Buerda


Municipios d'a comarca Sobrarbe
L'Abizanda | L'Aínsa-Sobrarbe | Barcabo | Bielsa | Boltanya | Broto | A Buerda | Chistén | A Espunya | Fanlo | Fiscal | A Fueva | Palo | Plan | Puértolas | O Pueyo d'Araguás | Tella-Sin | Sant Chuan de Plan | Torla-Ordesa