Frontón (topografía)

De Biquipedia
Ir a la navegación Ir a la búsqueda
Este articlo ye sobre los frontons en orografía, topografía y toponimia. Pa atros significaus de la palabra frontón, vaiga a frontón (desambigación).
Envista a piet de lo frontón de Chinese Wall de Montana.

Un frontón ye una ladera plana con muita pendient, tendent a la verticalidat.

Etimolochía y semantica[editar | modificar o codigo]

Caprock Escarpment, un frontón de Texas pareixiu a los de las Bardenas Reyals.

La palabra frontón ye una derivación con sufixo -ón de l'aragonés medieval fruent (hué "frent"), si ye que no deriva dreitament d'una forma latina FRONTONE(M) formada a partir de lo latín FRONTE(M) con lo mesmo significau. Se documenta lo suyo emplego oronimico actual pa nombrar laderas en cheso. La variant frondón presenta sonorización dezaga de liquida y ye propia de l'aragonés central.[1][2]

Los toponimos formaus con Frondella de la val de Tena y Sobrepuerto derivan de FRONTǏCŬLA,[3] por lo que son etimolochicament son muit cercanos a los frontons. Bi ha una sonorización dezaga de liquida tipica de l'aragonés central. Las formas Frondiella son confusions entre sufixos u rearagonesizacions.

Mencions de frontons en textos medievals[editar | modificar o codigo]

En los mollonamientos y cartas de población medievals se fa referencia a frontons toponimicos y orograficos, y a vegadas s'emplega la formula vertient o frontón (visto dende alto u dende abaixo):

...mandamos seer puesta una boga siquiere fita en el somo del dito Pueyo de Mocatanyia clamado, et otra en el otro Pueyo contiguo ad aquel que ye mas baxo enta part de Caragoça, et otra en la bertient o fronton de cerro que ye sobre la dita poca, et otra en el canto de la poca entra par[t] de Caragoca de la Val de Malbiure,..[4]

Se fa mencions a frontons de pueyos, cabezos y muelas en los mollonamientos relacionaus con Longars y los lugars de la redolada:

el tercero a la lomera dius el camino que va ad Aladren; el quarto, el fronton de sobre el Pueyo de Ladrones alla balluebo (sic); el quinto, en la loma que yes sobre el campo de M. Lapeña et es mullon que parte con Villanueva et con Tosos et con Longares.[4]
Et pus otro muyllon en mediio del fronton del cabeço d'Alaman, assi que la birtient del dito cabeço que ye enta Longares sia de Longares e la otra birtient del dito cabeço enta part d'Alhamen sia de Alhamen.[4]

Tamién en los documentos medievals de Sadaba se'n fa mención d'uns quantos:[5]

a la rua del fondon de la laguna Malchivet; de la dicta rua al fronton de la dita laguna; et del dito fronton a la carrera de puey Pinoso; et de la carrera de puey Pinoso a las penyas de la cueba de Marco; et de las dictas peñas al fronton de puey Negret; et del puey del fronton de puey Negret al pueyo de la Celada,...(1254)
otra buga al frontonciello canto el Sasso; item, otra buga en medio del Sasso a vista de la del frontonciello canto el Sasso; item, otra buga en la carrera llamada de Traymalas a la laguna de Forniellos; item, otra buga cerca de Puylampa sobre la cequia mayor enta la partida del Sasso en dreytera de la buga del frontonciello que yes entre la balssa y Puylampa;...(1381)
al pie de la loma clamada la Sobediella, al costado de un fronton o loma que esta entre el camino que va de Sadaba a Viota de la par de suso enta los vanyales et la dita cruz;...(1426)
primero ay un mojon en el alto de puey de Asiello, y de alli discurre al fronton de puey de Tapon abrigo de cierço do esta una penya en la qual ay una cruz senyalada;...(1439)

En un documento de que fixa las mugas entre Zaila y La Romana se nombra un "frontón Blanco":

e ixe al fronton blanco al otro mullon, e de mullon en mullon va y traviesa la val de cavalgadores dreyto a la sabina que esta del otra part, et de la sabina puya cerro a cerro al otro pino esmoxado, suso al pino que es en el cabezo et al otro pino que es en somo de las vertientes de la val Genistosa, et traviesa la val et va al fronton blanco et traviesa la val Genistosa et va al cabezuelo pasada de la val et al cabezo savinoso de la vallada de la carrera de Villiella.[6]

En 1260 lo comandador calatravo d'Alcanyiz y lo propietario de Camarón don Blasco d'Alagón estableixioron las mugas entre los termins de Mont-royo, Camarón y Bunyuel. En lo documento se nombró un frontón de la Perola:

aquesto es a saber que la primera boga es a la fonte de Aumbuix en la sierra de Brerex asi como desciende de voga en voga por el regallo entre entranbas las sendas sobre la fonte de la Peniella en puya entro al frontón de la Perola....[7]

En lo texto de mollonamiento de boalaches y defesas entre los termins de Fortanet y Exorcas (1414), se fizo mención de dos frontons:

...y plegua al rio y parte el rio asuso y del rio salle al Barranquo Salvador y de allí parte y traviessa el Camino de Gudar y salle al Vallexo de Donya Asensia asuso entro al fronton de la Penya Rruvia y torna por la Penya Fondonera fastal Morron de la Ffuent de las Palomas y viene la penya adelant y plegua a la Ffuent del Lugar y aqui fenexe este boalage. Item, el otro boalage de la Foya Redonda comiença en el fronton de la Cerradiella y baxa el camino de la Yedra y salle al cerrico de la Foya de la Caridat et por fondo del Prado de la Yedra y de aquí recto por do el Pozuelo y salle a la Penya de la Canarilla y sigue la Penya adelant al Prado del Auguarhat y va carrera y de aqui salle a la Penya Alta y va las vertientes asuso entre el termino de Exorquas y de Miravet y salle al Cabeço de Yuanys Sancho y de aqui va la vertient asuso y salle al Cabeço de Pasqual Mancho y de alli va a la senda asuso y traviessa a la Pedriza de la Foya Redonda y va la senda asuso y torna al fronton de la Cerradiella y aquí fenexe este boalage.[8]

En la carta de población de Villel nombran dos frontons.

asin como las aguas vierten et fiera el Atalaya Ruvia et del Atalaya Ruvia asin como las aguas vierten et fiere al fronton de la Quadradeja, et de la Quadradeja al fronton al Escaleruela de la Trona et del Escaleruela a las canales del fondon a la foç de Vallacronch...[9]

Lo frontón de la Olmediella se documenta en un texto de delimitación y mollonamiento de termins entre lo concello de Teruel y lo comandador d'Alcalá de la Selva:

...prout incipit in fronton del Olmediella et dat ad omareium et vadit ad cabeçum de las...[10]

Eixemplos actuals de frontons[editar | modificar o codigo]

Envista lontana d'uns frontons de las Bardenas Reyals baixo lo Plano.

Son toponimos actuals con lo formant frontón:

Referencias[editar | modificar o codigo]

  1. (es) Jesús Vázquez Obrador: Notas sobre aragonesismos atestiguados en un documento notarial tensino de 1628 y en una copia posterior. Publicau en: Alazet: Revista de filología, ISSN 0214-7602, Nº 16, 2004, pp. 181-248.
  2. 2,0 2,1 2,2 (es) Jesús Vázquez Obrador: Toponimia de Sobremonte (Huesca). IV oronimia. Publicau en Archivo de filología aragonesa, ISSN 0210-5624, ISSN-e 2603-7688, Vol. 48-49, 1992-1993, pp. 173-206.
  3. 3,0 3,1 (es) Jesús Vázquez Obrador: Nombres de lugar de Sobrepuerto : análisis linguístico. Comarca Alto Gállego, D. L. 2002. Serie: Yalliq nº 4, p. 153.
  4. 4,0 4,1 4,2 (es)(an) Concepción Villanueva Morte, Mario Lafuente Gómez: Documentos del concejo de Zaragoza. Edición crítica de los fondos del Archivo Municipal. I (1285-1348), Zaragoza, Universidat de Zaragoza, 2015. p. 108, p. 389, p 430.
  5. (es) María Rosa Gutiérrez Iglesias: Fondos documentales del Archivo Municipal de Sádaba, publicau en Cuadernos de Historia Jerónimo Zurita, nº 51-52 (1985), pp. 379-418.
  6. (es) María Concepción Contel Barea: El Cister zaragozano en los siglos XIII y XIV. Abadía de Nuestra Señora de Rueda de Ebro. II. Documentos. Publicau en: Cuadernos de historia Jerónimo Zurita, nº. 31-32, 1978, pp. 384-385.
  7. (es) Antonio Martín Costea: Nuevos datos históricos sobre la villa medieval de Camarón. Grupo de Estudios Masinos, nº VI 1986. pp 41-42.
  8. (es) Jesús J. Villarroya Zaera: Mojonación y limitación de los boalajes y dehesas en los términos de Fortanete y Jorcas. (Fortanete ... 1414). Ontejas Asociación Cultural de Fortanete nº 28, mayo 2016.
  9. (an) "Carta de población de Villel".
  10. (es) Antonio Gargallo Moya: El Concejo de Teruel en la Edad Media volumen IV. Instituto de Estudios Turolenses, 1997, p. 132.
  11. (es) Marcelino Cortés Valenciano: Toponimia de la Villa de Tauste. Asociación Cultural El Patiaz, 2008 - p. 144.

Se veiga tamién[editar | modificar o codigo]