Dialectos de l'aragonés

Grupos de parlas de l'aragonés

A lengua aragonesa tiene parlas locals, que s'agrupan en parlas de val, de comarca u parlas de bellas comarcas. O termin dialecto ye ambigo y se gosa fer servir pa parlas de val, bien definitas (cheso, ansotano, etz...). Tamién existe a propuesta de clasificar as parlas aragonesas en cuatro grupos, complexos dialectals u dialectos (seguntes as apreciacions d'os autors), que dimpués explicaremos. A diversitat lingüistica podemos clasificar-la asinas:

Vals y Semontano

Veyemos graus d'erosión-pureza, homocheneidat-localismo, evolución-arcaismo:

Vals d'o Pireneu axial

Millor conservación d'a luenga, pero con arcaismos. A topografía en forma de vals bien separatas ha feito que l'aragonés aiga evolucionato en un dialecto u parla local en cada val:

• Ansotano
• Aragonés cheso
• Aragüesino
• Aisino
• Tensino
• Bergotés
• Aragonés d'a valle de Vio
• Belsetán
• Chistabín
• Benasqués

Prepireneu

Millor conservación d'os rasgos chenuinos que en o Semontano, pero peyor que en as vals d'o Pirineo Axial. Son parlas de transición entre o Semontanés y a parla de cada val.

Semontano

O Semontanés ye relativament uniforme en zonas más amplas, pero mui castellanizato, con perduga de muitos caracters chenuinos. As diferencias cheneracionals son más grans que as cheograficas. S'ha perdito o emplego d'a particla pronominoadverbial de locativo i, (bi en as vals axials).

Polos occidental y oriental

Existe una distribución de diferencias entre l'este y l'ueste, con mugas que no coinciden, pero que fan que unos se veigan más que más dende Broto y Cotefablo enta la Ribagorza, (y más luent), y atros se veigan más que más dende Tena y Cotefablo enta Navarra. Podemos veyer-lo en as parellas:

Fonetica

• -x- / -ix: por eixemplo baixo / baixo.

A muga ye en Cotefablo, pero a o sud no ye clara por a perduga d'o fonema a causa d'a cheada tipica d'o semontano.

Ciertos matices foneticos esporadicos visibles en ciertas parolas presentan una distribución d'alcuerdo con estos polos.

• conello / conillo.

Parolas que conservan millor a traza fonetica orichinal u en a part occidental u en a oriental:

• sartana / sartén.

Se suposa que sartana se dició enantes sartaina. Relacionato con esto tenemos a forma verbal de primera presona d'o pasato imperfecto d'indicativo -ebai de l'ansotano, que corresponde a -ebe d'o chistabín.

• tenebai / tenebe.

Morfolochía

• con mi/con yo
• nos / mos
• vos / tos
• bi / i: "bi" se troba en Ansó, Echo, Tena, Sarrablo, plegando como minoritario ta Bielsa y ta o Viello Sobrarbe. "i", estió a forma mas extendita quan se alzaba en o resto d'Aragón.
• sindembargo / manimenos, conchuncions adversativas.
• allora u alora / alavez
• a ormino / a sobén: A sobén se deciba en aragonés meyeval d'a depresión del Ebro y se documenta en o Baixo Aragón en o sieglo XX.
• de raso / de tot
• pro / prou: A primera forma, d'Ansó a Tena, tamién un poquet en Bielsa. A segunda forma de Broto a Benás. Prou por o sud plega ta o Somontano, Baixo Aragón y Sierra de Gúdar con a suya forma alofona prau.
• cosa / res: En a zona este de l'Alto Aragón se troba res, pero dezaga de ni: no he visto ni res, no n'ha quedau ni res. En Pandicosa, Viello Sobrarbe y Ribagorza, en especial en Benás.
• puedes / puetz
• chulio / chuliol

Lexico

• Almadía / Navata.
• Calderizo / Cremallos.
• Clamar / Dicir (con sentito de "denominar").
• Clamar-se / Dicir-se.
• Cornizas / .
• Fablar, (Ansó, Echo) / Parlar, (Chistau, Viello Sobrarbe, Ribagorza, Monegros).
• Lacuna-Laguna / Estanyo.
• Melón / Formas d'a familia Taixo-Teixón-Texugo
• Milloca / Panizo.
• Odir (ansotán), Oyir / Sentir.
• Paxaro / Muixón.
• Pez / Pegunta
• Toballa / Xugamanos
• Xorrontar / Espantar
• / Demoret
• / Enfilar
• / Vidolla, Virolla.

Parolas con a mesma radiz y diferent sufixo

• Felz(e) / Felequera, Falaguera.
• Fraxín(o) / Freixe(ra).

Atros aspectos

En os verbos deícticos de movimiento ir y venir se veye que l'uso d'estos verbos coincide con os usos castellans en aragonés occidental (o emisor ye o solo centro deictico d'a comunicación) y con os usos catalans y occitans en aragonés oriental (o interlocutor puet estar tamién centro deictico d'a comunicación, d'astí se de diga venir referindo-se a lo puesto on ye):

• Iré ta Binéfar lugo, (aragonés cheso).
• Vendré ta Binéfar luego, (aragonés ribagorzán).

Propuesta d'os cuatro dialectos

A propuesta más asolada de clasificación dialectal, ye a de Francho Nagore, que clasifica as parlas aragonesas en 4 grupos (occidental, central, oriental y meridional). Ta beluns, istos grupos son complexos dialectals, y as parlas que bi ha adintro de cadagún (como o cheso, o chistabín...) serían dialectos. Ta belatros, os 4 grupos son os dialectos constitutivos de l'aragonés, y os parlaches que incluyen serían sozdialectos, parlas comarcals u locals.

• Aragonés Occidental
• Aragonés Central
• Aragonés Meridional u Semontanés
• Aragonés Oriental

Atras propuestas de clasificación dialectal

Encara que a propuesta d'os quatro dialectos ye a más estendillata, atros autors en han propuesto variacions. Asinas, ta Ch. R. Usón y Ch. Tomás, bi habría tres dialectos historicos (occidental, central y oriental), que se corresponden alto u baixo con os tres viellos condaus pirinencos (Aragón,Sobrarbe y Ribagorza). Seguntes istos autors, as variedatz meridionals serían a continación d'ístas, que s'habrían castellanizau y uniformau en un proceso favoreixiu por a suya orografía más plana.

Atro autor, F. Sánchez, ha propuesto en zaguerías una clasificacion que postula a existencia de dos grans variedatz u dialectos, l'occidental y l'oriental. Istos tendrían, amás, unas sotzvariedatz más estremas: l'ansotano (y en bella mida, o cheso y l'ayerbense), con caracteristicas occidentals extremas, relacionatas con l'antigo romance navarro, y o ribagorzano, con prous solucions de transición enta o catalán.

Bibliografía

• Francho Chabier Nagore Laín. El Aragonés Hoy. Ibercaja e CFA.
• Anchel Conte et al. EL ARAGONÉS IDENTIDAD Y PROBLEMÁTICA DE UNA LENGUA. Colezión Aragón. Librería general.
• Chabier Tomás Arias. El aragonés del "biello Sobrarbe. Instituto de Estudios Altoaragoneses, 1999. ISBN 84-8127-095-4