Pegunta
De Biquipedia
La pegunta u pez ye un repui de la pirolís d'un material organico u destilazión d'alquitrans. Ye solida a temperatura ambient, e una barracha complexa de muitos idrocarburos la composa:
- idrocarburos aromaticos poliziclicos.
- oligoarilos e oligoarilmetanos
- compuestos poliziclicos y eteroaromaticos
Las peguntas presentan un amplo bentallo de tobura en cuenta d'una temperatura definita de fusión. Cuan se dixa que siga frida de nuebo la pegunta solidifica sin cristalizazión.
Los idrocarburos aromaticospoliziclicos son lo grupo de compuestos més abundants en las peguntas. Seguntes lur estrutura, se pueden clasificar en cata-condensatos e peri-condensatos. Los cata-condensatos presentan atomos de carbono terziario comuns, como masimo, á dos aniellos aromaticos, mientres que en los peri-condensatos, bel atomo de carbono terziario pertenex á tres unidaz aromaticas. La diferent tipolochía d'ixas dos clases de compuestos poliaromaticos toca á lo suyo comportamiento, por exemplo á la reactibidat termica suya.
[editar] Introduzión istorica
La pegunta estió lo produto més esportato por Finlandia mientres los sieglos XVII e XVIII. Las naus e buques mercaders europeyos prezisaban pegunta á manta, e lo prenzipal suministro probeniba de las selbas de coniferas de lo reino de Suezia, que allora ocupaba Finlandia. En atros países la pegunta se sacaba de pins biellos, u lo que quedaba dimpués de tallar l'árbol, como materia prima pa sacar pegunta. Los suecos, fineses e carelios la sacaban de pins chóbens.
La crosta de arbols e matullos se tallaba pa produzir inzisions por las que dimpués iba á fluyir la resina. Dimpués d'unas añatas estos arbols los tallaban, los partiban en trozos chicoz e los almazenaban pa produzir pegunta. La pegunta la trasportaban ta los puertos en tonels e la embarcaban pa que plegase ta los mercatos internazionals. Lo negozio de la pegunta estió un modo prenzipal de bida pa los abitadors de lo surueste de Finlandia, en l'interior, sobre tot Carelios. Més tarde á finals de lo millor tiempo d'esta industria, tamién se prozesaba en las rechions d'Ostrobotnia e Kainuu.
Bi eba una creyenzia que diziba que fer serbir pins de 30 a 40 años yera una gran perduga, en espezial porque las selbas on s'espleitaba la pegunta nunca no plegaban á produzir troncos grans buenos pa las serrerías, e s'eban de sustituir por las pizeyas, no tan buenas crexedoras. Sin d'embargo las rendas prozedents de la benda de brea lis feban onra á los abitadors d'ixas rechions. Eban d'espleitar un recurso natural en una zona de suelo pobre en nutrients, fuese lo recurso que fuese.
En Finlandia fabricoron pegunta mientres 300 años, rematando á prinzipios de lo sieglo XX, cuan dixoron de costruir embarcazions con fusta, e se reduzió la demanda d'este material.
En l'Alto Aragón ozidental se diz pez y l'Alto Aragón oriental se diz pegunta, común con o catalán, como en testos en castellán d'Aragón de lo sieglo XVI encara esistiba la parabra peguntar como relatiba á la costruzión e ye un compuesto de PICARE + UNCTARE, la forma oriental parix deribar de lo berbo.
