Navata

De Biquipedia
(Reendrezau dende Almadía)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Iste articlo se refiere a una mena d'embarcación feita con trampos. Ta o lugar catalán, se veiga Navata (Alto Empordán).
Navata en o río Galligo.

A navata (d'o latín < NAVE, "barco"[1]) ye una mena d'embarcación chiqueta que consiste en un conchunto de trampos feitos con trallos de madera, os cuals s'atableran, s'adoban, s'aplanan, se barrenan y se ligan con rametas flexibles de matulleras (como los verdugos d'a sarguera), y que tiene per función portiar os troncos per os ríos dende as selvas dica an que se troban as sarrarías. Ye tradicional d'os Pireneus, anque pueden trobar-sen embarcacions pareixitas en belaltras partes d'o mundo.

Cuan a navata ye gran, conta con dos remos debanters y un de coder. Si ye chiqueta, nomás que en porta un per cada cabo.

Denominacions[editar | modificar o codigo]

A parola navata se rechistra en Oza, Biescas, Sobrepuerto, a Buerda, Piarruego, Rebiella y Salas Altas,[2] tamién en chistabín y en baixorribagorzán. A denominación navata ye una parola aragonesa transmesa a u compartita con o idioma catalán d'a Francha de Levant (navada, pronunciato /nabaɛ/ en fragatín).

En o castellano d'Aragón d'o sieglo XVI evitaban escribir navata y escribiban navada,[3] dica en as zonas navateras de l'Alto Aragón a on se conserva huei esta parola con xorda intervocalica -T-.

En os barrancos d'a redolata de Sant Chuan d'a Penya, a on bi heba una actividat navatera mes chicota, adrezata a lo río Galligo, as navatas se diciban almadías,[3] coincidindo con a denominación tradicional que se rechistra en Uncastiello,[4] y con a denominación que feban servir en o peache de Puent de Luna en aragonés medieval:[5]

de almadia de biegas, dos sueldos / De almadias de fustes mayores, cinco sueldos

En os Pireneus de Navarra tamién reciben o nombre d'almadías, como tamién se deciba en a Ribera Navarra, pero en bella localidat navarra existiba o sinonimo baxilla.[6] En os Pireneus de Catalunya, o nombre de rais, denominación que pasó a lo gallego como rallos por l'actividat de navaters catalans en Asturias. En a Ribera d'Ebro catalana l'oficio yera conoixito como aumadiaire, derivato d'"almadía", podendo estar en catalán un termin amprato d'o castellano d'Aragón u l'aragonés por l'actividat navatera d'o Sistema Iberico adrezata enta o Valencia u Casp.

Historia[editar | modificar o codigo]

As navatas apareixoron en os tiempos en que os accesos per tierra t'as selvas fusteras d'os cobaltos d'os monts yeran bien complicatos, estando muito mas fácil de guiar-los per o río (siempre que ixo fuese posible) dica bel puesto mas propicio ta la suya distribución.

Historia d'as navatas pirenencas[editar | modificar o codigo]

As navatas son estatas tradicionals per tot en os Pireneus, a fin de poder guiar os troncos d'alto d'os monts enta las vals a lo sud d'os Pireneus. Per un regular os troncos se picaban, s'arrocegaban con os abríos dica las riberas d'o río, an s'amuntonaban, asperando la primavera, cuan a glera ye mas gran y ye mas fácil a guía.

En os Pireneus ríos con actividat navatera estioron o Irati, o Esca (sieglo XVIII), l'Aragón, Galligo, Cinca, Esera, Noguera Pallarera y Segre.

L'actividat navatera d'o río Aragón encomenzaba ya en Astún y entraba en o Reino de Navara por una aduana que centralizaba os impuestos, conservando-se o libro de contos con una buena documentación d'os sieglos XIV y XV. A fusta con a que construiban casas d'ixos tiempos en Tudela proveniba d'as navatas de l'Alto Aragón occidental.

Hue día contina la tradición d'as navatas en forma de fiesta per bels lugars d'a faixa pirenenca, como en l'Aínsa, en Burgui u en el Pont del Claverol, siempre ta de primavera. Prou conoixito ye o descenso de navatas a Espunya-l'Aínsa, an cada anyada se desciende la Cinca en plena mayencada, en recordanza y homenache d'os antigos navaters.

Bi ha un biero etno-botanico, baptizato con o nombre de Ruta de los Navateros, que esnaviesa per os camins tradicionals que se troban entre Puyarruego y Escalona dica a Espunya.

Tamién en existen museus, como lo Museu de la Navata en l'Aínsa, o Museo de la Almadía en o lugar navarro de Burgui u lo Museu dels Raiers en o lugar catalán d'el Pont del Claverol.

Historia d'as navatas en o Sistema Iberico[editar | modificar o codigo]

En o Sistema Iberico bi habió una conoixita actividad navatera en o Tacho, pero tamién podió existir-ne una no tan conoixita en o río Guadalaviar dende a Sierra d'Albarracín dica Valencia y en o sieglo XIV dende os pinars d'Aliaga dica Casp a traviés d'o Guadalop.[7]

L'actividat navatera en o río Guadalaviar trescruzando territorios aragoneses y valencianos yera tamién a rota de salita pa la fusta d'a Serranía de Cuenca, fusta que podeba rematar o suyo camín en ciudaz costeras que perteneixeban a la Corona de Castiella. En l'Archivo d'a Corona d'Aragón se conserva una carta d'Alifonso XI d'o 20 de chinero de 1347 protestando por o embargamiento que se feba a uns mercaders de Moya que levaban fusta a Valencia. O 7 de febrero de 1347 Pero lo Cerimonioso contestó que por a sequera no podeba deixar transportar a fusta sin pagar por l'augua igual como fan os regants:

la fusta quel dito D. Johan de vuestro mandamiento ha feyto tallar en los montes de Moya por bastecer la vuestra ciudad de Algezira

Enlaces externos[editar | modificar o codigo]

Referencias[editar | modificar o codigo]

  1. (es) Ana Leiva Vicén:Léxico aragonés de Antillón (Huesca). Análisis lingüístico (II). Alazet: Revista de Filología Nº 16, 2004, pp. 67-174, ISSN 0214-7602
  2. Francho Nagore et al. Endize de bocables de l'aragonés
  3. 3,0 3,1 Severino Pallaruelo, las Navatas y el Sobrarbe. O salmón, fancine alternativo y cultural del Alto Aragón, Numero 2, 1992-1993.
  4. José Olano Pemán: Diccionario de palabras, voces y dichos de Uncastillo. Asociación cultural La Lonjeta, 1996.
  5. (an) Teresa Iranzo Munío: ACTA CURIARUM REGNI ARAGONUM Tomo IX Vol 2º. Cortes del reinado de Alfonso V. Cortes de Alcañiz 1436. Gobierno de Aragón, 2007. p 735
  6. E. Baells Almadías y Almadieros: El interés de su estudios histórico. Pirineos nº 199, pp109-151. Chaca 1883. [1].
  7. (es) E. Balcells Almadías y Almadieros: El interés de su estudio histórico. Pirineos, 119 pp 109-151. Chaca 1983.