Aragonés central

Aragonés central
Variedat de l'aragonés
Localización cheografica
Territorios	Dende a val de Tena dica Bielsa
Lugar(s) principal(s)	Pandicosa, Broto, L'Aínsa, Bielsa
Literatura
Escritors principals	Leonardo Escalona, Chusé María Satué, Maximo Palacio

L'aragonés central ye l'aragonés que se charra entre as vals de Bielsa y Tena, y en o Prepireneu a o norte de Guara. Ye millor definito por caracters foneticos que por caracters morfolochicos u lexicos y dende estos zaguers puntos de vista l'aragonés central d'a cuenca d'o Galligo sería aragonés occidental y l'aragonés central d'a cuenca d'a Cinca sería aragonés oriental en un sentito amplo sin parar cuenta en a propuesta de clasificación d'as parlas altoaragonesas en quatre brancas.

Fonetica

Conserva a fonética de l'aragonés pirenaico preliterario:

• Bi ha focos de conservación d'o diftongo -ia- derivato d'a E curta latina (fiastas, suarde, etc.) y casos isolatos fuera d'os focos.

• As oclusivas xordas intervocalicas latinas P, T, K se conservan en muitos más casos que en l'aragonés cheneral: capeza, saper, crapa, lupo, escopallo, foricar, afocar, taleca, focaza, borruca, fornica, ayutar, fusata, xata, recutir, recatiar, emprenyatuara. Esto da en morfolochia participios en -ato, -ito.

• Bi ha más casos de evolución d'a -LL- latina enta sonitos cacuminals analogos a la che vaqueira de l'asturián occidental, sonitos que han dato: -ch- (tensino, Tierra de Biescas zona de toponimos como cochata), -t- (bergotés, belsetán, zona de toponimos como cotata).

• Sonorización dezaga liquida: As sonoras que van dezaga liquida N, R, s'enchorden sobre tot en o sector de Torla-Broto-Vió-A Solana-Tena:
  • Grupo -MP- > -mb-:
    • Cambo en Pandicosa, Torla, Oto, Broto, Buesa, Fanlo, Buisán, Yosa.
    • Tramba en Torla
    • Embolla: ampolla (muito estendillato)
  • Grupo -NT- > -nd-:
    • Planda y Punda en Vió y Pandicosa
    • Candal, Sendir, Fuande, Puande, Undar, nomás que en Bió.
  • Grupo -NK- > -ng-:
    • Blango, Bango, Chungo, Barrango, Palanga
    • Cingüenda (Panticosa)
  • Grupo -LT- > -ld-:
    • Aldo, Buldorín, Saldo, Suarde, Sangardana
  • Grupo -RT- > -rd-:
    • Chordica/Xordica (muito estendillato)
  • Grupo -LP- > -lb-
    • Tauba (de Talpa, en Sallent)
  • Grupo -RK- > -rg-:
    • Forgancha

Morfolochia:

En o sector central trobamos en muitos puestos l'articlo ro, ros, ra, ras como forma post-vocalica de l'articlo aragonés cheneral o, os, a, as. Mesmo lo trobamos en un texto antigo procedent d'o Sobrarbe que yera en latín pero teneba formas romances: ero kabalo, era espata (a -l- representaba a vegatas una -ll- u una -l- cheminata). Coincide con as formas gasconas de l'atro costato d'os Pireneus.

S'emplegan os participios -ato, -ito, consideratos os más d'alcuerdo con a fonetica aragonesa. Manimenos en bellas zonas coexisten con -au, -iu que tienden a predominar, y mesmo han feito que se pierdan os primers.

Variedatz:

Aragonés centro-occidental

• Aragonés d'a Val d'Acumuer
• Aragonés d'a Tierra de Biescas
• Aragonés sarrablés
• Aragonés de Sobrepuerto
• Aragonés tensino (con l'aragonés pandicuto como parla local millor conservata).
• Aragonés de Vallibasa

Aragonés centro-oriental

• Aragonés d'a Valle de Vio
• Aragonés d'a Valle de Puértolas
• Aragonés d'a Ribera de Fiscal
• Aragonés de Sierra Ferrera
• Aragonés belsetán
• Aragonés bergotés
• Aragonés d'a Valle de Tella

Bibliografía

• Francho Chabier Nagore Laín. El Aragonés Hoy. Ibercaja y Consello d'a Fabla Aragonesa, 1989.
• Anchel Conte et al. El aragonés identidad y problemática de una lengua. Colección Aragón. Librería general.
• Chabier Tomás Arias. El aragonés del "biello Sobrarbe. Instituto de Estudios Altoaragoneses, 1999. ISBN 84-8127-095-4