Palabra
De Biquipedia
Una palabra u parola ye, en gramatica tradizional, cadagún d'os segmentos que se troban entre dos pausas u espazios en a cadena fablata u escrita, que puet aparexer en atras posizions, e que tien una funzión.
Manimenos, determinar qué constituye foneticament u morfosintacticament una palabra ye un problema más gran, asinas por exemplo chunto á los morfemas ligatos e as palabras lecsicas esisten os cliticos, d'os que se descute o suyo estatus de palabra. A rama d'a lingüistica que estudia la composizión e estrutura interna d'as palabras ye a morfolochía.
[editar] Formazión de palabras
En l'aragonés, como en a resta de luengas romanicas, bi ha tres prozedimientos ta la formazión de palabras:
- L'abilitazión, en a que no se creyan nuebas palabras propiament ditas, sino que s'abilitan atras clases de palabras como sustantibos (prenzipalment adchetibos, partizipios e infinitibos)
- Exemplos de sustantibazión d'adchetibos son "o choben", "o biello" u "os zaguers".
- Exemplos de sustantibazión de partizipios son "o escurexito", "o chelato", "a rullata" u "o socanillato".
- Exemplos de sustantibazión d'infinitibos son "o quefer", "o charrar", u "l'amenister".
- L'afixazión, puet estar sufixazión (metendo un afixo dezaga d'a radiz d'a palabra) u prefixazión (metendo un afixo debant d'a radiz d'a palabra):
- Exemplos de sufixazión son "-et/-eta" (chiquet/chiqueta), "-izo/a" (plenizo, grandiza) u "-allo/a" (espantallo, pixallo).
- Exemplos de prefixazión son "es-" (escaxalato, eschucato), "en-" (enfarinata, encomienzo) u "a-" (asetegato, afumato).
- A composizión, formando una palabra nueba con atras dos ya esistents.
- Exemplos de composizión son xucamans, tastabín, birabolas u crebagüesos.
[editar] Bibliografía
- Gramatica d'a luenga aragonesa. Francho Nagore. Zinquena Edizión. Mira Editores. ISBN 84-86778-16-6
