Gastronomía d'Aragón

Por gastronomía d'Aragón cal entender a gastronomía propia y diferenciada d'Aragón, diferent de la d'atras comunidaz autonomas d'Espanya y d'atros países. En concreto, se refiere mesmo a ingredients que a tecnicas y a recetas de cocina y ye un d'os elementos que pueden definir a Cultura d'Aragón.

Se tracta d'una gastronomía con prous influyencias d'os suyos territorios vecins, amanaus u con vinclos historicos y con muitos puntos comuns con éls, mas que mas con as cocinas navarra y riojana, pero tamién con as cocinas catalana, italiana y francesa.

No ye una cocina immutable so que ha teniu cambios importants a traviés d'os anyos, en incorporar ingredients, tecnicas y mesmo recetas propias d'atras cocinas y d'atras culturas en un proceso que no ye nomás que propio de l'actual globalización so que s'ha produciu en o tiempo como consecuencia d'as propias vicisituz d'a Historia d'Aragón, y que ha sabiu incorporar ixas influyencias sin perdida d'a suya propia personalidat.

Amás, no ye en realidat una cocina unitaria so que bi ha diferencias entre las diferents comarcas d'Aragón en función d'as caracteristicas economicas, socials y territorials de cadaguna d'as comarcas, sin que por ixo pueda dixar-se de charrar d'una cocina aragonesa comuna.

A gastronomía d'Aragón se caracteriza por estar basada en a clamada "dieta mediterrania", encara que adaptada a las caracteristicas propias d'o país.

Antiparte, como s'escayece con todas as gastronomías d'o mundo, una parte important d'as preparacions culinarias han naixiu en as mesas d'as clases socials altas, estendillando-se dimpués como una moda u como un elemento a imitar a la resta d'a población, mas que mas ta días de fiestas u de celebracions (como por eixemplo las vodas).

As suyas caracteristicas

A base d'a gastronomía aragonesa ye la clamada "dieta mediterrania", compartida por os países que mugan con a mar Mediterrania y que se caracteriza por un elevau consumo de vechetals y fruita, de pan de trigo (u d'atros cerials), de peix y de carnes blancas (pollo y atras aus y tocinos) pero tamién de cordero (u crabas d'antes mas) entre las carnes royas. Como graixas, s'emplega mas que mas l'aceite d'oliva, encara que en muitos platos de cocina de pastor un elemento fundamental ye la graixa de cordero, como s'escayece con as migas.

Os suyos ingredients

Como s'ha dito, la base d'a gastronomía aragonesa ye la "dieta mediterrania", a on l'elemento prencipal ye l'elevau consumo de productos d'orichen vechetal (como diz la canción Aragón de José Antonio Labordeta, "y donde hay augua una huerta" , "y a on bi ha augua una huerta") que tradicionalment procediban en a mayor parte d'os lugars de l'autoproducción en casa.

Tamién se fa un alto consumo de cerials (mas que mas de trigo, pero tamién d'ordio, de segal u de panizo) en forma de farina ta elaborar pan u ta fabricar pasta.

La fruita ye un atro d'os elementos destacaus d'a gastronomía aragonesa, en destacando la calidat de muitas d'as produccions actuals y historicas.

O consumo de peix yera tradicionalment mas reduciu y limitau a peixes de río (mas que mas a truita, encara que tamién d'atras especies como l'angula, que mesmo en lugars tan distanciaus d'a mar como las Cinco Villas se pescaba, como consta en Malpica d'Arba en o sieglo XIX y reculle lo Diccionario geográfico-estadístico-histórico de España y sus posesiones de Ultramar de Pascual Madoz) u conservaus en salazón, en destacando entre éls o bacalau y las sardinetas.

Tamién yera reduciu o consumo de carne, procedent d'a caza como la perdiz, lo conillo, las cotornices u las liebres, pero tamién d'animals criaus ta lo suyo consumo, en destacando lo pollo, los tocinos, o cordero y las crabas.

En as graixas destaca mas que mas l'aceite d'oliva, tan caracteristico d'a cocina mediterrania y que conta en Aragón con una elevada producción, encara que mientres os zaguers 100 anyos s'han abandonau muitos cautivos marguinals d'olivera. Tanimientres, en bels platos d'a cocina aragonesa tamién se fa servir graixa animal, mas que mas de tocín u de cordero.