Talpa europaea

De Biquipedia
Ir a la navegación Ir a la búsqueda
Talpa europaea
Talpa europaea MHNT.jpg
Talpa europaea
Denominacions populars
Topo, tobonero, tabonero, taupa, tauba, toponero
Clasificación scientifica
Dominio:
Eukaryota
Reino:
Animalia
Filo:
Chordata
Clase:
Mammalia
Subclase:
Theria
Infraclase:
Placentalia
Orden:
Soricomorpha
Familia:
Talpidae
Subfamilia:
Talpinae
Tribu:
Talpini
Chenero:
Talpa
Especie:
T. europaea
Descripción
Talpa europaea
LINNAEUS, 1758
Distribución cheografica
Map of range mole.jpg
Distribución en Eurasia.

O topo común u europeu (scientificament Talpa europaea (LINNAEUS, 1758)), que tamién tiene atros nombres en aragonés como tabonero en Ribagorza[1][2] y tobonero/toponero en Sobrarbe,[2][3][4] ye un mamifero insectivoro clasificau en a orden d'os soricomorfos y a familia d'os talpidos.

A especie se conoix más que más por vivir debaixo de tierra, en matriqueras profundas y intrincadas que construyen ellos mesmos y que se dicen topineras, y por tener una fisionomía adaptada a una forma de vida tant peculiar.

Descripción[editar | editar código]

O topo ye un mamifero soricomorfo d'entre 12 y 20 centimetros de largaria, con una coda peluda de 3 cm más. O pelo ye negro, preto, fino, que chunto con un pellizo flexible le sirve pa arrocegar-se por adintro d'as topineras y a la vegada poder retacular sin fer-se estorbo.

Tiene as zarpas debanteras adaptadas pa esgarrapar y tunelar a tierra. As mans son enormes, sin pelo, con cinco didos robustos chunius con a piel, entre os quals denguno ye oposable, y as unglas son recias y creixen contino. As patas debanteras que as aguantan son muit curtas, firmes, y s'articulan quasi de tot debaixo d'a piel; os codos son chiraus de forma que as zarpas siempre tienen a palma mirando ta dezaga, y os huembros son muit fuertes, con homoplatos firmes y debantaus a on que se refirma os musclos.

A capeza ye gran, sin orellas vistables (pos no tiene pavellón auditivo externo) y uellos amagaus entre o pelo. Ye quasi ciego, anque tiene un tacto y un olfacto finismos que le sirven pa arribar dica a on que son as presas.

Hermafroditismo[editar | editar código]

O topo europeu, de conchunta con atras especies d'o chenero Talpa, son os solos mamiferos en os que s'haiga descrito un hermafroditismo.[5] Anque existen os masclos y son fértils, as fembras tienen tamién un teixiu testicular en l'aparato reproductor que no les sirve pa auto-fecundar-se pero sí produz grans cantidatz de testosterona en qualques fases d'o ciclo anyal.

As fembras tienen una forma especial de gonadas que se diz ovotestis,[5] y que no son ovarios ni testiclos propiament ditos. A parte femenina ye perfectament funcional, y en o periodo reproductor de l'anyada s'emplena d'ovocitos y libera hormonas femeninas[5] como qualsiquier ovario de mamifero. Manimenos, sacando ixa temporada, a resta de l'anyada predomina o comportamiento masculino en as gonadas y o teixiu proto-testicular se desenvolica y libera testosterona en cantidatz parellanas a las d'un masclo.[5] Os tubulos seminiferos son disfuncionals en as fembras, y as celulas de Sertoli tienen forma embrionaria,[5] por o que no pueden fer espermatochenesi.

Habitat[editar | editar código]

Un topinal ye un campo u prau que os topos malmeten a base de fer-le topineras.

O topo europeu amenista suels profundos pa fer as topineras. Habita dende o libel d'a costa dica 2.000 mslm en o Pireneu.[5] Se miran d'evitar os suels acidos, a on que no se troba ni tansas lombrices que son a suya presa principal.

No les fan goi os fenals ni os vivers, por a tierra grasa, a on que l'augua embadina os túnels, ni os suels secos, arenosos, cascallos u de mal excavar pa que s'aguanten as matriqueras. Son abundants en altarias meyas, entre os 1.000 y 1.500 metros[5] sobre o libel d'a mar, en o suelo de praus y uebras de tierra medianament suelta y sazonosa, en os que i sían abundants as presas.[5]

Distribución[editar | editar código]

O topo europeu habita dende o sud d'Anglaterra dica os ríos Oby y Irtysh, en Siberia, y dende o sud de Suecia dica o norte d'Italia en Europa occidental.

En a Peninsula Iberica se'n puede trobar en terrens que le sían favorables por tot en Catalunya, en Aragón y en Navarra y País Vasco, pero en a baixant occidental d'o Sistema Iberico se fa poquet a poquet más escaso, con presencia documentada en as provincias de Soria y Burgos lo más ta ponient.[5] En a Meseta norte y en as cordeleras que se troba más ta occident o suyo puesto l'ocupa o suyo parient Talpa occidentalis.

Imáchens[editar | editar código]

Referencias[editar | editar código]

  1. (es) BALLARÍN CORNEL, Ángel, Diccionario del benasqués; Zaragoza, 1978. Consultable en linia a traviés de (an)(es)(en) Diccionario del benasqués. Consultau o 5 de setiembre de 2018.
  2. 2,0 2,1 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-8986-235-7
  3. (es) TOMÁS ARIAS, Chabier, El aragonés del Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4
  4. (es) QUINTANA i FONT, Artur, El Aragonés nuclear de Nerín y Sercué (Valle de Vio); Gara d'Edizions. Zaragoza, 2007. ISBN 978-84-8094-060-3
  5. 5,0 5,1 5,2 5,3 5,4 5,5 5,6 5,7 5,8 (es) Enciclopedia virtual de los vertebrados españoles, consultada o 5 de setiembre de 2018.

Se veiga tamién[editar | editar código]

Vinclos externos[editar | editar código]