Abechuela

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Abechuela
Municipio d'Aragón
Entidat  • País  • Provincia  • Comarca	Municipio  Aragón  Teruel Gúdar-Chabalambre
Partiu chudicial	Teruel
Superficie	87 km²
Población  • Total  • Densidat	55 hab. (2013) 0,63 hab/km²
Altaria  • Meyana	1.169 m.
Distancia  • 95 km	enta Teruel
Alcalde	Vicente Cervera Bartual
Codigo postal	44422
Parroquial  • Diocesi  • Arcipestrau	Teruel y Albarracín Mora de Rubielos
Coordenadas	39°54’34’’N 0°53’35’’U
Abechuela Abechuela en Aragón
Web oficial

Abechuela (en castellano Abejuela, en churro Castellar d'Abejuela) ye un municipio de la provincia de Teruel, situau en la comarca de Gúdar-Chabalambre. La suya población ye de 55 habitants en una superficie de 87 km² y una densidat de población de 0,63 hab/km².

Cheografía

Ye situau en lo semontano de la sierra de Chabalambre, chunto a la Rambla Abechuela. Ye lo punto mas meridional de la provincia de Teruel. Comprende lo lugar de la Cervera.

Mugas

Lo suyo termin municipal muga con Lo Toro, con un cantón de Bexix, con un cantón de Sacanyet, con Andilla, con La Yesa, con Torrillas y con Manzanera. L'actual termin d'Abechuela representa una falca adintro de lo territorio de lo País Valenciano y s'ixampló enta lo sud en lo sieglo XVIII como resultau d'uns litichios territorials con Andilla y La Yesa.

Torrillas	Manzanera
La Yesa		Lo Toro
	Andilla	Andilla, Bexix, Sacanyet

Toponimia

Lo toponimo actual en castellano Abejuela ye un de los muitos toponimos de l'aria de l'aragonés d'as comunidaz aragonesas con la terminación -uela, diminutivo indicador de lugars chicoz: Escoriuela, Ferreruela, Lagueruela, Lanzuela, Mosqueruela, Nogueruelas, Royuela, Sarzuela de la Loma y Cerveruela, a los que s'habría d'anyadir La Iglesuela amán d'ixa aria. Ye posible que antigament fuese conoixida como Abella, toponimo documental de lo sieglo XIII.

Dimpués de la deseparación d'Exerica de lo concello de Teruel en 1261 los teruelanos quereban recuperar los territorios que d'alcuerdo con lo fuero de 1177 lis correspondeban, y prebaban de fer-lo poblando los territorios que teoricament lis correspondeban. Lo historiador Enric Guinot Rodríguez opina ni Torrillas ni Abechuela existiban en 1261, y que Torrillas y Almansa (nuclio precursor d'Abechuela) son citadas por primera vegada en mayo de 1262 como lugars que lo concello de Teruel heba de repoblar. D'esta traza os teruelanos nombroron mayordombres en un texto en lo que salen unas aldeyas de la zona en litichio con lo reino de Valencia entre las que trobamos torrillas latinizau:

qui dividant et donent ad populandum quibuscumque personis voluerint...loca illa sunt in terminis turoliii, qui nominantur Musquerola, Val de Linares, Pena Calva, Atorela, Salmança, Turriles, Camarela et omnia loca que in termino Turolii sunt ad populandum

En noviembre de 1263, en tiempos de lo litichio entre lo Concello de Teruel y Eximén Pérez d'Arenós por la posesión d'Albentosa, Chaime I sentenció que la posesión d'un lugar dito Abella correspondeba a lo concello de Teruel y no a Eximén Pérez d'Arenós.

Lo 2 de setiembre de 1268 s'escribiba Castellar de Abexuela cuan lo concello de Teruel nombró seis quinyoners pa l'aldeya de Torrillas:

al río de Truchiellas e hixe a los morones de Javalambre, como las aguas vierten, e da en el morón Orelano sobre la fuent de la Penna, e hixe al castellar de Abexuela....

Lo microtoponimo homonimo actual La Abejuela, que ye un termin agricola de Teruel amán de l'Arrabal y de Val de Zebro, ya se documenta en lo sieglo XV escrito La Abeiuela y en concreto en un texto referent a 1475 L'Abejuela.

Lo lugar d'Abechuela s'escribe Abejuela en un texto de 1689 en catalán:

y senyaladament als vehins, y habitadors de les viles, y lochs de Abejuela, Villar, Bexis, Chelva ab ses aldees, y Yriguelas, La Yesa y demés circunvehins

De provenir de lo romanz Abella, (y no de lo latín ABBATIOLA como se proposa pa un Abejuela d'Albacet), lo lugar Abella con sufixo -uela se convertiría en Abechuela por estar en meyo d'una zona entre la Comunidat de Teruel y las Comarcas churras a on pareix que a -ll- se convertió en -ch- que se representaba con as letras -y-, -i-, -j-, (no -j- velar castellana actual) y menos a sobén -x-, ya en los sieglos XIII-XIV, como se vei en Torrillas, que ya s'escribiba Torrijas/Torrixas.

En textos medievals escritos en aragonés d'as comarcas churras u en aragonés d'as comunidaz aragonesas veyemos la mesma evolución en parolas aragonesas (ligaxo y no "ligallo", fijuela y no filluela), y en los toponimos medievals remataus en -ejo y no en -ello u -iello.

En las parolas actuals conservadas en la parla churra u en lo castellano de lo surueste d'Aragón asnacho, panocha, regacho se vei la mesma evolución fonetica, y corresponden a las parolas asnallo, panolla y regallo de lo Baixo Aragón. En lo sud de la provincia de Teruel bi ha hipercorreccions como ceboja en cuenta de cebolla.

João Batista Labanha escribiba Abeyuela en "Itinerario del Reyno de Aragón (1610-1611)" (lo libro yera escrito en portugués pero los toponimos de lo Sistema Iberico yeran cuasi siempre en castellano), a l'igual que escribiba Torriyas, Borya, Cantavieya y Casteyon. En los textos escritos en castellano de los sieglos XVI, XVII y XVIII s'escribe cuasi siempre Abejuela, muit pocas vegadas Abexuela.

Historia

En la concordia de 1322 u 1324 entre Andilla, lo concello de Teruel y l'aldeya d'Almansa s'acordó una muga entre Almansa y Andilla y que la Fuent de la Musa y lo Pozuelo d'el Fondón d'Abechuela fuesen abrebadors comuns pa las dos localidaz.

Enta lo sieglo XVI los habitants d'Almansa fuoron baixando a vivir a lo fondón d'Abechuela, que yera chusto en la muga con lo Reino de Valencia y comproron tierras en las localidaz d'Andilla y La Yesa, como constató Antonio José de Cavanilles. En l'anyo 1677 encomenzoron los pleitos con La Yesa porque los habitadors d'Abechuela reivindicaban las partidas de lo termin a on yeran las tierras que heban comprau. En un principio lo pleito estió favorable pa los habitadors de La Yesa. Lo 26 de febrero de 1682 una sentencia arbitral describió como heba d'estar la muga entre Abechuela y La Yesa, tal y quiento lo entendeba Hipòlit Ravanals un sieglo dimpués:

...y por ella se declaró, que la división de los terminos y los confines de la Yesa y Abejuela se deben regular y correr por el Albeo de la rambla, llamada de Abejuela, desde el Cantal de Lerzo, hasta los majanos, que estan sitos inmediatamente, bajo la oya dicha de Abejuela

Manimenos en lo Sieglo XVIII encomenzó lo pleito con los habitadors d'Andilla por lo mesmo motivo. La ciudat de Valencia se presentó en ixe pleito pa representar a tot lo reino pa esfender las demarcacions historicas.

Dos sentencias favorables a Abechuela lo 15 de chinero de 1732 y lo 14 de mayo de 1736 modificoron las mugas entre los reinos d'Aragón y Valencia por ixamplar-se enta lo sud lo termin d'Abechuela fendo una falca en territorio valenciano. uns 4 km.

Hipòlit Ravanals estió qui fació la revisión de los termins mugants entre lo Reino de Valencia y lo Reino d'Aragón en la redolada d'Abechuela.

Los habitadors d'Abechuela han emigrau muito a tierras baixas valencianas. L'apelliu Zurriaga ye relativament común en Abechuela y se diz que la chent d'Olocau de Carraixet con este apelliu provienen d'Abechuela. Muitos de los criaus de la Cartuixa de Porta Coeli (Campo de Turia) proveniban d'Abechuela y teneban apelliu Zurriaga.

Demografía

Evolución demografica

1362 f 1495 f 1842 1857 1860 1877 1887 1897 1900 - - 320 642 638 690 684 667 649

1910 1920 1930 1940 1950 1960 1970 1981 1991 687 649 509 456 462 311 164 63 32

1992 1994 1996 1997 1998 1999 2000 2001 2002 - - 70 - 61 63 58 51 47

2003 2004 2005 2006 2007 2008 2009 2010 2011 59 68 65 61 68 61 57 56 66

2012 2013 2014 2015 2016 2017 2018 2019 2020 55 39 41 54 56 50 49 48 50

2021 2022 2023 2024 2025 2026 2027 2028 - 57 56 - - - - - - -

1717-1981: población de feito; 1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración

Reparto de concellers

Eleccions municipals
Partiu	1979	1983	1987	1991	1995	1999	2003	2007	2011
Partido Popular									1
Partido Aragonés									1
Partido de los Socialistas de Aragón									1
Total									3

Alcaldes

Lista d'alcaldes

Lechislatura	Nombre	Partiu politico
1979–1983	Antonio Mateo Gil	UCD
1983–1987
1987–1991
1991–1995
1995–1999
1999–2003	Vicente Ros Castellar	PP
2003–2007	Javier Villar Vicente	PSOE
2007–2011	Javier Villar Vicente	PSOE
2011–2015	Vicente Cervera Bartual	Partido Aragonés
2015-2019	Carmen Civera García	Partido Aragonés
2019-2023	Carmen Civera García	Partido Aragonés

Molimentos

• Ilesia de Sant Agostín d'Abechuela, protechida legalment con a suya declaración como Bien d'Intrés Cultural.
• Torre d'Abechuela.
• Ermita de Santa Margalida, sieglo XIII.

Fiestas

• 20 de chulio.
• 28 d'agosto.

Bibliografía

• (ca) Enric Guinot: Els límits del regne, el procés de formació territorial del País Valencià Medieval (1238-1500). Edicions Alfons El Magnànim. 1995.

Vinclos externos

• Se veigan as imáchens de Commons sobre Abejuela.

Lugars d'o municipio d'Abechuela
Poblaus: Abechuela Despoblaus: La Cervera

Lugars desapareixius d'o municipio d'Abechuela
Almansa