Abechuela

De Biquipedia
Ir a la navegación Ir a la búsqueda
Abechuela
Municipio d'Aragón
Bandera Escudo d'armas
Abejuela 04.JPG
Entidat
 • País
 • Provincia
 • Comarca
Municipio
Flag of Aragon.svg Aragón
Teruel (provincia).svg Teruel
Gúdar-Chabalambre
Superficie 87 km²
Población
 • Total

61 hab. (2008)
Altaria 1.169 m.
Distancia
 • 95 km

enta Teruel
Codigo postal 44422
Coordenatas 39°55’ 1’’N 0°52’58’’U
Abechuela en Aragón
Abechuela
Abechuela
Situación d'Abechuela en Aragón

Abechuela (Abejuela en castellán) ye un municipio de la provincia de Teruel, situau en la comarca de Gúdar-Chabalambre. La suya población ye de 61 habitants (2008), en una superficie de 87 km² y una densidat de población de 0,70 hab/km².

Cheografía[editar | editar código]

Ye situau en lo semontano de la sierra de Chabalambre, chunto a la Rambla Abechuela. Ye lo punto más meridional de la provincia de Teruel. Comprende lo lugar de la Cervera.

Mugas[editar | editar código]

Lo suyo termin municipal muga con Lo Toro, con un cantón de Bexix, con un cantón de Sacanyet, con Andilla, con La Yesa, con Torrillas y con Manzanera. L'actual termin d'Abechuela representa una falca adintro de lo territorio de lo País Valencián y s'ixampló enta lo sud en lo sieglo XVIII como resultau d'uns litichios territorials con Andilla y La Yesa.

Torrillas Manzanera
La Yesa Rose des vents2.png Lo Toro
Andilla Andilla, Bexix, Sacanyet

Toponimia[editar | editar código]

Lo toponimo actual en castellán Abejuela ye un de los muitos toponimos de l'aria de l'aragonés d'as comunidatz aragonesas con la terminación -uela, diminutivo indicador de lugars chicotz: Escoriuela, Ferreruela, Lagueruela, Lanzuela, Mosqueruela, Nogueruelas, Royuela, Sarzuela de la Loma y Cerveruela, a los que s'habría d'anyadir La Iglesuela amán d'ixa aria. Ye posible que antigament fuese conoixida como Abella, toponimo documental de lo sieglo XIII.[1]

Dimpués de la deseparación d'Exerica de lo concello de Teruel en 1261 los terolans quereban recuperar los territorios que d'alcuerdo con lo fuero de 1177 lis correspondeban, y prebaban de fer-lo poblando los territorios que teoricament lis correspondeban. Lo historiador Enric Guinot Rodríguez opina ni Torrillas ni Abechuela existiban en 1261, y que Torrillas y Almansa (nuclio precursor d'Abechuela) son citadas por primera vegada en mayo de 1262 como lugars que lo concello de Teruel heba de repoblar. D'esta traza os terolans nombroron mayordombres en un texto en lo que salen unas aldeyas de la zona en litichio con lo reino de Valencia entre las que trobamos torrillas latinizau:

qui dividant et donent ad populandum quibuscumque personis voluerint...loca illa sunt in terminis turoliii, qui nominantur Musquerola, Val de Linares, Pena Calva, Atorela, Salmança, Turriles, Camarela et omnia loca que in termino Turolii sunt ad populandum

En noviembre de 1263, en tiempos de lo litichio entre lo Concello de Teruel y Eximén Pérez d'Arenós por la posesión d'Albentosa, Chaime I sentenció que la posesión d'un lugar dito Abella[1] correspondeba a lo concello de Teruel y no a Eximén Pérez d'Arenós.

Lo 2 de setiembre de 1268 s'escribiba Castellar de Abexuela quan lo concello de Teruel nombró seis quinyoners pa l'aldeya de Torrillas:

al río de Truchiellas e hixe a los morones de Javalambre, como las aguas vierten, e da en el morón Orelano sobre la fuent de la Penna, e hixe al castellar de Abexuela....

Lo microtoponimo homonimo actual La Abejuela, que ye un termin agricola de Teruel amán de l'Arrabal y de Val de Zebro, ya se documenta en lo sieglo XV escrito La Abeiuela[2] y en concreto en un texto referent a 1475 L'Abejuela[3].

Lo lugar d'Abechuela s'escribe Abejuela en un texto de 1689 en catalán:

y senyaladament als vehins, y habitadors de les viles, y lochs de Abejuela, Villar, Bexis, Chelva ab ses aldees, y Yriguelas, La Yesa y demés circunvehins

De provenir de lo romanz Abella, (y no de lo latín ABBATIOLA como se proposa pa un Abejuela d'Albacet), lo lugar Abella con sufixo -uela esdevendría Abechuela por estar en meyo d'una zona entre la Comunidat de Teruel y las Comarcas churras a on pareix que a -ll- esdevinió -ch- que se representaba con as letras -y-, -i-, -j-, (no -j- velar castellana actual) y menos a sobén -x-, ya en los sieglos XIII-XIV, como se vei en Torrillas, que ya s'escribiba Torrijas/Torrixas.

En textos medievals escritos en aragonés de las comarcas churras u en aragonés de las comunidatz aragonesas veyemos la mesma evolución en parolas aragonesas (ligaxo y no "ligallo", fijuela y no filluela), y en los toponimos medievals remataus en -ejo y no en -ello u -iello.

En las parolas actuals conservadas en la parla churra u en lo castellán de lo surueste d'Aragón asnacho, panocha, regacho se vei la mesma evolución fonetica, y corresponden a las parolas asnallo, panolla y regallo de lo Baixo Aragón. En lo sud de la provincia de Teruel bi ha hipercorreccions como ceboja en cuenta de cebolla.

João Batista Labanha escribiba Abeyuela en "Itinerario del Reyno de Aragón (1610-1611)" (lo libro yera escrito en portugués pero los toponimos de lo Sistema Iberico yeran quasi siempre en castellán), a l'egual que escribiba Torriyas, Borya, Cantavieya y Casteyon. En los textos escritos en castellán de los sieglos XVI, XVII y XVIII s'escribe quasi siempre Abejuela, muit pocas vegadas Abexuela.

Historia[editar | editar código]

En la concordia de 1322 u 1324 entre Andilla, lo concello de Teruel y l'aldeya d'Almansa s'acordó una muga entre Almansa y Andilla y que la Fuent de la Musa y lo Pozuelo d'el Fondón d'Abechuela fuesen abrebadors comuns pa las dos localidatz.

Enta lo sieglo XVI los habitants d'Almansa fuoron baixando a vivir a lo fondón d'Abechuela, que yera chusto en la muga con lo Reino de Valencia y comproron tierras en las localidatz d'Andilla y La Yesa, como constató Antonio José de Cavanilles. En l'anyo 1677 encomenzoron los pleitos con La Yesa porque los habitadors d'Abechuela reivindicaban las partidas de lo termin a on yeran las tierras que heban comprau. En un principio lo pleito estió favorable pa los habitadors de La Yesa. Lo 26 de febrero de 1682 una sentencia arbitral describió como heba d'estar la muga entre Abechuela y La Yesa, tarcual lo entendeba Hipòlit Ravanals un sieglo dimpués:

...y por ella se declaró, que la división de los terminos y los confines de la Yesa y Abejuela se deben regular y correr por el Albeo de la rambla, llamada de Abejuela, desde el Cantal de Lerzo, hasta los majanos, que estan sitos inmediatamente, bajo la oya dicha de Abejuela[4]

Manimenos en lo Sieglo XVIII encomenzó lo pleito con los habitadors d'Andilla por lo mesmo motivo. La ciudat de Valencia se presentó en ixe pleito pa representar a tot lo reino pa esfender las demarcacions historicas.

Dos sentencias favorables a Abechuela lo 15 de chinero de 1732 y lo 14 de mayo de 1736 modificoron las mugas entre los reinos d'Aragón y Valencia[5] por ixamplar-se enta lo sud lo termin d'Abechuela fendo una falca en territorio valencián.[6] uns 4 km.

Hipòlit Ravanals estió qui fació la revisión de los termins mugants entre lo Reino de Valencia y lo Reino d'Aragón en la redolada d'Abechuela.[4]

Los habitadors d'Abechuela han emigrau muito a tierras baixas valencianas. L'apelliu Zurriaga ye relativament común en Abechuela y se diz que la chent d'Olocau de Carraixet con este apelliu provienen d'Abechuela. Muitos de los criaus de la Cartuixa de Porta Coeli (Campo de Turia) proveniban d'Abechuela y teneban apelliu Zurriaga.

Demografía[editar | editar código]

Evolución demografica
1362 f 1495 f 1842 1857 1860 1877 1887 1897 1900
- - 320 642 638 690 684 667 649

1910 1920 1930 1940 1950 1960 1970 1981 1991
687 649 509 456 462 311 164 63 32

1992 1994 1996 1997 1998 1999 2000 2001 2002
- - 70 - 61 63 58 51 47

2003 2004 2005 2006 2007 2008 2009 2010 2011
59 68 65 61 68 61 - - -

2012 2013 2014 2015 2016 2017 2018 2019 -
- - - - - - - - -

 1717-1981: población de feito; 1990- : población de dreito.
Fuent: Intercensal en l'INE, Series de población en l'INE y Relación d'unidatz poblacionals en l'INE.

Administración[editar | editar código]

Reparto de concellers[editar | editar código]

Eleccions municipals
Partiu 1979 1983 1987 1991 1995 1999 2003 2007 2011
Partido Popular 1
Partido Aragonés 1
Partido de los Socialistas de Aragón 1
Total 3

Alcaldes[editar | editar código]

Lista d'alcaldes
Lechislatura Nombre Partiu politico
19791983
19831987
19871991
19911995
19951999
19992003
20032007
20072011
20112015 Vicente Cervera Bartual Partido Aragonés

Molimentos[editar | editar código]

Fiestas[editar | editar código]

Referencias[editar | editar código]

  1. 1,0 1,1 Enric Guinot Rodríguez Els límits del regne: el procés de formació territorial del País Valencià medieval, 1238-1500 Edicions Alfons el Magnànim, Institució Valenciana dʼEstudis e Investigació, 1995 [1]
  2. Javier Terrado Pablo La lengua de Teruel a fines de la Edat Media. Instituto de Estudios Turolenses, 1991.
  3. Fernando López Rajadel Crónicas de los jueces de Teruel (1176-1532) Instituto de Estudios Turolenses, 1994. p 282
  4. 4,0 4,1 Company, A.; Carbonell Boira, M.J. y Sanchis, F. (1986): La revisió de la frontera valenciano-aragonesa en 1732 (Hipòlit Ravanals). Butlletí de la Societat d'Onomàstica, 24, 603-510. [2]
  5. Francesc Torres Faus Les divisions territorials valencianes a les Observacions de Cavanilles Cuadernos de geografía, ISSN 0210-086X, Nº 62, 1997 p 307 [3]
  6. Comentarios El Capsot, nº 48, chinero-chunio 2009

Bibliografía[editar | editar código]

  • (ca) Enric Guinot: Ela límits del regne, el procés de formació territorial del País Valencià Medieval (1238-1500). Edicions Alfons El Magnànim. 1995.

Vinclos externos[editar | editar código]


Lugars d'o municipio d'Abechuela
Abechuela | Almansa | La Cervera


 
Municipios d'a comarca Gúdar-Chabalambre
Abechuela | Albentosa | Alcalá de la Selva | Arcos de las Salinas | Cabra de Mora | Camarena de la Sierra | Lo Castellar | Formich Susano | Fuents de Rubielos | Gúdar | Linars de Mora | Manzanera | Mora de Rubielos | Mosqueruela | Nogueruelas | Olba | La Puebla de Valverde | Puertomingalbo | Rubiuelos de Mora | Sant Agostín | Sarrión | Torrillas | Valbona | Val de Linars