Chibraltar

Chibraltar
Territorio d'ultramar d'o Reino Unito
Bandera Escudo
Lema: Nulli Expugnabilis Hosti (latín «No conquerible por dengún enemigo»)
Entidat  • Estato	Territorio d'ultramar Reino Unito
Capital	Chibraltar
Idioma oficial  • Luenga propia  • Atros idiomas	Anglés Llanito Castellán
Establimiento d'o Reino Unito	11 d'abril de 1713
Superficie  • Total	6.843 km²
Gubierno  • Chefe d'Estato  • Gubernador  • Primer Menistro	Monarquía Isabel II Edward Davis Fabian Picardo
Población  • Total (2014)  • Densidat	33 140 hab. 4.290 hab/km²
PIB (nominal)  • Total  • PIB per capita	$1066 millons $38,200
Identificadors  • Internet	.gi
Prefixo telefonico	+350
Moneda	Libra chibraltarenya (GIP)
Miembro de: Reino Unito, UE, ONU, OTAN, OCDE, OSCE

Chibraltar (en grafía etimolochica, anglés y castellán Gibraltar, prenunciato /dʒɨˈbrɒltər/ en anglés y /xiβɾalˈtaɾ/ en castellán) ye un territorio d'ultramar perteneixient a lo Reino Unito. Ye situato a lo sud d'a Peninsula Iberica en o Estreito de Chibraltar, a los pietz d'o penyón d'o mesmo nombre.

A suya población ye de 27.967 habitants en 2007, en una superficie de 6,5 km² y una densidat de 4.290 hab/km².

A ciudat ye un centro bancario y toristico, y base de l'Armata Britanica (Royal Navy).

Toponimia

Provién de l'arabe جبل طارق (/Chabal Tarik/) que significa Mont de Tarik, suposato caudiello berber que dentró en a Peninsula Iberica bella cosa enantes que Muza. En o "Liber Regum" en parlan:

A la sazón que regnaua el rei Rodrigo en Espanna uinieron d Affrica el rei Aboali z Abogubra. Et era rei en Marruecos el rei Amiramozlemin, & estonz uino Taric en Espanya & arribo a Gibaltaric.

En o "Libro de las Cheneracions", relacionato con l'anterior plegan a fer servir a ch d'a grafía moderna:

Entonz beno el rey Teric en Espaynna, et aribó a Chibal Taric: por eso ovo nombre Givaltaric, ço es el mont Taric.

Historia

Chibraltar y Ávila (antiga ciudat y tozal en l'actual Ceuta) formaban as ditas Columnas d'Hercules, que os mariners fenicios marcoron con unas columnas d'archent ta indicar a los pueblos mediterranios as mugas d'a zona segura de navegación.

Anglaterra y os Países Baixos, dos grans potencias maritimas, yeran enemigas de l'aspiración de Felipe d'Anchú (más tardi Felipe V d'Espanya) a la cadiera reyal d'Espanya. En chulio de 1702, mientres a Guerra de Succesión Espanyola, plegoron ta Cádiz y desembarcoron en Rota y Puerto de Santa María.

O 4 d'agosto de 1704, una atra esquadra anglesa prenió Chibraltar. Os suyos comandants (Sir George Rooke y o Prencipe Chorche) prenioron o Penyón en nombre de l'Archiduque Carlos d'Austria, pretendient a la cadiera d'Espanya. Entre os expedicionarios, se i trobaba un batallón de catalans, que desembarcoron en l'actual Catalan Bay. Un d'os protagonistas d'istos escaicimientos ye o famoso duque de Marlborough (dito Mambrú por os espanyols). Nueu anyos más tardi, a conquiesta se formalizo por meyo d'o Tractato d'Utrecht (1713), en o que Espanya cedeba a lo Reino Unito o Penyón con a condición d'evitar, u en defecto d'ixo controlar, o contrabando enta Espanya.

Espanya prebó de reconquerir ista ciutat, en 1727, 1779 dica 1782, y no reconoixió a ocupación d'ista zona d'o suyo territorio. En 1783, por o tractato de Versailles, Espanya acceptó a cesión de la sobirania de Chibraltar a lo Reino Unito a cambeo d'a recuperación de Menorca y parti de Florida.

Totz os intentos ta recuperar Chibraltar fracasoron debito a la superioridat anglesa en a mar. O escritor espanyol, naixito de Cádiz, José Cadalso morió en un d'istos intentos. S'establió una muga e un campo melitar en Chibraltar. Os chibraltarenyos de 1704 se'n heban tresladato con a insignia d'o suyo municipio ta San Roque y chunto iste lugar creixió atro dito Los Barrios. Más tardi se repobló tamién Alchezira (albandonata dende 1369).

Mientres a Guerra Civil Espanyola, as tropas britanicas ocuporon l'itsmo, que no heba estato cedito a Anglaterra, a on i construyoron un aeropuerto. D'atra man mientres a Segunda Guerra Mundial, Chibraltar estió a base d'operacions melitars britanicas entre l'Atlantico y a Mediterranio, amás d'estar o solo territorio d'Europa continental que se mantenió libre d'ocupación por as fuerzas de l'Eixe.

Francisco Franco consideraba a ocupación como una afrenta a la dignidat espanyola, y ye por ixo que mirando de forzar una devolución mantenió trancata "la varana" mientres 13 anyos. Quan remató a dictadura se premitió unatra vegata o paso de viachers y mercancías.

En l'actualidat os gubiernos espanyols continan reclamando a sobirania u cosobiranía d'o Penyón, encara que ista reclamación siempre ha estato refusata por o gubierno britanico; os habitants de Chibraltar han esfendito lo suyo dreito d'autodeterminación, garantizato por a Carta d'a ONU en a suya resolución Nº 1514 (XV), y, en referendums convocatos por as autoridatz locals, han refusato albandonar a sobirania britanica.

Demografía

Como ye propio en un puerto mediterranio de gran importancia, l'actual población tien un orichen diverso: principalment britanico y espanyol, con minorías d'orichen italián, portugués, maltés, arabe y chodigo.

Os ciudadanos de Chibraltar son ditos "llanitos", posiblement d'o nombre italián Gianni, de Giovanni (Chuan). A unica luenga oficial ye l'anglés y ye emplegata por o gubierno y as escuelas, pero a mayor parti d'os habitants charran tamién o dialecto andaluz d'o castellán. Amás se charran atras luengas como l'arabe u o maltés y o clamato "llanito" (prenunciato [jɑˈnito] u [ʒɑˈnito]) que tien como base o castellán andaluz con gran influencia de l'anglés y asabelos amprens atras luengas como o chenovés, o italián, o maltés, o portugués y o chodigoespanyol.

As relichions más populars son o catolicismo (76%), o protestantismo (anglicanismo) (6%), o islam (6,9%), o chudaísmo (2,3%) y 7% denguna u bella atra.

Chibraltar ye un d'os territorios más densament poblatos d'o mundo, con alto u baixo 4.290 presonas por km². A requesta d'espacio s'ha solucionato con a ocupación de tierra a lo mar, que actualment representa un tercio d'a superficie total d'a ciudat.

Divisions territorials

Chibraltar ye dividita en siet arias residencials, que apareixen en a siguient tabla. As cifras de población s'han preso d'o censo de 2001:

		Aria residencial	Población	% de total
	1.	East Side	429	1.54%
	2.	North District	4,116	14.97%
	3.	Reclamation Areas	9,599	34.91%
	4.	Sandpits Area	2,207	8.03%
	5.	South District	4,257	15.48%
	6.	Town Area	3,588	13.05%
	7.	Upper Town	2,805	10.20%
		Resta	494	1.82%
		Chibraltar	27,495	100%