Oryctolagus cuniculus

Oryctolagus cuniculus
Oryctolagus cuniculus
Denominacions populars
Conello, conillo, coniello, conil
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Clase:	Mammalia
Orden:	Lagomorpha
Familia:	Leporidae
Chenero:	Oryctolagus
Especie:	O. cuniculus
Descripción
Oryctolagus cuniculus Linnaeus, 1758
Distribución cheografica
{{{leyenda_mapa}}}

O conello, conillo u coniello (Oryctolagus cuniculus (Linnaeus, 1758)) ye un mamifero lagomorfo natural de a Europa mediterrania y occidental y de o norte d'o Magreb, que s'ha introduciu en diferents puestos d'o mundo y que se cría en cautividat con diversos propositos.

Descripción

O conello ye un mamifero chicot de a orden d'os Lagomorpha y d'a familia d'os leporidos, que comparte con as suyas parients as liebres.

Os conillos son herbivoros, y tienen o cuerpo cubierto d'un pelache preto y lanudo, cabeza ovalada, uellos grans, y a color d'entre parda y grisa (anque en as variedatz domesticas a diversidat de colors ye muito mas ampla). Tienen as orellas largas (dica 7 cm), anque más curtas que as d'as liebres, y una coda chiquinina. As suyas patas debanteras son más curtas que no as zagueras, por o que quan se desplazan o fan brincando. Mesura de 33 a 40 cm de lonchitut.

Como as suyas parients as liebres, os conellos son fundamentalment animals diurnos, anque en libertat concentran a suya actividat en as primeras horas de maitins y as zagueras de tardes. A diferencia de como fan as liebres, os conillos habitan en cados, que en aragonés reciben o nombre especifico de lorigueras, a on que libran y guardan a os cachapos, que naixen ciegos y sin pelo, dica que pueden andar.

O conello domestico (O. cuniculus domesticus), se cria por o pellizo y por a carne, y a vegadas, puede servir d'animal de companyía. Tamién puet estar criau como animal de laboratorio. Existe una raza de conello domestico propia d'a Val de Chistau en periglo de desapareixer.

Zoonimia

Os nombres patrimonials de l'Oryctolagus cuniculus s'han perdiu en buena cosa de l'Alto Aragón, a on que os ha suplantau o castellanismo lexico «conejo».

As diferents formas como se diz a iste leporido en os idiomas ibero-romances derivan d'un parola propia de bell pueblo prerromán d'Hispania que os griegos transcribioron como kýniklos y os romans amproron como CUNICŬLUS en uns tiempos que esta especie yera restrinchita a la Peninsula Iberica y no la heban introdueita encara en os países d'a Mediterrania Oriental. Si a evolución d'o diminutivo -ICULU ya presenta diverchencias derivatas de si a vocal I ye una Ĭ breu u una Ī larga, en o latín vulgar hispanico ista parola d'orichen no latín presentaba a forma con -ĬCULU en l'ueste y centro d'Hispania, que esdevinió coelho en portugués y conejo en castellán, y a forma -ĪCULU en l'este d'Hispania, que esdevinió conill en catalán (y en occitán), tot quedando o dominio d'o navarro-aragonés entre meyo d'as dos zonas. Dende o punto d'envista teorico, a evolución de SPICULU con a parella espejo en castellán y espill en catalán presentan una distribución pareixida. En vistas d'o contexto cabe esperar que, teoricament, en aragonés a forma conello se trobe més a sobén en aragonés occidental, y as formas conillo/conil en aragonés oriental y centro-oriental.

En o dominio lingüistico de l'aragonés, l'animal recibe diversas formas variants de o mesmo nombre. Actualment a mas freqüent ye o castellanismo «conejo», que ha gosau desplazar as parolas patrimonials aragonesas en buena cosa de l'aria aragonesofona, y que fa que se tracte d'un de os animals domesticos en os que o nombre vernaclo s'emplega menos.

D'entre as formas patrimonials aragonesas, «conello» se documenta en Rodellar, en o extrimo noroccidental de o Semontano de Balbastro, y en Agüero en a Plana de Uesca, quasi en a muga con as Cinco Villas. A forma conello ye muito freqüent en a scripta meyeval y, con unatra ortografía, s'escribiba coneyllo en romanz navarro.

A forma «conillo» s'ha documentau en Chistén, en a val de Chistau (Sobrarbe), y en o Viello Sobrarbe en sud de a mesma comarca, pero i ha alcordanza que s'hese emplegau, d'antigos, tamién en bellas localidatz de a val d'a Cinca, como a Buerda, y en o Toledo d'a Nata. En Torrociella d'Alcanyiz a planta Silene inflata recibe o nombre de cunillos

Existe una tercera forma, «coniello», con diftongo interno. Ista forma s'ha documentau en Chistén en a val de Chistau, en Vio en a val de Vio, y en Broto en a val de Broto; todas tres localidatz en a comarca de Sobrarbe, como en o caso anterior. Istas formas s'han feito a partir de conillo y son resultato d'hipercorreccions recients contra las formas castellanas con diminutivo en -illo, que se siente como o equivalent castellán d'o diminutivo aragonés -iello.

Formas mas minoritarias, que podrían estar localismos u mesmo catalanismos lexicos (pus nomas se troban en a metat oriental de l'Alto Aragón), son «conil», documentada en o Viello Sobrarbe por Chabier Tomás, y «cunil», que se diz en Fonz. As formas «conill» y «cunill», propias de a luenga catalana, trascienden en o dominio lingüistico de l'aragonés (como pasa a sobén) exclusivament en zonas en as que a pronunciación d'una -LL en posición de final no son atipicas, en lugars como Beri y Benás, en a val de Benás.

Se veiga tamién

• Cunicultura
• Liebre

Vinclos externos

• Se veigan as imáchens de Commons sobre Oryctolagus cuniculus.