Lacuna
De Biquipedia
Una Lacuna u Laguna ye cualsiquier estensión natural d'augua dulze u salata. A denominazión laco/lago tamién ye aplicable en aragonés e se puet fer serbir pa denominar estensions macrocheograficas d'augua que no bi ha en Aragón seguindo a tradizión meyebal (Lago Tiberiades), ya que s'ha desbenito que a mayor parte d'as estensions d'augua en arias aragonesoparlants han rezibito a denominazión de "lacunas", "lagunas", "estaños", "basas", "ibons", "saladas", etc...belunas restrinchitas a tipos espezials de lacunas. O termin "laco" ha fosilizato en muitos puestos como un tecnizismo binatero.
En os Perineus en a toponimia bi ha muitos casos de "lacunas" u "lagunas" seguntes a zona, (y menos a sobent "laco" como en Rodellar), y a begatas permanexe o toponimo dimpués d'aber desaparexito por colmatazión natural, como s'ha desbenito en "Lacuniacha", l'autual parque faunistico.
En a Bal de l'Ebro destacan as lacunas con augua salata que se dizen "Saladas" e se distribuyen en bels coros: Saladas d'Alcañiz, sector de Burcharaloz, etz...
En o Sistema Iberico se diziban u se dizen "lagunas", no i abendo conoxenzia d'a forma con xorda conserbata "lacuna". Destaca a presenzia d'a Laguna de Gallocanta, que ye d'augua salata e d'orichen tectonico. A man d'a laguna de Gallocanta bi ha atras lagunas ditas Laguna de Guialguerrero (a man d'o despoblato meyebal de Billar Guerrero), a Laguna de la Zaida e a Lagunica. Bi habió atras zonas umidas calificatas de laguna como a Laguna de Vivallo en l'aria de Castellot. Bellas zonas umidas definitas güei como lagunas en castellán se diziban balsas u balsiellas en l'aragonés meyebal local, como s'ha desbenito en Bezas.
En a costa lebantina bellas lacunas litorals se dizen "Albuferas", de l'arabe, con o sennificato de mar chicota.
