Rambla

De Biquipedia

Rambla de La Colaita procedent d'a Sierra del Caballón en o termin monezipal de Catadau, (Balenzia).

Una rambla ye una clase de torrent propia d'as zonas mediterranias d'a parte oriental d'a Peninsula Iberica.

O suyo cabal ye temporal u ocasional, podendo lebar muita augua en as semanas de gota frida. Tienen una fuerte pendient e poca largaria, ya que en uns casos ye á man d'a mar u un río prenzipal on desembocan. Á begatas o curso alto de bels ríos d'a zona mediterrania bi ha bellas ramblas que forman o río propiament dito en a zona on s'achuntan.

[editar] Etimolochía e Toponimia

Bien d'o arabe ramla que sennifica "arenal". En Azagra, Fustiñana, Buñuel, Lodosa e San Adrián se fa serbir con o sennificato de cuesta u montón de tierra e piedras arrastratas por as auguas, e parix que bi ha cruze fonetico e semantico con rampa. En documentos meyebals que probienen de l'Almunia, Zaragoza e Balbastro, se documenta a parabra rambla con un sennificato parexito a lo que tién en o catalán d'o Matarraña (matarrañés), que ye considerato una bariant d'o tortosín.

En catalán rambla se considera una parabra propia d'o balenzián e tortosín d'o Matarraña e cheosinonimo de riera. En concreto en Mequinenza e atras parlas d'o Matarraña o sennificato documentato ye de "terreno á man d'o río" (lo que dizen la rambla del riu) u tamién arenal. Encara que en Barzelona i aigan carreras prenzipals con un noma basato en a parabra rambla.

A parabra rambla s'emplegaba en aragonés d'o Sistema Iberico (y encara en castellán d'Aragón) e ha dato orichen e berbos como arramblar u arramplar e parabras como arramblaje.

A begatas bels cursos d'augua se claman ramblas encara que sigan ríos, como ye o caso d'o río Magro u Rambla d'Algemesí, en a probinzia de Balenzia.

[editar] Bibliografía consultata

• Juan A. Frago Gracia. TOPONIMIA NAVARROARAGONESA DEL EBRO (V) YERMOS Y PASTIZALES. Archivo de filología aragonesa XXXVIII. 1986.