Calabacín

De Biquipedia
(Reendrezau dende Crabacín)
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Un calabacín.

O calabacín[1] u carabacín[1] ye una hortaliza de regano que ye o fuito d'a calabacera Cucurbita pepo, bien emparentada con Cucurbita maxima que fa las calabazas regulars y as de rabiquet. Como atras cucurbitacias, o calabacín se guarda muito tiempo y tarda a-saber-lo a putrir-se, por lo que ye una verdura bien estimada y no ye rara de trobar en os mercaus cuasi tot l'anyo.

Dende o punto d'envista botanico, o calabacín ye una baya de tipo peponide. Se culle de veranos y dica primers d'agüerro.

Variedat de nombres[editar | modificar o codigo]

En Ribagorza, o carabacín recibe nombres diferents seguntes o puesto. En aragonés baixorribagorzano, arredol de Graus, Fonz, Estada y Estadilla, se le diz carabazón[2][3] y tamién se conoixe a forma carabaceta.[3] En cambio, en o norte d'a comarca, en patués, le i dicen carbazón, que se pronuncia "carbasón"[2] ya que o seseyo ye una d'as caracteristicas d'aquel dialecto. As dos formas fan acordar-se d'o catalán, que tiene buena cosa d'influencia en a redolada por estar vecino y en o cual se dice «carbassó». Por contra, en Campo recibe o nombre de carbacín[4] que ye cuasi o mesmo o nombre que se le da en chistabín[5] y en o norte d'A Fueva y Baixo Penyas[6] en Sobrarbe, an ye crabacín,[6] presentando una metatesi con respecto a l'anterior que cal que sí, l'habría puesto causar a influencia d'a palabra «craba», igual como crapacín predomina en os puestos an que l'animal se dice «crapa».[1]

Que te trenco'l crapacín![7] (aragonés belsetán)

Cosa significativa ye lo que pasa entre Sobrarbe y Sarrablo an que la palabra crabacín/crapacín pasa a tomar tamién o significau de «toza», «tozuelo» u tamién de «cranio» u «calavera».[5] W. D. Elcock deciba que ixo yera mediau una vez mas por a craba/crapa, animal muit guito conoixiu por tociar de momento y, por tanto, por fer servir a capeza pa atros menisters que as personas. A idea de que a capeza cualque persona (igual que os animals) l'habría d'emplegar pa trucar u tociar con ella, y no pas pa pensar, ye bien enradigada en a cultura y mas que mas en l'humor popular altoaragonés, talmente mas que en atros puestos.

Emplegada asinas trobamos a forma crapacín en Bielsa, en Sercué, en Fanlo, en Yeba y en Cámbol.[1] En Chesera y en Chillué (Sarrablo) Elcock documentó a variant crapacino.[1] En a valle de Broto nos trobamos con as formas carapacín en Buesa y calapacín en Torla.[1] En Bielsa, A. Badia documentó que tamién le deciban calabazón.[7]

Entre as comarcas d'Alto Galligo y Chacetania as formas ya se tornan sonorizaderas, como crabacín, carabacín, calabacín y calabacino.[1] En Fuencalderas (Cinco Villas) se documenta calabazón.[8]

D'alcuerdo con Elcock, a forma que coincide con a castellana estaría pues a mas comun, afuera d'una zona concreta en o Pirineu central aragonés, an que lo parellano fonetico con «capeza» y con «crapa» habría feito mas fácil a conservación d'as formas aragonesas diferenciables.[1]

Se veiga tamién[editar | modificar o codigo]

Referencias[editar | modificar o codigo]

  1. 1,0 1,1 1,2 1,3 1,4 1,5 1,6 1,7 ELCOCK, William Dennis, Algunas afinidades fonéticas entre el aragonés y el bearnés; Prensas Universitarias de Zaragoza + Xordica Editorial. Zaragoza, 2005. ISBN 978-84-96457-09-5
  2. 2,0 2,1 VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza, 2004. ISBN 978-84-8986-235-7
  3. 3,0 3,1 ARNAL PURROY, Mª Luisa. El habla de la Baja Ribagorza occidental. Institución «Fernando el Católico», 1998. ISBN 84-7820-402-4
  4. MASCARAY SIN, Bienvenido, Vocabulario del habla de Campo (Ribagorza, Huesca); Prensas Universitarias de Zaragoza + Xordica Editorial. Zaragoza, 2013. ISBN 978-84-96457-87-4
  5. 5,0 5,1 BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Institución «Fernando el Católico» + Gara d'Edizions. Zaragoza, 2008. ISBN 978-84-8094-061-0
  6. 6,0 6,1 BLAS GABARDA, Fernando y ROMANOS HERNANDO, Fernando, El Aragonés de Baixo Peñas; Institución «Fernando el Católico» + Gara d'Edizions. Zaragoza, 2005. ISBN 84-8094-054-9
  7. 7,0 7,1 BADIA i MARGARIT, Antoni Maria, El habla del Valle de Bielsa (Pirineo aragonés). Edición d'Artur Quintana. Aladrada ediciones. Zaragoza, 2015. ISBN 978-84-944335-5-9
  8. ARBUÉS POSSAT, José. Tradiciones, costumbres y lengua en Fuencalderas (Cinco Villas, Zaragoza). Xordica Editorial. Zaragoza, 2012. ISBN 978-84-96457-79-9.